Ania ti Inaramid ti Mangisalakantayo para Kadatayo?
Inaramiden ni Jesucristo ti amin a banag a kasapulan iti panagdaliasattayo nga agturong iti pagtungpalan a nabalabala iti plano ti Nailangitan nga Amatayo.
Iti miting ti sardam ti Sabado iti stake conference adun a tawen ti naglabas, naam-ammok ti babai a nagkuna a kiniddaw ti gagayyemna nga agsubli iti simbaan kalpasan ti adu a tawen a dina panagaktibo, ngem di makapanunot iti ania man a rason no apay nga agsubli. Tapno maallukoy, kinunak, “No ibilangmo amin dagitoy a banag nga inaramid ti Mangisalakan para kenka, adu ti rasonmo nga agsubli nga agrukbab ken agserbi Kenkuana.” Nasdaawak idi insungbatna, “Ania ti inaramidna para kaniak?”
Ania ti inaramiden ni Jesucristo para iti tunggal maysa kadatayo? Inaramidna ti amin a banag a kasapulan iti panagdaliasattayo nga agturong iti pagtungpalan a nabalabala iti plano ti Nailangitan nga Amatayo. Saritaek ti uppat a kangrunaan a sagudayen dayta a plano. Iti tunggal maysa kadagitoy, ti Bugbugtong nga Anakna, ni Jesucristo, ti kangrunaan a tao. Maparparegta iti amin daytoy “ti ayat ti Dios, a nangyagsep iti bagina kadagiti puso dagiti annak ti tao; gapuna, isu ti kangrunaan a matarigagayan iti amin a banag” (1 Nephi 11:22).
I.
Sakbay laeng ti Easter Sunday, apagisu ti panagsaritak nga umuna iti Panagungar ni Jesucristo. Ti Panagungar manipud iti patay ket panangipanamnama iti bukod nga adigi ti pammatitayo. Mangnayon daytoy iti kaipapanan ti doktrinatayo, mangparegta iti ugalitayo, ken namnama iti masakbayantayo.
Gapu ta mamatitayo kadagiti panangiladawan ti Biblia ken Libro ni Mormon iti literal a Panangungar ni Jesucristo, awatentayo pay ti adu a pannursuro iti scripture a dumtengto ti kasta met la a panagungar iti amin a mortal a nagbiag ditoy daga.1 Kas insuro ni Jesus, “Gapu ta agbiagak, agbiagkayto met” (Juan 14:19). Insuro dagiti Apostolna a “dagiti natay agungardanto a di agrupsa” ken “daytoy bagi a matay agkawesto iti saan nga ipapatay” (1 Taga Corinto 15:52, 54).
Ngem ti Panagungar ikkannatayo iti ad-adda ngem itoy a pammatalged ti imortalidad. Balbaliwanna ti wagas a panangkitatayo iti mortal a biag.
Ikkannatayo ti Panagungar iti pannirigan ken pigsa nga agibtur iti karit a sarangten ti tunggal maysa kadatayo ken dagiti ipatpategtayo. Ikkannatayo iti baro a wagas a mangkita iti pisikal, mental, emosional a pagkurangan idi nayanak wenno naalatayo iti mortal a biag. Ikkannatayo iti pigsa nga agibtur kadagiti ladingit, pannakaupay, ken pannakapaaytayo. Gapu ta addaantayo amin iti manamnama a panagungar, ammotayo a temporario laeng dagitoy a pagkurangan ti bagi ken oposision.
Ikkannatayo pay ti Panagungar iti nabileg nga insentibo nga agtungpal iti bilbilin ti Dios bayat ti mortal a biagtayo. No agungartayo manipud iti patay ket agtuloytayo iti naipadto a Maudi a Manangukom, kayattayo ti maikari kadagiti kangrunaan a bendision a naikari kadagiti nagungar a parsua.2
Mainayon pay, ti kari a mairaman ti Panagungar ti maysa a gundaway a makadennatayo dagiti miembro ti pamiliatayo—asawa, annak, nagannak, ken kaputotan—maysa a nabileg a pammaregta a mangipatungpal iti pagrebbengantayo iti pamilia iti mortalidad. Tulongannatayo pay nga agbiag a sangkamaysa iti ayat ditoy a biag, ken liwliwaennatayo iti ipapatay dagiti patpatgentayo. Ammotayo a temporario laeng dagitoy mortal a panagsina, ken namnamaentayo ti masakbayan a narag-o a panagtitipon ken panaglalangen. Ikkannatayo ti Panagungar iti namnama ken pigsa nga aganus bayat ti panaguraytayo. Isagananatayo pay nga addaan tured ken dignidad a mangsango iti bukodtayo nga ipapatay—uray ipapatay a maawagan iti saan pay a panawen.
