“Abril 22–28: ‘Napno iti Ayat iti Dios ken iti Amin a Tao.’ Mosiah 1–3,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
“Abril 22–28. Mosiah 1–3,” Umaykayo, Sumurot Kaniak—Para kadagiti Indibidual ken Pamilia: 2024 (2024)
Panangawat kadagiti Pannursuro ni Ari Benjamin, ni Maria Alejandra Gil
Mosiah 22–28: “Napno iti Ayat iti Dios ken iti Amin a Tao”
Mosiah 1–3
No mangngeganyo ti balikas nga ari, mabalinyo a panunoten dagiti korona, katulongan, ken trono. Iti Mosiah 1–3, mabasayonto ti maipapan iti nadumaduma a kita ti ari. Imbes nga agbiag a di makipagtrabaho kadagiti taona, ni Ari Benjamin “nagbannog kadagiti bukod[na] nga ima” (Mosiah 2:14). Imbes nga agserbi kenkuana dagiti dadduma, isu ti nagserbi kadagiti taona “iti amin a kabaelan, panunot ken pigsa nga inted ti Apo [kenkuana]” (Mosiah 2:11). Saan a kayat daytoy nga ari nga agdayaw kenkuana dagiti taona; imbes ketdi, insurona ida nga agdayaw iti Nailangitan nga arida, ni Jesucristo. Naawatan ni Ari Benjamin nga isu “ti Apo a Mannakabalin nga agturay” (Mosiah 3:5), nga immay a “bimmaba manipud langit” ken napan a “nakilangen kadagiti tao, … tapno maisalakan dagiti annak ti tao babaen ti pammati iti naganna” (Mosiah 3:5, 9).
Dagiti Kapanunotan para iti Panagsursuro iti Pagtaengan ken iti Simbaan
“Amirisen dagiti [nasantuan a kasuratan] a sireregta.”
Kadagitoy a bersikulo, kitaen no kasano a binendisionan dagiti sagrado a kasuratan dagiti tao ni Ari Benjamin. Kasano a nasaysayaat ti biagyo gapu ta adda kadakayo dagiti nasantuan a kasuratan?
No agserbiak kadagiti dadduma, agserserbiak pay iti Dios.
Ania iti panagkunayo nga isungbat koma ni Ari Benjamin no saludsodenyo kenkuana no apay a nagserbi iti amin a “kabaelan, panunot, ken pigsa[na]”? (Mosiah 2:11). Utobenyo daytoy bayat ti panangbasayo iti Mosiah 2:10–26. Ania ti insuro ni Ari Benjamin a mangparegta kadakayo nga agserbi kadagiti dadduma iti napatpateg a wagas? Kas pagarigan, ania ti kaipapanan kadakayo a mangammo a no agserbikayo iti dadduma a tao, agserserbikayo pay iti Dios? (kitaen iti Mosiah 2:17). Agkalikagum a maaddaan iti inspirasion maipapan no kasano a makapagserbikayo iti maysa a tao iti daytoy a lawas.
Uray no ammotayo a nasken nga agserbitayo iti dadduma, maipasangotayo no dadduma kadagiti karit. Sabali pay a wagas ti panangadal iti Mosiah 2:10–26 ket panangilista kadagiti kinapudno nga insuro ni Ari Benjamin kadagiti dadduma a makatulong kadakayo a mangparmek kadagiti karit a mabalin a maglapped kadakayo iti panagserbiyo. Ania dagiti padas a nangipakita kadakayo a pudno ti insuro ni Ari Benjamin?
Inbinglay ni Presidente Joy D. Jones ti maysa a nabileg a padas a nangbalbaliw iti wagas a panangmatmatna iti panagserbi kadagiti dadduma. Basaen ti maipapan iti daytoy iti “For Him” (Ensign wenno Liahona, Nob. 2018, 50–52), ket panunoten maipapan kadagiti gundaway nga adda kadakayo iti panagserbi iti dadduma. Mabalinyo pay ketdi nga ilista ti sumagmamano ket utobenyo no kasano a ti mensahe ni Presidente Jones, agraman ti Mosiah 2:17, ket mabalin a makaimpluensia iti wagas a yaasidegyo kadagitoy a gundaway. Ti maysa a himno a kas iti “A Poor Wayfaring Man of Grief” (Hymns, no. 29) wenno maysa a video kas iti “The Old Shoemaker” (Gospel Library) makatulong kadakayo a mangpanunot iti nayon a nauneg a pannakaammo ken pannakaawat.
