Ni Ari Benjamin a mangisursuro kadagiti taona

Iti Panagserbi ti Diosyo, ni Walter Rane

Abril 29–Mayo 5: “Naindaklan a Panagbalbaliw”

Mosiah 4–6

Nanggeganyo kadin ti maysa a tao a nagsao ken nariknayo a naparegtakayo a mangbalbaliw iti biagyo? Nalabit nga inkeddengyo, gapu iti nangngeganyo, ti agbiag a naidumduma bassit—wenno naidumduma unay. Kasta ti kita ti mensahe nga inted ni Ari Benjamin, ken addaan dagiti kinapudno nga insurona iti kasta a kita ti epekto kadagiti tao a nakangngeg kadagitoy. Imbinglay ni Ari Benjamin kadagiti taona no ania ti insuro dagiti anghel kenkuana—a mapasamak dagiti nakaskasdaaw a bendision babaen ti “panangsubbot a dara ni Cristo” (Mosiah 4:2). Gapu iti mensahena, binalbaliwanda ti panagkitada iti bagbagida (kitaen itiMosiah 4:2), binalbaliwan ti Espiritu dagiti tarigagayda (kitaen itiMosiah 5:2), ket nakitulagda iti Dios a kanayon nga aramidenda ti pagayatanna (kitaen itiMosiah 5:5). Daytoy ti no kasano nga inapektuan ti balikas ni Ari Benjamin dagiti taona. Kasano nga apektuannakayto daytoy?

Dagiti Kapanunotan para iti Panagsursuro iti Pagtaengan ken iti Simbaan

Mosiah 4

Babaen ken ni Jesucristo, maawat ken mapagtalinaedko ti pannakapakawan dagiti basolko.

No dadduma, uray no nariknayon a napakawanen dagiti basolyo, mabalin a marigatankayo a mangpatalinaed iti dayta a rikna ken agtalinaed iti dana ti kinalinteg. Insuro ni Ari Benjamin kadagiti taona no kasano nga agpada nga awaten ken pagtalinaeden ti pannakapakawan dagiti basol. Bayat ti panangadalyo iti kapitulo 4 ti Mosiah, ibilangyo a saludsoden dagitoy:

Dagiti bersikulo 1–8.Ania dagiti kasasaad a panangipaay ti Dios iti pannakapakawan dagiti basolyo? Ania ti masursuroyo maipapan Kenkuana kadagitoy a bersikulo a mangparegta nga agbabawi? Kasano a maipakitayo a pudno a nagbabawikayon?

Dagiti bersikulo 11–16.Segun kadagitoy a bersikulo, ania ti mapasamak iti biagtayo no aramidentayo dagiti banag a nailadawan iti bersikulo 11? Napadasanyo kadin, wenno ti maysa nga ay-ayatenyo dagitoy a panagbalbaliw? Kasano a maipada dagitoy a panagbalbaliw kadagiti panagbalbaliw a nailadawan iti Mosiah 3:19.

Dagiti bersikulo 16–30.Kasano a ti panangibinglay iti adda kadakayo kadagiti dadduma ket mangtulong kadakayo a mangpatalinaed iti pannakapakawan dagiti basolyo? Kasano a mayaplikaryo ti bersikulo 27 kadagiti panagkagumaanyo nga agbalin a kas ken ni Cristo?

Ania ti kaipapanan ti makilimlimostayo amin? Segun kadagitoy a bersikulo, kasano ti nasken a panangtratotayo iti amin nga annak ti Dios? (kitaen iti Mosiah 4:26). Asino ti agkasapulan iti tulongyo?

Kitaen met iti Becky Craven, “Keep the Change,” Liahona, Nob. 2020, 58–60.

icon iti seminary

Mosiah 4:5–10

Mamati ken agtalekak iti Dios.

Ti awis ni Ari Benjamin a mamati ken agtalek iti Dios ket napateg ita a kas idi nagkauna a panawen. Bayat ti panangbasayo iti Mosiah 4:5–10, sapulenyo dagiti kinapudno maipapan iti Dios a mangted kadakayo iti gapu iti panagtalek Kenkuana Kitaen dagiti awis nga ited ni Ari Benjamin iti bersikulo 10. Apay a ti panagtalek iti Dios ket mangaramid a nalaklaka nga aramiden ti no ania ti yawis ni Ari Benjamin?

