pamilia nga agad-adal

Marso 4–10: “Agrag-otayo ken ni Cristo”

2 Nephi 20–25

Iraman dagiti sinurat ni Isaias dagiti napigsa a ballaag, ngem mangipaayda met iti namnama ken rag-o. Daytoy ti maysa a gapu no apay nga inraman ida ni Nephi iti kasuratanna: “Isuratko ti sumagmamano a balikas ni Isaias,” kinunana, “Ta siasino man … ti makabasa kadagitoy a balikas mabalin a maitag-ay dagiti pusoda ket agrag-oda” (2 Nephi 11:8). Iti maysa a kaipapanan, ti panangawis a mangbasa kadagiti sinurat ni Isaias ket maysa nga awis nga agrag-o. Makapagragsakkayo, kas iti inaramid ni Nephi, kadagiti padto ni Isaias maipapan iti pannakaummong ti Israel, ti idadateng ti Mesias, ken ti kappia a naikari kadagiti nalinteg. Mabalinyo ti agrag-o nga agbiag iti naipadto nga aldaw no ti Apo “nakaipatakder iti wagayway kadagiti pagilian, ken urnongenna dagiti napagtalaw iti Israel” (2 Nephi 21:12). No mawawkayo iti kinalinteg, mabalin a “naragsakkayo a mangpapusuak iti danum iti bubon ti panangisalakan” (2 Nephi 22:3). Iti sabali a pannao, mabalinyo ti “agrag-o ken ni Cristo” (2 Nephi 25:26).

Dagiti Kapanunotan para iti Panagsursuro iti Pagtaengan ken iti Simbaan

2 Nephi 21:22

Masarakak iti talna ken ni Jesucristo.

Adda parikut dagiti annak ni Lehi iti panagsisinnupanget. Kimmaro dayta a parikut kadagiti masanguanan a kaputotan, a nangiturong iti pannakabingaybingay, pannakabalud, ladingit, ken pannakadadael. Ket agtultuloy nga agbalin a parikut ti panagsisinnupanget ita.

Iti panangpanunot iti amin dayta, utobenyo dagiti padto iti 2 Nephi 21–22. Ibilangyo no kasano nga ipatpatungpal ti Mangisalakan dagitoy a padto. Ania ti kaipapanan kadakayo ti padto a ti lobo “makipagtaengto iti kordero”? (2 Nephi 21:6). Utobenyo no anianto ti mabalinyo nga aramiden tapno agbalin a mamagkappia.

Kitaen iti Dale G. Renlund, “The Peace of Christ Abolishes Enmity,” Liahona, Nob. 2021, 83–85.

2 Nephi 21:9–12

Um-ummongen ti Apo dagiti taona.

Saksi ni Nephi ken ti pamiliana iti pannakaiwaras ti Israel (kitaen iti 2 Nephi 25:10). Ita mabalinyon ti makipaset iti panaguummong ti Israel (kitaen iti 2 Nephi 21:12). Bayat ti panangbasayo iti 2 Nephi 21:9–12, panunotenyo no kasano a makatulongkayo a mangipatungpal kadagiti padto nga iladawan dagiti bersikulo.

Kas pagarigan, bayat ti panangbasayo maipapan iti “wagayway” (wenno bandera) a maibayogto tapno mangummong kadagiti tao ti Dios, panunotenyo no kasano a nakitayo ti Dios a nangummong kadagiti taona, iti pisikal ken naespirituan. Ania ti mangallukoy kadagiti tao iti Apo ken iti Simbaanna?

Ania ti mariknayo a makaparegta nga aramidenyo a tumulong a mangummong kadagiti tao ti Dios?

2 Nephi 23–24

Matnagto ti kinailubongan ti Babilonia.

