Ni Lehi nga Agdaldaliasat iti Asideg ti Nalabaga a Baybay, ni Gary Smith

Enero 8–14: “Mapanak ket Aramidek”

1 Nephi 1–5

Irugi ti Libro ni Mormon iti pakaammuan maipapan iti pudno a kaamaan a makapadpadas kadagiti pudno a panagkarigatan. Napasamak idi 600 BC, ngem adda dagiti banag maipapan iti daytoy a pakaammuan a mabalin a kasla pamiliar kadagiti pamilia iti agdama. Nagnaed daytoy a pamilia iti maysa a lubong nga agraraira iti kinadakes, ngem inkari ti Apo kadakuada a no sumurotda Kenkuana, idalanna ida iti kinatalged. Iti panagtultuloyda, addaanda kadagiti naimbag a kanito ken dakes a kanito; napadasanda dagiti naindaklan a bendision ken milagro, ngem addaanda met kadagiti panagsisinnuppiat ken panagsisinnupanget. Manmano nga adda iti nasantuan a kasuratan ti kasta a detalyado a pakasaritaan ti maysa a pamilia a mangikarkarigatan nga agbiag iti ebanghelio: nagannak nga agkagkagumaan a mangparegta iti pammati iti pamiliada ken madandanagan maipapan iti panagtalgedda, dagiti annak a mangikedkeddeng no mamatida met laeng kadagiti nagannak kadakuada, ken agkakabsat a lallaki nga agiinnapal ken agsisinnupanget—ket no dadduma agpipinnakawanda iti tunggal maysa. Iti pakabuklan, adda bileg kadagiti pagarigan ti pammati daytoy saan a perpekto a pamilia.

Dagiti Kapanunotan iti Panagsursuro iti Pagtaengan ken iti Simbaan

1 Nephi 1–5

“Napateg unay kaniak” ti balikas ti Dios.

Maysa a napateg a mensahe iti Libro ni Mormon ket “napateg unay” ti balikas ti Dios (1 Nephi 5:21). Bayat ti panangbasayo iti 1 Nephi 1–5, sapulenyo dagiti wagas a direkta wenno saan a direkta a binendisionan ti balikas ti Dios ti pamilia ni Lehi (kas pagarigan, kitaen iti 1:11–15; 3:19–20; 5:10–22). Ania ti isuro kadatayo dagitoy a kapitulo maipapan iti balikas ti Dios? Ania ti masarakanyo a mangparegta kadakayo a mangsukisok kadagiti nasantuan a kasuratan?

Kitaen met iti “As I Search the Holy Scriptures,” Hymns, no. 277; “Scriptures Legacy” (video), Gospel Library.

1 Nephi 2

Magun-od ken mapapigsak ti pammaneknekko bayat ti panagturongko iti Apo.

Maam-ammo ni Nephi gapu iti nabileg a pammatina iti Apo, ngem kasapulanna ti agtrabaho tapno magun-odna ti pammaneknekna—kas iti ar-aramidentayo amin. Ania ti mabasayo iti 1 Nephi 2 a mangipakita no apay a nakagun-od ni Nephi iti pammaneknek a pudno dagiti balikas ti amana? Apay a saan a nagun-od da Laman ken Lemuel daytoy a pammaneknek? (Kitaen met iti 1 Nephi 15:2–11). Kaano a nariknayo a pinalukneng ti Apo ti pusoyo?

Kitaen met iti “The Lord Commands Lehi’s Family to Leave Jerusalem” (video), Gospel Library.

1 Nephi 3–4

Isagananto ti Dios ti wagas para kaniak a mangaramid iti pagayatanna.

Idi binilin ti Apo dagiti annak ni Lehi a mangala kadagiti gambang a pinanid, saanna nga inted dagiti masinunuo a pangiturong no kasano nga aramiden daytoy. Masansan a pudno daytoy iti pangiturong a maawattayo manipud iti Dios, ket mabalin a marikna a kasla impaaramidna ti “narigat a banag” (1 Nephi 3:5). Ania ti mangparegta kadakayo maipapan iti sungbat ni Nephi iti bilin ti Apo iti 1 Nephi 3:7, 15–16?

