Siled iti Pagdagusan
Itoy a Paskua ti Panagungar, awisennatayo ni Jesucristo nga agbalin a kas Kenkuana, naimbag a Samaritano, nga aramiden ti pagdagusanna (ti Simbaanna) a kamang ti amin.
Patpatgek a kakabsat, kailiwko ti amak nupay pimmusay 20 a tawenen ti napalabas. Ikari ti Paskua ti Panagungar a makitakto manen isuna.
Binisitanak ti amak iti nagturposak nga eskuelaan idiay Inglatera. Marikna ti amana a kailiwko ti pagtaengan.
Inayat ti amak ti pannakigasanggasat malaksid iti taraon. Uray idiay Francia, a mabigbig iti panagluto, ibagana nga, “Intayo mangan iti Chinese food.” Kas napaut a nagserbi a patriach iti Simbaan, naespirituan ken naasi unay ti amak. Maysa a rabii, kinunana idi adda napigsa a wangwang dagiti napartak a pang-emerhensia a lugan idiay Paris, “Gerrit, sugat ti siudad dagidiay a wangwang.”
Iti dayta a biahe, nariknak ti sabali a wangwang ken sugsugat. Aglaklako ti maysa nga agtutubo a babai ti sorbetes iti bassit a karison. Maysa a scoop ti sorbetes ti kadakkel laeng dagiti apana. Iti di ammo a rason, maysa a dakkel a lalaki ti simmango iti agtutubo a babai. Agbugkaw ken agiduron, nabalintuag ti karisonna, naibukbok dagiti apa ti sorbetesna. Awan ti maaramidak idi rinumekna dagiti apa kadagiti botasna. Makitkitak pay ti agtutubo a babai a nakaparintumeng iti kalsada, a mangpadpadas a mangisalba kadagiti narumek nga apana, agar-arubos ti lua iti saem iti rupana. Maladingitanak iti itsurana, a mangipalagip iti kinaawan asi, awanan pannakaseknan, di pagkikinnaawatantayo iti tunggal maysa.
Iti maysa a malem, binisitami ken tatang ti dakkel a katedral iti Chartes asideg iti Paris. Imbatad ni Malcolm Miller,1 maysa nga eksperto iti katedral ti tallo a pakabuklan ti nakoloran a sarming a tawtawa ti Chartres. Kinunana nga isaritada ti maysa nga estoria.
Ipakita ti umuna a tawtawa da Adan ken Eva a pumampanaw iti Minuyongan ti Eden.
Isarita manen ti maikadua ti pangngarig ti naimbag a Samaritano.
Iladawan ti maikatlo ti Maikadua a Yaay ti Apo.
No pagkakaduaen, iladawan dagitoy a nakoloran a sarming a tawtawa ti panagdaliasattayo iti biag. Awisenadatayo nga umawat iti amin iti siled iti pagdagusanna.2
iStock.com/digitalimagination
Kas kada Adan ken Eva, panawantayo iti Minuyongan ti Eden a mapan iti lubong dagiti sisiitan ken kalkalunay.3
iStock.com/digitalimagination
Mariribukantayo, masugatan, ken mabaybay-an nga agpapaut-ot kadagiti natapok a dalantayo nga agpa-Jerico.4
Nupay nasken nga agtitinnulongtayo, masansan lumabastayo iti bangir ti kalsada, iti aniaman a rason.
Nupay kasta, addaan iti asi, agsardeng ti Naimbag a Samaritano ket agasanna iti arak ken lana ti sugsugattayo. Itudonatayo dagiti simbolo iti sakramento ken dadduma nga ordinansa nga arak ken lana iti naespirituan a panangpaimbag ni Jesucristo.5 Ipannatayo ti Naimbag a Samaritano iti asnona wenno, ibaklaynatayo iti abagana iti sumagmamano a nakoloran a sarming. Isangpetnatayo iti pagdagusan, a mangibagi ti Simabaanna. Kuna ti Naimbag a Samaritano iti pagdagusan, “Taraknem; … inton sumubliak, bayadakto kenka.”6 Ikari nga agsubli ti Naimbag a Samaritano, a simbolo ti Mangisalakantayo, iti daytoy a kanito iti kinatan-ok ken kinadayag.
