Ni Jesus nga Agkarkararag iti Getsemani

Saan Koma a ti Pagayatak, No Di ti Pagayatam, ti Maaramid, ni Harry Anderson

Pebrero 19–25: “O Anian a Kinaindaklan ti Plano ti Diostayo”

2 Nephi 6–10

Napalabasen ti 40 a tawen manipud ti ipapanaw ti pamilia ni Lehi iti Jerusalem. Addada iti ganggannaet a baro a daga, kagudua ti lubong ti kaadayoda manipud iti Jerusalem. Natay ni Lehi, ket inrugin ti pamiliana ti agbalinto a sinigsiglo ti kabayagna a panagsusupanget iti nagbaetan dagiti Nephite—“a namati kadagiti ballaag ken paltiing ti Dios”—ken dagiti Lamanite, a saan a namati (2 Nephi 5:6). Ni Jacob, ti inaudi a kabsat ni Nephi a naordenanen kas maysa a mannursuro para kadagiti Nephite, ket nagtarigagay a maammuan dagiti natulagan a tao a saanto pulos malipatan ida ti Dios, isu a nasken a saanda a manglipat Kenkuana iti kaano man. Daytoy ti maysa a mensahe nga awan duadua a kasapulantayo ita (kitaen iti Doktrina ken Katulagan 1:15–16). “Laglagipentayo, … gapu ta saantayo a napagtalaw. … Nabileg dagiti kari Apo,” impakdaar ni Jacob (2 Nephi 10:20–21). Kadagitoy a kari, awan ti nain-indaklan pay ngem iti kari ti “agnanayon a pannakasubbot” a mangparmek iti patay ken impierno (2 Nephi 9:7). “Ngarud,” inggibus ni Jacob, “paragsakenyo dagiti pusoyo”! (2 Nephi 10:23).

Dagiti Kapanunotan para iti Panagsursuro iti Pagtaengan ken iti Simbaan

2 Nephi 6–8

Manangngaasi ti Apo kadagiti taona ken ipatungpalnanto dagiti karina.

Tapno matulongan dagiti taona a makaawat a pasetda ti balay ti Israel ken makapagtalekda iti Dios ken dagiti karina, inadaw ni Jacob ti padto ni Isaias, a naisurat iti 2 Nephi 6–8. Agpaay met kadakayo dayta a mensahe, gapu ta dagiti Santo iti Ud-udina nga Aldaw ket paset met dagiti natulagan a tao ti Dios. Bayat ti panangbasayo kadagitoy a kapitulo, utobenyo dagiti saludsod a kas iti sumaganad:

• Ania ti masursurok maipanggep iti panangsubbot nga ayat ni Jesucristo kaniak? Ania dagiti balikas wenno ragup ti balikas a mangipeksa a nangnangruna iti daytoy nga ayat?

• Ania ti idiaya ti Mangisalakan kadagiti tao nga agkalikagum a mangsapul Kenkuana?

• Ania ti maaramidko tapno ad-adda a sipupudno nga “agurayak” iti Mangisalakan ken dagiti naikari a bendisionna?

icon iti seminary

2 Nephi 9:1–26

Isalakannak ni Jesucristo manipud iti basol ken ipapatay.

Maysa a wagas a panangpadakkel iti panagyamantayo ken ni Jesucristo ket panangpanunot maipapan iti no ania koma ti napasamak kadatayo no awan Isuna. Bayat ti panangbasayo iti 2 Nephi 9:1–26, ibilangyo ti panangmarka iti maysa a maris no ania ti mapasamak kadatayo no awan ti Pannubbot ni Jesucristo. Kalpasanna, iti sabali pay a listaan wenno maris, mabalinyo nga ilasin no ania ti maawattayo babaen iti Pannubbot ti Mangisalakan. Maibatay iti nabasayo, kasano ti panangilawlawagyo no apay a kasapulantayo ti Pannubbot ni Jesucristo? Ania dagiti nasarakanyo a mangparegta kadakayo a mangdayaw iti “sirib ti Dios, ti asi ken paraburna”? (2 Nephi 9:8).