Bayat ti panangbasayo iti 1 Nephi 3–4, sapulenyo dagiti nadumaduma a rigat a napasaran ni Nephi. Kasano nga “insagana ti Apo ti wagas” nga agpaay ken ni Nephi a “mangtungpal iti banag nga [imbilinna]”? Apay a napateg a maammuanyo no ania ti inaramid ti Apo para ken ni Nephi?

Maysa a nabileg a wagas a nangisaganaan kadatayo ti Dios a mangtungpal kadagiti bilinna ket babaen ti panangibaonna ken ni Jesucristo tapno agbalin a Mangisalakantayo. Ibilangyo ti panangbasa iti mensahe ni Presidente Dallin H. Oaks a “What Has Our Savior Done for Us?” (Liahona, Mayo 2021, 75–77). Kasano nga insagana ni Jesucristo ti maysa a dalan para iti tunggal maysa kadatayo? Iti panangammoyo a pinarmekna ti amin a banag para kadakayo, ania ti mariknayo a makaawis a “mapan ken aramiden”?

Kitaen met iti “Nephi Is Led by the Spirit to Obtain the Plates of Brass” (video), Gospel Library; Gospel Topics, “Obedience,” Gospel Library.

Agusar kadagiti estoria ken pagarigan a mangisuro kadagiti pagbatayan ti ebanghelio. Bayat ti panangisaganayo a mangisuro, panunotenyo dagiti bukod a padas a makainayon iti maikadua a saksi kadagiti pakaammuan iti nasantuan a kasuratan. Kas pagarigan, kaano nga insagana ti Apo ti dalan para kadakayo a mangaramid iti pagayatanna?

Napnoda iti Rag-o, ni Walter Rane

1 Nephi 4:1–3; 5:1–8

Ti pananglagip kadagiti aramid ti Dios ti makaited kaniak iti pammati nga agtungpal kadagiti bilinna.

Idi narikna da Laman ken Lemuel a kasla agdaydayamudom ken agrekreklamoda, masansan nga adda da Nephi ken Lehi iti asidegda a mangparegta ken mangsuporta kadakuada. No mariknayo a kasla agdaydayamudomkayo, makatulong a basaen dagiti balikas da Nephi ken Lehi. Kasano a pinadas da Nephi ken Lehi a mangtulong iti dadduma a mangbukel iti pammati iti Dios? (kitaen iti 1 Nephi 4:1–3; 5:1–8; kitaen met iti 1 Nephi 7:6–21). Ania ti masursuroyo a makatulong kadakayo no masulisogkayo nga agdayamudom wenno agreklamo?

1 Nephi 4:5–18

“Imbagnosnak ti Espiritu.”

Iti 1 Nephi 4:5–18, ania ti makaawis kadakayo maipapan iti kabaelan ni Nephi a mangbigbig ken mangsurot iti Espiritu? Mabalinyo pay nga irebyu ti mensahe ni Presidente Russell M. Nelson a “Revelation for the Church, Revelation for Our Lives” (Liahona, Mayo 2018, 93–96) a mangsursuro iti ad-adu pay maipapan iti panangawat iti palting manipud iti Apo).

Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.

Dagiti kapanunotan para iti Panangisuro kadagiti Ubbing

1 Nephi 2:16

Maaddaanak iti bukodko a pammaneknek.

• Kasano nga ammo ni Nephi a pudno ti insuro ti amana? Tulongam dagiti ubbing a mangsapul kadagiti sungbat iti 1 Nephi 2:16, 19. Mabalin a magustuanyo pay ti mangisurat kadagiti aramid ni Nephi kadagiti bloke wenno dadduma pay a banag ket kalpasanna mangbangon iti maysa a banag babaen kadagiti banag. Makaiturong daytoy iti panagsasarita maipapan no kasano a matulongannatayo dagitoy a tignay a mangbukel iti pammaneknektayo.

