Dagiti Bishop—Dagiti Pastor iti Arban ti Apo
Addaan ti bishop iti kapatgan nga akem nga agserbi kas pastor a mangtarabay iti tumantanor a kaputotan ken ni Jesucristo.
Patpatgek a kakabsatko iti priesthood, maysa a nakallalagip unay a linia iti magusgustuan unay a himno, “Shall the youth of Zion falter?”1 Ti naimpusuan ken naipukkaw a panangipakdaarko iti sungbatko iti dayta a saludsod ket “Saan!”
Tapno masigurado a pudno ti sungbat, paneknekak ita a ti panangsuporta iti tumantanor a kaputotan iti panawen dagiti karkarna a karit ken sulisog ket napateg a pagrebbengan nga inted ti Nailangitan nga Ama kadagiti nagannak ken bishopric.2 Ipakitak man ti kinapateg ti bishopric babaen ti maysa a personal a padas.
Idi maysaak a deacon, immakar ti pamiliak iti baro a pagtaengan iti sabali a ward. Mangrugiak idi iti junior high school, isu a nagatendarak pay iti baro nga eskuela. Adda maysa a datdatlag a grupo ti young men iti deacons quorum. Aktibo a miembro ti kaaduan a nagannakda. Naan-anay nga aktibo ti inak; naidumduma ti amak iti tunggal wagas ngem saan nga aktibo a miembro.
Napasnek a lider ti maikadua a mamagbaga iti bishopric,3 ni Brother Dean Eyre. Idi agad-adjust-ak pay laeng iti baro a ward, naipakaammo ti father-son event para iti Bear Lake—agarup 40 miles (65 km) ti kaadayona. Panangkunak diak makadar-ay no awan ti amak. Ngem espesial nga inawisnak ni Brother Eyre a kumuyogak kenkuana. Nagsao iti nangato ken nadayaw maipapan iti amak ken inyunay-unayna ti pateg ti gundaway a kumadua iti dadduma pay a miembro ti deacons quorum. Inkeddengko ti kumuyog ken Brother Eyre, ket naaddaanak iti napintas a padas.
Ni Brother Eyre ti datdatlag a pagwadan ti ayat a kas ken ni Cristo iti panangipatungpal iti pagrebbengan ti bishopric a mangsuporta kadagiti nagannak a mangaywan ken mangtaraon kadagiti agtutubo. Inikkannak iti napintas a rugi iti daytoy baro a ward ken nangisuro kaniak.
Sumagmamano a bulan sakbay a napanak iti mision idi 1960, pimmusay ni Brother Eyre gapu iti kanser iti edad 39. Pinanawanna ti asawana ken ti lima nga annakda, agtawen amin iti nababbaba ngem 16. Impanamnama kaniakdagiti inauna nga annakna, da Richard ken Chris Eyre, nga iti kaawan ti amada, sinuportaran ken inaywanan ida ken dagiti adingda a lallaki ken babai nga addaan ayat a kas ken ni Cristo, a pinagyamyamanak.
Kanayon a kangrunaan a pagrebbengan dagiti nagannak ti pamiliada.4 Ipaay met dagiti panguluen ti korum ti napateg a suporta ken tarabay kadagiti miembro ti korum iti panangtulong kadakuada a mangitag-ay iti pagrebbengan ken bileg ti Aaronic Priesthood iti sentro ti biagda.5
Ita panggepko nga ipokus kadagiti bishop ken counselorda, nga umno a maawagan iti “pastor iti arban ti Apo”—a mangyunay-unay iti panagbalin a pastor para iti tumantanor a kaputotan.6 Makaay-ayo nga intudo ni Apostol Pablo ni Jesucristo kas “ti Pastor ken Obispo dagiti kararuayo.”7
Addaan ti bishop iti lima a kangrunaan a pagrebbengan a mangidaulo iti maysa a ward:
-
Isu ti presiding high priest iti ward.8
-
Isu ti presidente ti Aaronic Priesthood.9
-
Isu ti sapasap nga ukom.10
-
Isu ti mangurnos iti aramid ti pannakaisalakan ken pannakaitan-ok, agraman ti panangaywan iti agkasapulan.11
-
Isu ti mangkita kadagiti rekord, pakaseknan iti kuarta, ken ti pannakausar iti meetinghouse.12
Iti akemna a presiding high priest, ti bishop ti “naespirituan a lider.”13 Isu ti “napudno a disipulo ni Jesucristo.”14
Mainayon pay, “ti bishop ti mangurnos iti aramid ti pannakaisalakan ken pannakaitan-ok iti ward.”15 Ti bishop koma ti mangidutok iti inaldaw a pagrebbengan a mangibinglay iti ebanghelio, mangpapigsa kadagiti baro ken agsublin a miembro, ministering, ken aramid iti templo ken family history kadagiti panguluen ti elders quorum ken Relief Society.16 Ti bishop ti mangurnos iti daytoy nga aramid iti ward council and ward youth council.
