Daytoy ti Panawentayo!
Imbaonnanatayo ti Dios ditoy, itan, iti daytoy nakallalagip a panawen ti pakasaritaan.
Idi 1978, nagtakderak iti pagay-ayaman iti football iti estadium a naglaon iti 65,000 nga agbuybuya. Adda iti sanguanak ti sumagmamano a dadakkel a kasalisal a kasla man kayatda a pugotan ti ulok. Umuna a panagay-ayamko daytoy kas maysa a mangrugrugi a quarterback iti National Football League, ken agay-ayamkami nga agdama a kampeon iti Super Bowl. Kinapudnona, nagduaduaak no kabaelak met laeng ti mapan iti pagay-ayaman. Nagsanudak tapno ipalladawko ti umuna a panangibatok, ket idi inibbatak ti bola, nabatoak iti nakapigpigsa a diak pay napadasan idi. Iti dayta a kanito, nakaiddaak a napandagan dagiti nagtutuon nga atleta, nasdaawak idi no ania ti ar-aramidek sadiay. Adda pangngeddeng nga aramidek. Bay-ak kadi dagiti panagduaduak a mangparmek kaniak, wenno addaanak kadi iti tured ken pigsa a bumangon ken agtultuloy?
Associated Press
Saanko a naamiris iti dayta a gundaway no kasano nga isagananak daytoy a padas para kadagiti gundaway iti masakbayan. Kinasapulak nga ammuen a kabaelak ti agbalin a natibker ken natured iti baet dagiti narigat a kasasaad.
Ti ay-ayam iti football mabalin a saan a kas kapateg dagiti karit a pakaipasanguanyonto. Kaaduanna, awanto ti estadium a napno iti tattao nga agbuybuya. Ngem addaanto ti agnanayon a kinapateg dagiti natured a pangngeddengyo.
Mabalin a ditayo marikna a kabaelantayo ti karit. Ngem kitkitaennatayo ti Nailangitan nga Amatayo kas natured nga agipatpatakder iti pagarianna. Dayta ti gapu nga impatulodnatayo iti daytoy kangrunaan a masinunuo a panawen iti pakasaritaan ti lubong. Daytoy ti Panawentayo!
Denggenyo ti kinuna ni Presidente Russell M. Nelson kalpasan ti panagbalinna a Presidente ti Simbaan: “Ti Mangisalakan ken Mannubottayo, ni Jesucristo, aramidennanto dagiti sumagmamano a kabilgan nga aramidna iti nagbaetan ita ken iti yaayna manen. Makitatayto dagiti namilagruan a pakakitaan a ti Dios Ama ken ti Anakna, ni Jesucristo, idauluandanto daytoy a Simbaan iti kinangayed ken kinatan-ok” (“Revelation for the Church, Revelation for Our Lives,” Liahona, Mayo 2018, 96).
Dagiti kabibilgan nga aramid? Dagiti namilagruan a pakakitaan? Anianto ti langa dayta? Ania ti papel nga akmentayonto, ken kasano a maawatantayto no ania ti aramidentayo? Diak ammo ti amin a sungbat, ngem ammok a kasapulannatayo ti Apo tapno agsagana! Awan ti napatpateg pay ngem iti pannakaikari a mangaramat iti bileg ti priesthood.
Mamatitayo kadi iti propeta ti Dios? Masarakan ken maipatungpaltayo kadi ti pagtungpalantayo? Wen kabaelantayo, ket wen, kasapulan, gapu ta daytoy ti panawentayo!
No mangngegtayo ti estoria dagiti maingel a katulongan ti Dios nga immay kasakbayantayo—kas kada Moises, Maria, Moroni, Alma, Ester, Joseph, ken ti adu a dadduma pay—kaslada laeng dakdakkel ngem iti biag. Ngem saanda a naiduma kadatayo. Gagangayda a tattao a naipasango kadagiti karit. Nagtalekda iti Apo. Inaramidda dagiti umno a pangngeddeng kadagiti umno a kanito. Ken, addaan iti pammati ken ni Jesucristo, inaramidda dagiti trabaho a kasapulan iti panawenda.
