Alegoria maipapan iti Kayo ti Olibo, ni Brad Teare

Abril 8–14: “Makipagtrabaho ti Apo Kadatayo”

Jacob 5–7

Adu, adu a tattao ti saan pay a nakangngeg iti ebanghelio ni Jesucristo. No mariknayo a natalipuposkayo iti kinadakkel ti trabaho a panangummong kadakuada iti Simbaan ti Apo, ti kinuna ni Jacob maipapan kadagiti kayo nga olibo iti Jacob 5 ket addaan iti makapanamnama a palagip: kukua ti Apo ti bangkag. Intedna iti tunggal maysa kadatayo ti maysa a bassit a lugar a pakatulongantayo iti aramidna—ti pamiliatayo, dagiti gagayyemtayo, ti sakup ti impluensiatayo. Ket no dadduma ti umuna a tao a matulongantayo nga ummongen ket ti bagbagitayo. Ngem iti kaano man saantayo nga agmaymaysa iti daytoy nga aramid, gapu ta makipagtrabaho ti Apo ti bangkag a kaduana dagiti katulonganna (kitaen iti Jacob 5:72). Am-ammo ken ay-ayaten ti Dios dagiti annakna, ket mangisagananto iti wagas para iti tunggal maysa kadakuada tapno dumngeg iti ebangheliona, uray pay dagiti saan a nangawat Kenkuana iti napalabas (kitaen iti Jacob 4:15–18). Ket kalpasanna, no nalpasen ti aramid, amin dagiti “naregta a nakipagtrabaho [Kenkuana] … makipagrag-odanto [Kenkuana] gapu iti bunga ti bangkag[na]” (Jacob 5:75).

Kitaen met iti “Jacob Teaches about the Gathering of Israel” (video), Gospel Library.

Dagiti Kapanunotan para iti Panagsursuro iti Pagtaengan ken iti Simbaan

Jacob 5

Ni Jesucristo ti Apo ti bangkag.

Jacob 5 ket maysa nga estoria nga addaan iti simboliko a kaipapanan. Iladawanna dagiti kayo ken bunga ken trabahador, ngem talaga a maipapan daytoy kadagiti pannakilangen ti Dios kadagiti taona iti intero a pakasaritaan. Gapuna bayat ti panangbasayo iti kangrunaan nga estoria, panunotenyo no ania ti mabalin nga isimbolo ti sumagmamano kadagiti banag iti estoria.

Kas pagarigan, no ibagi ti bangkag ti lubong, ken ibagi ti naamo a kayo ti olibo ti Israel (wenno dagiti nakitulag iti Dios; kitaen iti Jacob 5:3), ania ti mabalin nga ibagi dagiti atap a kayo ti olibo? Ania ti mabalin nga ibagi ti nasayaat ken dakes a bunga? Ania dagiti dadduma pay a simbolo a makitayo?

Nupay isuro ti Jacob 5 maipapan kadagiti nasion ken siglo ti pakasaritaan ti lubong, maipapan met dayta kadakayo ken iti biagyo. Ania dagiti mensahe a masarakanyo para iti bagiyo iti Jacob 5?

Nalabit a ti kapatgan, ti Jacob 5 ket maipapan ken ni Jesucristo. Sapulenyo Isuna bayat ti panagbasayo. Ania ti masursuroyo maipapan Kenkuana, kas pagarigan, kadagiti bersikulo 40–41, 46–47?

Para kadagiti nayon a nalawag a pannakaammo ken pannakaawat maipapan iti Jacob 5, kitaen iti dayagram iti udi daytoy a balabala.

Jacob 5:61–75

Awisennak ti Apo a makipagtrabaho Kenkuana iti bangkagna.

Ti “dadduma pay a katulongan” (Jacob 5:70) a naawagan iti bangkag ti Apo ket iramanna dagiti tao a kas kadakayo. Ania dagiti kinapudno a masarakan iti Jacob 5, nangnangruna dagiti bersikulo 61–62 ken 70–75, maipapan iti panagtrabaho iti bangkag ti Apo? Ania ti nasursuroyo maipapan Kenkuana babaen ti panangtulong iti aramidna?

