“Marso 11–17: ‘Datdatlag nga Aramid ken Pagsidsiddaawan.’ 2 Nephi 26–30,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
Marso 11–17. 2 Nephi 26–30,” Umaykayo, Sumurot Kaniak—Para kadagiti Indibidual ken Pamilia: 2024 (2024)
Kibinen nga Iturongnakanto, ni Sandra Rast
Marso 11–17: “Datdatlag nga Aramid ken Pagsidsiddaawan”
2 Nephi 26–30
“Ipadtok kadakayo ti maipanggep kadagiti maudi nga aldaw,” insurat ni Nephi (2 Nephi 26:14). Iti sabali a pannao, nagsursurat isuna maipapan iti aldawtayo. Ket adda gapu tapno maseknan maipapan iti nakitana: dagiti tao a mangiliblibak iti bileg ken dagiti milagro ti Dios, napalalo nga apal ken panagririri. Ngem kas mainayon kadagitoy nga “aramid ti kasipngetan” iti ud-udina nga aldaw (2 Nephi 26:10, 22) nga iturong ti kabusor, nagsao met ni Nephi maipapan iti “datdatlag nga aramid ken pagsidsiddaawan” nga inturong ti Apo mismo (2 Nephi 27:26). Kangrunaan iti dayta nga aramid ti agbalinto a maysa a libro—maysa a libro a mangibutaktak kadagiti kinaulbod ni Satanas, ken mangummong kadagiti nalinteg. Dayta a libro ket ti Libro ni Mormon, ti nakaskasdaaw nga aramid ket ti aramid ti Simbaan ti Apo kadagiti ud-udina nga aldaw, ket ti pagsidsiddaawan ket—iti uray paset laeng—nga awisennatayo amin ti Dios, iti baet dagiti pagkapsutantayo, tapno makiraman iti panaguummong.
Dagiti Kapanunotan para iti Panagsursuro iti Pagtaengan ken iti Simbaan
Insagana ti Dios ti Libro ni Mormon para iti aldawtayo.
Iti 2 Nephi 26–27, kaaduan nga inadaw ni Nephi iti immun-una a padto ni Isaias (kitaen iti Isaias 29) ket inyarigna daytoy kadagiti taona ken iti kasuratanda—ti Libro ni Mormon. Naammuan ni Nephi babaen ti paltiing, uray idi sakbay a naan-anay a naisurat ti Libro ni Mormon, nga iti maysa nga aldaw “napategto unay kadagiti annak ti tattao” (2 Nephi 28:2). Kasano a dakkel ti pateg kadakayo ti Libro ni Mormon? Panunotenyo maipapan iti daytoy a saludsod bayat ti panangbasayo iti 2 Nephi 29–30. Ania dagiti sumagmamano a “nakaskasdaaw nga aramid” (2 Nephi 27:26) nga ipatpatungpal ti Dios iti lubong ken iti biagmo babaen ti Libro ni Mormon?
Kitaen iti Joseph Smith—Pakasaritaan 1:62–65.
Awisennatayo ni Jesucristo nga umasideg Kenkuana.
Adu dagiti napipintas a kinapudno a maibilang iti 2 Nephi 26:23–24. Kas pagarigan, mabalinyo a panunoten ti inaramid ni Jesucristo “agpaay iti pagimbagan ti lubong”—ken para kadakayo. Kasano a “mayasideg[na] amin dagiti tao”—ken dakayo—“kenkuana”? Ania ti mariknayo a makaparegta nga aramiden kas sungbat kadagiti panangipeksaanna iti ayat?
Agtultuloy ti panagbasa ken panagsapul kadagiti kinapudno maipapan iti Mangisalakan kadagiti bersikulo 25–33. Kitaenyo nangnangruna dagiti awisna. Kasano ti pananggupgopyo iti mensahe ni Jesucristo kadakayo iti maysa a binatog? Ti maysa a himno a kas iti “Come unto Jesus” (Hymns, no. 117) ket makalukat iti panunotyo kadagiti mainayon nga impresion.
