Pebrero 5–11: ‘Nawaya a Pumili iti Wayawaya ken Agnanayon a Biag, babaen ti Naindaklan a Mangibabaet.’ 2 Nephi 1–2,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
“Pebrero 5–11. 2 Nephi 1–2,” Umaykayo, Sumurot Kaniak—Para iti Pagtaengan ken Simbaan: 2024 (2024)
Da Adan ken Eva, ni Douglas Fryer
Pebrero 5–11: “Nawaya a Pumili iti Wayawaya ken Agnanayon a Biag, babaen ti Naindaklan a Mangibabaet”
2 Nephi 1–2
No naammuanyo nga asidegen nga aggibus ti biagyo, ania dagiti maudi a mensahe a kayatyo nga ibinglay kadagiti tao nga ay-ayatenyo unay? Idi narikna ni propeta Lehi nga asidegen ti panaggibus ti biagna, inummongna dagiti annakna iti maysa a maudi a gundaway. Imbinglayna kadakuada no ania ti impalgak ti Nailangitan nga Ama kenkuana. Imburayna ti pammaneknekna maipapan iti Mesias. Insurona dagiti kinapudno ti ebanghelio nga ipatpategna kadagiti tao nga ipatpategna. Insaritana maipapan ti wayawaya, panagtulnog, ti Pannakatnag da Adan ken Eva, ti pannakasubbot babaen ken ni Jesucristo, ken rag-o. Saan a pinili ti amin nga annakna nga agbiag a maitunos iti no ania ti insurona—awan kadatayo ti makaaramid iti kasta a pili para kadagiti ay-ayatentayo. Ngem mabalintayo nga isuro ken paneknekan ti maipapan iti Mannubbot, a mamagbalin kadatayo a “nawaya a mangpili iti wayawaya ken agnanayon a biag” (kitaen iti 2 Nephi 2:26–27).
Dagiti Kapanunotan para iti Panagsursuro iti Pagtaengan ken iti Simbaan
Mabalinko ti “agriing, ken bumangon manipud iti tapok,”
Iti 2 Nephi 1:13–29, kitaenyo dagiti balikas nga inusar ni Lehi a mangiladawan iti naespirituan a kasasaad da Laman ken Lemuel. Ania ti makatulong a mangpariing kadakayo manipud iti naespirituan a “nargaan a pannaturog”? Ania ti makatulong a mangikkat kadagiti naespirituan a “kawar” iti biagyo? Panunoten maipapan iti pammaneknek ni Lehi iti bersikulo 15 ken ti awisna iti bersikulo 23. Ania dagiti adda a mensahe ti Apo para kadakayo iti kadagitoy a bersikulo?
Agusar kadagiti biswal (visuals). Ti panagusar kadagiti biswal (visuals) ti makatulongto kadagiti agad-adal a makaawat kadagiti kinapudno ti ebanghelio ken manglagip kadagitoy iti napapaut. Bayat ti panagsaganayo a mangisuro manipud iti daytoy a balabala, ibilangyo no ania dagiti biswal (visuals) a mabalinyo nga usaren. Kas pagarigan, mabalin a makatulong ti papel a kawar kadagiti agad-adal a makaawat kadagiti balikas ni Lehi iti 2 Nephi 1:13 wenno 2 Nephi 2:27.
Gapu ken ni Jesucristo, “nawayaak a mangpili iti wayawaya ken biag nga agnanayon.
Adda itan ti pamilia ni Lehi iti baro a daga, a napno kadagiti baro a posibilidad. Dagiti pili nga inaramidda iti daytoy baro a lugar ket agbalin a napateg para iti balligi ken ragsakda. Nalabit daytoy ti gapuna nga insuro ni Lehi ti anakna a ni Jacob maipapan iti karbengan nga agpili, wenno ti kabaelan nga agaramid kadagiti pili, iti 2 Nephi 2. Bayat ti panangbasayo kadagiti bersikulo 11–30, isuratyo dagiti posible a sungbat kadagitoy a saludsod.
-
Apay a napateg unay ti karbengan nga agpili iti Nailangitan nga Ama, uray no usaren ti dadduma a tao iti makadangran a wagas?
