Ti tagtagainep ni Lehi—nga adda ti landok a pagkaptan, ti angep ti sipnget, nalawa a pasdek, ken kayo nga addaan iti “nalaus a sam-itna” a bunga—ket maysa a makaparegta nga awis nga umawat kadagiti bendision ti ayat ken pangsubbot a sakripisio ti Mangisalakan. Para ken ni Lehi, nupay kasta, maipapan pay iti kaamaanna daytoy a parmata: “Gapu iti banag a nakitak, adda kalintegak nga agrag-o iti Apo gapu ken ni Nephi ken kasta met ni Sam. … Ngem adtoy, Laman ken Lemuel, madanaganak unay gapu kadakayo” (1 Nephi 8:3–4). Idi nalpas ni Lehi iti panangiladawanna ti parmatana, nagpakaasi isuna kada Laman ken Lemuel nga “imdenganda dagiti balikasna, ta bareng kaasian ida ti Apo” (1 Nephi 8:37). Uray no naadalyon iti namin-adu ti parmata ni Lehi, iti daytoy a gundaway panunotenyo ti maipapan daytoy iti wagas nga inaramid ni Lehi—panunotenyo ti maysa a tao nga ay-ayatenyo. Bayat ti panangaramidyo, ti kinatalged ti landok a pagkaptan, dagiti peggad iti nalawa a pasdek, ken ti nalaus a sam-it ti bunga ket maaddaanto iti baro a kaipapanan. Ket maawatanyonto a nasaysayaat ti “amin a rikna ti nadungngo a nagannak” a nakaawat iti daytoy a nakallalagip a parmata.
Dagiti Kapanunotan iti Panagsursuro iti Pagtaengan ken iti Simbaan
Ania ti makaawis iti riknayo maipapan iti pagwadan ni Nephi iti 1 Nephi 7:6–21? Kasano a mabendisionantayo no “napudno a mamakawan[tayo]” iti tunggal maysa? Makatulong ti video a “The Lord Delivers Nephi from His Rebellious Brothers” Gospel Library) iti panagadalyo.
Ti ikakapetko a naimbag iti balikas ti Dios ti mangiturong kaniak iti Mangisalakan ken tulongannak a makarikna iti ayatna.
Idiaya ti parmata ni Lehi ti maysa nga awis a mangutob no sadino ti ayanyo iti bukodyo a panagdaliasat tapno agbalin a kas ken ni Cristo. Kinuna ni Presidente Boyd K. Packer: “Addakayo iti dayta; addatayo amin iti dayta. Ti tagtagainep wenno parmata ni Lehi iti landok a pagkaptan [iron rod] ket ipaayna ti amin … a kasapulan ti maysa a Santo iti Ud-udina nga aldaw tapno maawatan ti pannubok ti biag” (“Lehi’s Dream and You,” New Era, Ene. 2015, 2).
Bayat ti panagadalyo, ibilangyo ti panangpunno iti maysa a tsart a kas iti daytoy:
Mabalinyo pay a sapulen dagiti sumaganad a bersikulo tapno maammuanyo ti maipapan iti uppat a grupo dagiti tao a nakita ni Lehi: 1 Nephi 8:21–23, 24–28, 30, ken 31–33. Ania dagiti madlawyo a nagdumaan dagitoy a grupo? Apay a pimmanaw ti sumagmamano a tao kalpasan ti panangdanonda iti kayo ken panangramanda iti bunga (kitaen dagiti bersikulo 24–28)? Ania dagiti masursuroyo manipud iti daytoy a padas?
Kitaen met iti Kevin W. Pearson, “Stay by the Tree,” Liahona, Mayo 2015, 114–16; “Lehi Sees a Vision of the Tree of Life” (video), Gospel Library.
Para iti interaktibo a padas tapno matulongankayo a mangammo maipapan iti parmata ni Lehi, i-click ditoy.
Awisenyo dagiti agad-adal a mangibinglay met kadagiti bukodda a takuat. Ibilang ti panangawis kadagiti agad-adal a mangsukisok kadagiti nasantuan a kasuratan iti bukodda para kadagiti kinapudno a masarakanda. Kas pagarigan, mabalinyo nga awisen ida a mangsukisok kadagiti reperensia ti nasantuan a kasuratan iti tsart iti bukodda wenno iti babassit a grupo. Laglagipen ken ipategdanto dagiti kinapudno a matakuatanda.
Ammo dagiti nagkauna a propeta ti maipapan iti mision ni Jesucristo ken nagpaneknekda maipapan Kenkuana.
Apay iti panagkunayo a kayat ti Apo iti pamilia ni Lehi—ken kadatayo amin—a maammuantayo dagiti kinapudno a masarakan iti 1 Nephi 10:2–16? Ibilang no kasano a matulonganyo dagiti ipatpategyo a mangawis iti Mangisalakan iti biagda.
Ipalgakto ti Dios kaniak ti kinapudno babaen ti bileg ti Espiritu Santo.
