“Marso 18–24: ‘Daytoy ti Dalan.’ 2 Nephi 31–33,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
“Marso 18–24. 2 Nephi 31–33,” Umaykayo, Sumurot Kaniak—Para iti Pagtaengan ken Simbaan: 2024 (2024)
Ni Cristo a Mangisursuro kadagiti Disipulona, ni Justin Kunz
Marso 18–24: “Daytoy ti Dalan”
2 Nephi 31–33
Kadagiti maudi a nairekord a balikas ni Nephi, masarakantayo daytoy a palawag: “Binilinnak ti Apo, ket masapul nga agtungpalak” (2 Nephi 33:15). Daytoy ti nasayaat a pakagupgopan ti biag ni Nephi. Pinadasna a maawatan ti pagayatan ti Apo ket situtured a nagtungpal iti daytoy—uray no kaipapananna ti panangipustana iti biagna a mangala kadagiti pinanid a gambang manipud ken ni Laban, a nangbangon iti maysa a bilog ken nagballasiw iti baybay, wenno sipupudno a nangisursuro iti doktrina ni Cristo nga addaan iti kinalawag ken bileg. Makapagsao ni Nephi nga addaan iti natured a pammati iti panagkasapulan nga “agtultuloy a sitatalingenngen ken ni Cristo,” iti panangsurot iti “nailet ken akikid a dalan nga agturong iti agnanayon a biag” (2 Nephi 31:20,18, agsipud ta dayta ti dalan a sinurotna. Ammona babaen iti padas a daytoy a dalan, nupay narigat no dadduma, makaparag-o pay daytoy, ket “awan ti sabali a dalan wenno nagan a maited iti sirok ti langit a pakaisalakanan ti tao iti pagarian ti Dios” (2 Nephi 31:21
Dagiti Kapanunotan para iti Panagsursuro iti Pagtaengan ken iti Simbaan
Ni Jesucristo ken ti doktrinana ti kakaisuna a dalan nga agturong iti agnanayon a biag.
No nasken a gupgopenyo ti dalan nga agturong iti agnanayon a biag iti sumagmamano laeng a balikas, ania koma ti makunayo? Kitaen no kasano nga inladawan ni Nephi daytoy iti 2 Nephi 31. Ibilang ti panagdrowing iti maysa a dalan ken panangsurat iti dalan ti sumagmamano kadagiti pagbatayan wenno addang a masarakanyo kadagitoy a kapitulo. Mabalinyo nga inayon iti drowingyo ti bukodyo a pakagupgopan no ania ti insuro ni Nephi maipapan iti tunggal pagbatayan.
Bayat ti panagbasayo iti 2 Nephi 31:18–20, amirisenyo dagiti bukodyo a panagkagumaan nga “agtultuloy” iti dalan ti ebanghelio.
Kitaen met iti “Press Forward, Saints,” Hymns, no. 81.
Ti panangsurot kadagiti pannursuro ni Jesucristo ti mangiturong kadatayo iti agnanayon a biag.
Impakita ni Jesucristo ti naan-anay a pagwadan ti panagtungpal idi nabuniagan Isuna.
Napasamak man ti pannakabuniagyo idi kalman wenno 80 a tawen ti napalabasen, maysa idi daytoy a napateg a kanito. Simrekkayo iti agnanayon a katulagan a mangsurot ken ni Jesucristo. Panunotenyo ti panagbuniagyo bayat ti panagbasayo maipapan iti panagbuniag ti Mangisalakan iti 2 Nephi 31: 4–13. Mabalin a makatulong ti panangsungbat kadagiti saludsod kas kadagitoy:
-
Apay a nabuniagan ni Jesus? Apay a pinilik ti mabuniagan?
-
Ania dagiti kari nga inaramidko idi nabuniaganak? Ania ti ikari ti Apo kas supapak? (kitaen dagiti bersikulo 12–13; kitaen met iti Mosiah 18:10, 13).
-
Kasano a maipakitak a naikumitak pay laeng iti panangsurot ken ni Jesucristo?
