“Ayatenyo ti Dios, ayatenyo ti kaarrubayo,” Para iti Pigsa dagiti Agtutubo: Maysa a Pangiwanwan iti Panagpili (2022)
“Ayatenyo ti Dios, ayatenyo ti kaarrubayo,” Para iti Pigsa dagiti Agtutubo
Ayatenyo ti Dios, ayatenyo ti kaarrubayo
Mateo 22:37–40
Tapno matulongankayo nga agaramid kadagiti nasayaat a pili, nangted ti Dios kadagiti bilin. Inaramidna daytoy gapu ta ay-ayatennakayo. Ken ti kasayaatan a gapu tapno matungpal dagiti bilin ti Dios ket ti panagayatyo Kenkuana. Ti ayat ti kapatgan a paset dagiti bilin ti Dios.
Dagiti agnanayon a kinapudno
Ay-ayatennakayo ti Dios. Isu ti Amayo. Ti naan-anay nga ayatna ti makaparegta kadakayo nga agayat Kenkuana. No ti ayatmo iti Nailangitan nga Ama ti kapatgan nga impluensia iti biagmo, agbalin a nalaklaka ti adu a pangngeddeng.
Ti dua a kadakkelan iti amin a bilin, insuro ni Jesus, ket ti ayatenyo ti Dios ken ayatenyo ti kaarrubayo. Ket asino ti kaarrubayo? Ti tunggal maysa! Ti amin a naisuro kadagiti nasantuan a kasuratan ken insuro dagiti propeta ket mainaig kadagitoy dua a bilin.
Kakabsatyo ti amin a tao—agraman, siempre, dagiti tao a maiduma kadakayo, wenno dagiti sumuppiat kadakayo. Kayat ti Nailangitan nga Ama nga aggiinnayat dagiti annakna. No agserbikayo kadagiti annakna, agserserbikayo met Kenkuana.
Dagiti Awis
Ipakitayo ti panagayatyo iti Dios babaen iti panagtungpal kadagiti bilinna. Kas pagarigan, babaen iti panangngilin a nasantuan iti aldaw ti Sabbath, agraman ti sipupudno a panangisagana ken pannakiranud iti sakramento, ipakitayo iti Dios a natallugodkayo a mangidaton iti maysa nga aldaw ti makalawas Kenkuana. No agayuno ken agbayadkayo iti apagkapullo ken daton, ipakitayo a ti aramid ti Dios ket napatpateg kadakayo ngem kadagiti material a banag. No usarenyo dagiti nagan ti Dios ken ni Cristo nga addaan panagraem, saan a kaano man nga aramaten iti barengbareng wenno iti gagangay a wagas, ipakitayo ti panagyamanyo iti amin a naaramidanda para kadakayo.
Tratuenyo a kas maysa nga anak ti Dios ti tunggal maysa. Kas maysa a disipulo ni Jesucristo, mabalinyo ti mangidaulo nga addaan iti panagayat, panagraem, ken panangibilang kadagiti tao iti amin a puli ken relihion ken ania man a dadduma pay a grupo—nangnangruna kadagitay a no maminsan biktimada kadagiti makadangran a balikas ken tignay. Tulonganyo dagiti makarikna iti liday, dagiti agmaymaysa, wenno dagiti awanan gawayda. Tulonganyo ida a mangrikna iti ayat ti Nailangitan nga Ama babaen kadakayo.
Siguraduenyo a ti pagsasaoyo ti mangyanninaw iti ayat ti Dios ken ti dadduma—iti man pannakisaritayo iti sangunsango wenno iti virtual. Isaritayo dagiti banag a makaparegta—awan ti mabalin a mamagsisina, makapasakit, wenno makasair, uray no kas maysa laeng nga angaw. Mabalin a nabileg dagiti balikasyo. Pagbalinenyo dagitoy a nabileg para iti pagsayaatan.
Ti panagayat iti amin nga annak ti Dios ket mangrugi iti pagtaengan. Aramidenyo ti pasetyo a mangpabalin iti pagtaenganyo a maysa a lugar a pakariknaan ti tunggal maysa iti ayat ti Mangisalakan.
Dagiti naikari a bendision
Mapasingedyonto ti relasionyo iti Dios bayat ti panangipeksayo iti ayatyo babaen iti panagtungpal kadagiti bilinna ken panangsalimetmet kadagiti katulaganyo Kenkuana.
