Ti Dios Adda Kadatayo
Ti Dios adda kadatayo—ket personal a nairaman iti biagtayo ken naregta a mangtarabay kadagiti annakna.
Nagsao ti Dios babaen dagiti katulonganna, dagiti propeta.1 Daytoy a bigat naikkantayo iti pribilehio a dumngeg iti propeta ti Dios nga agsao iti intero a lubong. Ay-ayatendaka, Presidente Nelson, ket allukoyek ti amin iti sadino man nga agadal ken dumngeg kadagiti balikasmo.
Sakbay ti maika-12 a kasangayko, namindua a napilit ti pamiliami a pumanaw iti balaymi ket umakar iti baet ti riribuk, buteng, ken duadua a gapuanan ti gubat ken politika. Madandanaganak idi, ngem nalabit a nakaam-ames para kadagiti ay-ayatek a nagannak.
Sinagaba da tatang ken nanangko daytoy a dagensen kadakami nga uppat nga annakda. Pinasaranda ti rigat ken panagsagaba iti amin a kabaelanda. Nalabit a ti buteng ti nangparigat, nangibus iti orasda ken nangpukaw iti namnamada.
Daytoy a panawen ti pannakaupay kalpasan ti World War ll nangibati iti marka iti lubong. Daytoy ti nangibati iti marka kaniak.
Idi pay, iti panagmaymaysak a malidlidayan unay, masansan a masdaawak, “Adda ngata nabati pay a namnama iti lubong?”
Dagiti anghel Kadatayo
Idi utobek daytoy a saludsod, napanunotko dagiti agtutubo a missionary nga Amerikano a nagserbi kadakami kabayatan dagidi a tawen. Pinanawanda ti nam-ay ken talged dagiti balayda iti adayo ket nagbiaheda iti Germany—daga dagiti kallabes a kabusorda—tapno mangidiaya iti nadiosan a namnama kadagiti tattaomi. Dida immay a mangpabasol, mangadal, wenno mangpabain. Impaayda ti naganus a biagda a di pinanunot ti supapak, kayatda laeng ti tumulong iti dadduma nga agsapul iti rag-o ken talna a napadasanda.
Para kaniak, perpekto dagitoy nga agtutubo a lallaki ken babbai. Awan duadua a mapilawda, ngem awan makitak. Kanayonto nga ibilagko ida nga ipangpangruna iti biag—anghel ti lawag ken gloria, ministro ti kaasi, kinaimbag, ken kinapudno.
idinto a malmalmes ti lubong iti uyaw, gura, pungtot ken buteng, ti pagwadan ken pannursuro dagitoy nga agtutubo nangpunno kaniak iti namnama. Ti indiayada a mensahe ti ebanghelio ti nangrimbaw iti politika, pakasaritaan, gura, liday, ken personal nga adyenda. Intedna iti nadiosan a sungbat iti napapateg a saludsodtayo bayat dagitoy naririgat a panawen.
Ti mensahe ket nagbiag ti Dios ken impategnatayo, uray itoy a panawen ti riribuk, ken pannakatikaw. Nga Isu nagparang iti panawentayo a mangisubli iti kinapudno ken lawag—ti Ebanghelio ken Simbaanna. Nga Isu agsao manen kadagiti propeta; a ti Dios adda kadatayo—ket personal a nairaman iti biagtayo ken naregta a mangtartarabay kadagiti annakna.
Nakaskasdaaw ti masursurotayo no kumitatayo iti uray as-asideg bassit iti plano ti Nailangitan nga Amatayo iti pannakaisalakan ken pannakaitan-ok, ti plano ti kinaragsak, a para kadagiti annakna. No mariknatayo a ditayo maitutop, napapanaw, ken nalipatan, maadaltayo a manamnama a dinatayo nalipatan ti Dios— kinaagpaysona, idiayana iti amin nga annakna ti maysa a banag a di ipagarup: ti agbalin nga “agtawid ti Dios, ken makipagtawid ken Cristo.”2
Ania ti kaipapanan daytoy?
Nga agbiagtayto iti agnanayon, umawat iti naan-anay a ragsak,3 ken addaan iti potensial nga “agtawidto iti trono, pagarian, masakupan, ken bileg.”4
Makapakumbaba nga ammo a posible toy nangayed ken nadiosan a masakbayan—di gapu no siasinotayo ngem gapu iti no asino ti Dios.
Iti pannakaammotayo itoy, kasano a mabalintayo agdayamudom wenno agluksaw? Kasano a tagibassitentayo ti bagbagitayo no awisennatayo ti Ari dagiti ari nga ipatungpal ti kabaelantayo nga umawat iti nadiosan a ragsak ti masakbayan?5
Pannakaisalakan Kadatayo
Gapu iti perpekto nga ayat ti Dios kadatayo ken ti agnanayon a sakripisio ni Jesucristo, ti basbasoltayo—dakkel ken bassit— mapunasda ket dinto malagip.6 Makapagtalkdertayo iti sanguananna a nadalus, maikari, ken napasanto.