Ibilang no kasano a makaimpluensia dagitoy a bersikulo iti wagas a pakilangenan ken pangawisanyo iti dadduma nga umasideg ken ni Cristo. Mabalin a masarakam ti sumagmamano a kapanunotan iti mensahe ni Elder D. Todd Christofferson “The Doctrine of Belonging” (Liahona, Nob. 2022, 53–56).
Kitaen met iti 3 Nephi 18:30–32; Dallin H. Oaks, “What Has Our Savior Done for Us?,” Liahona, Mayo 2021, 75–77; Gospel Topics, “Belonging in the Church of Jesus Christ,” Gospel Library.
Saan nga agbuteng iti panagulimek. Agkasapulan iti oras dagiti napipintas a saludsod tapno masungbatan. Agkasapulan dagitoy iti panagsukisok, panagutob, ken inspirasion. Ti oras a bubosenyo iti panagur-uray kadagiti sungbat iti maysa a saludsod ket mabalin a maysa a sagrado nga oras ti panagutob. Liklikam ti masulisog a mangigibus a nasapa unay iti daytoy nga oras babaen ti yaakarmo iti sabali a topiko.
Kalikaguman ni Satanas ti mangallilaw.
Adu dagiti kinaulbod ken taktika ni Satanas a naibutaktak iti 2 Nephi 28. Sapulen dagitoy kadagiti bersikulo 6, 8, 21–23, 29. Apay a nasken a maammuanyo ti maipapan kadagiti kinaulbod ni Satanas? Anianto iti aramidenyo no gandatennakayo nga allilawen ti kabusor?
Nailista iti baba ti sumagmamano a nasantuan a kasuratan a mangilaksid kadagiti kinaulbod ni Satanas. Kitaenyo no maiparisyo ti pudno a doktrina kadagitoy a bersikulo iti palso a doktrina a pangballaagannatayo ni Nephi iti 2 Nephi 28:
-
2 Nephi 2:17: adda maysa a sairo (2 Nephi 28:22: “saanak a sairo, gapu ta awan”)
Kitaen met iti Gary E. Stevenson, “Deceive Me Not,” Liahona, Nob. 2019, 93–96.
Agtultuloy ti Dios a mangted iti paltiing a mangtarabay kadagiti annakna.
Kas Santo iti Ud-udina nga Aldaw, maparaburantayo iti kinawadwad ti balikas ti Dios. Ket, kas imballaag ni Nephi, nasken a ditayo pulos marikna nga “addaantayo iti umdas!” Bayat ti panangbasayo kadagiti ballaag iti 2 Nephi 28:27–31 ken 2 Nephi 29, panunotenyo maipapan kadagiti saludsod a kas kadagitoy:
-
Kasano ti kayat ti Apo a panangriknak ken panangsungbatko iti balikasna?
-
Apay a “makapungtot” no dadduma dagiti tao maipapan iti panangawat iti ad-adu pay a kinapudno manipud iti Dios? (2 Nephi 28:28). Mariknak kadi ti kastoy? No kasta, kasano a makapagbalbaliwak?
-
Ania ti kayat a sawen ti umawat iti balikas ti Dios? Kasano a maipakitak Kenkuana a kayatko ti umawat iti ad-adu pay iti balikasna?
Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.
Dagiti Kapanunotan para iti Panangisuro kadagiti Ubbing
Kayat ni Jesucristo nga umasideg ti tunggal maysa Kenkuana.
