Agbalinkayto a Nawaya
Ni Jesucristo ti silaw a nasken nga igganantayo bayat dagiti nasipnget a panawen ti mortal a biagtayo.
Ay-ayatek a kakabsatko, agyamanak itoy a gundaway nga agsarita kadakayo manipud iti Africa. Bendision nga adda teknolohia ita nga usaren ditoy a kasamayan a wagas a madanonkayo sadinokayo man.
Idi Septiembre 2019, iti panagserbimi kas lider ti Maryland Baltimore Mission, naaddaankami ken Sister Mutombo iti gundaway a bumisita iti Church historical sites iti Palmyra, New York, bayat idadar-aymi iti mission leadership seminar. Ginibusanmi ti panagbisitami iti Sacred Grove. Panggepmi iti panagbisita iti Sacred Grove saan a tapno maaddaan iti espesial a parangarang wenno parmata, ngem nariknami ti kaadda ti Dios itoy sagrado a lugar. Napno ti puspusomi iti panagyaman ken ni Propeta Joseph Smith.
Iti dalanmi nga agsubli,nadlaw ni Sister Mutombo nga immisemak iti dakkel bayat panagmanehok, isu a dinamagna, “Ania ti gapu ti panagragsakmo?”
Insungbatko, “Patpatgek a Nathalie, kanayon nga agballigi ti kinapudno, ken saan nga agtuloy ti sipnget iti daga gapu iti naisubli nga ebanghelio ni Jesucristo.”
Binisita ti Dios Ama ken ni Jesucristo ni ubing a Joseph Smith tapno iruar ti silaw a nakalemmeng, tapno maawattayo ti “pannakaammo kadagiti banag a kasasaadda ita, … kasasaadda idi, ken kasasaad[danto]” (Doktrina ken Katulagan 93:24).
Kalpasan ti dumani duagasut a tawen, adu latta ti agsapsapul iti kinapudno tapno agbalin a nawaya iti sumagmamano a tradision ken ti inuulbod nga isaksaknap ti kabusor iti intero a lubong. Adu ti “nabulsek iti nasikap nga aramid dagiti tao” (Doktrina ken Katulagan 123:12). Iti Suratna kadagiti taga Efeso, insuro ni Pablo, “Agriingka sika a matmaturong, ket bumangonka iti nagtengngaan dagiti natay, ket lawagannakanto ni Cristo” (Taga Efeso 5:14). Inkari ti Mangisalakan nga Isunto ti silaw iti amin a dumngeg kadagiti balikasna (kitaen iti 2 Nephi 10:14).
Tallopulo-ket-lima a tawen ti naglabas, nabulsek met dagiti dadakkelko ken nagsapsapul a mangammo iti kinapudno ken naseknanda no sadino ti pangsapulanda iti daytoy. Agpada a nayanak dagiti dadakkelko iti purok, a nagramutan dagiti tradision iti biag dagiti tao ken pamilia. Agpada a pinanawanda ti purokda idi ubbingda ket napanda iti siudad, a nagsapsapul iti naysaysayaat a biag.
Nagkasarda ket nangrugida a nagpamilia iti nanumo unay a wagas. Dumani walokami iti maysa a basst a balay—dagiti dadakkelko, dua a babbai a kabsatko ken siak, ken maysa a kasinsinko a sigud a nagyanen kadakami. Pampanunotek no pudno a pamiliakami, gapu ta dikami makagiddan a mangan dagiti dadakkelmi iti maymaysa a lamisaan. No sumangpet ti amami manipud iti trabaho, apaman a sumrek iti balay, makiddaw kadakami a mapan iti ruar. Ababa unay dagiti rabiimi, ta dikami makaturog gapu iti kaawan ti panagtutunos ken pudno nga ayat iti panagdenna kas agassawa dagiti dadakkelmi. Di laeng bassit ti pagtaenganmi, ngem nasipnget pay daytoy. Sakbay a naam-ammomi dagiti missionary, dinar-ayanmi ti agduduma a simbaan iti tunggal Domingo. Nalawag nga agsapsapul dagiti dadakkelmi iti maysa a banag a saan a maited ti lubong.
