Da Jacob ken Enos, ni Scott Snow

Abril 15–21: “Agtrabaho Kaniak a Mangaramid a Maibatay iti Pagayatanna”

Enos–Dagiti Balikas ni Mormon

Nupay napan ni Enos iti kabakiran tapno aganup kadagiti ayup tapno mapennekna ti panagbisin ti bagi, nagtungpal a nagtalinaed sadiay iti agmalem ken agingga iti rabii gapu ta “nagbisin ti kararuana.” Daytoy a panagbisin ti nangiturong ken ni Enos “tapno “ipukkawna ti timek[na] tapno dumanon iti langit.” Inladawanna daytoy a padas kas maysa a “pannakisinnupanget” iti sango ti Dios (kitaen iti Enos 1:2–4). Manipud ken ni Enos maammuantayo a ti kararag ket maysa a napasnek a panagkagumaan nga umasideg iti Dios ken agkalikagum a mangammo iti pagayatanna. No agkararagkayo nga addaan iti daytoy a panggep, ad-adda a matakuatanyo, kas iti inaramid ni Enos, a denggennakayo ti Dios ken pudno a maseknan kadakayo, kadagiti ay-ayatenyo, ken uray pay dagiti kabusoryo (kitaen iti Enos 1:4–17). No ammoyo ti pagayatanna, nasaysayaat a kabaelanyo a maaramid ti pagayatanna. Kas ken ni Mormon, mabalin a “di[yo] ammo ti amin a banag; ngem ammo ti Apo ti amin a banag …; nupay kasta, nakipagtrabaho [kadakayo] nga agaramid a maibatay iti pagayatanna” (Dagiti Balikas ni Mormon 1:7).

Dagiti Kapanunotan para iti Panagsursuro iti Pagtaengan ken iti Simbaan

Enos 1:1–17

Denggen ken sungbatanto ti Dios dagiti kararagko.

Dagiti padasyo iti kararag ket mabalin a saan a makaawis iti rikna ngem iti padas ni Enos, ngem saan a nasken nga agbalinda nga awan kaes-eskanna. Dagitoy ti sumagmamano a saludsod nga utoben bayat ti panagadalyo iti Enos 1:1–17:

• Ania dagiti balikas a mangiladawan kadagiti panagkagumaan ni Enos bayat ti panagkararagna?

• Kasano a nagbalbaliw dagiti kararag ni Enos manipud kadagiti bersikulo 4 agingga iti 11?

• Ania ti masursurok manipud ken ni Enos a makatulong kaniak a mangpasayaat kadagiti kararagko?

Kitaen met iti “Enos Prays Mightily” (video), Gospel Library; “Sweet Hour of Prayer,” Hymns, no. 142.

Panangibinglay kadagiti saludsod a paglilinnawagan. No mangisursurokayo kadagiti dadduma, ibilang ti panangipan kadagiti saludsod a kayatyo a paglilinnawagan iti maysa a prominente a lugar tapno makita ti tunggal maysa dagitoy. Makatulong daytoy kadagiti tao a mangutob kadagiti saludsod ken mangted iti ad-adu pay a naparegta a sungbat.

Enos 1:1–4

Matulongannak ti Apo a mangimpluensia iti pamiliak para iti pagsayaatan.

Mabalin nga adda maysa a tao iti pamiliayo a kayatyo a matulongan nga umay ken ni Cristo, ngem pampanunotenyo no adda pagdumaan dagiti panagkagumaanyo. Ania ti masursurotayo manipud iti Enos 1:1–4 maipapan iti impluensia ni Jacob iti anakna a ni Enos? Kas pagarigan, ania ti kaipapanan kadakayo ti ragup ti balikas a “ti pannaripato ken pammagbaga ti Apo”? Kasano a maawisyo ti impluensiana iti pagtaenganyo?

Bayat ti panangpanunotyo maipapan iti bukodyo a pamilia, ibilang dagitoy a saludsod ken resources:

• Kasano a maimpluensiaanyo ti pamiliayo kadagiti positibo a wagas? (kitaen iti 1 Nephi 2:16–18; 3:15–21; 5:1–6; 7:20–21; Alma 36:17–20; “Ti Kaamaan: Maysa a Waragawag iti Lubong”). Ania ti maaramidanyo no kasla saan a kayat ti maysa a tao ti tulongyo wenno natangsit kadakayo?

