Minerva Teichert (1888–1976), Panaglibas ni Ari Limhi ken dagiti Taona, 1949–1951, lana iti masonite, 35 7/8 x 48 a pulgada. Brigham Young University Museum of Art, 1969.

Mayo 20–26: We Have Entered into a Covenant with Him

Mosiah 18–24

Ti pakaammuan ni Alma ken dagiti taona iti Mosiah 18; 23–24 ket mangipakita no ania ti kayat a sawen ti “umay iti salinong ti Dios” (Mosiah 18:8). Idi nabuniagan dagiti tao ni Alma, nakitulagda iti Dios nga “agpaay kenkuana ken agtungpal kadagiti bilinna” (Mosiah 18:10). Idinto a maysa a bukod a panagkumit daytoy iti Dios, kasta met nga adda pakainaiganna iti no kasano a trinatoda ti tunggal maysa. Wen, ti panagdaliasat nga agsubli iti Nailangitan nga Ama ket kabukbukodan, ket awan ti maysa a makapagtungpal kadagiti katulagantayo para kadatayo, ngem saan a kayat a sawen dayta nga agmaymaysatayo. Kasapulantayo ti tunggal maysa. Kas miembro ti Simbaan ni Cristo, makitulagtayo nga agserbi iti Dios babaen ti panangtulong ken panagserbi iti maysa ken maysa iti panagdaliasattayo iti dalan, “pannakipagbaklay iti imet ti tunggal maysa” (Mosiah 18:8–10). Pudno nga adda dagiti imet a binaklay dagiti tao ni Alma, kas met laeng iti ar-aramidentayo amin. Ket maysa a wagas a pangtulongan ti Apo kadatayo a “lumag-an dagiti dagensen a naipabaklay [kadatayo]” (Mosiah 24:15) ket babaen ti panangtedna kadatayo iti maysa a komunidad dagiti Santo a nagkari a makipagladingit kadatayo ken mangliwliwa kadatayo, kas met laeng iti inkaritayon nga aramiden para kadakuada.

Kitaen met iti “The Lord Delivers the Covenant Peoples of Alma and Limhi” (video), Gospel Library.

Dagiti Kapanunotan para iti Panagsursuro iti Pagtaengan ken iti Simbaan

Mosiah 18:1–17

No mabuniaganak, agaramidak iti katulagan iti Dios.

Panunotenyo no kasano ti kauneg ti rikna dagiti namati a nailadawan iti Mosiah 18 maipapan ken ni Jesucristo. Masapul nga agkikitada a sililimed, iti dakkel a peggad, tapno maammuanda ti maipapan Kenkuana (kitaen iti bersikulo 3). Ket idi naikkan iti gundaway a mangipakita iti panagkumitda babaen ti katulagan ti panagbuniag, “nagsisipatda gapu iti rag-o, ket impukkawda: Daytoy ti tarigagay ti puspusomi” (Mosiah 18:11).

Ti panagbasa kadagitoy a bersikulo ket mabalin a nasayaat a gundaway a mangutob no kasano ti kinapateg kadakayo dagiti katulaganyo. Bayat ti panagadalyo iti Mosiah 18:8–14 a naipangruna, ibilangyo dagiti saludsod kas kadagitoy:

• Ania ti masursuroyo manipud kadagitoy a bersikulo maipapan kadagiti kari nga inaramidyo iti panagbuniag? Ania ti ikari ti Dios kadakayo? (kitaen dagiti bersikulo 10, 13).

• Kasano a mainaig ti katulagan nga agserbi iti Dios kadagiti panagkagumaantayo nga agminister iti tunggal maysa? (kitaen dagiti bersikulo 8–9).

• Ania ti kayat a sawen kadakayo ti “agtakder a kas [maysa a saksi] ti Dios”? (bersikulo 9).

• Kasano a ti matulongannakayo ti panagtungpal iti katulaganyo iti panagbuniag a “mapno iti Espiritu”? (Mosiah 18:14). Kasano a matulongannakayo ti Espiritu nga agtungpal iti katulaganyo?

