Ti Ayat ti Dios, ni Sabrina Squires

Enero 22–28: “Naarmasan iti Kinalinteg ken Bileg ti Dios”

1 Nephi 11–15

No addaan ti Dios iti maysa a naindaklan a trabaho a paaramidna iti propetana, masansan nga ikkanna dayta a propeta iti naindaklan a parmata. Addaan amin da Moises, Juan, Lehi, ken Joseph Smith kadagiti parmata a kas iti dayta—dagiti parmata a nangpawada iti panunotda ken nakatulong kadakuada a makakita no kasano a kadakkel ken makapasiddaaw nga inspirasion ti aramid ti Dios.

Addaan met ni Nephi iti maysa kadagitoy a parmata a makapagbalbaliw-iti-biag. Nakita ni Nephi ti panagministro ti Mangisalakan, ti masakbayan ti an-annabo ni Lehi iti naikari a daga, ken ti pagtungpalan ti aramid ti Dios iti ud-udina nga aldaw. Kalpasan daytoy a parmata, nasaysayaat ti pannakaisagana ni Nephi para iti aramid nga agur-uray iti masanguanan. Ket ti panagbasa maipapan iti daytoy a parmata ti makatulong pay a mangisagana kadakayo—ta adda pay trabaho a paaramid ti Dios kadakayo iti pagarianna. Maysakayo kadagiti “santo ti simbaan ti Kordero” a nakita ni Nephi, “a naiwaraswaras iti amin a rabaw ti daga; ket naarmasanda iti kinalinteg ken bileg ti Dios iti naindaklan a dayag” (1 Nephi 14:14).

Kitaen met iti “Nephi Sees a Vision of Future Events” (video), Gospel Library.

Dagiti Kapanunotan para iti Panagsursuro iti Pagtaengan ken iti Simbaan

1 Nephi 11

Imbaon ti Dios ni Jesucristo kas maysa a pangipeksaan iti ayatna.

Idi dinamag ni Nephi iti anghel maipapan iti kaipapanan ti kayo iti parmata ni Lehi, mabalin koma a kinuna ti anghel, “Daytoy ti mangibagi iti ayat ti Dios.” Ngem ketdi, impakitana ken ni Nephi ti agsasaruno a simbolo ken pasamak manipud iti biag ti Mangisalakan. Sapulenyo dagitoy a simbolo ken pasamak bayat ti panangbasa ken panangutobyo iti 1 Nephi 11. Ania ti masarakanyo a makatulong a maawatanyo no apay a ni Jesucristo ti kangrunaan a pangipeksaan iti ayat ti Dios?

Mabalinyo pay nga ibilang ti panangbuya kadagiti Video iti Biblia iti Gospel Library a maitunos kadagiti pasamak a nakita ni Nephi. Kasano a natulongannakayo ti Mangisalakan a makarikna iti ayat ti Nailangitan nga Amayo?

Kitaen met iti Susan H. Porter, “God’s Love: The Most Joyous to the Soul,” Liahona, Nob. 2021, 33–35.

1 Nephi 12–14

Mabalinak a “maarmasan iti kinalinteg” ken bileg.

Saan nga agbiag ni Nephi a mangsaksi iti adu a nakitana iti parmatana. Apay iti panagkunayo a napateg a maammuan ni Nephi dagitoy a banag? Apay a napateg a maammuanyo dagitoy a banag? Damagenyo dagitoy a saludsod iti tunggal kanito a panangbasayo maipapan iti maysa a banag a nakita ni Nephi iti parmatana (kitaen iti 1 Nephi 12–14). Ania dagiti impresion a maawatyo maipapan iti akemyo iti “naindaklan ken … nakaskasdaaw nga aramid” ti Apo? (1 Nephi 14:7). Ania ti sumagmamano kadagiti naindaklan ken nakaskasdaaw a banag nga inaramiden ti Dios para kadatayo?

Ibilang nangnangruna ti kari iti 1 Nephi 14:14. Kasano nga impatungpal ti Mangisalakan daytoy a kari iti biagyo? (Para iti sumagmamano a pagarigan, kitaen iti David A. Bednar, “With the Power of God in Great Glory,” Liahona, Nob. 2021, 28–30, nangruna iti maudi a dua a benneg.)

