Agaramid kadagiti naparegta a pili

Iti Para iti Pigsa dagiti Agtutubo, masarakanyonto dagiti pannursuro ni Jesucristo ken dagiti propetana. Addaan kagitoy a kinapudno kas pangiwanwanyo, mabalinyo ti agaramid kadagiti naparegta a pili a mangbendisionto kadakayo ita ken iti unos ti kinaagnanayon.

Ni Jesucristo ti dalan nga agturong iti agnanayon a rag-o. Ti panangusaryo iti wayawayayo nga agpili a mangsurot ken ni Jesucristo, addakayo iti dana a mangiturong iti agnanayon a ragsak. Pagbalinenyo a pagrukodanyo ni Jesucristo, ti natibker a bato a pundasionyo. Bangonenyo ti biagyo kadagiti pannursurona, ket rukodenyo dagiti piliyo babaen kadagitoy. Dagiti katulagan nga aramidenyo iti panagbuniag, kabayatan ti sakramento, ken iti templo ket dagitoy dagiti bato a pagbangon iti natibker a pundasionyo ken ni Cristo. Mapasaranyonto latta dagiti panagrigat ken pannulisog, ngem tulongandakayonto ti Nailangitan nga Ama ken ti Mangisalakan babaen amin kadagitoy.

Maysakayo a maipatpateg a naespirituan nga anak ti Dios. Ti naindaklan a planona iti kinaragsak ti mangaramid a posible a dumur-askayo a naespirituan ken dumur-as ti nadiosan a potensialyo. Isu nga imbaonna ni Jesucristo nga agbalin a Mangisalakanyo.

Agtalek kadakayo ti Amayo iti Langit. Inikkannakayo kadagiti naindaklan a bendision, agraman ti pakabuklan ti ebanghelio ken dagiti sagrado nga ordinansa ken katulagan a mangbegkes kadakayo Kenkuana ken mangyeg iti bilegna iti biagyo. Addaan kadagitoy a bendision sumangbay ti nayon a responsabilidad. Ammona a kabaelanyo iti mangbalbaliw iti lubong, ket agkasapulan dayta, kaaduanna, iti agbalin a naidumduma iti lubong. Dawatenyo ti pannarabay ti Nailangitan nga Ama bayat iti panagpiliyo. Bendisionannakayto iti pammaregta babaen iti Espiritu Santo.

Ti panggep ti Para iti Pigsa dagiti Agtutubo ket saan a mangted kadakayo iti “wen” wenno “saan” iti tunggal mabalin a pili a maipasango kadakayo. Ketdi, aw-awisennakayo ti Apo nga agbiag iti nangatngato ken nasansantuan a wagas—ti wagasna. Isuronakayto daytoy a pangiwanwan maipapan iti wagasna. Ilawlawagna dagiti kinapudno nga impalgakna. Pagbalinenyo dagitoy a kinapudno a pangiwanwan iti panagpiliyo—dagiti daddakel a pili, kas iti panagaramid kadagiti katulagan iti templo ken panagserbi iti mision, kasta met kadagiti inaldaw a piliyo, kas iti no kasano ti panangtrato kadagiti tao wenno kasano ti panangbubos iti orasyo.

Idinto a matulongandakayo dagiti dadduma, personal ti naespirituan a panagdur-asyo. Nagbaetanyo daytoy iti Apo. Ammona ti pusoyo, ken Isuna laeng ti mabalin a kangatuan nga Ukom. Aramidenyo amin ti kabaelanyo a mapasayaat ti biagyo iti inaldaw, tungpalenyo dagiti bilin ti Dios ken dayawen dagiti katulaganyo, ken tulonganyo dagiti dadduma a makaasideg iti Mangisalakan.

Kitaen iti Mosiah 4:29–30 (dagiti wagas iti panagbasol ket di mabilang, masapul a kitaentayo a nalaing ti bagbagitayo); Helaman 5:12 (bangonenyo ti pundasionyo ken Cristo); Doktrina ken Katulagan 45:57 (kaduayo ti Espiritu Santo kas pangiwanwan); 82:15 (ibegkesyo ti bagbagbagiyo iti Apo babaen kadagiti katulagan).

Kasano a naurnos daytoy a pangiwanwan

Addaan iti tallo a paset ti tunggal topiko:

1. Dagiti agnanayon a kinapudno, wenno doktrina ti naisubli nga ebanghelio ni Jesucristo

2. Dagiti awis nga agtignay a maitunos kadagitoy a kinapudno

3. Dagiti naikari a bendision nga ipaay ti Apo kadagiti agbiag babaen kadagiti pannursurona