Goodsalt
Ibilangyo ti bannuar iti Daan a Tulag a ni Josue. Isu ti maysa a napudno a pasurot ni Moises, maysa kadagiti kaindaklan a lider iti pakasaritaan. Kalpasan ti ipapanaw ni Moises, daytoy ti panawen ni Josue. Isu ti mangiturong kadagiti annak ti Israel iti naikari a daga. Kasano nga inaramidna daytoy? Nayanak ken dimmakkel ni Josue iti pannakaadipen sadiay Ehipto. Awanan iti handbook wenno instructional video a mangtulong kenkuana. Awanan pay iti smartphone! Ngem adda kenkuana daytoy a kari manipud iti Apo:
“Kas kaaddak ken ni Moises, addaakto kenka: saankanto a panawan wenno baybay-an.
“Pakirdem ti pakinakemmo ket dika agbuteng” (Josue 1:5–6).
Idi baro ken awan pay padasko a Seventy, nakaawatak iti maysa a tawag iti telepono manipud iti Opisina ti Umuna a Panguluen, nga agsalsaludsod no siak ti mangibagi iti propeta iti panangbisita iti maysa a barito iti ospital—a madagdagus. Zach ti nagan ti barito. Agsagsagana nga agbalin a maysa a missionary ngem naaksidente daytoy ket nagsagaba iti nakaro a sugat iti ulo.
Agtartaray ti panunotko kabayatan ti panagmanehok a mapan iti ospital. Babaonen para ti propeta—agang-angawka kadi? Ania ti mapanko sanguen? Kasano a matulongakto daytoy a barito? Adda kadi umdas a pammatik? Ti napasnek a panagkararag ken ti pannakaammo nga addaanak iti turay ti nasatuan a priesthood ti nagbalin a tibkerko.
Nakaidda iti katre ti ospital ni Zach idi sumangpetak. Siuurnos a nakatakder dagiti nakasagana a mangitaray kenkuana iti operating room tapno pagin-awaen dagiti doktor ti presion iti utekna. Kinitak ti aglulua nga inana ken ti mabutbuteng a gayyemna nga nakatakder iti asideg, ket naawatak a masapul ni Zach ti priesthood blessing. Nagpatulongnak iti gayyemna a nabiit pay a nakaawat iti Melchizedek Priesthood. Nariknak ti bileg ti priesthood bayat ti panangtedmi a sipapakumbaba iti bendision ken ni Zach. Kalpasnna intarayda isuna a dagus para iti pannakaoperarna, ket pinasingkedan ti natalna a rikna a ti Mangisalakan ti makaammo kadagiti banag a mayannurot iti pagsiribanna.
Inaramid ti medical staff ti maysa a maudi a X-ray sakbay a naaramid ti umuna nga iwa. Nakigtotda iti natakuatanda a saan koma gayam a masapul ti operasion.
Nasursuro manen ni Zach ti magna ken agsao kalpasan ti adu a therapy. Nagserbi iti naballigian a mision ket addaan itan ti napintas a pamilia.
Kinaagpaysona, saan a a kanayon a kasta ti bungana. Nangtedak ti dadduma pay a priesthood blessing nga addaan iti maipada a pammati, ken saan a pinatgan ti Dios ti naan-anay a pannakapaimbag iti daytoy a biag. Agtalektayo kadagiti panggepna ket ibatitayo Kenkuana dagiti bungana. Saantayo a kanayon a mapili ti pagbanagan dagiti aramidtayo, ngem nakasaganatayo nga agaramid.
Mabalin a saan a kiniddaw kenka ti Umuna a Panguluen a mangibagi kadakuada iti nakaam-amak a situasion. Ngem kas pannakabagi ti Apo naawagantayo nga agaramid kadagiti banag a makapagbalbaliw iti biag. Saannatayto a baybay-an. Daytoy ti Panawentayo!
