No Ania ti Masursurotayo ket Ditayto Kaano Man Malipatan
Ngem no nainkararagan a kitaenyo ti biagyo, patiek a makitayonto ti adu a wagas a tarabayennakayto ti Apo iti daytoy a panawen ti rigat.
Patpatgek a kakabsatko, pinadpadaanak daytoy a miting iti virtual kadakayo. Maudi a gundaway nga inangaytayo ti sesion iti priesthood ti sapasap a komperensia idi Abril 2019. Adun ti napasamak iti napalabas a dua a tawen! Adda kadakayo ti nakapukawen kadagiti patpatgenna. Adda naawanan iti trabaho, pagbiagan, wenno salun-at. Adda pay naawanan iti talna ken namnama iti masakbayan. Malidayanak iti tunggal maysa kadakayo a nagsagaba kadagitoy wenno dadduma pay a napukaw. Kanayon nga ikararagko a liwliwaennakayto ti Apo. No bay-anyo nga agballigi ti Dios iti biagyo, ammok a namnamaenna ti nasayaat iti masakbayanyo kas inaramidnan.
Iti baet dagiti pukaw a napasarantayo, adda met dagiti banag a nasarakantayo. Adda nakasarak iti naun-uneg a pammati iti Nailangitan nga Amatayo ken ti Anakna, ni Jesucristo. Adu ti nakasarak iti baro a pannirigan iti biag—uray pay ti agnanayon a pannirigan. Mabalin a nasarakanyo ti napigpigsa a relasion kadagiti ipatpategyo ken iti Apo. Ket sapay ta nasarakanyo ti napadakkel a kabaelan a dumngeg Kenkuana ken umawat iti bukod a paltiing. Masansan a dagiti narigat a pannubok ti mangted iti gundway a dumur-as a di koma dimteng iti sabali a wagas.
Lagipenyo ti napalabas a dua a tawen. Kasano a dimmur-askayo? Ania ti nasursuroyo? Mabalin a kinayatyo idi damo a makapagsublikayo iti 2019 ket agtalinaed idiay! Ngem no nainkararagan a kitaenyo ti biagyo, patiek a makitayonto ti adu a wagas a tarabayennakayo ti Apo iti daytoy a panawen ti rigat, a tultulongannakayo nga agbalin a napaspasnek, ad-adda a converted—pudno a lalaki ti Dios.
Ammok nga adda naindaklan ken nakaskasdaaw a plano ti Apo kadatayo—a saggaysa ken sangkatipon. Addaan iti kinaasi ken kinaanus, kunana:
“Babassitkayo nga ubbing, ket diyo pay la maawatan no kasano ti kinaindaklan dagiti bendision ti Ama … insaganana kadakayo;
“Ket diyo pay la kabaelan amin a banag ita; nupay kasta, agragsakkayo, ta iturongkayo.”1
Patpatgek a kakabsatko, paneknekak nga inaramidnan, ken isu, pudno nga iturongnatayo, no dumngegtayo Kenkuana. Kayatna a dumur-as ken masursuruantayo, babaen ti—nalabit a nangnangruna a babaen iti—rigat.
Ti rigat ket maysa a naindaklan a mannursuro. Ania ti nasursuroyon iti napalabs a dua a tawen a kayatyo a laglagipen a kanayon? Naidumduma dagiti sungbatyo, ngem maisingasingko man ti uppat a leksion a namnamaek a nasursurotayo amin ken ditayto kaano man malipatan.
Leksion 1: Ti Pagtaengan ti Sentro ti Pammati ken Pagdaydayawan
Masansan a no ballaagannatayo ti Apo maipapan iti peggad ti maudi nga aldaw, iramanna dayoy a balakad: “Agtakderkayo iti nasantuan a lugar, ket saan nga aggaraw.”2 Awan duadua nga iraman dagitoy “nasantuan a lugar” ti templo ti Apo ken meetinghouses. Ngem ti kabaelantayo nga agummong kadagitoy a lugar ket naigetan iti agduduma a tukad, naadaltayo a maysa kadagiti kasantuan a lugar iti daga ket ti pagtaengan—wen, ti mismo a pagtaenganyo.
