Pebrero 12–18: “Nagbiagkami iti Wagas a Naragsak”

2 Nephi 3–5

Iti panangbasa iti 1 Nephi, mabalin a maaddaankayo iti impresion nga uray kaskasano dakdakkel ni Nephi ngem iti biag. “Dakkel iti pammagi” iti agpada a bagi ken espiritu (1 Nephi 2:16), kasla kimmapuy gapu kadagiti pannubok a naipasango kenkuana. Wenno uray la dayta ti mabalin nga ipapantayo. Idinto a nakaskasdaaw ti pammati ni Nephi, dagiti nadungngo a balikasna iti 2 Nephi 4 ti mangipalgak nga uray dagiti napudno a tao no dadduma ket makarikna a “nakakaasi” ken “nalaka a nasaplit” kadagiti sulisog. Ditoy makitatayo ti maysa a tao a mangpadpadas, a kayatna ti agrag-o, ngem “agasug ti pusona gapu kadagiti basol[na].” Mabalintayo nga inaig dayta ken iti mangnamnama a determinasion a sumaganad: “Nupay kasta, ammok no siasino ti nagtalkak” (kitaen iti 2 Nephi 4:15–19).

Idinto a nasursuro ni Nephi ken dagiti taona ti agbiag “iti wagas a naragsak” (2 Nephi 5:27), nasursuroda pay a saan a sumangbay ti ragsak a silalaka wenno awan dagiti panawen ti panagladingit. Agtaud dayta kamaudiananna iti panagtalek iti Apo, “ti pundasion [bato] ti kinalinteg[tayo] (2 Nephi 4:35).

Dagiti Kapanunotan para iti Panagsursuro iti Pagtaengan ken iti Simbaan

2 Nephi 3:6–24

Ni Joseph Smith ti pinili ti Dios a mangisubli iti ebanghelio.

Inranud ni Lehi iti anakna a ni Joseph ti maysa a padto nga inted ni Jose a taga Egipto. Ti padto ket maipapan iti maysa a masakbayan a “napili a mammadto,” ni Joseph Smith. Ania ti kuna dagiti bersikulo 6–24 nga aramiden ni Joseph Smith a mangbendision kadagiti tao ti Dios? Panunoten no kasano a nagbalin ti aramid ni Joseph Smith a “dakkel ti pategna” kadakayo? Mabalin a makagun-odkayo iti sumagmamano a kapanunotan manipud kadagiti video maipapan ken ni Joseph Smith iti “Prophets of the Restoration” collection iti Gospel Library. Panunotenyo dagiti saludsod a kas kadagitoy, ket ibilangyo ti panangisurat kadagiti sungbatyo:

• Ania ti ammoyo maipapan iti Nailangitan nga Ama ken ni Jesucristo gapu iti insuro ni Joseph Smith?

• Kasano a maigiddiat ti biagyo gapu iti insubli ti Apo babaen ken ni Joseph Smith?

• Ania koma ngata ti biagyo no saan a napasamak ti Pannakaisubli?

Maysa a napateg a paset ti mision ni Joseph Smith ti mangisangbay iti Libro ni Mormon. Ania ti masursuroyo manipud iti daytoy a kapitulo maipapan no apay a napateg ti Libro ni Mormon? Nangnangruna, mabalinyo a sapulen dagiti gapu kadagiti bersikulo 7, 11–13, 18–24.

Kitaen met iti Patarus ni Joseph Smith, Genesis 50:24–38 (iti Bible appendix); Gospel Topics, “Joseph Smith,” Gospel Library; “Praise to the Man,” Hymns, no. 27.

Propeta ti Apo, ni David Lindsley

2 Nephi 4:15–35

“O Apo, nagtalekak kenka.”

Kinuna ni Nephi nga “isuratna dagiti adda iti kaunggak” (bersikulo 15). Bayat ti panagbasayo iti 2 Nephi 4:15–35, saludsodenyo iti bagiyo, “Ania dagiti adda iti kaunggak ?” Ibilangyo ti panangisurat kadagitoy, kas iti inaramid ni Nephi, ken panangibinglay kadagitoy kadagiti tao nga ay-ayatenyo.

Ti pannakakita no kasano a nakasarak ni Nephi iti liwliwa idi nariknana ti pannakaupay ken panagdanag ket makatulong kadakayo no addaankayo iti umasping a rikna. Sapulen kadagiti bersikulo 15–35 dagiti binatog a mangted kadakayo iti liwliwa. Adda kadi maysa nga am-ammoyo a mabalin a makasapul iti liwliwa kadagitoy a binatog?

Kitaen met iti Ronald A. Rasband, “The Things of My Soul,” Liahona, Nob. 2021, 39–41.

2 Nephi 5

Masarakak ti ragsak iti panagbiag iti ebanghelio ni Jesucristo.

Ania iti panagkunayo ti kaipapanan ti panagbalin a naragsak? Insurat ni Nephi a nagbiag dagiti taona “iti wagas a naragsak” (2 Nephi 5:27). Mabalinyo a sapulen dagiti pili nga inaramid ni Nephi ken dagiti taona a nakatulong kadakuada nga agbalin a naragsak (kitaen, kas pagarigan, iti 2 Nephi 5:6, 10–17). Ania ti makatulong kadakayo a mangbangon iti maysa a biag nga addaan iti ragsak kas iti inaramid dagiti tao ni Nephi?

2 Nephi 5:20–21

Ania ti lunod nga immay kadagiti Lamanite?

Iti aldaw ni Nephi ti lunod dagiti Lamanite ket “naisinada iti imatang [ti Apo] … gapu iti kinamanagbasolda” (2 Nephi 5:20–21). Kaipapanan daytoy a naisina ti Espiritu ti Apo manipud iti biagda. Idi inawat dagiti Lamanite ti ebanghelio ni Jesucristo iti kamaudiananna, “saanen a sinurot ida ti lunod ti Dios (Alma 23:18).

