“Mayo 6–12: ‘Babaen ti Bileg ti Apo.’ Mosiah 7–10,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
“Mayo 6–12. Mosiah 7–10,” Umaykayo, Sumurot Kaniak—Para iti Pagtaengan ken Simbaan: 2024 (2024)
Minerva Teichert (1888–1976), Ni Ammon iti sanguanan ni Ari Limhi, 1949–1951, lana iti masonite, 35 15/16 x 48 a pulgada. Brigham Young University Museum of Art, 1969.
Mayo 6–12: “Babaen ti Bileg ti Apo”
Mosiah 7–10
Kabayatan ti panagragsak dagiti tao ni Ari Mosiah iti “agtultuloy a kappia” iti Zarahemla (Mosiah 7:1), naiturong dagiti panunotda iti sabali pay a grupo dagiti Nephite, a kasakbayan ti adu a tawen pimmanawda tapno agindeg iti daga ti Lehi-Nephi. Naglabas dagiti kaputotan, ket awanen ti damag dagiti tao ni Mosiah manipud kadakuada. Isu nga indawat ni Mosiah ken ni Ammon a mangidaulo iti grupo dagiti agsuksukisok tapno mangbirok kadagiti pimmanaw a Nephite. Natakuatan ti grupo dagiti agsuksukisok a “gapu iti basol” dagiti Nephite (Mosiah 7:24, ket inadipen ida dagiti Lamanite. Ngem iti isasangpet ni Ammon ken dagiti kabsatna a lallaki, kellaat nga adda namnama para iti pannakaisalakan.
No dadduma kaslatayo kadagitoy nga adipen a Nephite, nga agsagsagaba gapu kadagiti basoltayo, agpangpangngadua no kasano a masarakantayto manen ti talna. No dadduma kaslatayo ken ni Ammon, a makarikna iti pannakatignay a tumulong kadagiti dadduma ket iti kamaudiananna matakuatan a dagiti panagkagumaantayo ti nangparegta kadakuada nga “itag-ay[da] dagiti ulo[da], ken agrag-o[da], ket agtalek[da] iti Dios” (Mosiah 7:19). Ania man dagiti kasasaadtayo, kasapulantayo amin ti agbabawi ken “agsubli iti Apo a naimpusuan ti panggep,” nga addaan iti pammati a “wayawayaanna[tayo]” (Mosiah 7:33).
Dagiti Kapanunotan para iti Panagsursuro iti Pagtaengan ken iti Simbaan
Adda pannakabalin ni Jesucristo a mangisalakan kaniak.
Ti pannakaam-ammona ken ni Ammon, ti nangted ken ni Ari Limhi iti namnama, ket kayatna nga ited dayta a namnama kadagiti taona. Nalabit a makaited met kadakayo dagiti balikasna iti namnama. Para iti konteksto, ibilang ti panangrebyu iti situasion dagiti tao ni Limhi iti Mosiah 7:20–25. Kalpasanna, utobenyo dagitoy a saludsod bayat ti panangbasayo iti Mosiah 7:14–33:
-
Ania ti insao ni Limhi a nangpatibker iti pammati ken namnama dagiti taona ken ni Cristo?
-
Ania dagiti ragup ti balikas a makatulong kadakayo a makarikna iti namnama? (kitaen dagiti bersikulo 19, 33).
-
Ania dagiti padas a nakatulong kadakayo nga agtalek a maisalakan ken isalakannakayonto ti Dios?
Kitaen met iti “Redeemer of Israel,” Hymns, no. 6.
Naparsuaak iti “ladawan ti Dios.”
Iti Mosiah 7:26–27, inlawlawag ni Limhi ti sumagmamano kadagiti kinapudno nga insuro ni Abinadi. Ania dagiti kinapudno a mailasinyo kadagitoy a bersikulo? Kasano nga apektuan dagitoy a kinapudno ti wagas a pakakitaanyo iti Dios ken iti bagiyo?
Kitaen met iti Russell M. Nelson, “Your Body: A Magnificent Gift to Cherish,” Liahona, Ago. 2019, 50–55.
Mangted ti Apo kadagiti propeta, mammadto, ken mammaltiing, a pagsayaatan ti sangkataw-an.
