Mayo 13–19: “Ti Silaw … A Saan a Pulos a Mapasipnget” Mosiah 11–17,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
“Mayo 13–19. Mosiah 11–17,” Umaykayo, Sumurot Kaniak—Para iti Pagtaengan ken Simbaan: 2024 (2024)
Ni Abinadi iti Sanguanan ni Ari Noe, ni Andrew Bosley
Mayo 13–19: “Ti Silaw … A Saan a Pulos a Mapasipnget”
Mosiah 11–17
Mabalin a mangrugi dagiti dadakkel nga uram iti maysa a rissik. Ni Abinadi ti kakaisuna a maysa a tao a nagpampaneknek a maibusor iti maysa a nabileg nga ari ken ti kortena. Saan a naawat ti kaaduan a balikasna, ken nakedngan isuna a matay. Ngem ti pammaneknekna maipapan ken ni Jesucristo, nga isu ti “silaw … a saan a pulos a mapasipnget” (Mosiah 16:9), ket namagrissik iti maysa a banag iti kaunggan ti agtutubo a saserdote a ni Alma. Ken dayta a rissik ti kumbersion ket in-inut a dimmakkel bayat ti panangisangbay ni Alma iti adu a dadduma pay iti panagbabawi ken pammati ken ni Jesucristo. Dagiti gil-ayab ti apuy a nangpatay ken ni Abinadi ket in-inut a naiddep, ngem ti apuy ti pammati a pinarnuay dagiti balikasna ket nalabit nga adda napaut nga impluensiada kadagiti Nephite—ken kadagiti tao mangbasa kadagiti balikasna iti agdama. Kaaduan kadatayo ti saanto iti kaano man a naan-anay a mapadasan ti kas iti inaramid ni Abinadi gapu kadagiti pammaneknektayo, ngem addaantayo amin iti kanito no ti panangsurottayo ken ni Jesucristo ket maysa a pannubok ti tured ken pammatitayo. Nalabit a ti panangadal iti pammaneknek ni Abinadi ti mangparubrobto pay kadagiti gil-ayab ti pammaneknek ken tured iti pusoyo.
Kitaen met iti “Abinadi Testifies of Jesus Christ” (video), Gospel Library.
Dagiti Kapanunotan para iti Panagsursuro iti Pagtaengan ken iti Simbaan
Makapagtakderak para ken ni Jesucristo, uray no agtakderak nga agmaymaysa.
Bayat ti panagadalyo iti Mosiah 11–13; 17, kitaenyo dagiti ladawan ni Abinadi iti daytoy a balabala. Ania ti masursuroyo maipapan iti panagtakder kas maysa a saksi para ken ni Cristo? Nangnangruna, a mabalinyo nga ipamaysa ti panagadalyo kadagiti binatog ken saludsod a kas kadagitoy:
-
Kasano ti panangiladawanyo ken ni Noe ken dagiti taona? Apay a kasapulan ti tured ni Abinadi a mangibinglay kadakuada iti mensahe ti Dios? (kitaen iti Mosiah 11:1–19, 27–29; 12:9–15).
-
Kasano nga iladawanyo ni Abinadi? Ania ti naawatan ni Abinadi a nakatulong kenkuana nga agbalin a natured iti pammaneknekna? (kitaen iti Mosiah 13:2–9, 28, 33–35; 17:8–10, 20).
Kaano ti pannakariknayo a maymaysakayo a nangitakder a nangidepensa iti Mangisalakan ken ti ebangheliona? Kasano a tinulongannakayo a makarikna a kinaduanakayo? Bayat ti panangutobyo daytoy, mabalinyo a basaen ti pakaammuan ni Eliseo ken ti agtutubo nga adipenna iti 2 Ar-ari 6:14–17. Ania ti mangparegta kadakayo maipapan iti daytoy a pakaammuan?
Mabalinyo pay a sukisoken dagiti panid 31–33 ti Para iti Pigsa dagiti Agtutubo: Maysa a Pangiwanwan iti Panagpili tapno mangsapul kadagiti ragup ti balikas a mangted kadakayo iti tured a mangsaluad iti kinapudno. Wenno mabalinyo nga aramiden met dayta kadagiti liriko ti maysa a himno a kas iti “Do What Is Right” wenno “Let Us All Press On” (Hymns, nos. 237, 243).