Nagtultuloy daytoy agingga a naam-ammomi da Elder ken Sister Hutchings, ti umuna a senior missionary couple a naawagan nga agserbi iti Zaire (nga ammo itan a DR ti Congo wenno Congo-Kinshasa). Idi damo a nakipagkitakami itoy 2 a naimbag a misionario, a kaslada la anghel a naggapu iti Dios, nadlawko nga adda maysa a banag a nagbalbaliw iti pamiliami. Kalpasan ti panagbuniagmi, pudno a nangrugi a dimmur-as ti baro nga estilo ti biagmi gapu iti naisubli nga ebanghelio. Nangrugi ti balikas ti Dios a dimmakkel iti kararuami. Nagrugi dagitoy a nanglawag iti pannakaawatmi ken nagbalin a naimas kadakami, gapu ta mariknami dagiti kinapudno a naawatmi ken makitami ti lawag, ket rimmaniag a rimmaniag daytoy a lawag iti inaldaw.
Daytoy a pannakaawat ti apay ti ebanghelio ti nangtulong kadakami nga agbalin nga ad-adda a kas iti Mangisalakan. Saan a nagbaliw ti kadakkel ti balaymi; kasta met ti kasasaadmi iti kagimongan. Ngem nasaksiak ti panagbaliw ti puso dagiti dadakkelko bayat ti inaldaw a panagkararagmi, bigat ken rabii. Inadalmi ti Libro ni Mormon; nag-family home evening-kami; pudno a nagbalinkami a maysa a pamilia. Kada Domingo agriingkami iti alas sais ti bigat tapno agsagana a mapan iti simbaan, ket agbiahekami iti uneg ti adu nga oras tapno dumar-ay kadagiti miting iti Simbaan iti linawas nga awan ti reklamo. Maysa a napintas a padas ti agsaksi. Dakami, a sigud a nagna iti sipnget, pinaksiatmi ti sipnget kadakami (kitaen iti Doktrina ken Katulagan 50:25) ket nakitami ti “agrimat a lawag” (2 Nephi 19:2).
Maysa nga aldaw malagipko idi diak kayat ti agriing a nasapa para iti family prayer, indayamudomko kadagiti babbai a kakabsatko, “Awan pudno a maaramidtayo ditoy a pagtaengan, agkararag ken agkararag, ken agkararagtayo laeng.” Nangngeg ni tatangko dagiti saok. Malagipko ti reaksionna bayat ti naayat ngem natibker a panangisurona kaniak, “Agingga nga addaka ditoy balay, agkararag, ken agkararag, ken agkararagkanto.”
Nangngegak dagiti sao ni tatangko iti inaldaw. Ania iti panagkunayo nga ar-aramidenmi ken ni Sister Mutombo kadagiti annakmi ita? Agkararag, ken agkararag, ken agkararagkami. Daytoy ti tawidmi.
Ti lalaki a nayanak a bulsek ken pinaimbag ni Jesucristo, kalpasan a pinilit dagiti kaarrubana ken dagiti Fariseo, kinunana:
“Ti tao a managan Jesus nangaramid ti pitak, ket sinapsapuanna dagiti matak ket kinunana kaniak, Inka idiay Siloe ket agdiram-oska: ket napanak ngarud ket nagdiram-osak ket nakakitaak. …
“… Maysa a banag [nga] ammok [ket] idinto a … bulsekak idi, itan makakitaak” (Juan 9:11, 25).
Bulsekkami met idi ket itan makakitakami. Ti naisubli nga ebanghelio ti nangaring iti pamiliami manipud pay iti dayta a panawen Ti pannakaawat iti apay ti ebanghelio ti nangparabur iti tallo a henerasion ti pamiliak ken agtultuloyto a mangparabur kadagiti umay a henerasion.