• Ania dagiti pagbatayan a masarakanyo kadagiti sumaganad a nasantuan a kasuratan a mabalin a mangtarabay iti relasionyo kadagiti miembro ti pamilia? Mateo 5:21–24, 38–44; 6:14; 7:1–5; 22:36–39; 3 Nephi 18:21; Moroni 7:33; Doktrina ken Katulagan 18:10–13.

Imbinglay ni Elder Dieter F. Uchtdorf ti makatulong a balakad para kadagiti pamilia iti “In Praise of Those Who Save” (Ensign wenno Liahona, Mayo 2016, 77–80). Ania ti makaparegta a mensahena nga aramidenyo a mangpapigsa iti pamiliayo? (kitaen nangnangruna iti benneg a napauluan iti “Saving Our Families”).

Kitaen met iti Gospel Topics, “Family,” Gospel Library; “Home and Family—Through Small Things” (video), Gospel Library.

Enos 1:1–18

Maawatko ti pannakapakawan no aramatek ti pammati ken ni Cristo.

No dadduma mabalin a pampanunotenyo no napakawanen dagiti basolyo, uray no nagbabawikayon kadagita a basol. Ania dagiti mainayon a nauneg a pannakaammo ken pannakaawat a magun-odyo manipud iti padas ni Enos iti 1:1–8? Kasano nga impakita ni Enos ti pammatina ken ni Jesucristo sakbay ken kalpasan a naawatna ti pannakapakawan?

Jarom–Omni

No ikagumaanak a tungpalen dagiti bilinna, bendisionannakto ti Dios.

Agpada nga iladawan dagiti libro da Jarom ken Omni ti pagnaigan ti kinalinteg ken kinarang-ay. Ania ti masursuroyo manipud iti Jarom 1:7–12; Omni 1:5–7, 12–18? Kasano a naiduma dagiti nailubongan a panangilawlawag ti kinarang-ay manipud iti panangilawlawag ti Apo? Kasano a tulongan ti Apo a rumang-ay dagiti taona? (kitaen iti Alma 37:13; 48:15–16).

Omni 1:25–26

“Umasideg ken ni Cristo, nga isu ti Nasantuan ti Israel.”

Masansan nga agparang iti Libro ni Mormon ti awis nga “Umaykayo ken ni Cristo.” Kinapudnona, maysa kadagiti kangrunaan a panggep ti libro ket ti panangted iti daytoy nga awis iti tunggal maysa. Bayat ti panangbasayo iti Omni 1:25–26, ania dagiti balikas wenno ragup ti balikas a masarakanyo a mangiladawan no kasano ti umasideg ken ni Cristo? Anianto ti aramidenyo nga umasideg Kenkuana nga ad-adda a naan-anay?

Ni Mormon a Mangtiptipon kadagiti Pinanid, ni Jorge Cocco

Dagiti Balikas ni Mormon 1:1–8

Agtrabahonto ti Apo babaen kaniak no surotek ti pannarabayna.

Maysa a rason nga impaltiing ti Apo ken ni Mormon a mangiraman iti babassit a pinanid ni Nephi iti Libro ni Mormon ket gapu ta ammo ti Dios a mapukaw dagiti umuna a 116 a naipatarus a panid (kitaen iti Doktrina ken Katulagan 10; Saints, volume 1, kapitulo 5). Apay nga agyamankayo a sinurot ni Mormon ti panangiturong ti Apo a mangiraman kadagitoy a sinurat (a bukbuklen ti 1 Nephi agingga iti Omni)? Ania dagiti rason nga inted ni Mormon iti panangiraman kadagitoy? (kitaen iti Dagiti Balikas ni Mormon 1:3–7). Kaano a nakitayon ti Dios nga agar-aramid babaen kadakayo wenno iti dadduma?

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

Enos 1:1–5

Makasaritak ti Nailangitan nga Ama babaen iti kararag.