Kasano a mayaplikaryonto no ania ti nasursuroyo manipud ken ni Abinadi? Ti video a “Dare to Stand Alone” (Gospel Library) ti mangiladawan kadagiti situasion a mabalin a pangitakderanyo kas saksi para ken ni Jesucristo ken ti ebangheliona. Ania dagiti dadduma pay a pagarigan a mapanunotyo?
Kitaen met iti Taga Roma 1:16; 2 Timoteo 1:7–8; “Chapter 8: The Call for Courage,” Teachings of Presidents of the Church: Thomas S. Monson (2022), 135–47; Gospel Topics, “Faith in Jesus Christ,” Gospel Library.
Mangisuro babaen ti Espiritu. “Agkasapulan ti nabileg a pannursuro iti ebanghelio saan laeng a ti panangisagana iti maysa nga adalen no di ket panangisagana iti bagiyo iti naespirituan [tapno] dumngeg ken mangsurot iti panangiwanwan ti Espiritu bayat ti panangisuroyo” (Panangisuro iti Wagas ti Mangisalakan, 17).
Masapul nga aramatek ti pusok tapno maawatak ti balikas ti Dios.
Pamiliar dagiti saserdote ni Ari Noe iti balikas ti Dios. Mabalinda nga adawen dagiti binatog ti nasantuan a kasuratan ken kunada nga isuroda dagiti bilin. Ket kaskasdi, kasla saan a naapektuan ti biagda iti ebanghelio ti Mangisalakan. Apay a kasta?
Panunotenyo maipapan iti daytoy bayat ti panangbasayo iti Mosiah 12:19–37. Ania iti panagkunayo ti kaipapanan ti aramatenyo ti pusoyo tapno maawatanyo ti balikas ti Dios. Ania dagiti balikas ken ragup ti balikas a mangparegta kadakayo nga agaramid kadagiti panagbalbaliw iti wagas a panagsursuroyo iti ebanghelio?
Nasken a maisurat dagiti bilin ti Dios iti pusok.
Utobenyo ti obserbasion ni Abinadi a dagiti bilin ket “saan a naisurat iti puspuso” dagiti saserdote (Mosiah 13:11). Ania ti mabalin a kayat a sawen daytoy a ragup ti balikas? Bayat ti panangbasayo iti Mosiah 13:11–26, ibilang wenno panunoten no naisurat met laeng dagitoy a bilin iti pusoyo.
Kitaen met iti Jeremias 31:31–34; 2 Taga Corinto 3:3.
Nagsagaba ni Jesucristo para kaniak.
Iti Mosiah 14–15, kitaenyo dagiti balikas ken ragup ti balikas a mangiladawan iti Mangisalakan ken no ania ti sinagabana para kadakayo. Ania dagiti bersikulo a makatulong a mangpauneg iti ayat ken panagyamanyo Kenkuana?
Kasano nga agpada a ti Ama ken ti Anak ni Jesucristo?
Insuro ni Abinadi a ti Dios nga Anak—ni Jesucristo—ket agbalin a Mannubbot (kitaen iti Mosiah 15:1) nga agnanaed iti lasag, nga agbalin nga agpada a tao ken Dios (dagiti bersikulo 2–3) Naan-anay nga impasakupna ti Bagina iti pagayatan ti Dios nga Ama (dagiti bersikulo 5–9). Gapu iti daytoy, agpada ni Jesucristo nga Anak ti Dios ken ti naan-anay a naindagaan a pannakabagi ti Dios nga Ama (kitaen iti Juan 14:6–10).
Ni Jesucristo pay ti Ama a kayatna a sawen a no awatentayo ti panangsubbotna, agbalintayo a “bukelna” ken “agtawid iti pagarian ti Dios” (Mosiah 15:11–12). Iti sabali a pannao, agbalintayo a naespirituan a maipasngay manen babaen Kenkuana (kitaen iti Mosiah 5:7).
Apay a mariknayo a nasken a maammuan dagitoy a banag maipapan iti Nailangitan nga Ama ken ni Jesucristo? Kasano a pabilgen ti pammaneknek ni Abinadi ti pammatiyo Kadakuada?