Napno ti pusok iti panagyaman iti Nailangitan nga Amak. Maamirisko a dina intulok dagiti annakna a madaleb ditoy a biag nga awanan namnama para iti naraniag ken agnanayon a masakbayan. Nangted iti pangiturong a mangipalgak iti dalan nga agsubli Kenkuana. Ken iti sentro iti amin daytoy ti Patpatgenna nga Anak, ni Jesucristo,7 ken ti sakripisiona para kadatayo.
Naan-anay a baliwan ti awan patinggana a Pannubbot ti Mangisalakan ti pannirigantayo iti basol ken pagkurangantayo. Imbes nga ipamaysa kadagitoy ken makarikna iti saan a pannakasubbot, masursuruantayo kadagitoy ken makarikna iti namnama.8 Ti pangdalus a sagut ti panagbabawi palugodannatayo a lipatentayo ti agbasol ken agbalin a baro a parsua.9
Gapu ken Jesucristo, dinatayo makedngan dagiti pannakapaaytayo. Mapasayaatdatayo.
Kas maysa a musikero a mangsanay kadagiti nota, makitatayo dagiti biddut, pakapilawan, ken basbasoltayo a kas gundaway iti dakdakkel a saluad ti bagi, napudpudno nga ayat iti dadduma, ken pannakapasayaat babaen ti panagbabawi.
No agbabawitayo, dinatayo ikkatan ti karbengan ti biddut. Pasetda ti panagdur-astayo.
Maladagatayo amin a maidasig iti nadayag ken naisangsangayan a parsua a nakaisangratanda. Awan ti tao nga agkaradap a magna, ken agtaray a di masansan a maitikleb, maidungpar, ken madunor. Kasta ti panagsursurotayo.
No napasnek nga agsanaytayo, agtungpal iti bilbilin ti Dios, ken agkumit iti kagumaantayo nga agbabawi, agibtur, ken ipakat ti masursurotayo, tunggal binatog, malawagantayto ti kararuatayo.10 Ket nupay ditayo naan-anay a maawatan ti potensialtayo ita, “Ammotayo a, no agparangto ti [Mangisalakan],” umaspingtayto Kenkuana, ket “makitatayto kas isuna.”11
Anian a nadayag a kari!
Wen, nariribuk ti lubong. Ket wen, adda dagiti pagkapsutantayo. Ngem ditayo agladingit ken maupay, gapu ta makapagtalektayo iti Dios, makapagtalektayo iti Anakna, ni Jesucristo, ken maawattayo ti sagut ti Espiritu a mangtarabay kadatayo itoy a dana ti biag a napnuan rag-o ken nailangitan a ragsak.12
Ni Jesus a kaduatayo
Masansan a napanunotko, ania koma ti isuro ken aramiden ni Jesus no kaduatayo ita?
Kalpasan ti Panagungar, tinungpal ni Jesucristo ti karina a sumarungkar iti “dadduma a karnerona.”13
Ibaga ti Libro ni Mormon: Mainayon a Pammaneknek ken ni Jesucristo dayta a panagparang kadagiti tattao iti American continent. Addaantayo iti daytoy a napateg a rekord kas maiggaman a saksi iti aramid ti Mangisalakan.
Nagbiag dagiti tao iti Libro ni Mormon iti sabali a bangir ti lubong—amang a naiduma dagiti pakasaritaan, kultura, ken klimada ti politika kadagiti tao a sinuruan ni Jesus iti panagministrona iti daga. Ket sinuruanna ida iti adu a kasta met la a banag nga insurona iti Nasantuan a Daga.
Apay nga inaramidna dayta?
Kanayon nga isurona dagiti agnanayon a kinapudno. Maaramatda iti tattao iti tunggal edad ken iti ania man a kasasaad.
Ti mensahena idi ken ita ket mensahe ti namnamaken pannakaibilang—maysa a pammaneknek a di binaybay-an ti Dios nga Amatayo dagiti annakna.
A ti Dios adda kadatayo!
Dua gasut a tawen ti naglabas, nagsubli manen ti Mangisalakan iti daga. Kaduana ti Dios Ama, nagparang iti 14 ti tawenna a ni Joseph Smith ket nangirugi ti Pannakaisubli ti ebanghelio ken ti Simbaan ni Jesucristo. Manipud iti dayta nga aldaw, naluktan ti langit, ket bimmaba dagiti nailangitan a mensahero manipud iti imortal a gloria. Naibukbok ti lawag ken pannakaammo manipud iti trono ti langit.
Nakisao manen ni Apo Jesucristo iti lubong.
Ania ti kinunana?
Bendision kadatayo, naisurat ti adu a balikasna iti Doktrina ken Katulagan—magun-od ti asino man nga agtarigagay a mangbasa ken mangadal kadagitoy. Napateg dagitoy a balikas kadatayo ita.
