Marso 25–31: “Agungarto … nga Addaan iti Pagpaimbag kadagiti Payakna.” Paskua ti Panagungar
“Marso 25–31: “Agungarto … nga Addaan iti Pagpaimbag kadagiti Payakna” “Paskua ti Panagungar,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2023)
“Marso 25–31. Paskua ti Panagungar,” Umaykayo, Sumurot Kaniak—Para iti Pagtaengan ken Simbaan: 2024 (2023)
Ladawan
ni nagungar a Cristo ken dagiti Apostolna
Ni Cristo ken dagiti Apostol, ni Del Parson
Marso 25–31: “Agungarto … nga Addaan iti Pagpaimbag kadagiti Payakna”
Paskua ti Panagungar
Natured dagiti nagkauna nga Apostol kadagiti pammaneknekda ken ni Jesucristo ken ti Panagungarna (kitaen iti Dagiti Aramid 4:33). Minilmilion a tattao ti mamati ken ni Jesucristo ket ikarigatanda ti sumurot Kenkuana gapu kadagiti balikasda a naisurat iti Biblia. Ngem mabalin a sumagmamano a tattao ti masdaaw: No ni Jesucristo ti Mangisalakan iti intero a lubong, ngarud apay a lilmitado dagiti nakasaksi iti bassit a bilang dagiti tao iti maysa a bassit a rehion?
Agtakder ti Libro ni Mormon a kas nayon, mangal-allukoy a saksi a ni Jesucristo ti Mangisalakan ti lubong, a mangiparparangarang iti bagina kadagiti amin a pagilian” (panid ti paulo ti Libro ni Mormon) ken mangidiaydiaya iti pannakaisalakan iti amin nga umasideg Kenkuana. Mainayon pay, ilawlawag pay daytoy maikadua a saksi no ania ti kaipapanan ti pannakaisalakan. Daytoy ti gapu no apay a da Nephi, Jacob, Mormon, ken amin dagiti propeta ket nagtrabahoda a “sireregta iti panangikitikit[da] kadagitoy a balikas kadagiti pinanid”—tapno maipakdaar kadagiti masakbayan a kaputotan nga isuda met ket “ammo[da] ni Cristo, ken … adda namnama[da] iti dayagna” (Jacob 4:3–4). Daytoy a panawen ti Paskua ti Panagungar, panunotenyo maipapan kadagiti pammaneknek iti Libro ni Mormon a ti bileg ti Mangisalakan ket agpada a sangalubongan ken personal—a mangsubsubbot iti intero a lubong ket mangsubsubbot kadakayo.
Dagiti Kapanunotan para iti Panagsursuro iti Pagtaengan ken iti Simbaan
Ladawan
Icon iti seminary
Gapu ken ni Jesucristo, agungarakto.
Naipakadawyanen iti Paskua ti Panagungar a mangutob iti Panagungar ni Jesucristo, ngem ania kadi ti umisu a kayat a sawen ti agungar? Ania dagiti nalawag a pannakaammo ken pannakaawat [insights] nga ited ti Libro ni Mormon maipapan iti panagungar? Nalabit nga iti daytoy panawen ti Paskua ti Panagungar mabalinyo nga ilista dagiti kinapudno maipapan iti panagungar a masarakanyo iti 2 Nephi 9:6–15,22; Alma 11:41–45; 40:21–25; ken 3 Nephi 26:4–5.
Mabalinyo pay nga isurat no kasano nga impluensiaan dagitoy a kinapudno dagiti tignayyo ken ti wagas a panagbiagyo. Kas pagarigan, panunotenyo no kasano a makumpletoyo dagitoy a binatog: No diak ammo dagitoy a banag … ken Gapu ta ammok dagitoy a banag …
Ti himno kas iti “I Know That My Redeemer Lives” (Hymns, no. 136) ket matulongannakayo a mangpanunot no apay a napateg kadakayo ti Panagungar ti Mangisalakan. Bayat ti panagkanta, panagdengngeg, wenno panagbasayo iti himno, mabalin nga isaludsodyo iti bagiyo, “Kasano a naiduma ti biagko gapu ta nagungar ni Jesucristo?”
