Napakawanen, ni Greg Olsen. Naaramat nga addaan pammalubos. www.GregOlsen.com

Abril 1–7: “Makitunoskayo iti Dios babaen ti Pannubbot ni Cristo”

Jacob 1–4

Imbilang dagiti Nephite ni Nephi a “nabileg a salaknibda” (kitaen iti Jacob 1:10). Sinalaknibanna pay ida a maibusor kadagiti naespirituan a peggad, a nangbalballaag kadakuada a maibusor iti basol ken nangguyguyugoy kadakuada nga umasideg ken ni Cristo. Ita naisaad dayta a trabaho ken ni Jacob, nga inkonsagrar ni Nephi nga agbalin a maysa a saserdote ken mannursuro (kitaen iti Jacob 1:18). Narikna ni Jacob ti pagrebbengan a situtured a mangballaag kadagiti “mangrugin nga agtrabaho iti basol” idinto a mangliwliwa pay “iti nasugatan a kararua” dagiti nadangran gapu iti basol dagiti dadduma (kitaen iti Jacob 2:5–9). Kasano nga aramidenna nga agpada? Itudona ida ken ni Jesucristo—gapu ta kasapulan ti agpada a grupo ti panangagas ti Mangisalakan (kitaen iti Jacob 4). Kas iti mensahe ni Nephi kasakbayan kenkuana, ti pammaneknek ni Jacob ket maysa nga awag a “makitunos iti [Dios] babaen ti pannubbot ni Cristo” (Jacob 4:11).

Dagiti Kapanunotan para iti Panagsursuro iti Pagtaengan ken iti Simbaan

Jacob 1:6–8, 15–19; 2:1–11

Addaanak iti “nakaibaonan manipud ti Apo.”

Ken ni Jacob, ti panangisuro iti balikas ti Dios ket maysa a “nakaibaonan manipud iti Apo,” isu a nagtrabaho isuna a sipapasnek tapno “mangipateg iti takemna” (Jacob 1:17,19). Ania ti kayat a sawen kadakayo dagitoy ragup ti balikas nga inusar ni Jacob? Panunoten no ania ti aramiden ti maysa a magnifying glass. Mangted kadi dayta kadakayo iti ania man a kapanunotan? Bayat ti panangutobyo iti Jacob 1:6–8, 15–19 ken 2:1–11, panunotenyo dagiti pangibaonan a mabalin nga adda iti Apo a para kadakayo. Ania ti mariknayo a makaparegta nga aramiden a “mangipateg” kadagitoy?

Kitaen met iti “Whom the Lord Calls, the Lord Qualifies,” iti Teachings of Presidents of the Church: Thomas S. Monson (2022), 209–20; “Rise to Your Call” (video), Gospel Library.

Jacob 2:12–21

“Diyo itulok a dadaelen ti kinapalangguad ti puspusoyo dagiti kararuayo!”

Adda parikut dagiti Nephite iti kinapalangguad ken panangipamaysada kadagiti kinabaknang (kitaen iti Jacob 2:13), ket saan a naidumduma dayta a parikut kadakuada wenno iti aldawda. Kasano nga itandudo ti kabusor ti panagayat iti kinabaknang ita? Kalpasan ti panangbasayo iti Jacob 2:12–21, iladawanyo iti bukodyo a balikas no kasano a kayat ti Dios a panangkita ti material a kinabaknang. Ti maysa a himno kas iti “Because I Have Been Given Much” (Hymns, no. 219) ti makaipaay kadagiti nayon a nauneg a pannakaammo ken pannakaawat. Ania ti mariknayo a makaparegta nga aramiden maipapan iti no ania ti masursuroyo?

Jacob 2:22–35; 3:10–12

Pakaragsakan ti Dios ti kinadalus ti dayaw.

Bayat ti panagbasayo iti Jacob 2:22–35; 3:10–12, ania ti masarakanyo a makatulong kadakayo no apay a napateg unay iti Dios ti kinadalus ti dayaw? Ania ti sumagmamano a negatibo a pagbanagan ti imoralidad—iti aldaw ni Jacob ken iti aldawtayo? Ania dagiti bendision ti panagbiag a nadalus iti dayaw?

