Ni Isaias nga agsursurat kadagiti nalukot a papel

Pebrero 26–Marso 3: “Maawaganto ti Naganna … Ti Prinsipe ti Kappia”

2 Nephi 11–19

Ti panagikitikit kadagiti pinanid a metal ket saan a nalaka, ken bassit ti espasio iti babassit a pinanid ni Nephi. Isu nga apay nga ikagumaan ni Nephi a kopiaen ti adu a sinurat ni propeta Isaias iti kasuratanna? Inaramidna dayta gapu ta kayatna a mamatitayo ken ni Jesucristo. “Maragsakan ti kaunggak,” insuratna, “iti panangipaneknekko kadagiti taok ti kinapudno ti yaay ni Cristo” (2 Nephi 11:4). Nakitan ni Nephi no ania ti mapasamak iti tattaona kadagiti masanguanan a kaputotan. Nakitana nga iti baet dagiti naindaklan a bendisionda, agbalindanto a natangig, mannakisinnupiat, ken nailubongan (kitaen iti 1 Nephi 12; 15:4–6). Nakitana pay dagiti umasping a parikut iti aldawtayo (kitaen iti 1 Nephi 14). Nagballaag dagiti sinurat ni Isaias maibusor iti kasta a kinadangkes. Ngem nangtedda pay ken Nephi iti namnama para iti nadayag a masakbayan—ti gibus ti kinadakes, panaguummong dagiti napudno, ken “dakkel a lawag” para kadagiti tao a “nagna iti kasipngetan” (2 Nephi 19:2). Mapasamak amin daytoy ta “nayanak [idi] ti maladaga” a mangigibus iti amin a sinnupanget—“Ti Prinsipe ti Kappia” (2 Nephi 19:6).

Dagiti Kapanunotan para iti Panagsursuro iti Pagtaengan ken iti Simbaan

Kasano a nasaysayaat a maawatak dagiti pannursuro ni Isaias?

Nabigbig ni Nephi a “saan a nalawag dagiti balikas ni Isaias” (2 Nephi 25:4). Ngem nangted pay isuna iti balakad a makatulong kadatayo a mangsapul iti kaipapanan dagiti sinurat ni Isaias:

• “Yarigmo dagiti balikasna iti” bagim (2 Nephi 11:2). Adu dagiti pannursuro ni Isaias ti aduan kadagiti mabalin a kaipapanan ken pakayaplikaran. Kas pagarigan, no basaenyo ti maipapan kadagiti lugar a pagnaedan iti 2 Nephi 14:5–6, panunotenyo no kasano a mayaplikar dagitoy a bersikulo iti pagtaenganyo. Saludsodenyo iti bagiyo, “Ania ti kayat ti Nailangitan nga Ama a masursurok?”

• Sapulen dagiti simbolo ni Jesucristo (kitaen iti 2 Nephi 11:4). Adu dagiti pannursuro ni Isaias maipapan iti Mangisalakan ti nangted iti kaipapanan babaen kadagiti simbolo. Kas pagarigan, kasano a maibagi ti Mangisalakan iti 2 Nephi 19:2? Ania iti isuro kenka daytoy a simbolo maipapan Kenkuana?

• “Ikalikagum a “mapno iti espiritu ti pammadto” (2 Nephi 25:4). Bayat ti panangadalyo, agkararag para iti naespirituan a pannarabay. Mabalin a diyo maawatan ti amin a banag iti damo, ngem matulongannakayo ti Espiritu nga agsursuro iti no ania ti nasken a maammuanyo.

Mabalin a matakuatanyo pay a makatulong ti agibasar kadagiti tulong iti panagadal kadagiti nasantuan a kasuratan, agraman dagiti listababa [footnote], dagiti paulo ti kapitulo, ken ti Pangiwanwan iti Nasantuan a Kasuratan. Dagiti manual ti institute ti Libro ni Mormon ken Daan a Tulag ket addaan iti nayon nga impormasion a makatulong kadakayo a mangammo maipapan iti napnuan pakasaritaan a konteksto dagiti pannursuro ni Isaias.