• Mabalinyo ti mangipakita kadagiti annakyo kadagiti ladawan wenno banag a mangibagi kadagiti banag a mabalin a sapsapulenda a paneknekan, kas iti maysa a kopia ti Libro ni Mormon wenno maysa a ladawan ni Jesucristo, maysa a templo, wenno ti sibibiag a propeta. Awisenyo ida a mangala iti maysa ken mangibinglay kadagiti pammaneknekda maipapan iti dayta a banag. Maibagayo pay kadagiti annakyo no kasano a nagun-odyo ti pammaneknekyo. Apay a kasapulantayo ti bukodtayo a pammaneknek?

1 Nephi 3–4

Tulongannakto ti Dios a mangtungpal kadagiti bilinna.

• Ibilangyo ti panangusar iti maysa wenno ad-adu pay kadagitoy a resources a mangtulong kadagiti annakyo nga agsarita maipapan iti no kasano a tinulongan ti Dios ni Nephi a mangala kadagiti pinanid a gambang: 1 Nephi 3–4; panid ti aktibidad iti daytoy a lawas; “Nephi’s Courage” (Children’s Songbook, 120–21); ken “Chapter 4: The Brass Plates” (iti Dagiti Estoria iti Libro ni Mormon, 8–12).

• Mabalin a magustuanyo ken dagiti annakyo ti mangyakem iti 1 Nephi 3:2–7. Mabalinyo ti agpammarang a kas Lehi ket kiddawenyo kadagiti annakyo nga agsublida iti Jerusalem tapno mangala kadagiti pinanid a gambang. Awisen ida a sumungbat iti bukodda a balikas a kasla isuda da Laman, Lemuel, wenno Nephi. Ania dagiti sumagmamano a banag nga imbilin ti Dios nga aramidentayo? (kitaen dagiti ladawan 103–15 iti Libro ti Arte ti Ebanghelio wenno Mosiah 18:8–10 para kadagiti kapanunotan). Kasano a makapagbalintayo a kas ken ni Nephi?

1 Nephi 3:19–21; 5:19–22

Maysa a dakkel a gameng dagiti nasantuan a kasuratan.

• Napateg unay dagiti nasantuan a kasuratan iti pamilia ni Lehi. Tapno mailadawan daytoy, mabalinyo nga awisen dagiti annakyo a mangtulong kadakayo a mangisarita wenno mangyakem iti no ania ti inaramid ni Nephi ken dagiti kakabsatna a mangala kadagiti pinanid a gambang: nagbaniagada iti atiddog a distansia, pinanawanda dagiti balitok ken pirakda, ket naglemmengda iti maysa a rukib tapno maisalakan ti biagda. Kalpasanna mabalinyo a basaen ti 1 Nephi 5:21 ket pagsasaritaanyo no apay a napateg unay dagiti nasantuan a kasuratan iti pamilia ni Lehi. Apay a napateg dagitoy kadatayo? Kasano ti panangtratotayo kadagiti nasantuan a kasuratan a kas maysa a gameng?

Impateg ni Nephi ken ti pamiliana dagiti nasantuan a kasuratan.

1 Nephi 4:6

Iturongnakto ti Espiritu Santo bayat ti panagkalikagumko a mangaramid iti pagayatan ti Apo.

• Kalpasan ti aggigiddan a panangrebyu iti 1 Nephi 3 no kasano a pinadas ni Nephi ken dagiti kakabsatna a mangala kadagiti pinanid a gambang, basaenyo a kadua dagiti annakyo ti 1 Nephi 4:6 tapno maammuan no ania ti inaramid ni Nephi a nangipalubos kenkuana nga agballigi iti kamaudiananna. Kalpasanna, mabalin nga ilista dagiti annakyo dagiti banag a kayat ti Dios nga aramidenda. Kasano a matulongannatayo ti Espiritu Santo kadagitoy a kasasaad?

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Tinungpalko ti Timek ti Espiritu, ni Walter Rane