iStock.com/digitalimagination
Itoy a Paskua ti Panagungar, awisennatayo ni Jesucristo nga agbalin a kas Kenkuana, a maysa a naimbag a Samaritano, nga aramidenna ti pagdagusanna (ti Simbaanna) a pagkamangan dagiti amin a nasugatan ken nabagyo iti biag.7 Agsaganatayo para iti inkarina a Maikadua a Yaayna kas iti aramidentayo iti inaldaw iti “kanunumuan kadagitoy”8 kas iti aramidentayo Kenkuana. Tunggal maysa kadatayo “ti kanunumuann kadagitoy.”
No umaytayo a kadua ti Naimbag a Samaritano iti pagdagusan, masursurotayo ti lima a banag maipanggep ken ni Jesucristo ken iti bagitayo.
Umuna, umaytayo iti pagdagusan no aniatayo nga addaan pagkapuyan ken kinaimperpekto. Ngem, addaantayo amin iti maysa a banag amaipaay a kasapulan a banag. Masansan a masarakantayo a sangsangkamaysa ti biahetayo iti Dios. Agkaykaysatayo kas maysa a komunidad—mapasaran man dagiti epidemia, bagyo, uram, tikag, wenno naulimek a panangipaay iti inaldaw a kasapulan. Maawattayo ti inspirasion no aggiinumantayo, a dumdumngeg iti tunggal tao, agraman ti tunggal kabsat a babai, ken ti Espiritu.
Iti panagbaliw dagiti pusotayo ken awatentayo ti ladawanna iti langatayo,9 makitatayo Isuna ken iti bagbagitayo iti Simbaanna. Masarakantayo Kenkuana, ti kinalawag saan a di agkakatunosan. Masarakantayo Kenkuana ti panggep nga agaramid ti naimbag, rason a sumayaat, ken dumurdur-as a kabaelan nga agbalin a nasaysayaat. Matakuatantayo Kenkuana ti natibker a pammati, makawayawaya a kinamanagparabur, maseknan a panagbalbaliw, ken panagtalek iti Dios. Iti pagdagusanna, masarakan ken mapaunegtayo ti personal a relasiontayo iti Dios, nga Amatayo, ken ni Jesucristo.
Pagtalkannatayo a tumulong a pagbalinen ti pagdagusan a lugar a nsken a pagyananna. No idatontayo dagiti talento ken amin a kabaelantayo, dagiti naespirituan a sagutna ti mangpapigsa ken mangbendision kadatayo.10
Imbaga kaniak ti Espaniol nga agipatpatarus ti pagsasao, “Elder Gong, ammok babaen ti Espiritu ti isaomto tapno maipatarusko,” kinuna daytoy matalek a kabsat, “babaen ti sagut ti pagsasao.”
Maipakita dagiti umay a sagut ti pammati ken namnama iti agduduma a situasion. Immawat iti naespirituan a liwliwa ti maysa nga ipatpateg a sister idi pimmusay ti asawana gapu ti COVID-19. Kinunana, “Ammok nga agdennakamto manen iti patpatgek nga asawak.” Iti sabali a situasion ti COVID, kinuna ti sabali pay a sister, “Nariknak a nasken a ipakaasik iti Apo ken kadagiti doktor nga ikkan iti ad-adu pay nga oras ti asawak.”
Maikadua, idawatna kadatayo a pagbalinen ti pagdagusanna a lugar ti parabur ken paguumongan nga adda siled para iti amin. Kas disipulo ni Jesucristo, agpapada amin, awan iti nababbaba a grupo,.
Maawat amin a dumar-ay kadagiti miting ti sakramento, dadduma pay a miting iti Domingo, ken pasken.11 Agdaydayawtayo iti Mangisalakantayo, agsisinnakit ken agpipinnategtayo. Kitaen ken bigbigentayo ti tunggal tao. Umisem, makitugawtayo kadagiti nakatugaw nga agmaymaysa, ammuen ti nagnaganda, agraman dagiti baro a miembro, dagiti agsublin a kakabsattayo, dagiti agtutubo, tunggal maipatpateg nga ubing iti Primary.