2 Nephi 11–19

Pinaneknekan ni Isaias ni Jesucristo.

Gapu ta inusar ni Isaias ti simboliko a pagsasao, mabalin a nalaka a mangtannawag iti nabileg a pammaneknekna ken ni Jesucristo. Sapulenyo ti Mangisalakan iti 2 Nephi 13:13; 14:4–6; 15:1–7; 16:1–7; 17:14; 18:14–15; 22:2. Ania ti isuro kadakayo dagitoy a bersikulo maipapan Kenkuana?

Ilista ti padto iti 2 Nephi 19:6 ti sumagmamano a pangawag ken ni Jesucristo. Kasano nga impatungpalna dagitoy nga akem iti biagtayo?

Kitaen met iti Ulisses Soares, “Jesus Christ: The Caregiver of Our Soul,” Liahona, Mayo 2021, 82–84.

2 Nephi 12–13; 15

Mapakumbabanto dagiti natangig ken nainlubongan.

Nakita ni Nephi idin a ti kinatangig ti makaigapu ti pannakatnag dagiti taona (kitaen iti 1 Nephi 12:19). Isu a saan a makapasiddaaw nga ibinglay ni Nephi kadagiti taona dagiti naulit a ballaag ni Isaias a maibusor iti kinatangig. Kadagiti kapitulo 12 ken 13, sapulenyo dagiti balikas nga inusar ni Isaias a pangiladawan iti kinatangig, kas iti napannakkel ken napalangguad. Iti 2 Nephi 15:1–24, sapulenyo ti simboliko a pagsasao a mangiladladawan kadagiti bunga ti kinatangig. Kalpasanna, mabalinyo a padasen a gupgopen ti nabasayo iti bukodyo a balikas. Panunotenyo no kasano a pilienyonto ti agbalin a napakumbaba.

Kitaen met iti “Chapter 18: Beware of Pride,” Teachings of Presidents of the Church: Ezra Taft Benson (2014), 229–40).

icon iti seminary

2 Nephi 12:2–3

Ti templo ti balay ti Apo.

Inawagan ni Isaias ti templo a “ti bantay ti balay ni Jehova” (2 Nephi 12:2). Apay a nasayaat a simbolo ti maysa a bantay para iti templo?

Kasano ti panangilawlawagyo iti maysa a tao no apay a kasapulantayo dagiti templo? Mabalinyo a masarakan ti sumagmamano a posible a sungbat iti 2 Nephi 12:2–3 ken iti mensahe ni Presidente Russell M. Nelson “The Temple and Your Spiritual Foundation” (Liahona, Nob. 2021, 93–96). Maibasar iti no ania ti nabasayo, ania ti kayat ti Apo a masursuro ken mapadasanyo iti nasantuan a balayna? Ania dagiti napadasanyo sadiay?

Masarakanyo dagiti saludsod iti interbyu iti temple recommend kadagiti panid 36–37 ti Para iti Pigsa dagiti Agtutubo: Maysa a Pangiwanwan iti Panagpili. Ibilangyo ti panangbasa iti tunggal maysa ken saludsodenyo iti bagiyo, ania ti isuro kaniak daytoy a saludsod maipapan kadagiti dalan ti Apo? Kasano a matulongannak daytoy a “magna kadagiti dalanna”?

Kitaen met iti Gospel Topics, “Temples,” Gospel Library; “High on the Mountain Top,” Hymns, no 5.

2 Nephi 12–19

Subbotento ni Jesucristo dagiti taona.

Iti laksid ti kinadakes a napaliiwna, nakita ni Isaias ti namnama para iti masanguanan. Ibilang ti panangadal iti tunggal maysa kadagiti sumaganad a binatog. Isurat ti maysa wenno ad-adu pay a kinapudno nga isuro ti tunggal binatog maipapan iti aldawtayo: 2 Nephi 12:1–5; 14:2–6; 15:20–26; 19:2–8. Apay a mariknayo a napateg dagitoy a binatog tapno maawatantayo?