Idi mangngegan ni Limhi ti pammaneknek ni Ammon a nangpatanor ti Apo iti maysa a mammadto, “nalaus ti rag-o ket nagyaman iti Dios” ni Limhi (Mosiah 8:19). Apay iti panagkunayo a nariknana ti kasdiay? Ania ti masursuroyo maipapan kadagiti mammadto manipud kadagiti balikas ni Ammon iti Mosiah 8:13–19?
Ita, kanunongantayo ti Umuna a Panguluen ken ti Korum dagiti Sangapulo-ket-dua nga Apostol kas propeta, mammadto, ken mammaltiing. Kasano a nagbalinda a “dakkel a pagimbagan” kadakayo? (Mosiah 8:18). Ania ti insuroda kadakayo a maipapan ken ni Jesucristo?
Kasano a situturedtayo, kas ken ni Ammon, nga agsarita maipapan iti panagkasapulan kadagiti propeta, mammadto, ken mammaltiing? (kitaen iti Mosiah 8:13–18). Kas pagarigan, ania ti maibinglayyo iti pamiliayo wenno iti social media maipapan:
-
Dagiti kinapudno a naisubli iti aldawtayo babaen ken ni Joseph Smith ken dadduma pay a propeta ti Apo (kas iti kinatao ti Dios, ti nadiosan a kinasiasinotayo, wenno ti agnanayon a kinatao ti pamilia). Mabalin a makatulong kadakayo ti panangrebyu iti “The Restoration of the Fulness of the Gospel of Jesus Christ” wenno ti “The Family: A Proclamation to the World” (Gospel Library) tapno mangpanunot iti sumagmamano kadagitoy a kinapudno.
-
Dagiti bendision dagiti bilin wenno ordinansa (kas iti Word of Wisdom, ti linteg ti kinadalus ti dayaw, wenno pannakailantip dagiti pamilia).
Itay napalabas a bulan, nangngegantayo manipud kadagiti propeta, mammadto, ken mammaltiing iti sapasap a komperensia. Ania dagiti mensahe a nangparegta kadakayo? Anianto ti sabali nga aramidenyo a maibatay iti no ania ti nasursuroyo? Ania ti kinuna dagiti mammadto ti Apo maipapan kadagiti “banag nga umay”? (Mosiah 8:17).
Kitaen met iti Gospel Topics, “Prophets,” Gospel Library.
Mabalinko a sanguen dagiti karit kaniak “babaen ti bileg ti Apo.”
Inako ni Zeniff a dagiti biddutna ti nangikabil iti tattaona iti narigat a kasasaad. Ngem idi agangay, kabayatan ti dangadang a maibusor kadagiti Lamanite, tinulonganna dagiti taona a mangsango kadagiti karitda nga addaan iti pammati iti Apo. Bayat ti panangbasayo iti Mosiah 9–10, sapulenyo no ania ti inaramid dagiti tao ni Zeniff a nangipakita iti pammatida. Kasano a pinapigsa ida ti Dios? Kasano a pinapigsanakayo? Ania ti kayat a sawen kadakayo ti agtultuloy “babaen ti bileg ti Apo”? (Mosiah 9:17; 10:10–11).
Makaimpluensia dagiti pilik kadagiti kaputotan.
Bayat ti panangbasayo iti Mosiah 10:11–17, ilasinyo no kasano a nangapekto dagiti tignay ken ugali dagiti immun-una a kaputotan dagiti Lamanite kadagiti simmaruno a kaputotan. Ania ti isingasing daytoy no kasano a makaapekto dagiti piliyo iti dadduma—nasayaat man wenno dakes —agraman dagiti tao a saan pay a nayanak?
Agusar kadagiti adalen a banag [object lesson]. Dagiti adalen a banag ti mangaramid iti panagsursuro a makaparagsak ken nakallalagip. Nalabit a makaipakita ti maysa a linia dagiti domino no kasano a makaapekto dagiti pili ti tattao kadagiti an-annaboda (kitaen iti Mosiah 10:11–17).
Dagiti Kapanunotan para iti Panangisuro kadagiti Ubbing
Tinulongan ti Dios dagiti tao kadagiti nasantuan a kasuratan, ken matulongannak.