Dagiti kapanunotan para iti Panangisuro kadagiti Ubbing
Makapagtakderak para ken ni Jesucristo, uray no agtakderak nga agmaymaysa.
-
Iti sumagmamano a panawen iti biagtayo, maipasangotayo amin iti panagaramid kadagiti pili a maisuppiat iti pammatitayo ken ni Jesucristo. Ania ti masursuro dagiti annakyo manipud ken ni Abinadi maipapan iti panagtakder a kas maysa a saksi ni Jesucristo, uray no saan a nalatak daytoy? Ti aramid ti arte iti daytoy a balabala wenno ti “Kapitulo 14: Da Abinadi ken Ari Noah” (iti Dagiti Estoria iti Libro ni Mormon, 38–42) ket makatulong kadakuada a mangiladawan iti panunotda ti pakaammuan iti Mosiah 11–13; 17. Saludsodenyo kadakuada no ania ti magustuanda maipapan ken ni Abinadi.
-
Mabalin a magustuan dagiti annakyo ti mangyakem kadagiti paset ti estoria ni Abinadi. Kalpasanna mabalinda ti mangyakem kadagiti senario ti pudno a biag tapno masanayda no ania ti mabalin nga aramidenda no kayat dagiti dadduma nga agaramidda iti maysa a banag a biddut. Wenno mabalinda nga ibinglay dagiti padas idi naturedda a nangsurot ken ni Jesucristo. Kasano a sinurot ni Abinadi ni Jesucristo? Mosiah 13:2–9; 17:7–10). Apay a saan nga inaramid ni Ari Noah ti ammona nga umisu? (kitaen iti Mosiah 17:11–12).
Nasken nga agtungpalak iti Sangapulo a Bilin.
-
Ammo dagiti saserdote ni Ari Noah dagiti bilin ngem saanda nga “insurat dagitoy iti puspuso[da]” (Mosiah 13:11). Kasano a matulonganyonto dagiti annakyo a mangammo kadagiti bilin ken mangipateg kadagitoy? Nalabit a mabalinda nga isurat dagiti bilin manipud iti Mosiah 12:33–36 ken 13:11–24 kadagiti sinan-puso a piraso ti papel. Bayat ti panangaramidda, kasaritayo ida maipapan iti no ania ti kaipapanan dagitoy a bilin ken no kasano a suroten dagitoy. Kasano nga isurattayo dagitoy a bilin iti puspusotayo?
-
Mabalinyo ti aggigiddan nga agkansion iti maysa a kanta maipapan kadagiti bilin, kas iti “Keep the Commandments” (Children’s Songbook, 146–47). Ania dagiti bendision a sumangbay iti panagtungpal kadagiti bilin?
Isuro kadatayo dagiti nasantuan a kasuratan dagiti bilin ti Dios.
Imbaon ti Nailangitan nga Ama ni Jesucristo a mangidalan kaniak nga agsubli Kenkuana.
-
Nupay maysa nga ababa a kapitulo daytoy, addaan ti Mosiah 14 iti sumagmamano a balikas ken ragup ti balikas a mangiladawan ken ni Jesucristo. Nalabit a mabalinyo ken dagiti annakyo ti mangilista kadagitoy bayat ti aggigiddan a panangbasayo iti kapitulo. Kalpasanna mabalinyo nga isarita no kasano ti riknayo maipapan iti Mangisalakan bayat ti panangadalyo kadagitoy a balikas ken ragup ti balikas.
-
Tapno mangisuro maipapan ken ni Jesucristo, inadaw ni Abinadi ni propeta Isaias, nga indilignatayo iti napukaw a karnero. Nalabit a makaibinglay dagiti annakyo kadagiti padas idi napukawanda iti maysa a banag wenno napukawda mismo. Kasano ti nariknada? Ania ti inaramidda? Kalpasanna mabalinda nga aggigiddan a mangbasa iti Mosiah 14:6 ken 16:4–9. Kasano a maipadatayo iti karnero a mayaw-awan manipud iti Dios? Kasano a tulongannatayo ni Jesucristo nga agsubli?
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Nagsilnag ti Rupana iti Kasta Unay Raniagna a Rimat, ni Jeremy Winborg