Addaan ti bishop iti kapatgan nga akem nga agserbi kas pastor a mangtarabay iti tumantanor a kaputotan, agraman dagiti young single adult, ken Jesucristo.17 Inyunay-unay ni Presidente Russell M. Nelson ti kapatgan nga akem ti bishop ken dagiti counselorna. Insurona nga “umuna ken kangrunaan a pangrebbenganda ti mangaywan kadagiti babbarito ken babbalasitang ti ward[da].”18 Ti bishopric ti mangsuporta kadagiti nagannak iti panangaywan ken panangtaraon kadagiti ubbing ken agtutubo iti ward. Aginnuman a sangkamaysa ti bishop ken ti presidente ti Young Women iti ward. Ikarigatanda a tulongan dagiti agtutubo nga agbiag kadagiti pagrukodan iti For the Strength of Youth, maikari nga umawat kadagiti ordinansa, ken agaramid ken agtungpal kadagiti sagrado a katulagan.
Masaludsodyo, “Apay a nabilin ti bishopric a mangbubos iti adu unay nga oras kadagiti agtutubo?” Binukel ti Apo ti Simbaanna a mangipatungpal kadagiti napateg a prioridad. Ngarud, ti pannakabukel ti Simbaanna addaan iti urnos nga adda ditoy ti dua a pagrebbengan ti bishop. Addaan iti nadoktrinaan a pagrebbenganna iti sibubukel a ward, ngem adda pay naipangruna a nadoktrinaan a pagrebbenganna iti priests quorum.19
Adda dagiti young men a priests ken young women nga agpapada ti edadna iti napateg unay nga addang iti biag ken panagdur-asda. Bayat ti ababa a panawen, agaramidda kadagiti pangngeddeng nga addaan iti napateg ken napaut nga implikasion. Ikeddengda no maikaridanto met laeng para iti templo, agserbi iti mision,20 agkagumaan a maikallaysa iti templo, ken agsagana nga agtrabaho para iti biagda. Dagitoy a pangngeddeng, no naaramiden, adda napalaus a naespirituan ken maaramat nga implikasionda iti nabati pay a biagda. Bishops, ammuenyo koma a ti ababa nga panawen a nabubosyo iti maysa nga agtutubo a priest, wenno balasitang, wenno young adult a makatulong kadakuada a makaawat iti bileg nga adda a magun-odda babaen ti Pannubbot ni Jesucristo. Maitedko ti pannirigan nga addanto napalaus nga impluensiana iti unos ti biagda.
Maysa kadagiti kapintasan a pagwadan a nakitakon iti bishop a nangtulong a mangipaay iti daytoy a kita ti pannirigan para iti agtutubona ket ni Bishop Moa Mahe. Naawagan nga agbalin nga umuna bishop ti San Francisco Tongan Ward.21 Maysa nga immigrant manipud iti Vava’u, Tonga. Masarakan ti wardna iti asideg ti San Francisco, California, airport, a pagtrabahuanna.22
Addaan ti wardna iti dakkel a bilang dagiti agtutubo, kaaduanna ti naggapu iti pamilia a kasangsangpet iti Estados Unidos. Ni Bishop Mahe saan laeng nangisuro kadakuada iti sao ken babaen iti pagwadan no kasano ti agbalin a nalinteg a disipulo ni Jesucristo, ngem timmulong a mangted kadakuada iti pannirigan ti pakapagbalinanda ken tinulonganna ida nga agsagana para iti templo, mision, edukasion, ken pagtrabahuan. Nagserbi iti dumani walo a tawen, ket pimmudno dagiti arapaap ken tarigagayna para kadagiti agtutubo.