Kitaen met iti Mateo 25:40; “Faith Murray’s Story: Overcoming Adversity through Service,” “King Benjamin Teaches about Serving God” (videos), Gospel Library; JustServe.org; Gospel Topics, “Service,” Gospel Library.
No agserbiak kadagiti dadduma, agserserbiak pay iti Dios.
Umay ti ragsak manipud iti panagtungpal kadagiti bilin ti Dios.
Kasano nga iladawanyo ti ragsak a sumangbay manipud iti panagtungpal iti Dios? Adda kadi ania man a ragup ti balikas iti Mosiah 2:38–41 a mangtulong kadakayo a mangilawlawag no apay nga agtungpalkayo kadagiti bilinna?
Makapagbalinak a santo babaen ti Pannubbot ni Jesucristo.
Ni Ari Benjamin, kas kadagiti amin a propeta, ket nagpaneknek maipapan ken ni Jesucristo tapno dagiti taona “mabalin nga umawat iti pannakapakawan dagiti basolda, ken agrag-odanto iti napalalo” (Mosiah 3:13). Adtoy ti sumagmamano a saludsod nga utoben bayat ti panangbasayo iti pammaneknek ni Ari Benjamin maipapan iti Mangisalakan iti Mosiah 3:1–20:
-
Ania ti masursurok manipud kadagitoy a bersikulo maipapan iti Mangisalakan ken ti misionna?
-
Ania ti masursurok manipud iti Mosiah 3:18–19 maipapan iti no ania ti kaipapanan ti agbalin a santo?
-
Kasano a natulongannak ni Jesucristo a mangparmek iti basol, mangbalbaliw iti kinataok ken agbalin nga ad-adda a kas maysa a santo?
“Ti Apo a Mannakabalin … bumabanto manipud langit.”
Ania ti ited kadakayo ti bileg ti elektrisidad iti kabaelanyo nga aramiden? Kasano a maiduma koma ti biagyo no awan kadakayo daytoy? Dagitoy a saludsod ti makatulong kadakayo a mangutob iti dakdakkel pay a bileg a mabalin nga isangbay ti Mangisalakan iti biagyo.
Ti anghel a nagparang ken ni Ari Benjamin tinukoyna ni Jesucristo kas “ti Apo a Mannakabalin,” maysa a pangawag a kayatna a sawen nga adda Kenkuana ti amin a bileg wenno pannakabalin. Ania ti masursuroyo manipud iti Mosiah 3:5–21 maipapan iti no kasano nga usaren ti Mangisalakan dayta a bileg wenno pannakabalin? Kasano a nakitayon ti bileg ti Mangisalakan iti biagyo ken iti biag dagiti tao iti aglawlawyo? Ania ti mangpabael nga aramiden ken pagbalinanyo ti bilegna? Kasano a maiduma koma ti biagyo no awan kadakayo daytoy?
Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.
Dagiti Kapanunotan para iti Panangisuro kadagiti Ubbing
No agserbiak kadagiti dadduma, agserserbiak iti Dios.
-
Ti panid ti aktibidad ita a lawas ket addaan iti simple a korona a mabalin nga aramiden dagiti annakyo. Mabalin a kayatda ti agsisinnublat nga agtakder iti tugaw wenno stool ken agpammarang nga Ari Benjamin bayat ti panangibinglayyo iti sumagmamano a banag nga insuro ni Ari Benjamin kadagiti taona, a masarakan iti Mosiah 2–3. Mabalinyo pay nga ibinglay kadakuada ti “Kapitulo 12: Ari Benjamin” (Dagiti Estoria iti Libro ni Mormon, 32–35) tapno mangted kadakuada ti pakabuklan dagiti pannursuro ni Ari Benjamin.