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Sapulenyo dagiti pagtuladan [pattern]. Kadagiti nasantuan a kasuratan, masarakantayo dagiti pagtuladan a mangipakita kadatayo no kasano nga agtrabaho ti Apo. Iti 2 Nephi 11–19, mabalin a makasapulkayo kadagiti pagtuladan [pattern] a mangipakita no kasano nga agballaag ti Apo iti basol ken mamakawan kadagiti agbabawi.

Dagiti Kapanunotan para iti Panangisuro kadagiti Ubbing

2 Nephi 12:2–3

Ti templo ti balay ti Apo.

• Inladawan ni Isaias ti templo a “ti bantay ti balay ni Jehova.” Mabalin a magustuan dagiti annakyo ti agpammarang a sumangsang-at iti bantay bayat ti panagbasayo iti 2 Nephi 12:2–3. Tulongam ida a mangbirok kadagiti ragup ti balikas kadagitoy a bersikulo a mangiladawan no apay nga addaantayo kadagiti templo.

• Tapno mailadawan ti ragup ti balikas a “magnatayo kadagiti danana” manipud 2 Nephi 12:3, mabalinyo ti mangaramid iti dana iti suelo, nga agturong iti ladawan ti templo. Bayat ti pannagna dagiti annakyo iti dana, mabalinda a dakamaten dagiti banag a mabalinda nga aramiden tapno magnada kadagiti dana ti Apo.

• Awisenyo dagiti annakyo a mangidrowing iti ladawan ti bagbagida a mapmapan iti templo. Mabalinda ti agkansion wenno dumngeg iti maysa a kanta maipapan iti templo kas iti “I Love to See the Temple” (Children’s Songbook, 95). Tulonganyo ida a mangsarak kadagiti ragup ti balikas iti kanta a mangisuro no ania ti templo ken no ania ti aramidentayo sadiay.

2 Nephi 11:4–7; 17:14; 19:6

Ni Jesucristo ti Mangisalakanko.

• Adda sumagmamano a nagan ni Jesucristo iti 2 Nephi 11:4–7; 17:14; 19:6. Tulonganyo dagiti annakyo a mangsapul kadagitoy ken pagsasaritaan no ania ti kayat a sawen dagitoy. Kas pagarigan, ti “Cristo” kaipapananna “ti napulotan” ken ti “Imanuel” kaipapananna ti “kaduatayo ti Dios.” Ania ti isuro kadatayo dagitoy a nagan maipapan ken ni Jesus?

• Ipabuyayo dagiti paset ti video a “The Christ Child” (Gospel Library) a mangipakita iti nagduduma a tattao a kumitkita ken Jesus iti umuna a gundaway. Isardengyo ti video bayat dagitoy a panangiladawan, ket damagenyo kadagiti annakyo no ania koma ti narikna dagitoy a tao. Ania koma ti mariknatayo no addatayo sadiay? Kasanonto ti riknatayo no makitatayo manen Isuna?

2 Nephi 15:20

Padasen ni Satanas ti mangallilaw kaniak maipapan iti naimbag ken dakes.

• Ipakitayo kadagiti annakyo ti maysa a banag a napait wenno naalsem, kas iti sangaiwa a lemon, iti uneg ti maysa a bungon ti kendi. Aggigiddan a mangbasa iti 2 Nephi 15:20. Kasano a padasen ni Satanas nga aramiden dagiti banag a dakes nga aglanga a nasayaatda? Mabalinyo met nga ipakita ti umuna a 90 a segundo ti video a “You Will Be Freed” (Gospel Library). Apay nga ilimlimo ti mangngalap ti kawitna? Apay nga ilimlimo ni Satanas ti basol? Kasano a tulongannatayo ti Apo a mangliklik iti panangallilaw ni Satanas?

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Templo iti Panama City Panama

Templo iti Panama City Panama. “Maipasdekto ti balay ti Apo iti tuktok dagiti bantay, … ket pagdudupudopanto dagiti amin a pagilian” (2 Nephi 12:2).

panid ti aktibidad: ti templo ti balay ti Apo