1 Nephi 13:1–9; 14:9–11

Ania ti “nabileg ken makarimon a simbaan” a nakita ni Nephi?

Inlawlawag ni Presidente Dallin H. Oaks a ti “nabileg ken makarimon a simbaan” nga inladawan ni Nephi ket mangibagi iti “ania man a pilosopia wenno organisasion a mangsupiat iti panamati iti Dios. Ket ti ‘pannakabalud’ nga isangbay daytoy a ‘simbaan’ kadagiti santo ket saanto unay a pisikal a pannakaipupok a kas ti pannakabalud dagiti palso a kapanunotan” (“Stand as Witnesses of God,” Ensign, Mar. 2015,32). Kasano a matulongannakayo ti Mangisalakan a mangliklik—ken makalibas manipud—iti pannakabalud kadagiti palso a kapanunotan?

1 Nephi 15:1–11

Sungbatannakto ti Dios no agdawatak a sipapammati.

Nariknayo kadi a kasla dikayo umaw-awat idi iti bukodyo a paltiing—a saan a nakisarsarita ti Dios kadakayo? Ania a balakad ti inted ni Nephi kadagiti kakabsatna a lallaki idi nariknada ti kastoy? (Kitaen iti 1 Nephi 15:1–11.) Kasano a mayaplikaryo ti balakad ni Nephi iti biagyo?

1 Nephi 15:23–25

Ti ikakapet a naimbag iti balikas ti Dios ti mangtulong kaniak a mangkedked iti impluensia ni Satanas.

Masansan nga adda dagiti naganat nga ibaga ni Nephi kadagiti kakabsatna a lallaki. Ngem kasla nangnangruna a napasnek maipapan iti imbagana kadakuada iti 1 Nephi 15:23–25. Ania ti mensahe ni Nephi, ken apay iti panagkunayo a napigsa unay ti panagriknana iti daytoy?

Insuro ni Elder David A. Bednar a ti “balikas ti Dios” ket mabalin a tumukoy kadagiti nasantuan a kasuratan, kadagiti balikas dagiti sibibiag a propeta, ken ni Jesucristo a Mismo. Ania iti panagkunayo a kayatna a sawen ti “kumpet a naimbag” kadagiti nasantuan a kasuratan ken balikas dagiti sibibiag a propeta? Ania ti mabalin a kaipapanan ti “kumpet a naimbag” ken ni Jesucristo? Mabalinyo a sapulen dagiti mabalin a sungbat kadagitoy a saludsod iti mensahe ni Elder Bednar a “But We Heeded Them Not” (Liahona, Mayo 2022, 14–16).

Kasano a ti ikakapet a naimbag iti balikas ti Dios ket mangtulong kaniak a mangsaranget iti kabusor?. Ti panangpunno iti tsart a kas iti daytoy ti makatulong a mangbukel kadagiti kapanunotanyo:

	… tulongannak a mangparmek iti kinasipnget ti pannulisog? (kitaen iti 1 Nephi 12:17)	… tulongannak a “saan a dumngeg” iti kinaubbaw ken kinapalangguad ti lubong? (1 Nephi 12:18)
Kasano ti ikakapet a naimbag kadagiti nasantuan a kasuratan ken balikas dagiti sibibiag a propeta …
Kasano ti ikakapet a naimbag iti Mangisalakan …

Kitaen met iti “The Iron Rod,” Hymns, no. 274; Jorge F. Zeballos, “Building a Life Resistant to the Adversary,” Liahona, Nob. 2022, 50–52.

Maipada dagiti nasantuan a kasuratan iti landok a pagkaptan nga agturong iti kayo ti biag.

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti Kapanunotan para iti Panangisuro kadagiti Ubbing

1 Nephi 11:16–33

Imbaon ti Nailangitan nga Ama ni Jesucristo iti daga gapu ta ay-ayatennak.