-
Tapno maisuro dagiti annakyo maipapan kadagiti awis ti Mangisalakan kadagitoy a bersikulo, mabalinyo ti makisarita kadakuada maipapan kadagiti panawen nga inawisda dagiti tao iti naisangsangayan a pasken, kas iti birthday party. Kalpasanna mabalinyo nga aggigiddan a mangbasa iti 2 Nephi 26:23–28 ken mangsapul iti no ania ti yaw-awis ni Jesus nga aramidentayo. Mabalin a kayat dagiti annakyo ti mangaramid iti kard wenno surat a mangaw-awis iti maysa a tao nga umasideg ken ni Jesucristo. Allukoyenyo ida a mangusar iti ragup ti balikas manipud kadagitoy a bersikulo iti mensaheda.
-
Ti naipinta a ladawan iti ngudo daytoy a balabala ket mangipakita kadagiti tao manipud iti adu a pakasaritaan (background). Mabalin a kitaen dagiti annakyo daytoy a ladawan bayat ti panangbasayo iti 2 Nephi 26:33. Mabalinyo nga uliten ti ragup ti sasao nga “Aw-awisen ni Jesus ti amin nga umay Kenkuana” bayat ti panangitudo dagiti annakyo iti tunggal tao iti ladawan—ken kalpasanna iti bagbagida. Kasano nga umaytayo ken ni Jesus?
-
Maysa a kanta maipapan iti panagayat iti amin a tao, kas iti “I’ll Walk with You” (Children’s Songbook, 140–41), ket makatulong kadakayo a mangisuro iti mensahe ti 2 Nephi 26:33.
Ti Libro ni Mormon ket maysa a bendision.
-
Tapno matulongan dagiti annakyo a makarikna a ti Libro ni Mormon ket “dakkel ti pategna” (2 Nephi 28:2), mabalinyo ti mangbungon iti maysa a kopia kas sagut ket papugtuanyo kadakuada no ania ti adda iti uneg. Mabalinda a sapulen dagiti pamugtuan iti 2 Nephi 30:3–6. Ibagayo kadagiti annakyo no apay a dakkel ti pateg ti Libro ni Mormon kadakayo.
-
Ibilangyo ti panangidawat kadagiti annakyo a mangipapan a kuna kadakuada ti maysa a gayyem, “Diak kasapulan a basaen ti Libro ni Mormon. Nalpaskon a binasa ti Biblia.” Ania koma ti maisaotayo iti gayyemtayo? Aggigiddan a mangbasa iti 2 Nephi 29:7–11 tapno maammuan no apay a kayat ti Dios a maaddaantayo iti agpada a libro.
Suruannak ti Nailangitan nga Ama nga in-inut.
-
Nalabit a makapagpanunotkayo iti maysa a banag nga adalen wenno aktibidad a mangtulongto kadagiti annakyo a makaawat no ania ti kaipapanan ti agsursuro iti “tunggal binatog.” Kas pagarigan, mabalinda ti mangbukel iti maysa a puzzle wenno mangaramid iti maysa a banag babaen kadagiti bloke, saggaysa a pedaso iti maminsan. Wenno mabalinyo ti mangisuro kadakuada iti maysa a paglaingan iti tunggal addang, kas iti panangisiglot iti laso wenno panagdrowing iti maysa a ladawan. Kalpasanna mabalinyo a basaen ti 2 Nephi 28:30 ken pagsasaritaan no kasano nga isuronatayo ti Nailangitan nga Ama iti maysa a kinapudno iti maminsan.
-
Ti sabali pay a kapanunotan ket mabalin a mangpili iti maysa a ragup ti balikas manipud iti 2 Nephi 28:30 ken agsisinnublat a mangisurat iti daytoy, maysa a balikas iti maminsan. Kasano a maipada daytoy nga aktibidad iti wagas a panangted ti Dios kadatayo iti kinapudno? Apay nga ipalgak ti Dios ti kinapudno kadatayo nga “ibinsabinsa, bilin iti bilin, sangkabassit ditoy ken sangkabassit idiay” imbes a mamimpinsan amin? Kasano a maipakitatayo iti Dios a kayattayo ti umawat iti ad-adu pay a kinapudno manipud Kenkuana?
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Ni Cristo iti Tengnga, ni Judith A. Mehr