Insuro ni Elder David A. Bednar nga agbibiagtayo “iti maysa a lubong nga umad-adu ti panangumsi iti kinasagrado ti kabaelan nga agparsua iti biag [procreation]” (“We Believe in Being Chaste,” Liahona, Mayo 2013, 41–44). Kasano a matulonganyo dagiti dadduma a makaawat no apay nga agtulnogkayo iti linteg ti kinadalus ti dayaw? Ti maysa a nasayaat a lugar a pangrugian ket ti panangilawlawag kadagiti pagalagadan ti Dios maipapan iti seksual a rikna ken relasion iti “Your body is sacred” iti For the Strength of Youth: A Guide for Making Choices (dagiti panid 22–29). Ania pay ti masarakanyo iti dayta a pagadawan a mangtulong kadakayo a mangilawlawag no apay nga agbiagkayo iti kinadalus ti dayaw?

Masarakanyo dagiti nayon a sungbat iti mensahe ni Elder Bednar a naibasar iti ngato wenno iti video nga “I Choose to Be Pure” (Gospel Library).

Kasano a naiduma ti pagalagadan ti Dios maipapan iti seksual a kinadalus kadagiti dadduma a mensahe a mabalin a pakaipasanguanyo? Ania dagiti bendision ti panagbiag a nadalus iti dayaw?

Kitaen met iti Gospel Topics, “Virtue,” Gospel Library; “Same-Sex Attraction” iti “Life Help” Collection in the Gospel Library.

Jacob 4

Makitunosak iti Dios babaen ti Pannubbot ni Jesucristo.

Nagpakaasi ni Jacob kadagiti taona a “makitunos[da] iti [Dios] babaen ti pannubbot ni Cristo” (Jacob 4:11). Maysa a depinision ti mangitunos ti mangisubli iti panaggayyem wenno panagtutunos. Bayat ti panangutobyo iti bukodyo a biag, panunotenyo ti maysa a panawen a mabalin a nariknayo nga adayokayo iti Nailangitan nga Ama. Kasano a tulongannatayo ti Mangisalakan a mangisubli iti daytoy a relasion? Ania a balakad ti masarakanyo iti daytoy a kapitulo a makatulong kadakayo a makitunos iti Dios? (kitaen iti dagiti bersikulo 4–14).

Ania dagiti nayon a nauneg a pannakaammo ken pannakaawat a magun-odyo manipud iti Mateo 5:23–24? Kasano a matulongannakayo ti Mangisalakan a makitunos iti Dios—ken iti dadduma?

Kitaen met ti 2 Nephi 10:24.

Jacob 4:8–18

Maliklikak ti naespirituan a pannakabulsek babaen ti panangipamaysak iti Mangisalakan.

Bayat ti panagtrabaho ni Jacob a mangisubli nga ad-adda a naan-anay dagiti taona iti Apo, binallaaganna ida a saanda nga agbalin a naespirituan a bulsek ken saanda nga umsien dagiti “nalawag a balikas” ti ebanghelio (kitaen iti Jacob 4:13–14). Segun iti Jacob 4:8–18, ania ti maaramidtayo a mangliklik iti naespirituan a kinabulsek?

Kitaen met iti Quentin L. Cook, “Looking beyond the Mark,” Ensign, Mar. 2003, 40–44.

No mangisuro, usaren idi ti Mangisalakan dagiti panangidilig iti inaldaw a panagbiag. Tinulongan dagiti pangngarig ni Jesus dagiti tao a mangbirok kadagiti naespirituan a kinapudno kadagiti gagangay a padasda. Padasenyo nga aramiden met dayta no mangisurokayo. Kas pagarigan, no mangisursurokayo iti Jacob 4:8–18, mabalinyo a saludsoden kadagiti agad-adal no napadasandan ti naeksamen iti mata. Kasano ti panangamiris ti doktor ti pisikal a panagkitada? Kasano a maamiristayo ti naespirituan a panagkitatayo?

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

Jacob 2:8

Agasan ti Dios ti nasugatan a kararua.

