tattao a mangam-amiris iti Liahona

Enero 29–Pebrero 4: “Isaganakto ti Dalan a Pagnaanyo”

1 Nephi 16–22

Bayat ti panagdaliasat ti pamilia ni Lehi nga agturong iti naikari a daga, inaramid ti Apo kadakuada daytoy a kari: “Isaganakto ti dalan a pagnaanyo no tungpalenyo dagiti bilinko” (1 Nephi 17:13). Nalawag a saan a kaipapanan dayta a kari a nalaka ti panagdaliasat—simmuppiat latta dagiti miembro ti pamilia, natukkol dagiti bai, nagkarigatan ket natay dagiti tao, ket nasken a mangbangonda latta iti maysa a bapor manipud kadagiti ramit a pagbuangay. Nupay kasta, idi naipasango ti pamilia iti rigat wenno aramid a kasla imposible, nabigbig ni Nephi a saan nga adayo ti Apo iti kaano man. Ammona a ti Dios “taraonanna [dagiti napudno], ken papigsaenna ida, ken mangisagana iti pamuspusan tapno matungpalna ti banag nga imbilinna kadakuada” (1 Nephi 17:3). No masdaawkayo no apay a mapasamak dagiti banag a dakes kadagiti nasayaat a tao a kas ken ni Nephi ken ti pamiliana, masarakam ti nalawag a pannakaammo ken pannakaawat [insights] kadagitoy a kapitulo. Ngem nalabit a napatpateg, makitamto no ania ti aramiden dagiti nasayaat a tao no mapasamak dagiti dakes a banag.

Dagiti Kapanunotan para iti Panagsursuro iti Pagtaengan ken iti Simbaan

icon iti seminary

1 Nephi 16–18

Tulongannakto ti Mangisalakan a mangsango kadagiti karit ti biag.

Naipasango ti pamilia ni Nephi iti sumagmamano a narigat a karit—kas met kadatayo amin. Ania ti masursuroyo ken ni Nephi maipapan iti panangsango iti rigat nga addaan pammati ken ni Jesucristo? Basaen maipapan kadagiti padasna iti 1 Nephi 16:17–32; 16:34–39; 17:7–16; 18:1–4; ken 18:9–22. Ibilang ti panangisurat no ania ti masarakanyo kadagiti paulo kas kadagitoy: “Karit,” “No Kasano a Simmungbat ni Nephi,” ken “No Kasano a Timmulong ti Apo.” Ania ti masursuroyo a mayaplikaryo kadagiti karit a sangsanguenyo?

Kalpasan ti pannakasursuroyo manipud ken ni Nephi ken ti pamiliana, mabalinyo nga isurat dagiti mainayon a kapanunotan iti baba dagitoy a paulo: “Dagiti Karitko,” “No Kasano a Sungbatakto,” ken “No Kasano a Matulongannak ti Apo.” Bayat ti panangaramidyo, mabalinyo ti agibasar kadagiti nasantuan a kasuratan a kas kadagitoy: Mateo 11:28–30; Juan 14:26–27; Mosiah 24:13–15. Ti himno a kas iti: “Where Can I Turn for Peace?” (Hymns, no. 129), ket mabalin a mangpapigsa iti pammatiyo iti Mangisalakan ken ti tulong nga idiayana bayat dagiti panawen ti pannubok.

Kitaen iti Anthony D. Perkins, “Remember Thy Suffering Saints, O Our God,” Liahona, Nob. 2021, 103–5; “He Will Give You Help,” “The Lord Guides Lehi’s Journey,” “The Lord Commands Nephi to Build a Ship,” ken “Lehi’s Family Sails to the Promised Land” (videos), Gospel Library; “Life Help,” Gospel Library.

1 Nephi 16:10–16, 23–31; 18:11–22

Tarabayennak ti Dios kadagiti babassit ken gagangay a pamuspusan.