-
Kasano a padasen ti kabusor ti mangpakapsut wenno mangdadael iti karbenganyo nga agpili?
-
Kasano a tulongannakayo ti Mangisalakan nga “agpili iti wayawaya ken biag nga agnanayon” ((bersikulo 27)?
Adtoy ti sabali pay a wagas a pakasursuruan maipapan iti karbengan nga agpili iti 2 Nephi 2: Sapulen dagiti banag a kasapulan tapno maaddaantayo iti karbengan nga agpili ken tapno maragpattayo ti nadiosan a potensialtayo. Kas pagarigan:
-
2 Nephi 2:5: Maysa a pannakaammo iti naimbag ken dakes; maysa a linteg
Ania ti mapasamak iti karbengantayo nga agpili no napukaw ti maysa wenno ad-adu pay kadagitoy a banag?
Tunggal maysa iti innem a benneg ti Para iti Pigsa dagiti Agtutubo: Maysa a Pangiwanwan iti Panagpili ket naglaon iti “Dagiti Awis” ken “Dagiti Naikari a Bendision.” Sapulen iti maysa wenno ad-adu pay kadagitoy a benneg, ket agpilikayo iti naikari a bendision a namnamaenyo iti biagyo. Ania nga awis ti kasapulanyo nga agtignay tapno maawatyo daytoy a bendision? Ibilang ti panangibinglay iti maysa a tao kadagiti bendision a naawatyo manipud iti panangsurot kadagitoy nga awis.
Kitaen met iti Gospel Topics, “Agency and Accountability,” Gospel Library; “Know This, That Every Soul Is Free,” Hymns, no. 240.
Mapagbalin ti Dios a bendision dagiti pannubok.
Ammo ni Lehi a nagsagaba ti agtutubo nga anakna a ni Jacob iti “panagtutuok,” ken “adu a leddaang” kabayatan ti kinaubingna (2 Nephi 2:1) Apay iti panagkunayo a ti pammaneknek ni Lehi iti 2 Nephi 2:1–3, 6–25 ket napateg koma ken ni Jacob? Apay a napateg daytoy kadakayo? Sapulenyo dagiti balikas ken ragup ti balikas a masarakanyo a naipangpangruna a nabileg. Kasano nga inkonsagrar ti Dios dagiti rigatyo para iti pagimbaganyo? (Kitaen iti 2 Nephi 2:2.)
Kitaen met iti Taga Roma 8:28; Dale G. Renlund, “Infuriating Unfairness,” Liahona, Mayo 2021, 41–45.
Ti Pannakatnag ken ti Pannubbot ni Jesucristo ket napategda a paset iti plano ti Nailangitan nga Ama.
Patien ti adu a tattao a ti Pannakatnag ket maysa laeng a trahedia ken nagbiddut da Eva ken Adan idi pinilida a kanen ti bunga. Iti 2 Nephi 2:15–28, isuro ni Lehi ti nayon a kinapudno maipapan iti Pannakatnag—ken maipapan iti pannakasubbot babaen ken ni Cristo. No agsukisokkayo kadagitoy a kinapudno, ilistayo dagiti kinapudno maipapan iti napasamak iti Minuyongan ti Eden. Makatulong dagiti kastoy a saludsod:
-
Apay a kasapulan ti Pannakatnag?
-
Ania a papel ti inakem ni Jesucristo iti panangparmek kadagiti epekto ti Pannakatnag?
-
Kasano a ti umno a pannakaawat iti Pannakatnag ket makatulong kadatayo a nasaysayaat a makaawat iti panagkasapulantayo ken ni Jesucristo?
Kitaen met iti Dallin H. Oaks, “The Great Plan of Happiness,” Ensign, Nob. 1993, 72–75.
Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.
Diyo Koma Riribuken ti Pusoyo, ni Howard Lyon
Dagiti kapanunotan para iti Panangisuro kadagiti Ubbing
Tulongannak ni Jesuscristo a mangparmek kadagiti epekto ti basol.