Dumani 90 percent ti young men iti Aaronic Priesthood quorums ti nagserbi iti mision. Sangapulo-ket-lima a babbarito ken babbalasitang ti immuna a miembro ti pamiliada nga agatendar iti kollehio.23 Nakipagkita daytoy iti principal ti local high school (ditayo kapammati), ket naggayyemda ken nagkappengda maipapan no kasano tulonganda ti tunggal agtutubo a mangragpat kadagiti napapateg a goal ken mangparmek kadagiti problema. Imbaga ti principal kaniak a tinulongan isuna ni Bishop Mahe iti panangtulong kadagiti immigrant iti amin a pammati a marigrigatan. Ammo dagiti agtutubo nga ipatpateg ida ti bishop.
Naliday ta natay ni Bishop Mahe bayat panagserbina a bishop. Diakto pulos malipatan ti makasagid ken makaparegta a pumponna. Adu ti dimmar-ay. Buklen ti koro ti nasurok a 35 a napudno nga agtutubo a miembro a nagserbi iti mision ken agat-atendar iti kolehio ken isuda dagiti agtutubo bayat ti panagserbina a kas bishop. Impeksa ti maysa nga speaker ti nalaus a panagyamanna kadagiti agtutubo ken young adult iti wardna. Nangted pammadayaw ken ni Bishop Mahe para iti pannirigan nga intedna kadakuada iti panagsagana para iti biag ken nalinteg a serbisio. Ngem ti kapatgan, tinulongan ida ni Bishop Mahe a nangbukel iti pammatida ken ni Apo Jesucristo kas pundasion ti biagda.
Ita, dakayo a bishop, sadino man ti pagserbianyo, kadagiti interbyuyo ken dadduma pay nga asosasionyo, maipaayyo dayta a kita ti pannirigan ken mabangonyo ti pammati ken ni Jesucristo. Maitedyo ti nabileg nga awis a mangbaliw iti ugali, mangisagana kadakuada iti biag, ken mangparegta kadakuada nga agtalinaed iti dana ti katulagan.
Mainayon pay, matulonganyo ti sumagmamano nga agtutubo nga adda parikutna kadagiti nagannak maipanggep iti bambanag nga awan kaes-eskanna.24 Iti panawen a kasla dakkel ti parikut dagiti agtutubo kadagiti nagannakda, ti tao a mangidaulo iti korumda ken pagsungbatanda a mainaig iti simbaan ket isu pay ti tao a papanan dagiti nagannakda para iti temple recommend. Daytoy ti mangikabil iti bishop iti naidumduma a saad a mangbalakad iti agpada nga agtutubo ken nagannakda no nangparnuay ti supiat iti di pagkikinnaawatan. Makatulong dagiti bishop a mangkita kadagiti banag nga agnanayon ti panniriganna ken mangrisut iti parikut nga adda wenno awan kaes-eskanna. Isingasingmi nga awan koma ti naidutok a ministering family kadagiti bishop tapno makapagpokusda iti oras ken pigsada nga agserbi kadagiti agtutubo ken pamiliada kadagitoy a kita ti situasion.25
Ammok ti maysa a bishop a nakabael a nangrisut iti dakkel a suppiat ti maysa a barito ken nagannakna, a nangyeg iti panagtutunos iti pagtaengan ken nangpatibker iti panagkumit iti ebanghelio. Tinulongan ti bishop a maawatan dagiti nagannak a napatpateg ti panagkagumaan nga agbalin a disipulo ni Jesucristo ngem iti no kasano ken kaano a maileppas dagiti aramid iti pamilia.