Ket ditay koma masdaaw a makita nga isursuro manen ti Mangisalakan ti napateg a mensahe ti ebangheliona: “Ayatenyo ti Apo a Diosyo, iti amin a pusoyo, iti amin a kabaelan, panunot, ken pigsayo; ken iti nagan ni Jesucristo pagserbianyo.”14 Paregtaennatayo a mangsapul iti Dios15 ken agbiag kadagiti pannursuro nga impalgakna kadagiti katulonganna, dagiti propeta.16
Suruannatayo nga aggiinnayat17 ken agbalin a “napnuan asi iti amin a tao.”18
Awisennatayo nga agbalin nga imana, nga agaramid iti naimbag.19 “Saantayo koma nga agayat iti sao … no di ket iti aramid ken ti napudno.”20
Karitennatayo a dumngeg iti naindkalan a komisionna: nga agayat, mangibinglay, mangawis iti amin iti ebangheliona ken iti Simbaanna.21
Bilinennatayo a mangbangon iti nasantuan a templo ken sumrek ken agserbi sadiay.22
Suryannatayo nga agbalin a disipulona—tapno ti puspusotayo saan koma nga agkalikagum iti bukod a bileg, kinabaknang, anamong, wenno posision. Isuronatayo a “mangiwaksi iti banag a nailubongan, ken mangsapul kadagiti banag a nasaysayaat.”23
Paregtaennatayo a mangsapul iti rag-o, pannakalawlawag, talna, kinapudno, ragsak,24 ken ti kari ti saan nga ipapatay ken agnanayon a biag.25
Nayonantayo koma iti ad-adu pay nga addang. No immay koma ni Jesus iti wardyo, iti branch, wenno balayyo ita. Ania koma ti kayarigan dayta?
Kumita isuna iti mismo a pusoyo. Dagiti akinruar a langa mapukawto ti pategda. Am-ammonakayo a kas dakayo. Ammona dagiti tarigagay ti pusoyo.
Itag-ayna ti naemma ken napakumbaba.
Paimbagenna ti masakit.
Itdenna ti pammati ken tured a mamati ti agduadua.
Isuronatayo a manglukat iti puspusotayo iti Dios ket mangtulong iti dadduma.
Bigbigen ken dayawenna ti kinapudno, kipakumbaba, integridad, panamati, pannakipagrikna, ken asi.
Maminsan laeng nga ikikita iti matana agbalbaliwtayon. Agnanayon a nagbalbaliwtayon. Nabaliwan babaen ti nauneg a pannakaamiris a, pudno, adda ti Dios kadatayo.
Ania ti Aramidentayo?26
Malagipko ti nasingpet nga agtutubo a lalaki a kas kaniak bayat dagiti tawen a panagdakkelko. No masubliak pay ti panawen, liwliwaek ket ibagak kenkuana nga agtalinaed iti umno nga dalan ken agtultuloy nga agsukisok. Ket idawatko kenkuana nga awisenna ni Jesucristo iti biagna, ta ti Dios adda kadatayo!
Kadakayo, patpatgek a kakabsatko, patpatgek a gagayyemko, ken iti amin a nga agsuksukisok iti sungbat, kinapudno, ken ragsak, idiayak ti kasta met la a balakad: agtultuloy nga agsukisok nga addaan iti pammati ken kinaanus.27
Dumawatka, ket umawatkanto. Agtuktokka, ket mailukatto kenka.28 Agtalek iti Apo,29
Iti inaldaw a biagtayo napateg nga aramid ken nagasat a gundawaytayo a sumango iti Dios.
No ikkatentayo ti kinapalangguad ket umasideg iti tronona nga addaan iti nasneban a puso ken napnuan babawi nga espiritu,30 Isu umasidegto kadatayo.31
No kalikagumantayo a mangsurot ken Jesucristo ket magna iti dalan ti kinadisipulo, iti tunggal binatog, dumtengto ti aldaw ai mapadasantayto dayta di maarapaap a sagut ti yaawat iti pakabuklan ti rag-o.
Patpatgek a gagayyemko, ay-ayatennakayo ti Nailangitan nga Amayo iti awan pagkuranganna nga ayat. Impaneknekna ti ayatna iti agnanayon a wagas, ngem kangrunaanna babaen ti pannangtedna ti Bugbugtong nga Anakna kas sakripisio ken sagut iti annakna tapno maaramid a pudno ti panagsubli iti nailangitan a nagannak.
Paneknekak a sibibiag ti Nailangitan nga Amatayo, nga idauluan ni Jesucristo ti Simbaanna, ken ni Presidente Russell M. Nelson ti Propetana.
Idanonko kadakayo ti ayat ken bendision iti daytoy napintas a panawen ti Paskua ti Panagungar. Luktanyo ti pusoyo iti Mangisalakan ken Mannubbottayo, ania man dagiti kasasaad, pannubok, sagabaen, wenno biddutyo; maammuanyo nga Isu sibibiag, nga ay-ayatennakayo, ken gapu Kenkuana, dikayto kaano man nga agmaymaysa.
Adda ti Dios kadatayo.
Paneknekak daytoy iti sagrado a nagan ni Jesucristo, amen.