Kakabsat, ikutanyo ti priesthood ti Dios. “Dagiti kalintegan ti priesthood saan a mabalin nga isina kadagiti bileg ti langit.”3 Immawatkayon ken ti pamiliayo kadagiti ordinansa ti priesthood. Adda “kadagiti ordinansa [ti priesthood], [a] maipakita ti bileg ti kinadios.”4 Adda a magun-od dayta a bileg kadakayo ken ti pamiliayo iti bukodyo a pagtaengan no tungpalenyo dagiti katulagan nga inaramidyo.5
Naglabas ti185 a tawen, daytoy mismo nga aldaw, Abril 3, 1836, insubli ni Elias dagiti tulbek ti priesthood a mangipalubos kadagiti pamiliatayo a mailantip a sangkamaysa iti agnanayon. Dayta ti gapu a nasayaat unay ti rikna nga agannong iti sakramento iti pagtaenganyo. Kasano nga inapektuanna dagiti miembro ti pamiliayo a makitadakayo,—nga ama, lelong, asawa, anak wenno kabsatda—a mangannong itoy nasantuan nga ordinansa? Ania ti aramidenyo a mangpatalinaed dayta sagrado a rikna iti pamiliayo?
Mariknayo nga adda pay nasken nga aramidenyo a mangaramid iti pagtaenganyo a pudno a santuario ti pammati. No kasta, aramidenyo! No naasawaankayo, kainnumanyo ti asawayo kas agpada nga agkadua itoy napateg nga aramid. Adda dagiti ikarigatan a ragpaten a napatpateg ngem daytoy. Iti baet ita ken ti panawen a yaayto manen ti Apo, kasapulantayo amin nga agbalin dagiti pataengantayo a lugar ti talna ken talged.6
Dagiti galad ken tignay a mangyawis iti Espiritu ti mangnayon iti kinasantuan iti pagtaenganyo. Awan duadua nga agpukawto ti kinasantuan no adda maysa a banag iti ugali wenno aglawlawyo a managpasakit iti Espiritu Santo, ngarud “adaywan ida ti langit”7
Nasdaawkayo kadin no apay a ti Apo kayatna nga aramidentayo ti pagtaengantayo a sentro ti pagsursuruan ken pagbiagan iti ebanghelio? Di laeng isagananatayo, ken tulongannatayo iti maysa a pandemia. Aggibusto iti dagiti agdama a restriksion iti panaguummong. Nupay kasta, ti panagkumityo a mangaramid iti pagtaenganyo a kangrunaan a santuario saan a kaano man nga aggibus. No bumassit ti pammati ken kinasantuan ditoy natnag a lubong, dumakkel ti panagkasapulanyo iti nasantuan a lugar. Allukoyenkayo nga ituloyyo nga aramiden ti pagtaenganyo a pudno a “ken saan nga aggaraw”8 iti dayta napateg a goal.
Leksion 2: Kasapulantayo ti Tunggal Maysa.
Kayat ti Dios nga agtrabahotayo ken agtitinnulongtayo. Dayta ti gapu no apay ibaonnatayo iti daga kas pamilia ken buklennatayo kadagiti ward ken stake. Dayta ti gapu nga idawatna nga agserbi ken agministertayo iti tunggal maysa. Dayta ti gapu nga idawatna nga agbiagtayo iti lubong ngem ditayo taga lubong.9 Adu dagiti maileppastayo no agtitinnulongtayo ngem no agmaymaysatayo.10 Mapaay ti plano ti Dios iti kinaragsak no agtalinaed nga agsisina dagiti annakna iti tunggal maysa.
Naidumduma ti agdama a pandemia ta inapektuanna ti tunggal maysa iti lubong a talaga nga aggigiddan. Idinto nga adda dagiti nagsagaba iti nakarkaro ngem iti dadduma, nakarittayo amin iti sabali a wagas. Gapu itoy, adda potensial daytoy a pannuboktayo a mamagkaykaysa kadagiti annak ti Dios a di napasamak idi. Isu a, damagek, daytoy kadi a pannubok ti nangyasideg kadakayo iti kaarrubayo—iti kakabsatyo iti asideg ken iti amin a suli ti lubong?
Maipanggep ditoy, makatulong ti dua a naindaklan a bilin kadatayo umuna, ayaten ti Dios ken, maikadua, ayaten ti kaarrubatayo.11 Ipakitatayo ti ayattayo babaen ti panagserbi.
No adda am-ammoyo nga agmaymaysa, tulonganyo—uray no mariknayo met ti kasta! Di nasken nga adda rasonmo wenno mensahe wenno negosiom tapno makipagkitaka. Kamustaenyo laeng ket ipakitayo ti ayatyo. Makatulong kadakayo ti teknolohia. Adda man wenno awan pandemia, kasapulan a maammuan ti tunggal napateg nga anak ti Dios a di agmaymaysa!