Ti pagarian ti Babilonia ti nabileg a pangta iti politika ken militar iti nagkauna nga Israel. Ngem kadagiti tao ni Nephi—ken kadatayo ita—ti dakdakkel a pangta ket no ania ti ibagi ti Babilonia: kinailubongan ken basol. Ibilangyo no kasano a dagiti ballaag iti 2 Nephi 23–24 ket nakaapekto kadagiti nagbuteng wenno nagdaydayaw wenno nagtalek iti kinabaknang ken bileg ti Babilonia (kitaen, kas pagarigan, iti 23:6–9, 11, 19–22; 24:10–19). Ania dagiti sumagmamano a banag a mabalin a pagbutngan wenno daydayawen wenno pagtalkantayo ita? Ania ti mariknayo iti mensahe ti Apo kadakayo a mabalin nga adda kadagitoy a kapitulo? Panunoten no kasano a maipakitayo nga ‘agrag-okayo iti kinangayed [ti Apo]” (2 Nephi 23:3).

icon iti seminary

2 Nephi 25:19–29

“Agsaotayo iti maipanggep ken ni Cristo … agrag-otayo ken ni Cristo.”

Nawaya ni Nephi maipapan iti panangibinglayna kadagiti pammatina—nangruna ti pammaneknekna maipapan ken ni Jesucristo. Iti unos ti panangadalyo iti 2 Nephi 20–25, panunotenyo maipapan iti tarigagay ni Nephi a “manggutugot kadagiti annak[na] … a mamati ken ni Cristo, ken makikinnaawatan iti Dios” (bersikulo 23). Ania ti kayat ni Nephi a maammuan dagiti tao maipapan iti Mangisalakan? (kitaen dagiti bersikulo 12–13, 16). Ania ti pinadas ni Nephi a manguyot kadagiti tao a mamati Kenkuana? (kitaen dagiti bersikulo 19–29). Kitaen dagiti binatog iti daytoy a kapitulo a manguyot kadakayo a mamati ken sumurot ken ni Jesucristo.

Mabalin a saan a marikna ti dadduma kadatayo ti kinatured a kas ken ni Nephi maipapan iti panagsarita maipapan ken Cristo. Ngem mabalin a makasarakkayo iti maysa a banag kadagiti pannursuro ni Nephi iti 2 Nephi 25:23–26 a mangparegta kadakayo a makisarita maipapan Kenkuana kadagiti dadduma nga ad-adda a sipapanayag. Kas pagarigan, ti panangipakdaar ni Nephi nga “Agrag-otayo ken ni Cristo” ket mabalin a mangtignay kadakayo a mangpanunot no kasano a yeg ti Mangisalakan kadakayo ti rag-o—ken no kasano a maibinglayyo dayta a rag-o kadagiti dadduma.

Iti mensahena a “We Talk of Christ” (Liahona, Nob. 2020, 88–91), isingasing Elder Neil L. Andersen no kasano a makapagsaritatayo nga ad-adda a sipapannayag maipapan ken ni Cristo iti nadumaduma a kasasaad. Ania kadagiti singasingna ti napateg kadakayo? Ania dagiti gundaway nga adda kadakayo a mangisarita ti maipapan ken Cristo iti dadduma?

Ania ti mariknayo a makaparegta a mangisarita iti dadduma maipapan ken ni Cristo? No kasapulanyo ti sumagmamano a kapanunotan, mabalinyo a sukisoken ti “Ti Sibibiag a Cristo: Ti Pammaneknek dagiti Apostol” (Gospel Library). Ti himno a kas iti “I Believe in Christ” (Hymns, no. 134) ti mangted kadakayo iti ad-adu pay a kapanunotan.

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

2 Nephi 21:1–5

Maukomto ni Jesucristo iti kinalinteg.

• Tapno matulonganyo dagiti annakyo a mangiladawan iti panunotda kadagitoy a bersikulo, kitaenyo no makasarakkayo iti kayo a napukan wenno sanga a nagtubo manipud iti kayo (wenno usarenyo iti ladawan iti baba). No ti “sanga” iti 2 Nephi 21:1 ibagina ni Jesucristo, ania ti isuro dagiti bersikulo 2–5 kadatayo maipapan Kenkuana?

bassit a mula a dumakdakkel iti puon ti kayo

2 Nephi 21:6–9

Isangbay ni Jesucristo ti talna ken rag-o.

