Bendision iti Naganna
Ti panggep ti panangawattayo ti priesthood ket mapalugodantayo a mangbendision kadagiti tao para iti Apo, iti naganna.
Patpatgek a kakabsatko, a pada a katulongan iti priesthood ti Dios, pakaidayawak ti agsao kadakayo ita a sardam. Itedko kadakayo ti respeto ken panagyamanko. No makisarsaritaak kadakayo ken mangngegko ti dakkel a pammatiyo, mamatiak nga adda dumakdakkel a bileg ti priesthood ditoy lubong, nga addaan napigpigsa a korum ken dagiti napudpudno nga agik-ikut ti priesthood.
Iti sumagmamano a kanito a kaduakayo ita a sardam, agsaoak kadakayo a mayat nga agbalin nga ad-adda pay nga epektibo iti personal a serbisioyo iti priesthood. Ammoyo ti bilin a masapul a padakkelenyo ti awagyo nga agserbi.1 Ngem masdaawkayo ngata no ania ti kayat a sawen kenka ti padakkelen ti awagyo.
Rugiak kadagiti kabarbaro a deacon gapu ta nalabit a dida ammo ti kaipapanan ti panangpadakkel iti serbisioda iti priesthood. Kayat met ngata dagiti kabarbaro a naordenan nga elder ti dumngeg. Ken ti maysa a bishop kadagiti umuna a lawas ti panagserbina ket mabalin nga interesado met.
Masursuruanak a manglagip kadagidi aldaw a maysaak a deacon. Kayatko nga adda koma nangibaga kaniak iti isingasingko ita. Nakatulong koma kadagiti amin a pagrebbengak iti priesthood a dimteng kaniak manipud pay idi—uray pay dagiti awatek iti agdama nga aldaw.
Naordenannak a maysa a deacon iti maysa a bassit unay a branch a siak laeng ti deacon ket ni manongko a Ted laeng ti teacher. Dakami laeng ti pamilia iti branch. Agmiting ti sibubukel a branch iti pagtaenganmi. Ti priesthood leadermi nga agkabsat ket ti maysa a baro a convert a kaaw-awatna laeng ti priesthood mismo. Mamatiak a ti pagrebbengak laeng iti priesthood ket agipasa iti sakrament iti bukodko a siled a panganan.
Idi immakar ti pamiliak iti Utah, nasarakak ti bagik iti dakkel a ward nga adu ti deacon. Iti umuna a mitingko iti sakrament sadiay, napaliiwko dagiti deacon—maysa a buyot, panagkunak—a nagsayaat ti panagipasada iti sakrament a kasla nasanay a team.
Nagbutengak unay nga iti sumaruno a Domingo nasapa a napanak a sisiak iti pasdek ti ward nga awan ti makakita kaniak. Malagipko a daytoy ti Yalecrest Ward iti Salt Lake City, ken adda maysa nga estatua iti arubayan. Napanak iti likud ti estatua ket sipapasnek nga inkararagak ti tulong tapno maammuak no kasano ti saan a mapaay iti panagipasak iti sakrament. Nasungbatan dayta a kararagko.
Ngem ammok itan nga adda nasaysayaat a wagas tapno agkararag ken agpanunot bayat ti panagdur-astayo iti serbisiotayo iti priesthood. Dimteng daytoy babaen ti pannakaawatko no apay a maikkan dagiti tao iti priesthood. Ti panggep ti panangawattayo iti priesthood ket mangpalugod kadatayo a mangbendision iti tao para ti Apo, iti naganna.2
Tawtawen kalpasan a nagbalinak a deacon idi nasursurok no ania ti kaipapanan dayta. Kas pagarigan, kas maysa a high priest, nadutokannak a mangbisita iti miting ti sakrament iti sentro a pagaywanan. Nakiddaw nga agipasaak iti sakrament. Imbes a panunotek maipapan iti proseso wenno kinahusto iti panagipasak iti sakrament, kinitak ketdi ti rupa ti tunggal baket ken lakay. Nakitak ti adu kadakuada nga agsangsangit. Maysa a baket ti nanggammat ti manggasko, timmangad, ket kinunana iti napigsa “O, agyamanak, agyamanak.”