Bayat ti panagbasayo maipapan iti “maudi a panawen” nga agtrabaho ti Apo iti bangkagna, ania ti mangparegta kadakayo ken ti pamiliayo nga agserbi iti Apo “iti kabaelanyo”? Jacob 5:71 Nalabit a mabalinyo a mangpanunot iti bukod a padas a nakariknaanyo iti rag-o kabayatan ti panagserbiyo iti Apo ti bangkag—kas pagarigan, babaen ti panangibinglay iti ebanghelio, panagserbi iti templo, wenno panangpapigsa iti dadduma. Mabalinyo pay ti aggigiddan a mangsukisok kadagiti pagarigan nga imbinglay ni Elder Gary E. Stevenson iti mensahena a “Simply Beautiful—Beautifully Simple” (Liahona, Nob. 2021, 47–50).

Insuro ni Presidente Russel M. Nelson: “Ania man nga oras nga aramidenyo ti ania man a mangtulong iti asino man—iti agsumbangir ti belo—mangala iti addang iti panangaramid kadagiti katulagan iti Dios ken panangawat kadagiti kasapulan nga ordinansa ti panagbuniag ken templo, tumultulongkayo a mangummong iti Israel. Kas iti dayta ti kasimplena” (“Hope of Israel” [worldwide youth devotional, Hunio 3, 2018], ChurchofJesusChrist.org Ibilang ti panangrugi iti listaan dagiti kapanunotan ti no ania ti maaramidyo a makatulong a mangummong iti Israel. Manipud iti listaanyo, ania ti mariknayo a paaramid kadakayo ita ti Apo iti bangkagna? Segun iti bersikulo 75, kasano a gunggonaannatayo ti Apo para iti serbisio iti bangkagna?

Kitaen met iti “Israel, Israel, God Is Calling,” Hymns, no. 7; “Old Testament Olive Vineyard” (video), Gospel Library; Gospel Topics, “Gathering Israel,” “Inviting All to Receive the Gospel of Jesus Christ,” “Participating in Temple and Family History Work,” Gospel Library.

Bangkag ti Olivo iti Daan a Tulag

(Jacob 5–6) Seminary students visit an Old Testament olive vineyard and are taught how to care for olive trees. They discover conditions in the vineyard that parallel the conditions in Zenos’s allegory. Segment 1, Old Testament Olive Vineyard

Isuro ti doktrina Siguraduenyo a maipamaysa dagiti panaglilinnawagyo iti doktrina a mainaig iti pundasion kadagiti nasantuan a kasuratan. Mabalinyo nga aramiden daytoy babaen ti aggigiddan a panagbasa kadagiti nasantuan a kasuratan ket kalpasanna panagbibinninglay kadagiti kinapudno a masarakanyo, kasta met kadagiti padas iti panagtungpal kadagita a kinapudno.

Jacob 6:4–5

Laglagipen ti Apo dagiti taona nga addaan ayat ken asina.

Ti maysa a kaipapanan ti balikas a makikaysa ket dumket wenno kumpet iti maysa a banag a sititibker, siaasideg, ket saan a sikekedked. Kasano nga apektuan dayta a depinision ti wagas a pannakaawatyo iti Jacob 6:4–5? Iti estoria ti kayo nga olibo, kasano nga inyunnat ti Apo ti bangkag ti “takiag ti asina”? (kitaen, kas pagarigan, iti Jacob 5:47, 51, 60–61, 71–72). Kasano nga inaramidna daytoy para kadakayo?

Jacob 7:1–23

Makatakderak a napigsa no kariten dagiti dadduma ti pammatik ken ni Jesucristo.

Ti padas dagiti Nephite ken ni Sherem ti masansan a maulit kadagitoy nga aldaw: padpadasen dagiti tao ti mangdadael iti pammati ken ni Cristo. Kasano a simmungbat ni Jacob idi nadarup ti pammatina? Ania ti masursuroyo manipud kadagiti sungbatna? Ania ti maaramidyo itan nga agsagana para kadagiti panawen no makaritto ti pammatiyo iti Mangisalakan?