Ipapantayo a datayo isuda, pasangbayentayo dagiti gagayyem, sangaili, kaak-akar, tattao a makumikom iti kaadu ti pagrebbenganna. Makipagladingit, makipagrag-o, ken mangtarabay iti tunggal maysa. No napaaytayo iti tarigagaytayo ket maapura, ditay ammo, managhusga, wenno mangidumduma, agpipinnakawantayo ket agaramid iti nasaysayaat.
Kinuna ti pamilia a taga‑Africa nga agnanaed itan iti Estados Unidos, “Manipud iti umuna nga aldaw, mannakigayyem dagiti miembro ti Simbaan. Impariknada a kapamiliadakami. Awan ti nangtagibassit kadakami.” Kinuna ti ama, “Isuro ti Biblia a naggapu ti bunga ti ebanghelio iti ramut ti ebanghelio.” “Ket dagiti misionario,” kinuna ti ama ken ina, “kayatmi a dumakkel dagiti annakmi a kas kadagiti misionario.” Kakabsat, sibabara a pasangbayenntayo koma ti amin iti pagdagusanna.
Maikatlo, iti pagdagusanna, maadaltayo nga adda ken Jesuscristo ti kinaperpekto, saan a ti kinaperpekto ti lubong. Saan nga agpayso ti “insta-perfect” ti perpeksionismo ti lubong a makaiparikna kadatayo a ditayo maikari babaen kadagiti maar-aramid iti social media. Maisupadi iti dayta, ammo ti Mangisalakantayo a Jesucristo, ti amin a banag maipanggep kadatayo a ditayo kayat a maammuan ti asino man, ket patpatgennatayo latta. Isu ti ebangheliona ti maikadua ken maikatlo a gundaway, nga inaramid a posible ti pangsubbot a sakripisiona.12 Awisenna ti tunggal maysa kadatayo nga agbalin a naimbag a Samaritano, saan a managhusga ken ad-adda a manangpakawan iti bagbagitayo ken iti tunggal maysa, uray no ikarigatantayo nga ad-adda a naan-anay nga agtungpaltayo kadagiti bilinna.
Matulongantayo ti bagitayo bayat iti panagtitinnulongtayo. Am-ammok ti maysa a pamilia nga agnaed iti asideg ti kalsada. Masansan nga agsardeng dagiti biahero tapno agpatulong. Maysa a bigat nangngeg ti pamilia ti napigsa a banugbog iti ridawda. Nabannog ken nagdanag no asino daytoy iti 2:00 am, nasdaawda no ita laeng, adda koma makatulong. Iti panagtultuloy ti panagtuktok, nangngegda, “Uram—adda maur-uram iti likud ti balayyo.” Agtitinulong dagiti Naimbag a Samaritano.
Maikapat, agbalintayo a paset ti komunidad ti ebanghelio a nakasentro ken Jesuscristo, nayangkla iti naisubli a kinapudno, dagiti sibibiag a propeta ken apostol, ken ti sabali a tulag ni Jesuscristo—ti Libro ni Mormon. Yegnatayo iti pagdagusanna ken iti pay balayna—ti nasantuan a templo. Ti balay ti Apo ket maysa a lugar, kas iti nadunor a lalaki iti dalan nga agpa-Jerico, a pakadalusan ken pakakawesannatayo ti Naimbag a Samaritano, maisagananatayo nga agsubli iti sidong ti Dios, ken agnanayon a mapagkaykaysanatayo iti pamilia ti Dios agnanayon. Silulukat dagiti templona iti amin nga agbiag iti ebanghelio iti pammati ken panagtulnog.
Iraman ti panagrag-o iti templo ti panagkaykaysa iti ebanghelio iti baet ti agdumaduma a patawid, kultura, pagsasao, ken henerasion. Iti groundbreaking ti Templo iti Taylorville Utah, imbinglay ti agtawen-17 a ni Max Harker ti tawid a pammati ti pamilia a nangrugi innem a tawen a nasapsapa ti lelong-ti dapan ni Joseph Harker ken ti asawana, ni Susannah Sneath. Iti naisubli nga ebanghelio ni Jesuscristo, makapagbalintayo a napigsa a kawing ti henerasion ti pamiliatayo.