Binendisionan ti Apo ti panagserbik a naited iti naganna. Nagkararagak iti dayta nga aldaw para iti dayta a milagro a dumteng imbes nga ikararagko a maaramidko a nasayaat ti pasetko. Inkararagko a marikna koma dagiti tao ti ayat ti Apo babaen ti naayat a panagserbik. Naadalko a daytoy ti tulbek iti panagserbi ken panangbendision iti dadduma babaen iti naganna.
Nangngegko ti maysa a padas a nangipalagip kaniak iti kasta nga ayat. Idi napasardeng ti amin a miting ti Simbaan gapu iti COVID-19 pandemic, inawat ti ministering brother ti pagrebbengan manipud iti elders quorum president-na a mangbendision ken mangannong iti sakrament iti maysa a kabsat a babai a pagserbianna. Idi inawaganna isuna a mangyeg iti sakrament, nagkedked daytoy, ta kagurana a rummuar isuna iti bukodna a balay iti kasta a napeggad nga oras ken mamati pay nga agsublinto met laeng iti normal dagiti banag.
Idi simmangpet isuna iti pagtaenganna iti dayta a Domingo, adda indawatna. Mabalinda kadi ti mapan iti bangir a ridaw ket ikkanda met iti sakrament ti kaarrubana nga agtawen ti 87? Immanamong babaen ti pammalubos ti bishop.
Iti uneg ti adu a lawas, nga addaan iti naannad a social distancing ken dadduma pay panagtalged, naguummong ti bassit a grupo dagiti Santo iti kada Domingo para iti simple a serbisio iti sakrament. Bassit laeng a pedaso ti napirsapirsay a tinapay ken kopa iti danum—ngem adu a lua ti nagarubos gapu iti kinaimbag ti naayat a Dios.
Iti umno a panawen, nakasubli met laeng iti simbaan ti ministering brother, ti pamiliana, ken ti sister a pagserbianna. Ngem ti 87 ti tawenna a balo a babai, ti kaarruba, gapu iti kaadu ti panagannad, nasken nga agbati iti pagtaengan. Ti ministering brother—laglagipen a ti pagrebbenganna ket iti kaarrubana ken saan a kadaytoy mismo a baket—agpapan ita mapmapan latta iti pagtaenganna tunggal Domingo, adda iggemna a nasantuan a kasuratan ken bassit a tinapay, tapno annongenna ti sakrament iti Pangrabii ti Apo.
Ti serbisiona iti priesthood, kas kaniak iti dayta nga aldaw iti sentro a pagaywanan, naited gapu iti ayat. Kinapudnona, itay nabiit dinamag daytoy a ministering brother iti bishopna no adda pay sabali iti ward a mabalinna nga aywanan. Dimmakkel ti tarigagayna a mangpadakkel iti priesthood service-na bayat ti panagserbina iti nagan ti Apo iti wagas nga Isu laeng ti makaammo. Diak ammo no nagkararag daytoy a ministering brother, kas inaramidko, para kadagiti pagserbianna tapno maammuanna ti ayat ti Apo, ngem gapu ta nagserbi iti nagan ti Apo, ti bungana isu met laeng.
Isu met laeng ti napintas a bungana no agkararagak sakbay a mangtedak ti priesthood blessing iti maysa a tao a masakit wenno ti oras ti panagkasapulan. Napasamak iti naminsan iti ospital idi piniltdak dagiti awan anusna a doktor—ad-adda pay a pinilitdak—binilindak nga—listuak ti pumanaw tapno maaramidda ti trabahoda, imbes koma nga ikkandak iti gundaway a mangted iti priesthood blessing. Nagbatiak, ket inted ti bendision. Ket nagbiag dayta bassit nga ubing a babai a binendisionak iti dayta nga aldaw, nga impagarup dagiti doktor a matay. Agyamanak iti daytoy a kanito nga iti dayta nga aldaw, diak ipalubos ti bukodko a rikna a mapaay ngem tinarigagayan ti Apo a maaddaan dayta bassit nga ubing a babai ti maysa a bendision. Ket ammok no ania idi dayta a bendision: Binendisionak isuna tapno malaingan. Ket nalaingan.