Idi inturong ti Dios ti kaamaan ni Lehi iti langalang, dina inikkan ida iti maysa a mapa a mangipakpakita iti tunggal detalyado ti panagdaliasat. Ngem ketdi, inikkanna ida iti Liahona a mangtarabay kadakuada iti inaldaw. Bayat ti panangbasam iti 1 Nephi 16:10–16, 23–31, ken 18:11–22, ibilangmo ti panangilista kadagiti kinapudno a mangiladawan no kasano a tarabayen ti Dios dagiti annakna (kas pagarigan, maisuro ti 1 Nephi 16:10 a no dadduma tarabayennatayo ti Dios kadagiti saan a ninamnama a wagas). Ania dagiti pagpapadaan a makitayo iti nagbaetan ti Liahona ken ti Espiritu Santo? Ania dagiti “babassit a pamuspusan” a nangisangbayanna kadagiti “naindaklan a banag” iti biagmo?

Kitaen met iti Alma 37:7, 38–47; Doktrina ken Katulagan 64:33–34.

Ni Lehi a mangus-usar iti Liahona

No Nakasaganakayo Saankayto nga Agbuteng, ni Clark Kelley Price

1 Nephi 17:1–6, 17–22

Makapagbalin a bendision dagiti pannubokko.

Nupay agpapada dagiti karit ni Nephi ken dagiti kakabsatna iti langalang, agduduma unay dagiti padasda. Nalabit a mabalinyo nga idasig ti pakaammuan ni Nephi maipapan iti panagdaliasatna iti langalang (kitaen iti 1 Nephi 17:1–6) iti pakaammuan dagiti kakabsatna a lallaki (kitaen iti 1 Nephi 17:17–22). Ania ti naammuan wenno inaramid ni Nephi a nangtulong kenkuana a naaddaan iti napudno a pannirigan? Ibilang ti panagsurat maipapan iti nabiit pay wenno agdama a pannubok manipud iti pannirigan ti pammati ken panagyaman. Ania ti marikna wenno masursuroyo manipud iti daytoy?

Kitaen met iti Amy A. Wright, “Christ Heals That Which Is Broken,” Liahona, Mayo 2022, 81–84; “No Strength without Struggle” (video), Gospel Library.

Naulimek nga oras ti panagutob. Ti kaadda iti oras nga agpanunot, agusig, agutob, wenno agsurat ket makaiturong iti inspirasion. Makatulong daytoy kadatayo a makakita no kasano a mainaig ti doktrina wenno pagbatayan ti ebanghelio iti biagtayo. No mangisurokayo kadagiti dadduma, ikkam ida iti oras nga agutob ken mangisurat kadagiti impresionda. Mabalin pay a daytoy ti mangpadur-as iti kinatulokda a mangibinglay kadagiti kapanunotan ken riknada iti dadduma.

1 Nephi 19:22–24; 20–22

Mabalinko nga “aramaten wenno yarig ti amin a nasantuan a kasuratan” iti bagik.

Gapu ta nabayagen a naisurat dagiti nasantuan a kasuratan, mabalin a kasla saanda a mainaig kadatayo ita. Ngem ad-adu ti ammo ni Nephi. “Inyarigko ti amin a nasantuan a kasuratan kadatayo,” kinunana, “tapno agbalinda koma a pakairanudan ken pagadalantayo” (1 Nephi 19:23). Daytoy ti maysa a gapu a nakasarak ni Nephi iti kasta unay a naespirituan a bileg kadagiti nasantuan a kasuratan.

Ibilangyo dagiti saludsod a kas kadagiti sumaganad bayat ti panagbasayo iti 1 Nephi 20–22:

1 Nephi 20:1–9Ania ti isuro dagitoy a bersikulo maipapan kadagiti tao iti panawen ni Isaias? Ania dagiti masarakanyo a mayaplikar kadakayo?

1 Nephi 20:17–22.Ania ti isuro dagitoy a bersikulo maipapan no kasano nga inturong ti Nailangitan nga Ama dagiti tao iti panawen ni Isaias? Kasano nga awisennakayo ti Mangisalakan a sumurot Kenkuana?

Ania pay ti masarakanyo iti 1 Nephi 20–22 a mabalinyo a “mayarig” iti bagiyo?