Amin dagitoy nga epekto ti Panagungar ket paset ti umuna a sungbat iti saludsod “Ania ti inaramid ni Jesucristo para kaniak?”
II.
Para iti kaaduan kadatayo, ti gundaway a mapakawan iti basbasoltayo ket ti kadakkelan a kaipapanan ti Pannubbot ni Jesucristo. Iti panagdayaw, siraraem nga ikantatayo:
Imbukbokna ti napateg a darana;
Intedna a siwawaya ti biagna,
Awan basol a sakripisiona,
Mangispal iti matay a lubong.3
Inibturan ti Mangisalakan ken Mannubbottayo ti di matukod a panagsagaba tapno agbalin a maysa a sakripisio para iti basbasol ti amin a mortal nga agbabawi. Indiaya daytoy pangsubbot a sakripisio ti kasayaatan a banag—ti natarnaw a kordero nga awan mulitna—para iti kabgrunaan a kadagupan ti dakes, ti basbasol ti sangalubongan. Linuktanna ti ridaw tapno madalusan ti tunggal maysa kadatayo iti bukodtayo a basbasol tapno mabalin a maawattayo manen iti sidong ti Dios, ti Agnanayon nga Amatayo. Adda a magun-od daytoy nakalukat a ridaw ti amin nga annak ti Dios. Idaydayaw, nga ikantatayo:
Dayawek ti ibababana iti tronona
Ta umayna isalakan dang-as a kararua,
Pagtamdak panangipategna iti kas kaniak.4
Ti nangayed ken di matukod nga epekto ti Pannubbot ni Jesucristo maibatay iti ayat ti Dios para kadatayo amin. Pasingkedanna ti panangipakdaarna a “ti pateg dagiti kararua”—a ti tunggal tao—”napateg iti imatang ti Dios” (Doktrina ken Katulagan 18:10). Iti Biblia, inlawlawag ni Jesucristo daytoy no maipanggep iti ayat ti Nailangitan nga Ama: “Ta kasta la unay ti panagayat ti Dios iti lubong, nga intedna ti Anakna a bugbugtong, tapno amin a mamati kenkuana, saan a mapukaw, no di ket adda biagna nga agnanayon” (Juan 3:16 Iti moderno a paltiing, impakdaar ti Mannubbottayo, ni Jesucristo nga Isu “a nangayat iti lubong a nangtedanna iti bukodna a biag, tapno kas iti kaadu ti mamati makapagbalinda nga annak ti Dios” (Doktrina ken Katulagan 34:3).
Nakaskasdaaw kadi, no kasta, a ti Libro ni Mormon, Mainayon a Pammaneknek ken ni Jesucristo, igibusna iti panangisuro a ti panagbalin a “naan-anay” ken “napasanto ken ni Cristo,” naskentayo nga “ayaten[tayo] ti Dios iti amin a kabaelan, panunot ken pigsa[tayo]” (Moroni 10:32–33). Ti planona a pinaregta ti ayat maawat koma iti ayat.
III.
Ania pay ti Inaramid ti Mangisalakantayo, ni Jesucristo, para kadatayo? Babaen ti pannursuro dagiti propetana ken ti personal a panagministrona, sinuruannatayo ni Jesus iti plano ti pannakaisalakan. Mairaman ditoy a plano ti panagparsua, ti panggep ti biag, ti panagkasapulan iti oposision, ken ti sagut ti karbengan nga agpili. Sinuruannatayo pay kadagiti bilin ken katulagan a nasken a tungpalentayo ken dagiti ordinansa a nasken a pasarantayo a mangisubli kadatayo kadagiti nailangitan a nagannaktayo.
Iti Biblia, mabasatayo ti pannursurona: “Siak ti silaw ti lubong: ti sumurot kaniak saanto a magna iti sipnget, no di ket addanto kenkuana ti silaw ti biag” (Juan 8:12). Ken iti moderno a paltiing mabasatayo, “Adtoy, siak ni Jesucristo, … silaw a saan a mailemmeng iti sipnget” (Doktrina ken Katulagan 14:9). No surotentayo dagiti sursurona, silawanna ti danatayo itoy a biag ken ipanamnamana ti pagtungpalantayo kalpasanna.