-
Idi marigatan dagiti taona, inbinglay ni Ari Limhi dagiti nasantuan a kasuratan tapno mabukel ti pammatida. Saludsodenyo kadagiti annakyo ti maipapan kadagiti estoria iti nasantuan a kasuratan wenno tattao a makatulong kadakuada a maaddaan iti pammati. Kalpasanna mabalinyo nga ibasa ti Mosiah 7:19 kadakuada ken irebyu dagiti estoria a nadakamat iti daytoy a bersikulo (kitaen iti “Ti Fiesta ti Paskua” ken “Dagiti Israelita iti Let-ang” iti Dagiti Estoria iti Daan a Tulag, 70–76). Mabalin a kayat dagiti annakyo ti mangyakem kadagitoy. Kasano a tinulongan ti Apo dagiti tao kadagitoy nga estoria? Kasano a matulongannatayo?
-
Para iti ad-adu pay a pagarigan no kasano a tulongannatayo ti Apo, pumili iti sumagmamano a bersikulo ti ““Dagiti Estoria iti Libro ni Mormon” wenno “Nephi’s Courage” (Children’s Songbook, 118–19, 120–21) tapno makipagkanta kadagiti annakyo. Tulonganyo ida a mangilasin no kasano a tinulongan ti Apo dagiti tao iti Libro ni Mormon—ken no kasano a matulongannatayo.
Nangted ti Dios kadatayo kadagiti propeta, mammadto, ken mammaltiing.
-
Maysa a wagas tapno mangisuro maipapan kadagiti mammadto ket ti panangidilig kadagitoy kadagiti banag a makatulong kadatayo a makakita a nasaysayaat, kas iti anteohos, largabista, wenno maysa a mikroskopio. Kalpasanna bayat ti panangibasayo iti Mosiah 8:17 kadagiti annakyo, mabalinda nga ingato dagiti imada iti batog dagiti matada a kasla kumitkitada iti largabista tunggal mangngeganda ti balikas a “mammadto” .(kitaen met iti Moises 6:35–36). Isaritayo kadakuada maipapan kadagiti banag a tulongan ti Apo dagiti propeta a “makita” ti saantayo makita.
-
Kalpasan ti panangbasayo iti Mosiah 8:16–18 kadagiti annakyo, mabalinyo a tulongan ida a mangpanunot kadagiti wagas a mangileppas iti maysa a binatog a kas iti Ti mammadto ket kas iti … a mangtulong kadatayo … . Kas pagarigan, ti maysa a mammadto ket kas iti maysa a karatula ti trapiko a mangitudo kadatayo ken ni Jesus.
-
Mabalinyo pay ti agaramid kadagiti sinan-tugot ti saka a papel ket ditoy a paidrowingyo kadagiti annakyo dagiti ladawan dagiti banag nga imbalakad nga aramidentayo dagiti propeta, mammadto, ken mammaltiing. Ikabilyo dagiti sinan-tugot ti saka iti maysa a dalan iti lawlaw ti siled, ket papagnaenyo dagiti annakyo iti rabaw dagitoy sinan-tugot ti saka. Kasano nga agbalin ti maysa a mammadto a “dakkel a pangnamnamaan” kadatayo? (kitaen iti Mosiah 8:17–18).
No nakapsutak, mapapigsanak ti Apo.
-
No maipasango dagiti ubbing kadagiti karit, mariknada no dadduma a nakapuyda ken awan gawayda. Kasano a matulonganyo dagiti annakyo nga agpannuray iti pigsa ti Apo? Mabalinyo a damagen kadakuada no ania ti aramidentayo tapno agbalintayo a napigsa iti bagi. Ania ti kayat a sawen ti maaddaan iti “bileg ti tattao”? (kitaen iti Mosiah 10:11). Ania ti kayat a sawen ti maaddaan iti “bileg ti Apo”? (kitaen iti Mosiah 9:17–18; 10:10). Kasano a maawattayo ti bileg ti Apo? Awisenyo dagiti annakyo nga agdrowing kadagiti banag a makatulong kadakuada nga umawat iti bileg ti Apo.
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Ti Parmata ken ni Joseph Smith, ni Clark Kelley Price