• Ania ti isuro ti 2 Nephi 21:6–9 maipapan iti no ania ti mapasamak no sumurot ti tunggal maysa iti Mangisalakan? (kitaen met iti 4 Nephi 1:15–18). Kasano a maaramidtayo ti pagtaengantayo nga ad-adda a kas daytoy? Mabalin a maragsakan dagiti annakyo a mangkita kadagiti ladawan dagiti ayup a nadakamat kadagiti bersikulo 6–7—dagiti ayup a kadawyan a kabusor ngem saan nga agpipinnadangran inton umay manen ni Jesus (kitaen ti panid ti aktibidad ita a lawas). Mabalin pay a mangidrowing dagiti annakyo kadagiti ladawan ti bagbagida ken dagitoy nga ayup nga agbibiag a sitatalna iti sidong ni Jesus.

2 Nephi 21:11–12; 22

Um-ummongen ti Apo dagiti taona.

• Kinuna ni Isaias a mangikabil ti Apo iti “wagayway para kadagiti pagilian” a mangtulong ti panaguummong dagiti tao Kenkuana (kitaen iti 2 Nephi 21:11–12). Tulonganyo dagiti annakyo a makaawat a kasla maysa a bandera ti maysa a wagayway. Nalabit maragsakanda a mangidrowing iti bukodda a bandera. Mabalinda nga iraman dagiti ladawan wenno balikas a mangibagi kadagiti gapu nga umayda ken ni Jesucristo ken iti Simbaanna. Bay-am nga agsaritada maipapan kadagiti banderada, ken tulongan ida a mangpanunot no kasano a matulonganda dagiti dadduma nga “aguummong” ken ni Jesucristo.

• Kalpasan ti panangbasa iti 2 Nephi 22:4–5 nga aggigiddan, mabalinyo a kasarita dagiti annakyo maipapan iti sumagmamano kadagiti “nasayaat a banag” nga inaramid ti Apo. Ania dagiti sumagmamano nga “aramid ti Apo [kadatayo]” a mabalintayo nga ipakdaar? Tapno matulongan dagiti annakyo a mangpanunot iti daytoy a saludsod, mabalin nga aggigiddankayo a mangkansion iti maysa a kanta maipapan iti Mangisalakan, kas iti “I Believe in ChristHymns, no. 134). Mabalinyo ti agsisinnublat a mangileppas iti binatog a kas iti daytoy: “Mamatiak ken Cristo; Isu .” Kasano a matulongantayo ti dadduma a tao maipapan iti no ania ti inaramid ti Mangisalakan para kadatayo?

2 Nephi 25:26

“Agrag-otayo ken ni Cristo.”

• Kasano a matulonganyo dagiti annakyo nga “agrag-o ken ni Cristo”? Nalabit a mabalinyo nga isarita ti maysa nga estoria maipapan ken ni Jesucristo a mangmangyeg iti rag-o kadagiti dadduma wenno mabalinyo nga ipabuya ti maysa a video kas iti “Jesus Heals a Man Born Blind” wenno “Suffer the Little Children to Come unto Me” (Gospel Library). Mabalin nga itudo dagiti annakyo dagiti naragsak a kanito iti estoria wenno video. Kalpasanna, bayat ti panangbasayo nga aggigiddan iti 2 Nephi 25:26, mabalinda a pagsasaritaan maipapan no apay nga “agrag-oda ken ni Cristo.”

Paneknekanyo ni Cristo. Diyo ipapan nga ammo ti pamiliayo no kasano ti riknayo maipapan iti Mangisalakan. Ibagayo kadakuada, ket bay-anyo nga impluensiaan dagiti riknayo maipapan iti Mangisalakan iti wagas a pannakilangenyo kadakuada.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

dagiti misionario a mangisursuro iti maysa a pamilia

I’ll Go Where You Want Me to Go, ni Ramon Ely Garcia Rivas

panid ti aktibidad: Isangbay ni Jesucristo ti talna ken rag-o