“Wayawayaannakayonto ti kinapudno,” Para iti Pigsa dagiti Agtutubo: Maysa a Pangiwanwan iti Panagpili (2022)
“Wayawayaannakayonto ti kinapudno,” Para iti Pigsa dagiti Agtutubo
Wayawayaannakayonto ti kinapudno
Juan 8:32
Ti Nailangitan nga Amayo ti maysa a Dios ti kinapudno. Ammona ti amin. Aggapu Kenkuana ti amin a kinapudno ken agturong Kenkuana. Ipakitayo a napateg kadakayo ti kinapudno bayat ti panagsursuroyo, agbiagkayo nga addaan iti integridad, ken situtured nga agbalin a natibker iti no ania ti ammoyo nga umno—uray no nasken nga agtakderkayo nga agmaymaysa.
Dagiti agnanayon a kinapudno
Kayat ti Nailangitan nga Ama nga agsursuro a kanayon dagiti annakna a babbai ken lallaki. Addaankayo iti agpada a temporal ken naespirituan a gapu tapno manggun-od ken mangipateg iti panagsursuro. Saan laeng a maipapan iti panangullo iti kuarta ti edukasion. Paset daytoy iti agnanayon a panggepyo a tun-oyen nga agbalin nga ad-adda a kas iti Nailangitan nga Ama.
Ti kaipapanan ti panagbiag nga addaan iti integridad ket ayatenyo ti kinapudno iti amin a pusoyo—nga ad-adda ngem iti panagayatyo iti personal a pannakagin-awa, kinalatak, wenno pagnam-ayan. Kaipapananna ti panangaramid no ania ti umno gapu ta dayta ti maiparbeng nga aramiden.
Addaankayo iti maysa a banag a napateg nga ibinglay. Adda dagiti sungbat iti ebanghelio ni Jesucristo kadagiti saludsod maipapan iti biag. Daytoy ti dalan nga agturong iti talna ken ragsak. Mabalin a saanyo nga ammo ti amin a banag, ngem umdasen ti ammoyo a mangtulong kadagiti dadduma tapno maawatan ken maipategda dagiti pudno, agnanayon a pagbatayan.
Dagiti Awis
Itultuloy ti panagsursuroyo. Mangsapulkayo kadagiti gundaway a mangpalawa iti kapanunotanyo ken kadagiti paglainganyo. Mabalin nga iraman dagitoy a gundaway ti pormal nga edukasion iti pagadalan wenno bokasional a panagsanay kasta met iti saan a pormal a panagsursuro manipud kadagiti mapagtalkanyo a sources. Iramanyo ti Apo kadagiti panagkagumaanyo, ket iwanwannakayonto. Bayat ti panangsursuroyo maipapan iti lubong iti aglawlawyo, aagsursurokayo pay maipapan iti Mangisalakan, a nangparsua iti lubong. Adalenyo ti panagbiag ken dagiti pannursurona. Pagbalinenyo ti seminary, insititute, ken bukod a panagadal iti ebanghelio a kas paset iti panagsursuroyo agingga iti tungpal biag.
Ipategyo unay ti kinapudno ta diyonto pulos kayat ti agtakaw, agulbod, agkusit, wenno mangallilaw iti ania man a wagas—iti pagadalan, iti pagubraan, iti online, iti sadino man. Agbalinkayo a napudno a pasurot ni Jesucristo iti man publiko ken iti pribado.
Agbalinkayo a maysa a silaw iti dadduma. Bay-anyo a dagiti balikas ken tignayyo ti mangyanninaw iti pammatiyo ken ni Jesucristo. Agsaganakayo itan para kadagiti gundaway iti masakbayan iti panangiburay iti naglorian nga ebangheliona, kas maysa a misionario ken iti unos ti panagbiagyo. Ken agbalinkayo a nakasagana a mangibaga iti asino man nga agdamag kadakayo maipapan iti namnanma ken kinaragsak a marikriknayo.
Dagiti naikari a bendision
Ti edukasion ti mangpadur-as iti kabaelanyo nga agserbi iti Apo. Daytoy ti mangpabileg kadakayo a mangbendision iti dadduma, nangnangruna iti pamiliayo. No ad-adu a masursuroyo, ad-adda met a makatulongkayo iti panangbangon iti pagarian ti Dios ket makaimpluensiakayo iti lubong para iti pagimbagan.
Mangyeg ti kinapudno iti talna ken respeto iti bagi. No dagiti balikas ken tignayyo maitunos iti kinapudno, ipakitayo a mapagtalkandakayo—dagiti tao ken ti Apo.
No maitakderanyo dagiti pannursuro ni Jesucristo, makipagtakder met kadakayo. Mabalin a saan nga umanamong kadakayo dagiti dadduma, ngem makitanto ti kinatured ken kinapudnoyo. Uray man no suroten wenno saan dagiti dadduma ti pagwadanyo, pumigsanto ti pammaneknek, panagtalek iti bagi, ken pammatiyo ken ni Cristo.
Dagiti saludsod ken sungbat
Dakes kadi ti maaddaan kadagiti saludsod maipapan iti Simbaan? Kasano a masarakak dagiti sungbat? Ti kaadda dagiti saludsod ket saan a maysa a pakakitaan ti kinakapuy wenno kinaawan ti pammati. Kinapudnona, makatulong ti panagsaludsod a mangpatibker iti pammati. Nangrugi ti pannakaisubli ti ebanghelio idi nagsaludsod nga addaan pammati ti 14 ti tawenna a ni Joseph Smith. Birokentayo dagiti sungbat iti nasantuan a kasuratan, iti balikas dagiti propeta ti Dios, manipud kadagiti lider ken napudno a nagannak, ken manipud iti Dios Mismo. No saan a sumangbay a dagus dagiti sungbat, agtalekkayo a makasursurokayonto iti tunggal binatog. Agtultuloykayo nga agbiag iti no ania ti ammoyon, ken agtultuloykayo a mangsapul iti kinapudno.
Kasano a maitakderak no ania ti nalinteg.a diak masair ti rikna dagiti sabali ti pammatida? Rugianyo babaen iti panangsiguradoyo a naparegta dagiti balikas ken tignayyo babaen iti ayat iti Dios ken dagiti annakna. Ti panangiburay iti ebanghelio nasken a saan a maaramid iti espiritu ti sinnuppiat no di ketdi babaen iti kinalawag, kinaemma, ken kinaanus. Mabalin a managayatkayo kadagiti dadduma uray no saanyo nga anamongan dagiti panniriganda.
Kitaen iti Mateo 5:14–16 (agsilnag koma ti silawyo); Juan 14:6 (ni Jesus ti kinapudno); 1 Pedro 3:15 (nakasaganakayo a kanayon a mangiburay ti namnamayo ken ni Cristo); Doktrina ken Katulagan 88:77–80 (dagiti banag a kayat ti Apo a masursurotayo); 93:36 (gloria ti Dios ti saririt); 124:15 (ti kaipapanan ti integridad ket panangayat iti nalinteg); 130:18 (ti kinasaririt maitugottayo iti panagungar).
Saludsod iti rekomenda iti templo
Ikarkarigatam kadi ti agbalin a napudno iti amin nga ar-aramidem?