Malaksid iti panangisurona no ania ti nangisalakanan ni Jesucristo kadatayo, nangted met ni Jacob kadagiti nalawag a pannakaammo ken pannakaawat maipapan iti no kasano nga inaramidna daytoy. Ibilangyo ti panangisurat iti no ania ti masarakanyo iti 2 Nephi 9:11–15, 20–24.

Nasdaaw unay ni Jacob iti plano ti Dios iti pannakasubbot gapu ta impukkawna ti “O anian a kinaindaklan ti plano ti Diostayo.” Sapulen dagiti ekslamasion iti 2 Nephi 9 (masarakan ti kaaduan kadagitoy kadagiti bersikulo 8–20). Ania ti masursurom manipud kadagitoy a bersikulo maipapan iti plano ti Dios? Ania dagiti padas a nakatulong kadakayo a makarikna iti sumagmamano a narikna ni Jacob? Kas paset ti panagdaydayaw ken panagadalyo, ibilangyo ti panagsapul iti maysa a himno a mabalin a makayebkas no kasano ti riknam Kenkuana, kas iti “How Great Thou Art” (Hymns, no. 86).

Kitaen met iti “Where Justice, Love, and Mercy Meet,” “Jacob Teaches of the Resurrection” (videos), Gospel Library; Gospel Topics, “Atonement of Jesus Christ,” Gospel Library.

2 Nephi 9:7

Awan patinggana ti Pannubbot ti Mangisalakan.

Ania ti mabalin nga aramidenyo tapno nasaysayaat a maawatan ti “awan patinggana a pannubbot” ni Jesucristo? (2 Nephi 9:7). Nalabit a mabalinyo a kitaen dagiti banag a kasla awan patinggana ti bilangda—dagiti nginabras ti ruot iti maysa a talon, binukbukel ti darat iti igid ti baybay, wenno dagiti bituen iti tangatang. Kasano nga awan patinggana ti Pannubbot ti Mangisalakan? Kasano met a personal daytoy? Ania dagiti ragup ti balikas iti 2 Nephi 9 a mangtulong kadakayo a makarikna iti panangyamanyo iti inaramid ti Mangisalakan para kadakayo?

2 Nephi 9:27–54

Mabalinko ti umay ken ni Cristo ken sumurot iti plano ti Dios.

Iti 2 Nephi 9, inusar ni Jacob dagiti dua a nabileg ken aggidiat a ragup ti balikas: “ti manangngaasi a paggep ti mannakabalin a Namarsua” ken “ti nasikap a panggep dayta a sairo” (2Nephi 9:6,28). Nalabit a mabalinyo ti mangidrowing iti maysa a dana ket ikkanyo iti label a Plano ti Nailangitan nga Ama. Kalpasanna sukisoken ti 2 Nephi 9:27–52. Sapulen dagiti ballaag ken awis nga inted ni Jacob tapno matulongannatayo a mangsurot iti daytoy a plano. Isuratyo no ania ti masarakanyo iti abay ti dana. Kasano a padasen ni Satanas a mangyadayo kadatayo iti plano ti Dios? Ania ti mariknayo a makaparegta nga aramiden kas sungbat kadagitoy a ballaag ken awis?

2 Nephi 10:20, 23–25

Makaisangbay kaniak iti rag-o ti sakripisio ni Jesucristo.

Maysa a naragsak ti mensahe ni Jacob. “Sawek kadakayo dagitoy a banag,” kinunana, “tapno agrag-okayo, ket yangadyo ti uloyo iti agnanayon” (2 Nephi 9:3). Bayat ti panangbasayo iti 2 Nephi 10:20, 23–25, ania dagiti masarakanyo a mangparagsak iti pusoyo? Ania iti maaramidyonto a makatulong a manglagip kadagitoy a bambanag no mariknayo ti pannakaupay?