Gapu ta patpatgennatayo, karitennatayo nga agpokus Kenkuana imbes nga iti bambanag daytoy a mortal a lubong. Iti naindaklan a kaskasabana iti tinapay ti biag, insuro ni Jesus a nasken a ditayo maibilang kadagiti aggusto unay iti bambanag ti lubong—dagiti bambanag a mangsuporta iti biag iti daga ngem saan a mangted iti pannakataraon iti agnanayon a biag.5 Kas iti kanayon ken kanayon nga inyawis ni Jesus kadatayo, “Surotendak.”5
IV.
Kamaudiananna, isuro ti Libro ni Mormon a kas paset ti Pannubbotna, ni Jesucristo “[n]agitured iti saem ken rigat ken amin a kita ti sulisog; ket daytoy tapno matungpal ti balikas a nagkuna a sagabaennanto ti saem ken saksakit dagiti taona” (Alma 7:11).
Apay a sinagaba ti Mangisalakan dagitoy mortal a karit “iti tunggal kita”? Inlawlawag ni Alma, “Ken awatenna ti pagkuranganda, tapno mapno ti lalaemna iti kaasi, a maibatay iti lasag, tapno maammuanna a maibatay iti lasag no kasano nga alawenna dagiti taona a maibatay kadagiti pagkuranganda” (Alma 7:12).
Marikna ken ammo ti Mangisalakan dagiti sulisogtayo, dagiti rigattayo, dagiti sakittayo, ken dagiti sagabaentayo, ta siaayat a pinasaranna amin dagitoy kas paset ti Pannubbotna. Pasingkedan ti dadduma a nasantuan a kasuratan daytoy. Ipakdaar ti Baro a Tulag, “Ta gapu ti panagsagaba na met laeng iti pannakasulisog, mabalinna a badangan dagiti nasulisog” (Hebreo 2:18). Isuro ni Isaias “Dika agbuteng ta addaak kenka: … papigsaenkanto; wen tulongankanto” (Isaias 41:10). Amin nga agsagaba iti ania man a kita ti sakit nasken a lagipenda a napadasan met ti Mangisalakantayo dayta a kita ti saem, ken babaen ti Pannubbotna, idiayaannatayo iti pigsa nga agibtur iti daytoy.
Ginupgop ni Propeta Joseph Smith ti amin daytoy iti maikatlo a pagannurotan ti pammatitayo: “Mamatikami a babaen ti Pannubbot ni Cristo, maisalakan ti amin a sangkataw-an, babaen ti panagtungpal kadagiti paglintegan ken ordinansa ti Ebanghelio.”
“Ania ti inaramid ni Jesucristo para kaniak?” dinamag daydiay a kabsat a babae. Babaen ti plano ti Nailangitan nga Amatayo, “pinarsuana dagiti langit ken daga” (Doktrina ken Katulagan 14:9) tapno maaddaantayo iti mortal a padas a kasapulan iti panagsapul iti nadiosan a pagtungpalantayo. Kas paset ti plano ti Ama, pinarmek ti Panagungar ni Jesucristo ti ipapatay a mangipanamnama kadatayo ti imortalidad. Ti pangsubbot a sakripisio ni Jesucristo ikkannatayo iti gundaway nga agbabawi iti basbasoltayo ken agsubli a nadalus iti nailangitan a pagtaengantayo. Ipakita kadatayo dagiti bilin ken katulaganna ti dalan, ken ited ti priesthoodna ti turay a mangannong iti ordinansa a kasapulan tapno maragpat dayta a pagtungpalan. Siaayat a sinagaba ti Mangisalakantayo ti amin a saem ken sakit tapno ammona no kasano a papigsaennatayo iti rigrigattayo.
Inaramid ni Jesucristo amin daytoy gapu ta ipatpategna ti amin nga annak ti Dios. Ti ayat isu ti motibasion iti amin daytoy, ket kasta ngarud manipud pay iti rmismo a punganayna. Imbaga ti Dios kadatayo iti moderno a paltiing a “pinarsuana … ti lalaki ken babai, iti ladawanna … ken inikkanna ida iti bilbilin a nasken nga agayat ken agserbida kenkuana” (Doktrina ken Katulagan 20:18–19).
Paneknekak ti amin daytoy ket ikararagko a lagipentayo koma amin ti inaramid ti Mangisalakantayo para iti tunggal maysa kadatayo ken agayat ken agserbitayonto amin Kenkuana, iti nagan ni Jesucristo, amen.