• Tapno matulongan dagiti annakyo a makaawat no kasano a maagasan ti “nasugatan a kararua” mabalinyo a pagsasaritaan a sangkamaysa no kasano a masugatan ti bagitayo ken no ania ti makatulong kadagitoy nga umimbag. Nalabit mabalin nga isarita dagiti annakyo maipapan kadagiti panawen a nasugatanda ken no ania ti nakatulong kadakuada nga umimbag. Mabalinyo pay ketdi nga ipakita kadakuada dagiti benda wenno agas kas paset daytoy a saritaan. Ibinglayyo kadagiti ubbing no kasano a tinulongannakayo ti Mangisalakan idi kasapulan ti espirituyo ti pannakaagas.

Jacob 2:17–19

Matulongak dagiti dadduma nga agkasapulan no mangibinglayak kadakuada.

• Sumagmamano a tattao ti nakabakbaknang idi panawen ni Jacob, ngem saanda a kinayat nga ibinglay ti adda kadakuada kadagiti dadduma. Bayat ti panangbasayo kadagiti pannursuro ni Jacob kadakuada iti Jacob 2:17–19, mabalinyo nga ikkan dagiti annakyo kadagiti ladawan wenno banag nga iggaman a maikuyog kadagiti balikas wenno ragup ti balikas kadagitoy a bersikulo. Mabalinyo nga ilawlawag nga ibingbingayyo kadakuada dagitoy a banag; kalpasanna mabalinyo nga awisen ida a mangibinglay kadagiti banag kadakayo wenno iti tunggal maysa. Isaritayo no kasano ti riknayo no agibinglaykayo. Ania pay ti mabalintayo nga ibinglay kadagiti dadduma tapno matulongan ida a makarikna iti ragsak?

• Kalpasan ti aggigiddan a panagbasayo iti Jacob 2:17, nalabit mabalin a manginagan dagiti annakyo iti sumagmamano a bendision nga imbinglay ti Nailangitan nga Ama kadakuada. Apay a kayat ti Dios nga agbibinninglaytayo iti tunggal maysa?

Jacob 4:6, 10–11

Mapapigsak ti pammatik ken ni Jesucristo.

• Napigsa unay ta saan a maisin ti pammati ni Jacob ken ni Cristo. Tapno maisuro dagiti annakyo no kasano ti mangbangon iti pammati a kas iti dayta, mabalinyo a damagen kadakuada dagiti banag nga ar-aramidentayo tapno pumigpigsa ti bagitayo. Ania ti mabalin nga aramidentayo tapno agbalin a napigpigsa ti pammatitayo ken ni Jesucristo? Aggigiddan a basaenyo ti Jacob 4:6 ken tulonganyo dagiti ubbing a mangtakuat no ania ti inaramid ni Jacob ken dagiti taona tapno agbalin a “saan a maisin” ti pammatida.

• Maysa a wagas tapno matulongan a maawatan dagiti annakyo no ania ti kaipapanan ti “saan a maisin” iti pammatida ket ti mangsapul iti maysa a dakkel a kayo iti asideg ket idawat kadakuada a mangdayyeg iti tunggal sanga. Kalpasanna papadasyo kadakuada a mangdayyeg iti puon. Apay a narigrigat a dayyegen ti puon? Ania kadagiti ragup ti balikas iti Jacob 4:6, 10–11 ti mangiladawan no ania ti maaramidtayo a mangpabalin a saan a maisin ti pammatitayo ken ni Jesucristo?

  

  Kas iti puon ti maysa a kayo, mapagbalin a “saan a maisin” ti pammatitayo ken ni Cristo.

• Para iti dadduma pay a panangidilig a mangisuro kadagiti annakyo maipapan iti di maisin a pammati ken ni Jesucristo, kitaen iti Neil L. Andersen, “Spiritual Whirlwinds” (Liahona, Mayo 2014, 18–21; ken ti video a “Spiritual Whirlwinds“) wenno “The Wise Man and the Foolish Man” (Children’s Songbook, 281; kitaen met iti Mateo 7:24–27).

  Dagiti Naespirituan nga Alipugpog

  Diyo ipalugod nga iraremnakayo ti alipugpog. Dagitoy ti aldawyo—nga agtalinaed a natibker kas disipulo ni Apo Jesucristo.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ipatulodkonto dagiti Balikasda (Ni Jacob ti Mannursuro), ni Elspeth Caitlin Young