Kitaen met iti John 16:33; D. Todd Christofferson, “The Joy of the Saints,” Liahona, Nob. 2019, 15–18; “Jacob Encourages the Nephites to Be Reconciled with God” (video), Gospel Library.

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti kapanunotan para iti Panangisuro kadagiti Ubbing

2 Nephi 9:6–10, 19–24

Ni Jesucristo ti Mangisalakanko.

• Kasano a matulonganyonto dagiti annakyo a makaawat ken makarikna a kasapulanda ti Mangisalakan a ni Jesucristo? Makatulong met ti panid ti aktibidad itoy a lawas. Agusar daytoy iti simple nga analohia maipapan ti maysa nga abut ken maysa nga agdan. Ibilang ti panangusar iti 2 Nephi 9:21–22 tapno kasarita dagiti annakyo maipapan no apay nga agyamankayo ken ni Jesucristo.

• Maysa a wagas tapno makatulong kadagiti annakyo a makaawat no apay a kasapulantayo ti Mangisalakan ket ti panangisuro kadakuada maipapan iti Pannakatnag. Mabalinyo nga ipakita ti ladawan da Adan ken Eva, kas iti Leaving the Garden of Eden (Gospel Library), ken maysa a ladawan ni Jesucristo iti krus. Ibilang ti panangidawat kadakuada a mangiladawan no ania ti mapaspasamak iti tunggal ladawan. Kasano a maipadatayo kada Adan ken Eva? Nalabit a makatulong kadakuada ti 2 Nephi 9:6–10 a makita no ania ti ar-aramiden ni Jesucristo para kadatayo. Ibilang ti panangawis kadagiti ubbing a mangibinglay kadagiti riknada maipapan ken ni Jesucristo. Makatulong ti maysa a kanta kas iti “I Feel My Savior’s Love” (Children’s Songbook, 74–75).

Mangisuro iti kinapudno nga addaan kadagiti estoria ken pagarigan. Siguraduen a dagiti estoria ken pagarigan nga usarenyo ket mangisuro iti kinapudno. Kas pagarigan, no usarenyo ti panid ti aktibidad iti daytoy a lawas, isuroyo nga immay ni Jesucristo iti “abut” tapno tulongannatayo iti tunggal addang ti dalan bayat ti panagpangatotayo a rummuar.

2 Nephi 9:20, 28–29, 42–43, 49

“Pagragsakan ti pusok ti kinalinteg.”

• Tapno maallukoy dagiti annakyo nga “[agragsak] iti kinalinteg” wenno siraragsak nga agtulnog iti Apo (2 Nephi 9:49), nalabit mabalinyo nga ibinglay dagiti pagarigan a pagpilian ti maysa nga ubing iti nasayaat wenno dakes. Awisenyo dagiti ubbing nga agtakder no ti pili ket mangyeg iti ragsak ken agtugawda no ti pili ket mangyeg iti kinaliday. Kaano a nariknatayo ti ragsak gapu ta pinilitayo ti sumurot ken ni Jesucristo?

• Nalabit a makilangen dagiti annakyo kadagiti tao (no saanda pay) a mangipagarup a minamaag wenno saanen a maus-usar dagiti bilin ti Apo. Nalabit a mabalinyo ken dagiti annakyo a pagsasaritaan maipapan no kasano nga ilawlawag no apay a naragsaktayo a mangtungpal kadagiti bilin. Apay a napateg nga agtalek iti balakad ti Dios uray no saantayo a maawatan daytoy a naan-anay? Mabalinmo nga allukoyen ida a mangsapul iti 2 Nephi 9:20, 28–29, 42–43 para iti tulong iti panangpanunot ken panangilawlawag kadagitoy a saludsod.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ag-agasan ni Jesus dagiti tao

Inagasanna ti Adu a Nadumaduma a Sakit, ni J. Kirk Richards

panid ti aktibidad: Isalakannatayo ni Jesucristo manipud iti basol ken ipapatay