Ti panangsungbat kadagitoy a saludsod ket mabalin a mangiturong kadakayo a mangutob no apay a napateg dagiti katulagan ken ordinansa iti Dios. Mabalin a makasarakkayo kadagiti nauneg a pannakaammo ken pannakaawat iti mensahe ni Elder Gerrit W. Gong a “Covenant Belonging” (Liahona, Nov. 2019, 80–83) wenno ti mensahe ni Presidente Jean B. Bingham “Covenants with God Strengthen, Protect, and Prepare Us for Eternal Glory” (Liahona, Mayo 2022, 66–69). Apay a pagyamyamananyo dagiti katulaganyo? Ania ti ar-aramidenyo a mangtungpal kadagiti kariyo?

Kitaen met iti Gospel Topics, “Baptism,” Gospel Library; “Alma the Elder Teaches and Baptizes at the Waters of Mormon” (video), Gospel Library.

Isuroyo ti kinapudno manipud kadagiti nasantuan a kasuratan ken balikas dagiti propeta iti ud-udina nga aldaw. Bayat ti panangisuroyo—ken panagsursuro—laglagipenyo a ti maysa kadagiti kasayaatan a wagas tapno mapapigsa ti pammati ken ni Cristo ket ti panangipamaysa kadagiti nasantuan a kasuratan ken balikas dagiti propeta iti ud-udina nga aldaw (kitaen iti Mosiah 18:19).

Mosiah 18:17–30

Bilinen ti Dios dagiti taona nga aguummong, agbukel, ken agkaykaysa.

Adda dagiti tao a masdaaw, apay a kasapulantayo ti simbaan? Sukisokenyo ti Mosiah 18:17–31, nga agsapsapul iti pateg dagiti tao ni Alma a masarakan iti panaguummong iti “simbaan ni Cristo” (Mosiah 18:17). Ania dagiti pagpapadaan a makitayo iti simbaan ni Jesucristo iti aldaw ni Alma ken aldawtayo?

Kasano ti sungbatyo iti maysa a gayyem wenno miembro ti pamilia a saan a mamati a kasapulan ti maysa a nabukel a simbaan? Apay nga agyamantayo nga agkameng iti Simbaan ni Jesucristo?

Panunotenyo maipapan iti no ania ti maaramidanyo a mangtulong kadagiti miembro ti ward wenno branchyo tapno “agrereppeng ti puspusoda iti panagkaykaysa ken ayat” (Mosiah 18:21).

Kitaen met iti Dallin H. Oaks, “The Need for a Church,” Liahona, Nob. 2021, 24–26; “Love One Another,” Hymns, no. 308.

Mosiah 21–24

Tulongannak ti Dios a mangibaklay kadagiti dagensenko.

Agpadpada a natnag iti pannakaadipen dagiti tao ni Limhi ken dagiti tao ni Alma, nupay iti agduduma a kasasaad. Ania ti masursuroyo babaen iti panangyarig kadagiti pakaammuan dagiti tao ni Limhi iti Mosiah 19–22 ken dagiti tao ni Alma iti Mosiah 18; 23–24? Bayat ti panangaramidyo, sapulenyo dagiti mensahe a mayaplikar iti biagyo. Kas pagarigan, ania ti kayat a sawen ti “rumang-ay iti tunggal tukad”? (Mosiah 21:16). Kasano a mayaplikaryo daytoy a pagbatayan?

Mosiah 23:21–24; 24:8–17

Makapagtalekak iti Apo.

Nupay nagbabawidan kadagiti basolda, nakita latta ni Alma ken dagiti taona ti bagbagida iti pannakaadipen. Ipakita ti padasda a ti panagtalek iti Apo ken panagbiag kadagiti katulagantayo ket saan a kanayon a mangikkat kadagiti karittayo, ngem daytoy ti mangtulong kadatayo a mangparmek kadagitoy. Bayat ti panangbasayo iti Mosiah 23:21–24 ken 24:8–17, kitaenyo dagiti balikas ken ragup ti balikas a makatulong kadakayo a makasursuro nga agtalek iti Apo, iti baet dagiti kasasaadyo.

Kitaen met iti David A. Bednar, “Bear Up Their Burdens with Ease,” Liahona, Mayo 2014, 87–90.

Dagiti Kapanunotan para iti Panangisuro kadagiti Ubbing

Mosiah 18:7–17

No mabuniaganak, agaramidak iti katulagan iti Dios.