Addaan ti Gospel Library iti koleksion dagiti video ti Paskua ti Panagungar a mabalin a napnuan kaipapanan a paset ti panagadalyo. Nalabit a mabalinyo a buyaen ti maysa wenno ad-adu pay kadagitoy a video ket utobenyo no ania ti mainayon dagitoy iti pannakaawat wenno panagyamanyo iti Panagungar ti Mangisalakan.
Kitaen iti Lucas 24:36–43; Dagiti Aramid 24:15; 1 Taga Corinto 15:12–23; Reyna I. Aburto, “The Grave Has No Victory,” Liahona, Mayo 2021, 85–86; Gospel Topics, “Resurrection,” Gospel Library; “Death, Grieving, and Loss” iti “Life Help” koleksion iti Gospel Library.
Inawat ni Jesucristo iti Bagina dagiti basol, saem, ken saksakitko.
Nalawag nga isuro ti Biblia a sinubbot ni Jesucristo dagiti basoltayo. Ti Libro ni Mormon ti mangpadakkel iti pannakaawattayo iti sakripisio ken panagsagaba ni Cristo iti napapateg a wagas. Masarakanyo ti sumagmamano kadagitoy a pannursuro iti Mosiah 3:7; 15:5–9; Alma 7:11–13. Kalpasan a mabasayo dagitoy a binatog, ibilang ti panangisuratyo iti no ania ti matakuatanyo iti maysa a tsart a kas iti daytoy:
Ania ti sinagaba ti Mangisalakan?
Apay a nagsagaba Isuna?
Ania ti kayat a sawen daytoy kaniak?
Adtoy ti sabali pay a wagas a panangadal kadagitoy a binatog: Sapulenyo dagiti himno a mariknayo a maiparis kadagiti mensahe nga isuroda. Makatulong ti indeks ti “Nasantuan a Kasuratan” iti likud ti libro ti himno. Ania dagiti ragup ti balikas manipud kadagitoy a himno ken nasantuan a kasuratan ti makatulong kadakayo a mangbigbig iti pateg iti sakripisio ti Mangisalakan nga ad-adda pay?
Madalusan ken matulongannak ni Jesucristo nga agbalin a perpekto.
Mabalin a makuna a ti Libro ni Mormon ti pakaammuan dagiti tao a nagbalbaliw gapu iti Pannubbot ni Jesucristo. Mabalinyo a basaen ti sumagmamano kadagitoy a padas iti Mosiah 5:1–2; 27:8–28; Alma 15:3–12; 24:7–19. Mabalinyo a panunoten ti dadduma pay a pagarigan nga adalen pay. Ania ti makitayo a pagpapadaan dagitoy a padas? Ania dagiti pagdudumaan a makitayo? Ania ti isuro kadakayo dagitoy a padas maipanggep iti no kasano a mapagbalbaliwnakayo ti Mangisalakan?
Mabalinyo nga usaren ti “Kapitulo 53: Nailansa ni Jesus iti Krus” ken “Kapitulo 54: Nagungaren ni Jesus” (iti Dagiti Estoria iti Baro a Tulag, 136–38, 139–44, tapno isarita kadagiti annakyo maipapan iti Panangungar ni Jesucristo. Wenno paisaritayo kadagiti annakyo ti estoria, nga us-usaren dagiti ladawan kadagitoy a kapitulo.