Kitaen met iti Jeffrey R. Holland, “The Cost—and Blessings—of Discipleship,” Ensign wenno Liahona, Mayo 2014, 6–9; “Sherem Denies Christ” (video), Gospel Library.

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

Jacob 5

Maseknan ti Apo kadagiti taona.

• Kasano a maibinglayyo ti estoria maipapan kadagiti kayo ti olibo iti wagas a maawatan dagiti annakyo? Maysa a wagas ket ti pannagna iti ruar a mangkita iti maysa a kayo ken mangrebyu biit kadagiti kangrunaan a punto ti estoria. Ania ti inaramid ti Apo ti bangkag ken para kadagiti kayona? Kasano a maipadatayo kadagiti trabahador iti estoria ken matulongantayo dagiti dadduma a makarikna iti ayat ti Mangisalakan?

• Imbinglay ni Jacob ti estoria ti kayo ti olibo tapno mangawis kadagiti taona nga umay ken ni Cristo. Kasta met ti maaramid kadagiti annakyo. Nalabit mabalinyo a gupgopen ti estoria nga addaan kadagiti bersikulo a kas iti Jacob 5:3–4, 28–29, 47, ken 70–72 (kitaen met iti “Old Testament Olive Vineyard” [video], Gospel Library). Kalpasanna mabalinyo ken dagiti annakyo ti mangbasa iti Jacob 5:11, 41,47, ken 72, nga agsapsapul kadagiti banag a mangipakita no kasano ti kaadu ti panawen a panangaywan ti Apo ti bangkag (Jesucristo) kadagiti kayo. Ania ti aramiden ti Mangisalakan a mangipakita nga ay-aywanannatayo?

  Bangkag ti Olivo iti Daan a Tulag

  (Jacob 5–6) Seminary students visit an Old Testament olive vineyard and are taught how to care for olive trees. They discover conditions in the vineyard that parallel the conditions in Zenos’s allegory. Segment 1, Old Testament Olive Vineyard

Jacob 6:4–5

Ay-ayatennak ti Nailangitan nga Ama ken pakawanennakto no agbabawiak.

• Jacob 6:4–5 addaan iti napateg a mensahe para kadatayo no agaramidtayo kadagiti biddut a pili. Nalabit a matulonganyo dagiti annakyo a mangbirok iti daytoy. Ania dagiti balikas kadagitoy a bersikulo ti mangted kadatayo iti namnama iti manangsubbot nga ayat ti Dios? Makatulong ti estoria ni Elder Allen D. Haynie maipapan iti panagbalin a narugit iti napitak nga abut, iti mensahena a “Remembering in Whom We Have Trusted” (Liahona, Nob. 2015, 121–22). Ania ti isuro kadatayo daytoy nga estoria ken ti Jacob 6:4–5 maipapan iti no ania ti nasken nga aramidentayo tapno maisalakan iti pagarian ti Dios?

Jacob 7:1–23

Maitakderak no ania ti ammok a pudno.

• Kasano a maparegtayo dagiti annakyo a mangitakder iti kinapudno kas iti inaramid ni Jacob? Mabalin a buyaen dagiti annakyo ti video a “Chapter 10: Jacob and Sherem” (Gospel Library) ken mangyakem iti panagbinnalubal da Jacob ken Sherem, nga us-usaren ti Jacob 7:1–23 kas maysa a pangiwanwan. Kasano nga intakderan ni Jacob no ania ti ammona nga umno? Awisenyo dagiti annakyo a mangibinglay kadagiti padasda idi intakderanda ti umno, wenno ibinglayyo ti bukodyo a padas. Nalabit a mabalinda pay ti agkansion iti kanta a mangyebkas iti tured a kas ken ni Jacob, kas iti “Stand for the Right,” Children’s Songbook, 159.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.