-
Tapno matulonganyo dagiti annakyo a makaawat iti awis ni Lehi nga “ikkantenyo dagiti kawar” ti basol, nalabit a makapagtitinnulongkayo a mangaramid iti maysa a kawar manipud kadagiti akikid a papel. Kadagiti papel, mabalin a makatulong dagiti annakyo a mangisurat iti sumagmamano a banag a pangsulisogan ni Satanas kadatayo. Kalpasanna mabalinyo nga aggigiddan a basaen ti 2 Nephi 1:13, 15, 23 bayat nga i-act-da ti sumagmamano kadagiti ragup ti sasao kadagitoy a bersikulo—agraman ti panangyugyugyog iti kawar ti papel. Kasano a maipada ti basol iti maysa a kawar? Kasano a tulongannatayo ni Jesus nga “ikkatentayo dagiti kawar” ti basol?
Mabendisionannak no tungpalek dagiti bilin ti Dios.
-
Makatulong kadi dayta kadagiti annakyo a mangidilig kadagiti bilin ti Dios kadagiti sapatos, sombrero, guantes, wenno dadduma pay a banag a mangsalaknib kadatayo? Nalabit a mabalinyo a bay-an ida a mangpadas iti sumagmamano bayat ti panagsasaritayo maipapan no kasano a salaknibannatayo dagiti bilin. Kalpasanna, mabalinyo a basaem ti 2 Nephi 1:20, ket yunay-unay a “rumang-ay[tayo],” (naparaburan wenno nasalakniban) no tungpalentayo dagiti bilin. Ibinglayyo ti maysa a padas idi naparaburan wenno nasalaknibankayo babaen ti panangsurotyo kadagiti bilin.
-
Tapno mailadawan ti pagdumaan ti panagrang-ay ken pannakaisina manipud iti Dios (kitaen iti 2 Nephi 1:20), kitaenyo kadagiti annakyo ti maysa a nasalun-at a mula ken ti maysa a bulong wenno sanga a naisina manipud iti mula. Kalpasanna mabalin nga irebyu dagiti annakyo dagiti pili nga inaramid ni Nephi ken dagiti kakabsatna (kitaen iti 1 Nephi 2:11–16; 3:5–7; 18:9–11). Ania dagiti bunga dagitoy a pili? Ania dagiti pili a mangtulong kadatayo nga agtalinaed a konektado iti Dios?
Inikkannak ti Dios iti wayawaya a pumili.
-
Tapno matulonganyo dagiti annakyo a makaawat no ania ti insuro ni Lehi maipapan kadagiti kasupadi ken panagpili, mabalinyo ti agay-ayam ti maysa nga ay-ayam a pangisaw-anyo iti maysa a balikas (a kas iti silaw) ket isao dagiti annakyo ti kasupadina (sipnget). Tulonganyo ida a mangammo no apay a dagiti kasupadi ket paset ti plano ti Dios bayat ti aggigiddan a panagbasayo iti 2 Nephi 2:11, 16. Kalpasanna, mabalinyo nga ibinglay dagiti estoria maipapan iti maysa nga ubing a nasulisog nga agaramid iti biddut a pili. Mabalin nga ibinglay dagiti annakyo no ania ti kasupadi ti biddut a pili ken yakemda daytoy.
-
Tapno maammuan ti maipapan iti pagdumaan ti “wayawaya” ken “pannakabalud” (2 Nephi 2:27), mabalin nga agdrowing dagiti annakyo kadagiti ladawan ti maysa nga ayup iti maysa a pagipupokan ken maysa nga ayup iti gagangay nga aglawlawna. Ania nga ayup ti nawaya? Awisenyo dagiti ubbing a mangitudo iti umno a ladawan no basaenyo ti balikas a “nawaya” iti 2 Nephi 2:27. Paneknekan a wayawayaannatayo ni Jesucristo.
-
Aggigiddan nga agkansion iti maysa a kanta kas iti “Choose the Right” (Hymns, no. 239). Ania ti masursurotayo manipud iti daytoy a kanta maipanggep iti panagpili?
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Sumangpet ni Lehi ken dagiti Taona iti Baro a Lubong, ni Clark Kelley Price