• Tapno maisuro ken ni Nephi ti maipapan iti ayat ti Dios, impakita ti maysa nga anghel ken ni Nephi dagiti pasamak manipud iti biag ti Mangisalakan. Mabalinyo nga aramiden ti kasta met kadagiti annakyo—ikkanyo ida kadagiti ladawan dagiti pasamak a nakita ni Nephi iti 1 Nephi 11:20, 24, 27, 31, ken 33 (kitaen iti Libro ti Arte ti Ebanghelio, dagiti num. 30, 35, 39, 42, 57). Bayat ti panangbasayo kadagitoy a bersikulo, tulonganyo dagiti annakyo a mangsapul iti ladawan a maiparis iti daytoy. Ania ti masursurotayo maipapan ken ni Jesucristo manipud kadagitoy a bersikulo ken ladawan?

• Ti panangkansion iti maysa a kanta kas iti “He Sent His Son” (Children’s Songbook, 34–35) ket makatulong kadagiti annakyo a makarikna iti ayat ti Dios. Kalpasan ti panagkantayo, saludsoden kadagiti ubbing no ania ti nasursuroda manipud iti daytoy a kanta. Ania pay ti masursurotayo maipapan iti ayat ni Dios manipud iti 1 Nephi 11:22–23?

Usaren ti arte a mangtulong kadagiti ubbing nga agsursuro. No isuroyo dagiti ubbing ti maysa nga estoria iti nasantuan a kasuratan, tulonganyo ida a mangiladawan iti panunotda daytoy. Mabalinyo nga usaren dagiti ladawan, video, puppet, costume, ken dadduma pay.

1 Nephi 13:26–29, 35–36, 40

Isuro ti Libro ni Mormon dagiti napapateg a kinapudno.

• Tapno matulongan dagiti annakyo a mangipateg kadagiti “nalawag ken napateg” a kinapudno iti Libro ni Mormon, mabalinyo ti agdrowing iti ladawan ken awisenyo dagiti annakyo a mangbalbaliw wenno mangikkat kadagiti paset ti ladawan tapno agbalin a naiduma ti langana. Mabalinyo nga usaren daytoy a mangisuro a nabalbaliwan ken naikkatan dagiti banag iti Biblia iti panaglabas ti panawen. Aggigiddan a basaen ti 1 Nephi 13:40 ket pagsasaritaan no kasano a tulongannatayo ti Libro ni Mormon (“dagitoy maudi a kasuratan”) a makaawat kadagiti “nalawag ken napateg a banag” a napukaw manipud iti Biblia (dagiti “umuna” a kasuratan). Ania dagiti “nalawag ken napateg” a kinapudno a nasursuroyo manipud iti Libro ni Mormon?

• Ti video “The Book of Mormon—a Book from God” (Gospel Library) ket makatulong kadagiti annakyo a makakita no apay a napateg nga agpada a maaddaan iti Biblia ken ti Libro ni Mormon. Mabalin a magustuan dagiti ubbing a mangparnuay manen iti panangiladawan manipud iti video.

  Ti Libro ni Mormon—maysa a Libro manipud iti Dios

  Ilawlawag ni Elder Tad R. Callister ti kinapateg ti Libro ni Mormon kas kadua ti Biblia iti panangipalgak kadagiti pudno a doktrina ti Dios ken ti Simbaanna.

Insubli ti Libro ni Mormon dagiti kinapudno ti ebanghelio a napukaw kabayatan ti Ikakalilis iti Kinapudno.

1 Nephi 15:23–24

Matulongannak ti ikakapet a naimbag iti balikas ti Dios a mangkedked iti sulisog

• Ikkanyo dagiti annakyo iti gundaway a mangibinglay iti no ania ti malagipda maipapan iti parmata ni Lehi. Mabalin a makatulong nga usaren ti maysa a ladawan, kas iti maysa iti balabala itay napalabas a lawas. Ania ti nanglapped kadagiti tao a nangdanon iti kayo? Ania ti nangtulong kadakuada a mangdanon iti daytoy? Mabalinyo a kiddawen kadakuada a mangsapul iti landok a pagkaptan iti ladawan. Aggigiddan a basaen ti 1 Nephi 15:23–24 tapno maammuan no ania ti ibagi ti landok a pagkaptan ken no kasano a matulongannatayo daytoy.

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ti Parmata ni Nephi maipapan ken ni Maria, ni James Johnson