• Kasano a matulonganyo dagiti annakyo a mangaramid a napatpateg dagiti kararagda? Ibilang ti panangipakita kadakuada iti maysa a ladawan ni Enos nga agkarkararag; pailadawan kadakuada no ania ti makitada. Kalpasanna mabalinda ti agkidem ket ipapanda a makisarsaritada iti Nailangitan nga Ama iti sangunsango. Ania ti kayatda koma a pagsaritaan? Ania ti mabalin a kayatna nga ibaga kadakuada?

• Bayat ti panangbasayo iti napigsa iti Enos 1:1–5, mabalin nga agpammarang dagiti in-inaudi nga ubbing nga isuda ni Enos babaen iti panangyakemda nga agan-anup, agparparintumengda nga agkararag, ken dadduma pay. Mabalin a dumngeg dagiti in-inauna nga ubbing iti balikas wenno ragup ti balikas a mangiladawan kadagiti kararag ni Enos. Ania ti ibaga kadatayo dagitoy a balikas maipapan kadagiti kararag ni Enos? Ibinglayyo ti maysa a padas idi “nabisinan” ti kararuayo ken “immararawkayo” iti Apo (Enos 1:4).

Kas annak ti Dios, makapagkararagtayo iti Nailangitan nga Amatayo.

Enos 1:2–16

Denggen ken sungbatan ti Nailangitan nga Ama dagiti kararagko.

• Kasano a matulonganyo dagiti annakyo a makaawat a denggen ken sungbatanto ti Nailangitan nga Ama dagiti kararagda? Ibilang ti panangawis kadakuada a mangilista iti sumagmamano a banag a gagangay nga ikarkararaganda. Kalpasanna, mabalinyo a tulongan ida a mangbirok iti inkararagan ni Enos iti Enos 1:2, 9, 13–14, ken 16 (kitaen met iti “kapitulo 11: Enos,” Dagiti Estoria iti Libro ni Mormon, 30–31).

  Ania dagiti bunga dagiti kararag ni Enos? (kitaen dagiti bersikulo 6, 9, 11).

  Ania ti masursurotayo manipud iti padas ni Enos maipapan iti no kasano ti mangpasayaat kadagiti kararagtayo?

• Aggigiddan nga agkansion iti kanta maipapan iti kararag, kas iti “A Child’s Prayer” (Children’s Songbook, 12–13). Nalabit a mabalin nga ingato dagiti annakyo dagiti imada iti tunggal kanito a manggeganda ti balikas nga “agkararag” wenno “kararag” wenno sabali pay a naulit a balikas. Isaritayo kadagiti annakyo maipapan iti sumagmamano a wagas a sinungbatan ti Nailangitan nga Ama dagiti kararagyo.

Dagiti Balikas ni Mormon 1:3–8

Mabendisionak dagiti dadduma no denggek ti Espiritu Santo.

• Sinurot ni Mormon ti pannarabay ti Espiritu Santo a mangiraman iti babassit a pinanid ni Nephi iti Libro ni Mormon. Amin nga inadaltayo iti Libro ni Mormon agingga ita a tawen ket dimteng kadatayo gapu ta inaramid ni Mormon ti panagpili a dumngeg iti Espiritu. Kasano a matulonganyo dagiti annakyo nga agsursuro maipapan iti panagdengngeg iti Espiritu? Awisenyo ida nga agsisinnublat a mangbasa kadagiti bersikulo manipud iti Dagiti Balikas ni Mormon 1:3–8. Mabalinyo a pagsasaritaan ti maipapan no ania ti masursuroda manipud iti tunggal bersikulo. Kalpasanna mabalin dagiti annnakyo ti:

  • Mangibinglay no ania ti nasursuroda manipud kadagiti estoria iti Libro ni Mormon iti daytoy a tawen (dagiti ladawan manipud iti Umaykayo, Sumurot Kaniak makatulong kadakuada a manglagip).

  • Aggigiddan nga agkansion iti maysa a kanta maipapan iti Espiritu Santo, kas iti “The Still Small Voice” (Children’s Songbook, 106–7).

  • Pagsasaritaanyo maipapan kadagiti padas a nangtarabayan kadakayo ti Espiritu nga agaramid iti maysa a banag a nangbendision iti maysa a tao.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ni Enos nga Agkarkararag, ni Robert T. Barret