Ni Pedro, ti kangatuannga Apostol ti Mangisalakan ket adda iti barko idi makitana ni Jesus a magmagna iti rabaw ti danum. Kayatna ti mapan Kenkuana, ket kinuna ti Mangisalakan, “Umayka.” Situtured ken namilagruan, pinanawan ni Pedro ti kinatalged ti barko ket nangrugi a magna nga agturong iti Mangisalakan. Ngem kimmapsut ti pammati ni Pedro idi impamaysana ti pasnekna iti napigsa nga angin. “Nagbuteng isuna; ken nangrugin a lumned, nagsangit a kinunana, Apo, isalakannak. Ket dagus nga inunnat ni Jesus ti imana ket iniggamanna.” (Kitaen iti Mateo 14:22–33.)
No dumteng dagiti angin iti biagtayo, sadino ti pangipamaysaantayo? Laglagipen, adda kanayon a maysa a pagpannurayan a pagtaudan ti pigsa ken tured. Nakaunnat kadatayo dagiti takiag ni Jesus, a kas iti pannakayunnatda ken ni Pedro. No dumanontayo Kenkuana, siaayat nga ispalennatayto. Datayo dagiti kukuana. Kinunana, “Saanka nga agbuteng: ta sinubbotkan, inawaganka iti naganmo; kukuaka” (Isaias 43:1). Agballiginto Isuna kenka iti biagmo no ipalubosmo Kenkuana. Dakayo ti agpili Kitaen iti Russell M. Nelson, “Bay-an nga Agballigi ti Dios,” Liahona, Nob. 2020, 92–95.)
Nagpakaasi ni Josue kadagiti taona sakbay a natay, “Agpilikayo ita nga aldaw no siasino ti pagserbianyonto; … ngem siak ken ti balayko agserbikamto ken ni Jehova” (Josue 24:15). Nagbalin ni Josue a naindaklan a dadaulo iti panawenna gapu kadagiti pili nga inaramidna nga agserbi iti Apo. Patpatgek a gagayyemko, daytoy ti panawentayo! Dagiti pilitayo nga aramiden ti mangikeddengto iti pagtungpalantayo (kitaen ti Thomas S. Monson, “Decisions Determine Destiny” Brigham Young University fireside, Nob. 6, 2005], speeches.byu.edu).
Kabayatan ti panagserbik a kas maysa a bishop, adda pagsasaomi iti wardmi: Dagiti nasayaat a pili maipada iti kinaragsak—nga agnanayon. Labsandak no kua dagiti agtutubo iti pagnaan a kunkunada, “Bishop, ar-aramidek dagiti nasayaat a pili!” Arapaap dayta ti maysa a bishop!
Ania ti kayattayo a sawen iti “nasayaat a pili”? Adda naminsan a nagdamag ken ni Jesus, “Ania ti dakkel a bilin iti linteg?” Insungbatna:
“Ayatem ti Apo a Diosmo iti amin a pusom, ken iti amin a kararuam, ken iti amin nga isipmo.
“Daytoy isu ti umuna ken ti dakkel a bilin.
“Ket ti maikadua isu umasping kenkuana, Ayatem ti padam a tao a kas iti bagim” (Mateo 22:36–39).
Diak ammo maipapan kadakayo, ngem no mabasak dagitoy dua a dakkel a bilin, adda madlawko a maikatlo, a naipaawat a bilin: ayatem iti bagim.
Napanunotmo kadin ti panagayatmo iti bagim a kas maysa a bilin? Pudno ngata nga ay-ayatentayo iti Dios ken ay-ayatentayo dagiti annakna no saantayo nga ay-ayaten dagiti bagbagitayo?
Itay nabiit binalakadan ti maysa a masirib a lider ti maysa a lalaki a mangpadpadas a mangparmek kadagiti makadadael a panagpili iti sumagmamano a tawen. Nakarikna iti panagbain ti lalaki, nga agduddudua a maikari iti ayat ti asino man.