Ti isasarungkar ti Nagungar a Mangisalakan kadagiti kontinente ti America ti nabileg a saksi ti Panagungarna. Ibilang ti panangisaritayo kadagiti annakyo maipapan iti daytoy, nga us-usarenyo ti 3 Nephi 11; 17; ti kanta nga “Easter Hosanna”; wenno ti maudi a berso ti “Book of Mormon Stories” (Children’s Songbook, 68–69, 118–19). Allukoyenyo dagiti annakyo a mangipapan no ania koma ti mariknada no riknaenda dagiti sugat ni Jesus (kitaen iti 3 Nephi 11:14–15) wenno ipapanda a maysada kadagiti ubbing a binendisionanna (kitaen iti 3 Nephi 17:21). Ibinglayyo iti dadduma ti riknayo maipapan ken ni Jesucristo ken ti Panangungarna.
Tapno matulongan dagiti annakyo a mangtakuat no ania ti isuro ti Libro ni Mormon maipapan iti panangungar, mabalinyo nga awisen ida nga agpammarang nga awan ti ammoyo maipapan iti daytoy ken idawatyo kadakuada a a mangilawlawag iti daytoy kadakayo. Tulonganyo ida a mangsapul iti 2 Nephi 9:10–15; Alma 11:41–45; ken Alma 40:21–23 para kadagiti sungbat kadagiti saludsod a kas kadagitoy: Ania ti kaipapanan ti panagungar? Asino ti agungarto? Awisen pay ida a mangibinglay iti pammaneknek maipapan iti Panagungar ti Mangisalakan kas paset ti sungbatda.
Ammo ni Jesucristo no kasano a liwliwaennak.
Iladawan tiMosiah 3:7 ken Alma 7:11 ti sumagmamano kadagiti napasaran ti Mangisalakan kas paset ti Pannubbotna. Mabalinyo nga ibasa ti maysa kadagitoy a bersikulo kadagiti annakyo ket idawat kadakuada a dumngeg kadagiti balikas a mangibaga kadakuada no ania ti sinagaba ni Jesus para kadatayo. Kalpasanna mabalinyo a basaen ti Alma 7:12 tapno ammuen no apay a sinagabana daytoy. Paneknekan a narikna ni Jesucristo dagiti amin a saem ken sakittayo tapno maliwliwanatayo.
Adda kadi paborito a himno wenno kanta dagiti annakyo maipapan ken ni Jesucristo ken ti Pannubbotna? Mabalinyo a kantaen dayta nga aggigiddan—wenno agsursuro iti maysa a baro. Pagsaritaanyo dagiti balikas wenno ragup ti balikas kadagiti liriko a mangisuro kadakayo maipapan iti liwliwa ken talna nga idiaya ti Mangisalakan kadatayo.
Madalusannak ni Jesucristo ken matulongannak nga agbalbaliw.
Mangted ti Libro ni Mormon iti adu a pagarigan dagiti tao a nagbalbaliw gapu iti Pannubbot ti Mangisalakan. Nalabit a mabalin a pumili dagiti annakyo iti maysa tapno sursuruen kas ken ni Enos (kitaen iti Enos 1:2–8), Alma nga Ub-ubing (kitaen iti Mosiah 27:8–24), wenno dagiti Anti-Nephi-Lehi (kitaen iti Alma 24:7–19). Kasano a nagbalbaliw daytoy a tao wenno grupo gapu iti Pannubbot ni Jesucristo? Kasano a masurottayo dagiti pagwadanda?
Mabalinyo ken dagiti annakyo pay nga idasig ti maysa a banag a nadalus ken maysa a banag a narugit ket pagsaritaanyo no kasano a mapagbalin a nadalus dagiti narugit a banag. Aggigiddan a basaen ti Alma 13:11–13. Ania ti inaramid ni Jesus tapno mapagbalintayo a nadalus manipud kadagiti basoltayo? Kasano a mangiparikna daytoy kadatayo maipapan iti basol? Kasano a mangiparikna daytoy kadatayo maipapan iti Mangisalakan?
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Agbiag a maikari iti pannarabay ti Espiritu. Ti Espiritu ti pudno a mannursuro. No kalikagumanyo a gun-oden ti pannarabayna, ikkannakayto kadagiti kapanunotan ken impresion maipapan iti no kasano a maipaayyo dagiti kasapulan dagiti sursuruanyo.