Ni Jesucristo ti silaw nga agraniag iti sipnget. Isu a ti sumurot Kenkuana “saanto a magna iti sipnget, no di ket addanto kenkuana ti silaw ti biag” (Juan 8:12).
Iti dumani makatawen, iti nagbaetan ti 2016 ken 2017 naipasango dagiti tao iti rehion ti Kasai iti nakaro a trahedia. Nasipnget unay a tawen para kadagiti tao gapu iti sinnupadi ti tradisional a grupo dagiti maingel ken puersa ti gobierno. Nagwaras ti kinaranggas kadagiti ili iti Kasai-Central Province iti nalawlawa a rehion ti Kasai. Naglibas ti adu a tao iti pagtaenganda para iti talged ket naglemmengda iti mulmula. Awan kanen ken inumenda wenno ania man a banag, a talaga, ket maibilang kadakuada dagiti miembro ti Ti Simbaan ni Jesucristo dagiti Santo iti Ud-udina nga Aldaw iti lugar a Kananga. Sumagmamano a miembro ti Simbaan ti pinatay ti buyot.
Ni Brother Honoré Mulumba ti Nganza Ward iti Kananga ken ti pamiliana ti maibilang iti sumagmamano a tattao a naglemmeng iti balayda, a di ammo ti papanan gapu ta nagbalin ti amin a kalsada a pangbabakalan. Maysa nga aldaw nadlaw ti sumagmamano a buyot a lallaki ti kaadda ni Brother Mulumba ken ti pamiliana itimaysa a rabii a rimmuarda a kumita iti sumagmamano a sidaen a natnateng iti hardin ti pamilia. Maysa a grupo ti buyot ti napan iti balayda ket ginuyodda nga inruar ida ket imbagada kadakuada a pilienda ti kumappeng kadagiti kannawidanda iti buyot wenno mapapatayda.
Situtured nga imbaga ni Brother Mulumba, “Maysaak a iembro ti Ti Simbaan ni Jesucristo dagiti Santo iti Ud-udina nga Aldaw. Inawatmi iti pamiliak ni Jesucristo ken adda pammatimi Kenkuana. Agtalinaedkaminto a napudno iti katulaganmi ken awatentminto ti matay.”
Imbagana kadakuada, “No piniliyo ni Jesucristo, kanento dagiti aso dagiti bagiyo,” ket inkarida nga agsublida. Ngem saanda pulos a nagsublin, ket nagtalinaed ti pamilia idiay iti dua a bulan ket didan nakita pay ida. Pinagtalinaed ni Brother Mulumba ken ti pamiliana ti silaw ti pammatida a nakasindi. Nalagipda dagiti katulaganda ket nasaluadanda.
Ni Jesucristo ti silaw a nasken nga igganantayo bayat dagiti nasipnget a panawen ti mortal a biagtayo (kitaen iti 3 Nephi 18:24). No pilientayo ti sumurot ken Cristo, pilientayo ti agbalbaliw. Ti nagbalbaliw a tao para ken Cristo ket idauluanto ni Cristo, ket damagentayto kas iti inaramid ni Pablo, “Apo, ania ti paaramidmo kaniak?” (Dagiti Aramid 9:6). “Surotentayto dagiti addangna” (1 Pedro 2:21). “Magnatayto, kas iti pannagnana” (1 Juan 2:6). (Kitaen iti Ezra Taft Benson, “Born of God,” Tambuli, Okt. 1989, 2, 6.)
Paneknekak maipapan Kenkuana a natay, naitanem, ken nagungar manen iti maikatlo nga aldaw ket immuli iti langit tapno makaawattayo kadagiti bendision ti imortalidad ken pannakaitan-ok. Isu ti “silaw, … ti biag, ken ti kinapudno” (Ether 4:12). Isu ti agas ken remedio iti pannakatikaw ti lubong. Isu ti pagrukodan ti kinalaing para iti pannakaitan-ok, uray ni Jesucristo. Iti nagan ni Jesucristo, amen.