Kasano ti isusungbatyo no maidawat kadakayo nga agbiag iti maysa a pagbatayan ti ebanghelio a diyo maawatan? Iti sumaganad a nasantuan a kasuratan, kitaen dagiti paggidiatan ti sungbat ni Nephi iti parmata ni Lehi (kitaen iti 1 Nephi 10:17–19; 11:1) iti sungbat da Laman ken Lemuel (kitaen iti 1 Nephi 15:1–10). Ania dagiti kinapudno a naawatan ni Nephi a nangiturong kenkuana a sumungbat a kas iti inaramidna?
Sipapanunot iti pagwadan ni Nephi, ilistayo dagiti pagbatayan ti ebanghelio a kayatyo a nasaysayaat a maawatan. Ania ti mabalinyo nga aramiden tapno makasarakkayo kadagiti sungbat para iti bagiyo? (Kitaen met iti “Truth Will Make You Free” iti For the Strength of Youth: A Guide for Making Choices, 30–33.)
No kasano a naammuan ni Nephi a mismo a pudno dagiti balikas ti amana, maaramidtayo met ti kasta no mangngegantayo dagiti balikas dagiti agdama a propeta ken apostol. Ania ti insuro kadatayo dagiti propeta ken apostol iti kaudian a sapasap a komperensia? Kasano a nagun-odyo ti bukod a pammaneknek iti no ania ti insuroda?
Ti ikakapet a naimbag iti balikas ti Dios ti mangiturong kaniak Kenkuana ken mangtulong kaniak a mangrikna iti ayatna.
Mabalin a magustuan dagiti annakyo ti mangidrowing iti ladawan ti parmata ni Lehi bayat ti panangbasayo iti 1 Nephi 8 nga aggigiddan. Paibinglayyo kadakuada dagiti ladawan, ken tulonganyo ida a mangtakuat iti no ania ti ibagi dagiti simbolo iti tagtagainep (kitaen iti 1 Nephi 11:21–22; 12:16–18; 15:23–33,36 ken ti panid ti aktibidad iti daytoy a lawas). Kiddawen kadakuada a mangibinglay iti adu a sungbat agingga a kabaelanda iti daytoy a saludsod: Ania ti masursurotayo manipud iti parmata ni Lehi?
Addaankayo kadi iti maysa a banag a mabalin a mangibagi iti landok a pagkaptan iti parmata ni Lehi, kas iti maysa a tubo wenno maysa a stick? Paigganan kadagiti annakyo daytoy bayat ti panangiturongyo kadakuada iti lawlaw ti siled a mapan iti ladawan ti Mangisalakan. Apay a napateg ti landok a pagkaptan iti parmata ni Lehi? (Kitaen iti 1 Nephi 8:20, 24, 30). Apay a maipada ti landok a pagkaptan iti balikas ti Dios?
Awisenyo ti sumagmamano kadagiti ubbing a mangbasa iti 1 Nephi 8:10–12 ken mangiladawan no ania ti nakita ni Lehi. Kiddawen iti dadduma pay a mangbasa iti 1 Nephi 11:20–23 ken mangiladawan no ania ti nakita ni Nephi. Apay nga iparang ti anghel ken ni Nephi ti maladaga a ni Jesus tapno isurona kenkuana maipapan iti ayat ti Dios? Kasaritayo dagiti annakyo maipapan iti no kasano a nariknada ti ayat ti Dios iti biagda. Ti kanta a kas iti “I Feel My Savior’s Love” (Children’s Songbook, 74–75) ti makatulong kadakuada a mangpanunot kadagiti pagarigan.
Ipalgakto ti Dios kaniak ti kinapudno babaen ti bileg ti Espiritu Santo.
Kasano a matulonganyo dagiti annakyo a makaawat no ania ti insuro ni Nephi iti 1 Nephi 10:19? Nalabit a mabalinyo nga itupi ti ladawan ti Mangisalakan wenno sabali pay a naisangsangayan a banag iti uneg ti ules ket awisenyo dagiti annakyo a mangukrad iti daytoy. Bayat ti panangbasayo iti 1 Nephi 10:19, mabalinda nga ingato dagiti imada no mangngeganda dagiti balikas a “naukrad” ken “Espiritu Santo.” Mabalinyo nga ibinglay ti maysa a padas idi tinulongannakayo ti Espiritu Santo a mangtakuat iti kinapudno.
Awisenyo dagiti annakyo a mangisarita maipapan iti no ania ti aramidenda a mangsapul kadagiti sungbat iti maysa a saludsod. Ania ti nalabit a makuna ni Nephi no agsaludsod kenkuana ti maysa a tao no kasano ti mangsapul iti sungbat iti maysa a saludsod maipapan iti ebanghelio? Allukoyenyo dagiti ubbing a mangammo babaen ti panangbasada iti 1 Nephi 10:17–19; 11:1.
Narikna kadin dagiti annakyo a tinulongan ida ti Espiritu Santo a mangammo a pudno ti maysa a banag? Paibinglayyo kadakuada ti padasda. Ania ti makunatayo iti maysa a gayyem a mangipagarup a saanda a makaawat kadagiti sungbat babaen ti Espiritu Santo? Ania ti masarakantayo iti 1 Nephi 10:17–19 ken 11:1 a makatulong iti dayta a gayyem?
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