Mapasingedyonto ti relasionyo iti dadduma iti panangipeksayo ti ayatyo babaen iti panagserbi a kas ken ni Cristo. Masarakanyonto ti rag-o iti panangaramidyo iti lubong nga ad-adda a makaay-ayo a pagtaengan.
Dagiti saludsod ken sungbat
Kasano a mariknak ti ayat ti Dios? Kanayon a sidadaan a magun-od ti ayat ti Nailangitan nga Ama. Makisao a masansan Kenkuana babaen iti kararag. Iburayyo dagiti riknayo Kenkuna, ket dumngeg kadagiti impresion nga aggapu Kenkuana. Basaenyo dagiti balikasna iti nasantuan a kasuratan. Panunotenyo ti amin nga inaramidna kadakayo. Ibubosyo ti panawenyo kadagiti lugar ken aktibidad nga adda ti presensia ti Espirituna.
Namnamaen kadi ti Apo nga ayatek ti tunggal maysa, uray dagiti saan a nasayaat ti panangtratoda kaniak? Namnamaen ti Apo nga ayatenyo dagiti kabusoryo ken ikararaganyo dagiti mangirurumen kadakayo. Nupay kasta, saanna a kayat a sawen a nasken nga agtalinaedkayo iti situasion a pakaigapuan ti pannakadangran ti rikna, bagi, wenno espirituyo. Mangitudingkayo kadagiti beddeng tapno mapagtalinaed a natalged ti bagiyo. No na-bully wenno naabusokayo—wenno no ammoyo a mapaspasamak daytoy iti maysa a tao—kasaritayo ti maysa a mapagtalkan a nataengan.
Kaano ken kasano a maam-ammok dagiti miembro ti kasungani a sekso? Ti kasayaatan a wagas tapno maam-ammo dagiti dadduma ket babaen iti napudno a pannakigayyem. Kabayatan nga ubbingkayo pay, mangbangonkayo iti nasayaat a panaggagayyem iti adu a tattao. Iti dadduma a kultura, aggiinnammo dagiti miembro iti kasungani a sekso babaen kadagiti makaay-ayo nga aktibidad. Para iti emosional ken naespirituan a panagdur-as ken panagtalgedyo, nasken a maitantan dagiti aktibidad a sinaggaysa [one-on-one] agingga a nataengankayo—ti tawen a 16 ti nasayaat a pagalagadan. Makiumankayo kadagiti nagannak ken lideryo. Italimengyo dagiti naipamaysa a relasion a para intono natataengankayo. Bubosenyo ti panawenyo kadagiti makatulong kadakayo a mangtungpal kadagiti panagkumityo ken ni Jesucristo.
Ania ti maaramidko no ti pagtaenganmi ket saan a lugar ti ayat? Ammo ti Mangisalakan ti situasionyo, ket ay-ayatennakayo. Aganuskayo, itultuloyyo a tungpalen dagiti bilin ti Dios, ken agbalinkayo a nasayaat a pagwadan iti pamiliayo. Patanorenyo dagiti relasionyo iti pamilia iti wardyo. Agsaganakayo itan a mangbangon iti bukodyo a pamilia a nabuangay kadagiti pannursuro ni Jesucristo.
Kitaen iti Isaias 58:3–11 (dagiti panggep iti panagayuno); 58:13–14 (dagiti bendision ti panangngilin ti Sabbath); Malakias 3:8–10 (dagiti bendision ti panagbayad iti apagkapullo); Lucas 6:27–28 (ayatenyo dagiti kabusoryo); 10:25–37 (asino ti kaarrubak?); Juan 3:16–17 (ay-ayatennatayo ti Dios, isu nga imbaonna ti Anakna); 14:15 (tungpalentayo dagiti bilin gapu ta ay-ayatentayo ti Dios); 1 Juan 4:19 (ay-ayatentayo ti Dios gapu ta ay-ayatennatayo); Mosiah 2:17 (no agserbitayo kadagiti dadduma, agserserbitayo iti Dios).
Dagiti saludsod iti rekomenda iti templo
Sursurotem kadi dagiti pannursuro ti Simbaan ni Jesucristo iti tignaymo iti pribado ken publiko kadagiti miembro ti pamiliam ken kadagiti dadduma?
Ikarkarigatam kadi a mangpatalinaed a nasantuan iti aldaw ti Sabbath, iti pagtaengan ken iti simbaan; dumardar-ayka kadagiti mitingmo; agsagsagana ken maikarika a makiranud iti sakramento; ken agbibiagka a maitunos kadagiti paglintegan ken bilin ti ebanghelio?
Agbaybayadka kadi iti naan-anay nga apagkapullo?