Napasamaken iti adu a daras bayat ti panangtedko ti blessing iti maysa a dumanin matay, linawlaw dagiti miembro ti pamiliana ti iddana, mangnamnama iti bendision ti pannakaagas. Uray addaanank laeng iti bassit a kanito, agkararagak tapno ammuek no ania ti bendision nga insagana ti Apo a maitedko iti naganna. Ket dawatek a maammuak no kasano ti kayatna a panangbendision iti dayta a a tao a saan ket a ti kayatko wenno ti kayat ti adda iti lawlawna. Ti padasko ket uray saan a ti kayatda a bendision para kadakuada wenno iti ay-ayatenda ti dumteng, tignayen ti Espiritu ti puspuso a makapadas iti panangawat ken pannakaliwliwa imbes a pannakapaay.
Umay ti kasta met laeng nga inspirasion no agayuno ken agkararag dagiti patriarka para iti pannarabay tapno maitedda ti bendision a kayat ti Apo para iti dayta a tao. Manen, nakangngegak kadagiti naited a bendision a nangpasiddaaw kaniak ken ti tao nga umaw-awat iti bendision. Nalawag, ti bendision a naggapu iti Apo—agpada a dagiti ballaag a linaonna kasta met dagiti kari a naibinglay iti naganna. Ginunggonaan ti Apo ti kararag ken panagayuno ti patriarka.
Kas maysa a bishop, nasursurok ti agkararag iti Apo bayat ti panangiturongko kadagiti worthiness interview tapno iparikna ti Apo kaniak no ania ti kayatna para iti dayta a tao, a mangpatpatalinaed iti ania man nga inspirasion nga itedna a saan a makullaapan ti bukodko a pangngeddeng. Narigat dayta no ti Apo, iti ayatna, kayatna a bendisionan ti taoiti pannakaatur. Narigat a mailasin no ania ti kayat ti Apo manipud iti no ania ti kayatyo wenno ti mabalin a kayat ti sabali a tao.
Kabaelantayo ti magpadakkel iti priesthood service-tayo ditoy a biag ken iti nalabit nga aglabes pay. Agpannurayto daytoy iti kinapasnek iti panangpadas a mangammo iti pagayatan ti Apo ken dagiti panagkagumaantayo a dumngeg iti timekna tapno nasaysayaat a maammuantayo no ania ti kayatna para iti tao a pagserserbiantayo para Kenkuana. Dumteng dayta a panangpadakkel babaen iti babassit nga addang. Mabalin nga umay nga in-inut, ngem umayto. Ikari ti Apo daytoy kadatayo:
“Ta asino man a napudno iti pananggun-odda kadagitoy dua a kinasaserdote a nasaokon, ken mangipateg iti akemda, pasantuen ti Espiritu iti pannakapabaro dagiti bagida.
“Agbalinda nga annak ni Moises ken ni Aaron ken bukel ni Abraham, ken simbaan ken pagarian, ken pili ti Dios.
“Ken kasta met nga asino man nga umawat iti daytoy a kinasaserdote awatennak, kinuna ti Apo.”3
Paneknekak a naisublin dagiti tulbek ti priesthood ken ni Propeta Joseph Smith. Dagiti katulongan ti Apo nagparangda manipud langit tapno isublida ti priesthood para iti naindaklan a paspasamak a naipakaammon ken adda iti masangnguanantayo. Maummongto ti Israel. Nakasagananton dagiti tao ti Apo para iti nadayag a Maikadua a Yaayna. Agtultuloyto ti Pannakaisubli. Ad-adunto pay ti ipalgak ti Apo a pagayatanna babaen dagiti propetana ken dagiti katulonganna.
Mabalin a bassit ti panagriknam a maidasig iti dakkel nga aramidento ti Apo. No aramidenyo, awisenkayo a nainkararagan nga agdamagkayo iti Apo no kasano a kitaennakayo ti Apo. Am-ammonakayo mismo, intedna ti priesthood kadakayo, ket ti itatakder ken ti panang-magnify-yo ti priesthood ket napateg Kenkuana gapu ta ay-ayatennakayo ken pagtalkannakayo a mangbendision kadagiti tao iti naganna.
Bendisionankayo ita tapno mariknayo ti ayatna ken panagtalekna, iti nagan ni Jesucristo, amen.