Kinuna ti liderna kenkuana, “Am-ammonaka ti Apo, ay-ayatennaka, maragsakan kenka ken kadagiti natured nga addang nga ar-aramidem.” Ngem kalpasanna innayonna, “Masapul a denggem ti bilin nga ayatem ti bagim tapno mariknam ti ayat ti [Dios] ken ayatem ti dadduma.”
Idi nangngeg daytoy a kabsat a lalaki dayta a balakad, nagbaliw ti panniriganna iti biag. Idi agangay kinunana, “Binubosko ti unos ti biagko a mangpadpadas a mangsarak iti talna ken panangawat. Sinapulko dagita a banag iti adu a biddut a lugar. Iti laeng ayat ti Nailangitan nga Ama ken ti Mangisalakan a pakasarakak iti liwliwa. Ammok a kayatda nga ayatek ti bagik: pudno a daytoy laeng ti wagas a pakariknaak iti ayatda para kaniak.”
Kayat ti Nailangitan nga Amatayo nga ayatentayo dagiti bagbagitayo—saantayo nga agbalin a napannakkel wenno managimbubukod, ngem kitaentayo ti bagbagitayo a kas iti panangkitana kadatayo: datayo dagiti maipatpateg nga annakna. No sumeksek daytoy a kinapudno iti pusoyo, dumakkel ti panagayattayo iti Dios. No kitaenyo ti bagiyo nga addaan iti napudno a panagraem malukatan ti pusotayo a mangtrato kadagiti dadduma iti kasta met laeng. No ad-adda a mabigbigtayo ti nadiosan a pategtayo, ad-adda a maawatantayo daytoy a kinapudno: nga imbaonnatayo ti Dios ditoy, ita, iti daytoy napateg a panawen ti pakasaritaan, tapno maaramidtayo ti kadakkelan a mabalin a nasayaat kadagiti talento ken sagut nga adda kadatayo. Daytoy ti Panawentayo! (Kitaen iti Russell M. Nelson, “Becoming True Millennials” [worldwide devotional for young adults, Ene. 10, 2016], broadcasts.ChurchofJesusChrist.org.)
Insuro ni Joseph Smith a tunggal propeta, iti tunggal panawen, “sinegseggaanna nga addaan iti narag-o a namnama iti aldaw nga agbibiagtayo; … inkanta ken insuratda ken impadtoda maipapan iti daytoy nga aldawtayo; … datayo dagiti naparaburan a tattao a [pinili] ti Dios a mangipagteng ti dayag ti Ud-udina nga aldaw” (Teachings of Presidents of the Church: Joseph Smith [2007], 186).
Bayat ti panangsangoyo kadagiti inaldaw a karityo, laglagipenyo daytoy a pammatalged nga indiaya ni Elder Jeffrey R. Holland: “Nakaad-adu ti naipabaklay kadagiti abagatayo, ngem agbalinto a nadayag ken ken naballigian a padas daytoy. … Naiwaragawagen ti balligi iti daytoy maudi a pannakisalisal. Addan ti balligi kadagiti libro ti kasuratan … , dagiti nasantuan a kasuratan!” (“Be Not Afraid, Only Believe” [address to Church Educational System religious educators, Peb. 6, 2015], broadcasts.ChurchofJesusChrist.org).
Iti daytoy a napintas a Paskua ti Panagungar iti udi ti lawas awisenkayo nga agkakaragtayo amin a mangbigbig ken umawat kadagiti akemtayo bayat ti panagsaganatayo para iti nagloriaan nga aldaw a panagsubli ti Mangisalakan. Ay-ayatennatayo ti Apo nga ad-adda pay ngem iti matukodtayo, ken sungbatannanto dagiti kararagtayo! Addatayo man iti pagay-ayaman ti football, iti maysa a siled ti ospital, wenno iti sabali a lugar, makapagbalintayo a napateg a paset dagitoy nakaskasdaaw a pasamak—gapu ta daytoy ti panawentayo! Iti nagan ni Jesucristo, amen.