“Asino man a makapagibtur agingga iti panungpalan, isunto met laeng ti maisalakan.”
Bayat ti panangbasayo iti 2 Nephi 31:15–20, saludsodenyo iti bagiyo, “Kasano a maammuak no agib-ibturak agingga iti panungpalan?” Ania ti masursuroyo manipud ken ni Nephi a mangtulong kadakayo a mangsungbat iti daytoy a saludsod?
Insuro ni Elder Dale G. Renlund: “Ti panagibtur agingga iti panungpalan ket saan a maysa a naisina nga addang iti doktrina ni Cristo—kasla maileppastayo ti umuna nga uppat nga addang ket kalpasanna agkurbatayo, agngariettayo, ken aguraytayo a matay. Saan, ti panagibtur agingga iti panungpalan ket sireregta ken sigagagara a panangulit kadagiti addang” (“Lifelong Conversion” [Brigham Young University devotional, Sept. 14, 2021], 2, speeches.byu.edu). Kasano a maulityo dagiti addang iti doktrina ni Cristo, (pammati, panagbabawi; panangbuniag, ken panangawat iti Espiritu Santo)?
Babaen kadagiti balikas ni Cristo ken ti Espiritu Santo, ipakita kaniak ti Dios no ania ti aramidek.
Nariknayo kadin ti panangduadua maipapan kadagiti sumaruno nga addang iti biagyo? Kasta met laeng ti pakaseknan dagiti tao ni Nephi (kitaen iti 2 Nephi 32:1). Sapulen ti sungbat ni Nephi iti 2 Nephi 32:2–9. Kasano nga ibagayo iti bukodyo a balikas no ania ti insuro ni Nephi? Ania dagiti padas a nangisuro kadakayo a pudno dagiti balikas ni Nephi?
Ibilang ti panangilista kadagiti pangngeddeng wenno situasion (ita ken iti masanguanan) a kasapulanyo ti pannarabay ti Dios. Ania ti masursuroyo manipud iti 2 Nephi 32 a mangtulongto kadakayo nga agballigi iti panangawat iti inspirasion manipud Kenkuana? Ania ti mabalin a mangiturong kadagiti tao a “patangkenen dagiti pusoda a maibusor iti Nasantuan nga Espiritu”? (2 Nephi 33:2).
Bayat ti panangutobyo iti balakad ni Nephi, panunotenyo no kasano nga adalenyo dagiti balikas ti Mangisalakan. Mailadawanyo kadi daytoy a kas panagmerienda, pannangan, wenno panagpiesta? Ania ti nagdumaan, iti panagkunayo? Panunotenyo no kasano a mapagbalinyo ti padasyo kadagiti balikas ti Mangisalakan nga ad-adda a kasla maysa a fiesta. Mabalin a makaalakayo kadagiti kapanunotan manipud iti maysa a gayyem wenno miembro ti pamilia.
Agpennekkayo kadagiti balikas ni Cristo. Adu dagiti wagas ti panagpennek kadagiti balikas ni Cristo, a pakairamanan ti panagkararag para iti inspirasion, panagsaludsod sakbay ken bayat ti panagadal, panangilawlawag iti kaipapanan dagiti balikas, panagutob, panag-cross-reference, panagsurat iti notes, panagsapul kadagiti kinapudno ti ebanghelio, ken panangyaplikar kadagiti nasantuan a kasuratan iti biagyo (kitaen iti 1 Nephi 19:23).
Kasano nga awisenyo ti Espiritu Santo nga agbalin a kanayon a kadkadua iti biagyo, imbes a sagpaminsan a sumarsarungkar? Basaen ti tallo a singasing ni David A. Bednar a mangaramid iti panagkadkadua ti Espiritu Santo nga “agtultuloy a kinapudno” iti “Receive the Holy Ghost” (Liahona, Nob. 2010, 94–97). Kasano a yaplikaryonto ti balakadna?
Kitaen met iti Gospel Topics, “Revelation,” Gospel Library; “Daily Bread: Pattern” (video), Gospel Library.