Ibilangyo ti panangsukisok iti sumagmamano kadagitoy a mainayon a nasantuan a kasuratan a mangilista kadagiti kababalin ti Dios: Jeremias 32:17; 1 Juan 4:8; 2 Nephi 9:17; Alma 32:22; Mormon 9:9; Ether 3:12; Doktrina ken Katulagan 19:1–3; 88:41 (kitaen met iti video “Christlike Attributes,” Gospel Library). Mabalinyo nga usaren ti listaanyo a mangpanunot iti nadumaduma a wagas a mangileppas iti maysa a binatog a kas iti daytoy: “Gapu ta ammok a ti Dios , makapagtalekak Kenkuana a .”

Dumakkel ti panagtalektayo iti Dios bayat ti kaadda dagiti padastayo Kenkuana. Iti Mosiah 4:1–3, ania ti nakatulong kadagiti tao ni Ari Benjamin “a mangubog iti kinasayaat ti Dios”? (bersikulo 6). Panunotenyo maipapan kadagiti padasyo a kaduayo ti Dios. Ania ti insuro kadakayo dagitoy a padas maipapan Kenkuana? Ania dagiti addang nga ar-aramidenyo (wenno mabalinyo nga aramiden) tapno mapauneg ti pammatiyo wenno panagtalekyo iti Dios?

Kitaen met iti Jeffrey R. Holland, “The Grandeur of God,” Liahona, Nob. 2003, 70–73; Gospel Topics “God the Father,” Gospel Library; “I Know My Father Lives,” Hymns, no. 302.

Panangibinglay kadagiti sagrado a padas. Sumagmamano a padas ti sagrado wenno personal unay nga ibinglay. No aw-awisen dagiti dadduma a mangibinglay kadagiti padas, diyo piliten ida a mangibinglay no saanda a kayat.

Mosiah 4:29–30

Nasken nga annadantayo dagiti pampanunot, balikas, ken aramidtayo.

Saan a mangted ti Dios kadatayo iti listaan ti tunggal posible a basol. Segun iti Mosiah 4:29–30, ania ketdi ti aramidenna? Utobenyo no kasano nga apektuan dagiti pampanunot, balikas, ken aramidyo ti bagiyo ken dagiti dadduma. Kasano nga apektuanda ti relasionyo iti Dios? Kasano a “mabantayanyo [ti bagiyo]”?

Mosiah 5:1–5

Ti Espiritu ti Apo ti makaigapu iti naindaklan a panagbalbaliw iti pusok.

Gagangay nga isao dagiti tao ti, “Diak makapagbalbaliw. Daytan ti ugalik.” Iti kasupadina, ipakita kadatayo ti padas dagiti tao ni Ari Benjamin no kasano a sipupudno a mapagbalbaliw ti Espiritu ti Apo ti puspusotayo. Bayat ti panangbasayo iti Mosiah 5:1–5, panunoten maipapan no kasano a ti “naindaklan a panagbalbaliw” nga agturong iti pudno a kumbersion ket napasamaken—wenno mabalin a mapasamak—iti biagyo. Panunotenyo dagiti di madmadlaw, in-inut a panagbalbaliw kasta met dagiti “naindaklan” a padas. Kasano a matulongannakayo dagitoy a padas no maipasangokayo iti sulisog?

Kitaen met iti Ezequiel 36:26–27; Alma 5:14; “A Change of Heart,” “The People of King Benjamin Make a Covenant” (videos), Gospel Library.

Ni Cristo a mangag-agas iti masakit a babai

Dagiti Mangag-agas nga Ima, ni Adam Abram

Mosiah 5:5–15

Awatek iti bagik ti nagan ni Cristo no agaramidak kadagiti katulagan Kenkuana.

Ania ti masursuroyo manipud iti Mosiah 5:7–9 maipapan iti no ania ti kaipapanan ti awatenyo iti bagiyo ti nagan ni Cristo? Ania ti isuro dagiti kararag ti sakramento (kitaen itiMoroni 4–5) maipapan iti daytoy? Kasano a maipakitayo nga “agkamengkayo” iti Mangisalakan?