Leksion 3: Nairanta ti Korumyo iti Priesthood nga Ad-adda Pay Ngem iti Miting Laeng
Bayat ti pandemia, nakansela dagiti miting ti korum iti Domingo iti apagapaman. Makapagmiting itan a virtual ti sumagmamano a korum. Nupay kasta, ti aramid nga inted ti Apo kadagiti korum iti priesthood ket saan a nairanta a mapasamak laeng iti oras ti mting. Dagiti miting ket bassit a paset laeng ti nakairantaan ti maysa a korum ken no naia ti maaramidna.
Kakabsatko iti Aaronic Priesthood ken elders quorums, palawaenyo ti panniriganyo no apay nga adda dagiti korumtayo. Kasano a tarigagayan ti Apo a panangusaryo iti korumyo a mangipatungpal iti aramidna—itan? Agkiddaw iti paltiing manipud ti Apo. Ipakumbabayo ti bagiyo! Agdawatkayo! Dumngegkayo! No naawagankayo a mangidaulo, aggiinnuman kas panguluen ken kadua dagiti miembro ti korum. Ania man ti priesthood office wenno callingmo, bay-anyo nga agballigi ti Dios iti panagkumityo kas miembro ti korumyo ken iti serbisioyo. Padasenyo nga addaan rag-o ti kinalinteg nga isangbayyo no “sipapasnek a makiramankayo iti nasayaat a panggep.”12 Adda dagiti korum iti naidumduma a saad a mangpadaras iti panangummong iti Israel iti agsumbangir ti belo.
Leksion 4: Nasaysayaat a Denggentayo ni Jesucristo no Naulimektayo
Agbibiagtayo iti panawen a naipadto idi, no “agarimbangawto amin a banag; ket awan duadua, aglulokto ti puspuso dagiti tao; ta sumallukobto ti buteng iti amin a tao.”13 Pudno dayta sakbay ti pandemia, ket pudnonto daytoy kalpasanna. Agtultuloyto nga umadu ti arimbangaw iti lubong. Kasupadina, ti timek ti Apo saan a “timek ti makaalimpayeng nga ariwawa, ngem … naulimek a timek a naan-anay ti kinalamuyotna, [kasla] iti arasaas, [sumeksek] iti kaunggan ti kararua.”14 Tapno mangngegan ti naulimek a timek nasken a naulimekka met!15
Apagapaman a pinagsardeng ti pandemia dagiti aktibidad a gagangay a mangpunno iti biagtayo. Di agbayag makapagpilitayo manen a punnuen dayta nga oras iti ariwawa ken arimbangaw ti lubong. Wenno mausartayo ti orastayo a dumngeg iti timek ti Apo a mangyar-arasaas iti tarabay, liwliwa ken kappiana. Sagrado nga oras ti naulimek nga oras—oras a mangpadaras iti personal a paltiing ken mangted iti kappia.
Disiplinaenyo ti bagiyo a maaddaan iti oras nga agmaymaysa ken kadua dagiti patpatgenyo. Luktanyo ti pusoyo iti Dios iti kararag. Maaddaan iti oras nga agadal iti nasantuan a kasuratan ken agdaydayaw iti templo.
Patpagek a kakabsatko, adu dagiti banag a kayat ti Apo a masursurotayo manipud kadagiti padastayo bayat daytoy a pandemia. Inlistak laeng ti uppat. Awisenkayo nga aramidenyo ti bukodyo a listaan, utobenyo daytoy a nasayaat, ket ibinglayyo daytoy kadagiti ipatpategyo.
Naraniag ti masakbayan dagiti tao ti Dios nga agtungtungpal iti katulagan.16 Agtultuloy nga awaganto ti Apo dagiti katulonganna a maikari nga agiggem iti priesthood a mangbendision, mangliwliwa, ken mangpapigsa iti sangkataw-an ken mangtulong a mangisagana iti lubong ken tattaona iti Maikadua a Yaayna. Pagimbagan ti tunggal maysa kadatayo a mangragpat iti sagrado nga ordinasion nga inawattayo Maaramidtayo daytoy! Paneknekak daytoy, nga ipeksak ti ayatko para iti tunggal maysa kadakayo, iti sagrado a nagan ni Jesucristo, amen.