Dinakamat pay ti Libro ni Mormon a dimteng ti marka ti nangisit a kudil kadagiti Lamanite kalpasan a simmina dagiti Nephite kadakuada. Saan a naan-anay a maawatan ti kasasaad ken langa daytoy a marka. Idi damo daytoy a marka ti nangilasin kadagiti Lamanite manipud kadagiti Nephite. Idi agangay, gapu ta agpada a naipasango dagiti Nephite ken Lamanite kadagiti panawen ti kinadangkes ken kinalinteg, nagbalin nga awan pakainaiganna ti marka kas pakakitaan iti kasasaad dagiti Lamanite iti sango ti Dios.

Ipanamnama dagiti propeta iti aldawtayo a ti nangisit a kudil ket saan a maysa a tanda ti saan a panangparabur ti Dios wenno panangilunod. Impakdaar ni Presidente Russell M. Nelson: “Ipanamnamak kadakayo a ti panagtakderyo iti sango ti Dios saanna nga ikeddeng ti maris ti kudilyo. Ti panagparabur ken saan a panagparabur iti Dios ket agpannuray iti debosionyo iti Dios ken kadagiti bilinna ket saan nga iti maris ti kudilyo” (“Bay-an nga Agballigi ti Dios,” Liahona, Nob. 2020, 94).

Kas iti insuro ni Nephi, ti Apo “awan ti idaddadumana kadagiti umasideg kenkuana, nangisit ken puraw, adipen ken nawaya, lalaki ken babai; … agpapada ti amin iti Dios” (2 Nephi 26:33).

Kitaen met iti “Till We All Come in the Unity of the Faith” (video), Gospel Library.

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

2 Nephi 3:6–24

Maysa a propeta ni Joseph Smith.

• Panunotenyo no kasano a maisuroyo kadagiti annakyo ti maipapan iti naindaklan nga aramid nga impatungpal ti Dios babaen ken ni Joseph Smith. Tapno mangrugi, tulonganyo dagiti ubbing a mangsapul iti balikas a “mammadto” iti 2 Nephi 3:6 ken ilawlawag a maawagan dagiti propeta a mammadto gapu ta tulongan ida ti Nailangitan nga Ama a makakita kadagiti banag a ditayo makita. Ibinglayyo no apay a managyamantayo nga addaantayo iti maysa a mammadto a mangidadaulo iti Simbaantayo.

• Addaan ti Libro ti Arte ti Ebangehlio iti sumagmamano a ladawan a mabalinyo nga usaren a pangisuro maipapan iti inaramid ti Dios babaen ken ni Joseph Smith (kitaen dagiti ladawan 89–95). Paibinglay kadagiti annakyo no ania ti ammoda maipapan kadagiti ladawan. Apay a maawagan ni Joseph Smith iti maysa a “napili a mammadto”? Ania ti inaramid ni Joseph Smith a “dakkel ti pategna”? (bersikulo 7).

2 Nephi 4:15–35; 5

Ipatpategko “dagiti bambanag ti Apo.”

• Ania ti mangparagsak kadatayo? Ibilang ti aggigiddan a panangbasa kadagiti bersikulo manipud iti 2 Nephi 4 tapno maammuan no ania ti nangparagsak ken ni Nephi wenno nangparagsak kenkuana (kitaen dagiti bersikulo 15–16, 20–25, 34–35). Iti mensahena a “The Things of My Soul,” imbinglay ni Elder Ronald A. Rasband dagiti pito a pannursuro iti ebanghelio a napateg kenkuana (Liahona, Nob. 2021, 39–41). Nalabit mabalinyo nga aggigiddan nga irebyu ti listaanna ket pagsaritaanyo dagiti “bambanag ti Apo” a napateg kadakayo.

• 2 Nephi 5 iladawanna pay dagiti banag a nakatulong kadagiti Nephite nga agbiag “iti wagas a naragsak” (bersikulo 27). Mabalinyo ti mangipaay iti sumagmamano a balikas wenno ladawan a mangibagi kadagitoy a banag ken mangtulong kadagiti annakyo a mangiparis kadagitoy kadagiti bersikulo iti kapitulo 5. Dagiti sumagmamano a pagarigan iramanna ti pamilia (bersikulo 6), dagiti bilin ti Dios (bersikulo 10), dagiti nasantuan a kasuratan (bersikulo 12), aramid (dagiti bersikulo 15 ken 17), dagiti templo (bersikulo 16), ken dagiti takem iti Simbaan (bersikulo 26). Kasano a mangyeg kadatayo iti ragsak dagitoy a banag?

2 Nephi 5:15–16

Ti templo ti balay ti Apo.

• Bayat ti panangibasayo iti 2 Nephi 5:15–16 kadagiti annakyo, mabalinda ti agpammarang a tultulonganda ni Nephi a mangbangon iti maysa a templo. Mabalinyo pay nga ipakita kadakuada dagiti ladawan ti nadumaduma a pasdek, agraman ti maysa a templo. Kasano a maigiddiat dagiti templo iti dadduma a pasdek? Ibinglayyo iti tunggal maysa no apay a napateg kadakayo ti templo (kitaen met iti “I Love to See the Temple,” Children’s Songbook, 95).

Makapagbalin a kanito iti panangisuro ti ania man a kanito. Saanyo a panunoten a ti panangisuro iti pamiliayo ket maysa a banag nga aramidenyo iti maminsan iti makalawas bayat ti pormal nga oras ti adalen. Panunotenyo dayta kas maysa a banag nga aramidenyo iti amin nga oras.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ti Templo ni Nephi, ni Michael T. Malm