-
Mosiah 2:17 ti mabalin a nasayaat a bersikulo a sursuruen dagiti annakyo. Makatulongkayo kadakuada a mangulit iti daytoy iti sumagmamano a balikas iti maminsan. Wenno mabalinyo nga isurat ti bersikulo, nga awan ti sumagmamano a kangrunaan a balikas, ket kiddawenyo kadagiti annakyo a mangsapul kadagiti awan a balikas. Kalpasanna, mabalinyo a kasarita kadagiti annakyo no apay a kayat ti Dios nga agserbitayo iti tunggal maysa.
-
Mabalinyo a tulongan dagiti annakyo a mangsukisok iti Mosiah 2:11–18 tapno maammuan no ania ti inaramid ni Ari Benjamin a nagserbi iti dadduma. Kalpasanna mabalin nga isurat dagiti annakyo kadagiti akikid a papel ti sumagmamano a wagas a makapagserbida kadagiti miembro ti pamilia. Ikabil dagiti papel iti uneg ti maysa a pagikkan, kas iti bag wenno garapon, tapno mabalin dagiti annakyo ti mangala iti maysa iti tunggal aldaw ken aramidenda dayta a tignay ti panagserbi para iti maysa a tao.
Mangted iti pagsayaatan kadagiti ubbing ti panangulit. Saankayo a mabuteng a mangulit kadagiti aktibidad iti mamin-adu a gundaway, nangnangruna kadagiti in-inaudi nga ubbing. Ti panangdagdagullit ket makatulongto kadagiti ubbing a manglagip iti no ania ti masursuroda.
Insuro ni Ari Benjamin a makapagserbitayo iti Dios babaen ti panagserbi kadagiti dadduma.
Aggapu iti Nailangitan nga Ama dagiti amin a bendisionko.
-
Ti panagserbi ni Ari Benjamin kadagiti taona ket pinaregta ti nauneg a panagyamanna iti Dios. Kasano a maparegtayonto dagiti kasta met la a rikna kadagiti annakyo? Mabalin nga aggigiddankayo a mangbasa iti Mosiah 2:21 ket rugian ti mangilista kadagiti bendision nga inted ti Nailangitan nga Ama kadatayo. Kalpasanna mabalinyo ti mangnayon iti listaan ti dadduma pay a bendison a pampanunoten dagiti ubbing.
-
Adtoy ti ay-ayam a mabalinyo nga ay-ayamen tapno matulongan dagiti annakyo a mangbigbig kadagiti bendision ti Nailangitan nga Ama. Mabalin dagiti ubbing ti mangipasa iti ladawan ti Mangisalakan iti lawlaw bayat ti panagkanta wenno panagdengngegda iti kanta maipapan iti panagyaman (kitaen iti “Gratitude” iti topics index ti Children’s Songbook). Agsardeng iti panagkanta wenno isardeng sagpaminsan ti musika, ken awisenyo ti asino man a nakaiggem iti daytoy a ladawan tapno mangisarita maipapan iti maysa a bendision a pagyamyamananda. Segun iti Mosiah 2:22–24, kasano a maipakitatayo nga agyamyamantayo para kadagitoy a banag?
Tulongannakto ni Jesucristo nga agbalin nga ad-adda a kas Kenkuana.
-
Imbaga ti maysa nga anghel ken ni Ari Benjamin dagiti napapateg a kinapudno maipapan iti biag ken panagministro ni Jesucristo. Nalabit a mabalinyo ken dagiti annakyo ti mangsapul kadagiti ladawan ti sumagmamano kadagiti pasamak a nadakamat iti Mosiah 3:5–10 (kitaen, kas pagarigan, iti Libro ti Arte ti Ebanghelio, dagiti num. 30, 41, 42, 57,59). Bayat ti panangbasayo iti Mosiah 3:5–10, mabalin dagiti annakyo a mangingato kadagiti imada no mangngeganda ti maysa a banag kadagiti binatog a makita iti maysa kadagiti ladawan.
-
Nakatulong kadin dagiti annakyo a nangisagana iti taraon babaen iti panangusar iti maysa a resipe? Nalabit a mabalinyo a pagsasaritaan maipapan iti padas ken usaren ti Mosiah 3:19 tapno makaaramid iti maysa a “resipe” no kasano a makapagbalintayo a kas ken ni Jesucristo. Kasano a tulongannatayo ni Jesucristo nga agbalin a kas Kenkuana?
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Ti Bitla ni Ari Benjamin, ni Jeremy Winborg