Kamaudiananna, maikalima, agrag-otayo nga ay-ayaten ti Dios dagiti annakna iti amin nga agduduma a nagtaudan ken kasasaadtayo, iti tunggal nasion, puli, ken pagsasao, nga adda siled ti amin iti pagdagusanna.
Iti naglabas a 40 a tawen, umad-adun iti sangalubongan dagiti miembro ti Simbaan. Manipud idi 1998, nagnaed ti ad-adu pay a miembro ti Simbaan iti ruar ti Estados Unidos ken Canada. Inton 2025, namnamaentayo nga ad-adu pay ti agnaed a miembro ti Simbaan iti Latin America kas iti Estados Unidos ken Canada. Mangipatpatungpal iti padto ti panaguummong dagiti napudno nga an-annabo ni Lehi. Agtalinaed dagiti napudno a Santo agraman ti pioneer corridor a pagurnongan ti debosion ken panagserbi para iti sapasap a lubong.
Kasta met a kaaduan dagiti nataengan a miembro ti Simbaan ita ti awan asawana, balo, wenno diborsiado. Dakkel ken napateg a panagbalbaliw daytoy. Iraman daytoy ti nasurok a kagudua dagiti sisters iti Relief Society ken nasurok a kagudua ti nataengan a brothers iti priesthood. Daytoy a pagtuladan iti demograpiko ti kasasaad iti sapasap a Simbaan manipud pay idi1992 ken iti Simbaan iti Estados Unidos ken Canada manipud pay idi 2019.
Saan a maipapan iti marital status ti saadtayo iti sango ti Apo ken iti Simbaanna ngem iti panagbalin a napudno ken natured a disipulo ni Jesuscristo.13 Kayat dagiti nataengan a makita a nataengan ken responsable ken makatulong kas nataengan. Naggapu dagiti disipulo ni Jesuscristo iti tunggal lugar, iti tunggal sukog, kadakkel, maris, edad, tunggal maysa addaan talento, nalinteg a tarigagay, talento, ken dakkel a kabaelan a mangbendision ken agserbi. Sarakentayo iti inaldaw a sumurot ken ni Jesucristo nga adda pammati nga agturong iti panagbabawi14 ken manayon a rag-o.
Bayat daytoy a biag, no dadduma ur-urayentayo ti Apo. Mabalin nga awantayo iti namnamaen ken tarigagayantayo iti masakbayan. Kuna ti napasnek a sister, “Nasatuan a saad ti panaguray iti Apo kadagiti bendisionna. Nasken a di maragpat daytoy iti kinaay-ay, panangsuporta, wenno pananghusga ngem ketdi iti sagrado a panagdayaw.”15 Kabayatanna, agbiagtayo ita, saan nga agur-uray a mangrugi ti biag.
Ikari ni Isaias, “Dagiti agpannuray iti Apo maparaboranto ti pigsada; agtayabdanto a kasla iti agila; saandanto a mabbanog no agtarayda, saandanto a kumapsut no magnada.”16
Ikari ti Naimbag a Samaritano nga agsubli. Mapasamak dagiti milagro no aggiinnaywantayo kas iti panangaywanna. No umaytayo nga adda nasneban a puso ken napnuan babawi nga espiritu,17 masarakantayo ti timek ni Jesucristo ken malikmutan iti manakaawat a takiag ti kinatalged.18 Idaton ti pannakaibilang a katulagan ken “ti bileg ti kinadios” dagiti sagrado nga ordinansa20 tapno masantipikaran ti makin-uneg a panggep ke makinruar a tignay. Agbalin a pagdagusantayo ti Simbaanna babaen iti naayat-a kinasayaat ken kinaanusna.
No partuatentayo ti siled iti pagdagusanna, mangpaspasangbay iti amin, mapaimbagnatayo ti Naimbag a Samaritano kadagiti natapok a mortal a dalantayo. Addaan iti naan-anay nga ayat, ikari ti Amatayo ken ti Anakna, ni Jesucristo ti “kappia iti daytoy a lubong, ken agnanayon a biag iti masungad a lubong”20—“tapno sadino man ti yanko addakayto met.”21 Siyayaman a saksiak ken paneknekak iti sagrado a nagan ni Jesucristo, amen.