Tapno mabubos ti ad-adu nga oras kadagiti agtutubo, sadinoda man, agraman iti pasken wenno aktibidad iti eskuela, nabalakadan dagiti bishopric a mangidutok kadagiti maitutop a miting ken oras ti pannakiuman kadagiti adult. Idinto a makapagbalakad dagiti bishop maipapan iti serioso ken kasapulan unay a bambanag, isingasingmi ti panangidutok iti agtultuloy a panagbalakad iti di unay napapateg a bambanag a di mairaman dagiti pangngeddeng iti pannakaikari dagiti miembro ti elders quorum wenno Relief Society—gagangay a dagiti panguluen wenno ministering brothers ken sisters. Tarabayento ti Espiritu dagiti lider26 a mangpili kadagiti umisu a miembro a mairaman itoy a pannakiuman. Dagiti umawat iti daytoy naidutok a counseling assignment ti maikari iti paltiing. Nasken siempre a kanayon a pagtalinaedenda ti naiget a kompidensialidad.
Kanayon nga agsakripisio dagiti napudno a lider para iti tumantanor a kaputotan. Ditoy a bubosen dagiti miembro ti bishopric ti kaaduan nga oras iti serbisio iti Simbaan.
Tarigagayak itan nga isao ti sumagmamano a banag a direkta kadagiti agtutubo ken bishoptayo.
Mabalin nga adu kadakayo a napapateg nga agtutubo ti addaan iti nalawag a pannirigan ti kinasiasinoyo ken ti pagbalinanyo. Ngem iti mabiit nasken nga aramidenyonton dagiti kapatgan a desision iti biagyo. Agpabalakadkayo koma iti nagannak ken bishopyo maipapan iti napapateg a pili nga immuna kadakayo. Bay-an a ti bishop ti agbalin a gayyem ken mamagbagayo.
Ammomi nga adda pannubok ken sulisog nga umay kadakayo manipud iti tunggal direksion. Nasken nga agbabawitayo amin iti inaldaw kas insuro ni Presidente Nelson. Kasaoyo koma ti bishopyo maipapan iti ania man a banag a pakatulongan kadakayo ti sapasap nga ukom iti pannakayurnos ti biagyo iti Apo kas panagsagana para iti “naindaklan nga aramid” nga itedna kenka itoy maudi a dispensasion.27 Kas iti inyawis kadakayo ni Presidente Nelson, aramidenyo a maikari ti bagiyo nga agbalin a paset ti youth battalion ti Apo!28
Ita maysa a balikas kadakayo napapateg a bishop a maipaay iti leadershi[p ken kadagiti miembro ti Simbaan. Ipeksami ti nalaus a panagyamanmi kadakayo. Kadagiti panangbalbaliw a nakiddaw kadakayo nga aramidenyo iti kallabes a tawen, patpatgek a bishops, maamuanyo koma no kasano ti kadakkel ti ayat ken panagyamanmi kadakayo. Ti kontribusionyo iti pagarian ket dumanin saan a mailadawan. Addaan ti Simbaan iti 30,900 a bishop ken 6,865 a branch president nga agserserbi iti sangalubongan.29 Dayawenmi ti tunggal maysa kadakayo.
Adda dagiti balikas ken sagrado nga awag nga iladawanda ket napno iti dumani naespirituan, nakaskasdaaw a pateg. Ti pannakaawag ti bishop maysa a kaindaklan a balikas a naisangsangayan ti pategna. Ti agserbi iti Apo itoy a pagrebbengan ket nakaskasdaaw iti adu a wagas. Ti panangawag, panangkanunong, ken panangset apart iti maysa a bishop ket padas a di pulos malipatan. Para kaniak, daytoy ti espesial unay a pasamak gapu ta nangiparikna kenkuana ti adu a nadumaduma nga emosion. Maipada daytoy iti padas iti kallaysa, wenno padas iti panagbalin nga ama gapu ta narigat a mailadawan iti sumagmamano a balikas.30
Bishops, kanunongandakayo! Bishops, patpatgendakayo! Pudno a dakayo ti pastor ti Apo iti arbanna. Dinakayto baybay-an ti Mangisalakan kadagitoy sagrado nga awag. Paneknekak daytoy, itoy a Paskua ti Panagungar, iti nagan ni Jesucristo, amen.