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

1 Nephi 16:10, 28–29; 18:8–13, 20–22

No agtungpalak kadagiti bilin, tarabayennak ti Apo.

• No addaankayo iti maysa a kompas, maysa a mapa, wenno maysa a banag a mangtulong kadatayo a mangsarak iti dalantayo, mabalinyo nga ipakita daytoy kadagiti annakyo. Mabalin a maysa a nasayaat daytoy a wagas tapno mairugi ti panaglilinnawag maipapan iti Liahona, a mabalinyo a basaen iti 1 Nephi 16:10, 28–29. Ania dagiti sumagmamano a gapu ti saan a pagganaan ti maysa a kompas wenno mapa? Apay a no dadduma saan a gumana ti Liahona para iti pamilia ni Lehi? (kitaen iti 1 Nephi 18:9–12, 20–22). Ania ti inted ti Nailangitan nga Ama kadatayo ita a mangtarabay kadatayo nga agsubli Kenkuana?

• Tapno matulongan dagiti annakyo a mangyaplikar iti no ania ti masursuroda maipapan iti Liahona iti 1 Nephi 16:10, 26–31; 18:8–22, mabalinyo nga awisen ida a mangpanunot iti napateg wenno narigat a desision. Ania ti inted ti Dios kadatayo a mangtarabay kadatayo ita nga agtrabaho a kas iti Liahona? (Kitaen, kas pagarigan, iti Alma 37:38–44.) Ibilang ti panangibinglay iti bukod a padas a nangtarabayan kenka ti Nailangitan nga Ama.

1 Nephi 16:21–32

Makapagbalinak a nasayaat a pagwadan iti pamiliak.

• Bayat ti panangbasayo iti 1 Nephi 16:21–32 nga aggiggiddan, tulonganyo dagiti annakyo a mangtakuat no kasano a binendisionan ti pagwadan ni Nephi ti pamiliana (kitaen met iti video “The Lord Guides Lehi’s Journey” [Gospel Library]). Makaiturong daytoy iti panaglilinnawag maipapan no kasano a makapagbalintayo a kas ken ni Nephi. Awisen dagiti ubbingyo a mangplano iti maysa a banag a mabalinda nga aramiden tapno agbalinda a nasayaat nga impluensia iti dadduma pay a miembro ti pamilia.

1 Nephi 17:7–19; 18:1–4

Matulongannak ti Nailangitan nga Ama a mangaramid kadagiti naririgat a banag.

• Magustuan dagiti ubbing ti mangisarita kadagiti estoria. Mabalinyo nga awisen ida a tumulong kadakayo a mangisarita iti estoria ni Nephi nga agaramid iti bilog (kitaen iti 1 Nephi 17:7–19; 18:1–4; kitaen met iti “Kapitulo 7: Panangbangon iti Bapor,” Dagiti Estoria iti Libro ni Mormon, 21–22; wenno ti video “The Lord Instructs Nephi to Build a Ship” [Gospel Library]).). Mabalinda pay nga aggigiddan a mangkanta iti maikadua a berso ti “Nephi’s Courage” (Children’s Songbook, 120–21). Ania ti nakatulong ken ni Nephi a maaddaan iti tured idi linais isuna dagiti kakabsatna iti panangpadasna a mangaramid iti bilog?

• Saan nga ammo ni Nephi no kasano ti agaramid iti maysa a bilog, isu a nagpannuray iti panangiturong manipud iti Apo. Kalpasan ti panangbasada iti 1 Nephi 18:1 a kaduadakayo, mabalin nga ileppas dagiti annakyo ti panid ti aktibidad iti daytoy a lawas. Bayat ti panangaramidda, kasaritayo ida maipapan iti no kasano a matulongannatayo ti Nailangitan nga Ama nga agaramid kadagiti narigat a banag, kas met laeng iti panangtulongna ken Nephi.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ni Nephi ken ti pamiliana iti bilog

Trinatodak iti Nalabes a Kinaulpit, ni Walter Rane

panid ti aktibidad: Matulongannak ti Nailangitan nga Ama a mangaramid kadagiti naririgat a banag