Allukoyen ti Libro ni Mormon ti amin a mamati ken ni Jesucristo.
Iti 2 Nephi 33, bayat ti panangileppas ni Nephi kadagiti sinuratna, inlawlawagna dagiti gapu no apay a nagsursurat iti umuna a gundaway. Ania dagiti gapu a masarakanyo iti daytoy a kapitulo? Utobenyo dagiti estoria ken pannursuro a nabasayo agingga ita iti 1 Nephi ken 2 Nephi. Ania ti kangrunaan a nakaimpluensia kadakayo ken iti pammatiyo ken ni Cristo?
Kitaen met iti “Nephi Records His Final Testimony” (video), Gospel Library.
Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.
Dagiti Kapanunotan para iti Panangisuro kadagiti Ubbing
No mabuniaganak, sursurotek ni Jesucristo.
-
Adda maysa a ladawan ni Jesus a mabumbuniagan iti udi daytoy a balabala. Mabalin nga usaren daytoy dagiti annakyo a mangibaga kadakayo no ania ti ammoda maipapan iti daytoy a pasamak (kitaen met iti Mateo 3:13–17). Apay a kayat ti Dios a mabuniagantayo a kas Kenkuana? Mabalin a dumngeg dagiti annakyo kadagiti gapu bayat ti aggigiddan a panangbasayo kadagiti paset ti 2 Nephi 31:4–13. Mabalin a makatulong no ti maysa a nabiit pay a nabuniagan ti makaibinglay iti padasna.
Insuronak ni Jesuscristo no kasano ti agsubli iti Nailangitan nga Ama.
-
Tapno matulongan dagiti annakyo a mangiladawan iti panunotda kadagiti pannursuro iti 2 Nephi 31, mabalinda ti agdrowing iti dalan nga addaan iti ladawan ni Cristo iti ngudona. Mabalinyo a tulongan ida a mangsapul wenno mangidrowing kadagiti ladawan a mangibagi kadagiti addang iti dayta a dalan, kas iti pammati ken ni Cristo, panagbabawi, panagbuniag, sagut ti Espiritu Santo, ken panagibtur agingga iti panungpalan. Mabalinda nga itudo dagiti ladawan bayat ti panangbasayo iti 2 Nephi 31:17–20 nga aggigiddan.
Makapagpennekak kadagiti balikas ni Cristo.
-
Tapno maisuro maipapan iti “panagpennek” kadagiti balikas ni Cristo, mabalinyo a kiddawen kadagiti annakyo a mangyakem no kasano ti panagpennekda iti paboritoda a taraon. Iti 2 Nephi 32:3, ania ti kinuna ni Nephi a nasken a pagpennekantayo? Kasano a maigiddiat ti panagpennek iti balikas ti Dios manipud iti panangbasa laeng iti daytoy? Nalabit a mabalin a yakem dagiti annakyo dagiti pagdumaan. Ibinglay kadakuada dagiti bendision a naawatyo bayat iti panagpennekyo kadagiti nasantuan a kasuratan.
Kayat ti Nailangitan nga Ama nga agkararagak a kanayon.
-
Kalpasan ti panangbasa iti 2 Nephi 32:8–9, pagsasaritaanyo kadagiti annakyo maipapan no apay a saan a kayat ni Satanas nga agkararagtayo. Apay a kayat ti Dios nga “agkararagtayo a kanayon”? Mabalin dagiti annakyo ti mangilista wenno mangidrowing kadagiti ladawan dagiti situasion a mabalin a pagkararaganda. Kalpasanna mabalinyo ti agkanta iti maysa a kanta a mangisuro maipanggep iti kararag, a kas iti “Nagkararagka Kadi?” (Hymns, no. 140). Mabalinyo a sukatan ti sumagmamano a balikas iti kanta kadagiti balikas manipud kadagiti listaanda. Kasano a bendisionannatayo ti Dios no agkararagtayo a kanayon?
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Tapno Maipatungpal ti Amin a Kinalinteg, ni Liz Lemon Swindle