Kitaen met iti D. Todd Christofferson, “Why the Covenant Path,” Liahona, Mayo 2021, 116–19.

Dagiti Kapanunotan para iti Panangisuro kadagiti Ubbing

Mosiah 4:1–3, 10

Mangyeg iti rag-o ti panagbabawi.

• Tapno maisuro ti maipapan iti rag-o ti panagbabawi, nalabit a mabalinyo a papigketan wenno parugitan kadagiti annakyo dagiti imada ket kitaenyo no kasano ti riknada kalpasan ti panagbuggoda. Kalpasanna mabalinyo nga idilig dayta iti wagas ti panagrikna dagiti tao iti Mosiah 4:1–3 sakbay ken kalpasan a napakawan dagiti basolda. Ibinglayyo ti pammaneknekyo maipapan iti Mangisalakan ken panagbabawi.

• Ammo kadi dagiti annakyo no kasano ti agbabawi a naan-anay ken sipupudno? Tulongan ida a mangsapul iti inaramid dagiti tao ni Ari Benjamin iti Mosiah 4:1–3, 10. Mabalinda pay nga irebyu ti “Agbabawi, Panagbabawi” iti Pangiwanwan iti Nasantuan a Kasuratan. Kasano nga inaramid ni Jesucristo a posible ti panagbabawi?

Mosiah 4:12–26

Paregtaennak ti ebanghelio ni Jesucristo a mangtrato iti dadduma iti ayat ken kinaasi.

• Ti panagserbi iti dadduma ket mangted kadatayo iti nasayaat a rikna. Nalabit a mabalin nga agsarita dagiti annakyo maipapan iti maysa a panawen idi nagayat ken nagserbida iti maysa a tao ken no kasano ti riknada iti dayta a padas. Ania dagiti sumagmamano a rason a mabalin a saan a kayat dagiti tao ti agserbi kadagiti dadduma? Ania koma ti ibagada iti maysa a tao a mangawis kadakuada a tumulong kadagiti tao nga agkasapulan? Sapulen dagiti kapanunotan iti Mosiah 4:16–26.

• Insuro ni Ari Benjamin a no umasidegtayo ken ni Cristo ken umawattayo ti pannakapakawan dagiti basoltayo, “mapno[tayo] iti ayat ti Dios” (Mosiah 4:12). Daytoy ti mangiturong kadatayo nga agbalin a naayat ken naasi kadagiti dadduma. Mabalinyo ken dagiti annakyo ti agsukisok iti Mosiah 4:13–16, 26 (wenno maysa a kanta kas iti “I’ll Walk with You,” Children’s Songbook, 140–41) ken agsapul kadagiti ragup ti balikas a mangiladawan no kasano a makapagserbitayo kadagiti dadduma. Kalpasanna mabalinda ti mangyakem kadagitoy a banag wenno mangidrowing kadagiti ladawanda ken pugtuanda ti ragup ti balikas ti tunggal maysa. Kasano a maipakitatayo ti ayat ken kaasi iti pagtaengan, iti eskuela, wenno iti simbaan?

ubing a babai a makipagay-ayam iti maladaga

Insuronatayo ni Jesucristo nga agbalin a naasi kadagiti dadduma.

Mosiah 5:5–15

No agaramidak kadagiti katulagan iti Dios, awatek iti bagik ti nagan ni Cristo.

• Mabalin a magustuan dagiti annakyo ti mangaramid kadagiti tsapa a mangipakita iti nagan ni “Jesucristo” ket ikabilda dagitoy iti rabaw ti puspusoda (kitaen iti panid ti aktibidad iti daytoy a lawas). Bayat ti panangaramidda iti dayta, mabalinyo nga ibasa kadakuada ti Mosiah 5:12 ket pagsasaritaan maipapan iti no kasano ti panagaramid kadagiti katulagan, wenno kari, iti Dios ket maipada iti kaadda iti nagan ni Cristo a “kanayon a naisurat iti puspuso[tayo].”

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ni Cristo a mangpakpakan kadagiti tumatayab

Iti Awan Sarday a Panangaywanna, ni Greg K. Olsen

panid ti aktibidad: no agaramidak kadagiti katulagan iti Dios, awatek iti bagik ti nagan ni Cristo