• Maysa a napateg a wagas tapno matulongan dagiti annakyo nga agsagana para iti panagbuniag ket ti panangisuro kadakuada maipanggep iti katulagan nga aramidendanto no mabuniaganda. Mabalin a kasla simple daytoy a kas iti panangipakita iti ladawan iti udi ti balabala iti daytoy a lawas ken panangbasa maipapan iti katulagan a kadua ida iti Mosiah 18:9–10. Ibilangyo ti panangawis iti maysa nga ubing a nabuniaganen tapno mangisuro iti daytoy kadagiti ina-inaudi nga ubbing. Mabalin a maragsakan dagiti annakyo a makadamag maipapan iti panagbuniagyo. Kasano a binendisionan ti Dios ti biagyo gapu iti panagtungpalyo kadagiti katulaganyo?

• Mabalin nga usaren dagiti ubbing a nabuniaganen ti masansan a palagip maipapan kadagiti katulagan nga inaramidda ken pabaruenda iti kada lawas babaen ti sakramento. Tulonganyo dagiti annakyo a mangidilig iti katulagan iti panagbuniag a nailadawan iti Mosiah 18:8–10 kadagiti kararag iti sakramento (kitaen iti Doktrina ken Katulagan 20:77, 79). Kasano a mapagbalintayo ti sakramento a maysa a naisangsangayan, naraem a kanito, kas met laeng idi panawen ti panagbuniagtayo?

Agaramidtayo iti katulagan iti Dios no mabuniagantayo.

Mosiah 18:17–28

No mabuniaganak, agbalinak a maysa a miembro ti Ti Simbaan ni Jesucristo.

• Ammo kadi dagiti annakyo no ania ti kayatna a sawen ti agbalin a maysa a miembro ti Ti Simbaan ni Jesucristo dagiti Santo iti Ud-udina nga Aldaw? Ibilang ti panangtulongyo kadakuada a mangsapul kadagiti ladawan a mangibagi kadagiti banag nga inaramid dagiti miembro ti Simbaan iti Mosiah 18:17–28. Kas pagarigan, dagiti ladawan a Pannakaorden iti Priesthood ken Panagbayad iti Apagkapullo (Libro ti Arte iti Ebanghelio, dagiti num. 106, 113) mabalin a mangibagi kadagiti bersikulo 18 ken 27–28. Ibagayo kadakuada no apay nga agyamankayo nga agbalin a miembro iti Simbaan ni Jesucristo.

• Ti panangtulong kadagiti ubbing nga “agrereppeng iti panagkaykaysa ken ayat” (Mosiah 18:21) ket mangtulong kadakuada nga agtalinaed a konektado iti Simbaan iti unos ti panagbiagda. Ibilang ti panangawis kadagiti annakyo a mangbasa iti Mosiah 18:17–28. Ania ti inaramid dagiti miembro ti Simbaan ni Cristo idi aldaw ni Alma tapno agayat ken agserbi iti maysa ken maysa? Kasano a maaramidtayo daytoy iti ward, branch, wenno komunidadtayo? Maysa a kanta maipapan iti ayat, kas iti “I’ll Walk with You” (Children’s Songbook, 140), ti makapabileg iti daytoy a mensahe.

Mosiah 24:8–17

Mapalag-an ti Dios dagiti dagensenko.

• Ti simple nga adalen a banag ti mamagbalin iti panagsursuro nga ad-adda a nakallalagip. Ibilang ti panangpunno iti maysa a bag kadagiti nadadagsen a banag (a mangibagi kadagiti dagensen), ken panangawis iti maysa nga ubing a mangiggem iti bag. Bayat ti panangbasayo iti Mosiah 24:8–17 kadagiti annakyo, kiddawenyo kadakuada nga ikkatenda ti maysa a banag manipud iti bag tunggal mangngeganda ti maipapan iti maysa a banag nga inaramid ni Alma ken dagiti taona nga agpatulong iti Dios kadagiti dagensenda. Kalpasanna, mabalinyo a kasarita ida maipapan iti no kasano nga ad-adda a mapalag-an ti Nailangitan nga Ama dagiti dagensentayo no agpatulongtayo Kenkuana.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Dandanum ti Mormon, ni Jorge Cocco