“Hunio 17–23: ‘Umayto ni Jesucristo a Mangsubbot kadagiti Taona.’ Alma 8–12,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2024)
“Hunio 17–23. Alma 8–12,” Umaykayo, Sumurot Kaniak—Para iti Pagtaengan ken Simbaan: 2024 (2024)
Panangisuro iti Pudno a Doktrina, ni Michael T. Malm
Hunio 17–23: Umayto ni Jesucristo a Mangsubbot kadagiti Taona
Alma 8–12
Saanto a mapaay ti aramid ti Dios. Ngem dagiti panagkagumaantayo a makatulong iti aramidna no dadduma ket kasla mapaay—laeng, no saantayo a dagus makita dagiti pagbanaganda a namnamaentayo. No dadduma mabalin a medio mariknatayo ti narikna ni Alma idi inkasabana ti ebanghelio iti Ammonihah—nailaksid, natupraan, ken napapanaw. Ngem idi binilin isuna ti maysa nga anghel nga agsubli ket padasenna manen, situtured ni Alma a “nagsubli a dagus” (Alma 8:18), ket insagana ti Dios ti wagas iti sangona. Saan laeng nga impaayanna ni Alma iti taraon a kanen ken lugar a pagdagusanna, ngem insaganana pay ni Amulek, a nagbalin a katrabahona, maysa a maingel a mangsalsalaknib iti ebanghelio, ken maysa a napudno a gayyem. No maipasangotayo kadagiti tubeng ken pannakapaay bayat ti panagserbitayo iti pagarian ti Apo, mabalintayo a laglagipen no kasano a tinulongan ken inturong ti Dios ni Alma, ket makapagtalektayo a tulongannatayo ken iturongnatayonto met ti Dios, uray pay kadagiti narikut a kasasaad.
Dagiti Kapanunotan para iti Panagsursuro iti Pagtaengan ken iti Simbaan
Dagiti panagkagumaanko a mangibinglay iti ebanghelio ni Jesucristo ket agkasapulan iti kinaanus.
Napadasanyo kadin nga imbinglay ti ebanghelio ni Jesucristo iti maysa a tao, ngem saan a naawat ti awisyo? Napadasan met ti Alma dayta. Ania ti masursuroyo manipud kenkuana iti Alma 8:13–16 maipapan iti panangibinglayna iti ebanghelio iti baet dagiti karit ken supiat? Ituloy ti panangbasa kadagiti bersikulo 17–32, ken sapulen dagiti ragup ti balikas a mangparegta kadakayo nga agtultuloy a mangibinglay iti ebanghelio, uray no kasla saankayo nga agballigi.
Dagiti propeta ken apostol ti naisangsangayan a saksi ni Cristo, isu nga aduanda iti naparegta a balakad nga ibinglayda maipapan iti panagpaneknek Kenkuana. Sapulen iti kinuna ni Elder Dieter F. Uchtdorf iti “But What If It’s Hard?” (maysa a benneg iti “Missionary Work: Sharing What Is in Your Heart,” Liahona, Mayo 2019, 18) wenno iti imbinglay ni Elder Gary E. Stevenson iti “Love, Share, Invite,” (Liahona, Mayo 2022, 84–87). Ania ti masarakanyo sadiay a makatulong iti maysa a tao a mangrugrugin a makarikna iti pannakaupay maipapan iti panangibinglay iti ebanghelio?
Kasano ti pananggupgopyo iti amin nga inadalyo ditoy iti maysa wenno dua a makaparegta a binatog maipapan iti panangibinglay iti ebanghelio? Ibilangyo ti panagaramid iti maysa a poster wenno meme a mabalin a mangparegta kadakayo (ken iti dadduma) nga agtultuloy iti panangpadas.
Kitaen met iti “Help Me Teach with Inspiration,” Hymns, no. 281; “Alma Is Commanded by an Angel to Return to Ammonihah” (video), Gospel Library; Gospel Topics, “Inviting All to Receive the Gospel of Jesus Christ,” Gospel Library.
Umay dagiti bendision ti Dios nga addaan iti dakkel a pagrebbengan.
No basbasaen maipapan iti wagas a panangtrato dagiti Nephite iti Ammonihah kadagiti katulongan ti Apo, nalaka a lipaten nga iti naminsan nagbibiagda iti ebanghelio ken “naidaddadumada a tao ti Apo” (Alma 9:20 Bayat ti panangbasayo maipapan kadagiti naindaklan a bendision nga inted ti Dios kadagiti tao ni Nephi (kitaen nangnangruna iti Alma 9:19–23), utobenyo dagiti naindaklan a bendision nga intedna kadakayo. Ania dagiti pagrebbengan a sumangbay a kakuyog dagitoy a bendision? Ania ti ar-aramidenyo tapno agtalinaedkayo a napudno kadagitoy a pagrebbengan?
Kitaen met iti Doktrina ken Katulagan 50:24; 82:3; 93:39.
Plano ti Dios ti plano ti pannakasubbot.
Iti Alma 11–12, imbasar da Alma ken Amulek daytoy iti plano ti Dios a kas plano ti pannakasubbot. Bayat ti panangbasayo kadagitoy a kapitulo, utobenyo no apay a ti balikas a pannakasubbot ti naaramat a mangiladawan iti plano ti Dios. Ibilang ti panangisurat iti ababa a pakagupgopan ti insuro da Alma ken Amulek maipapan kadagiti sumaganad nga aspeto ti plano.
-
Ti Pannakatnag
-
Ti Mannubbot
-
Panagbabawi
-
Ipapatay
-
Panagungar
-
Panangukom
Kitaen ti epekto dagiti balikas ni Amulek kadagiti tao (kitaen iti Alma 11:46). Kasano nga apektuannakayo ti pannakaammo maipapan iti plano ti Dios?
Kitaen met iti Dallin H. Oaks, “The Great Plan,” Liahona, Mayo 2020, 93–96; “Amulek Testifies of Jesus Christ” (video), Gospel Library.
No diak patangkenen ti pusok, makaawatak iti ad-adu pay iti balikas ti Dios.
Mabalin a masdaaw ti sumagmamano a tattao no apay a saan nga ipakaammo ti Nailangitan nga Ama ti amin a banag kadatayo. Iti Alma 12:9–14, inlawlawag ni Alma ti maysa a posible a gapu. Makatulong dagitoy a saludsod kenka a mangutob no ania ti insurona:
-
Ania ti kaipapanan ti patangkenen dagiti pusoyo? Ania dagiti bunga ti kaadda iti natangken a puso? (kitaen met iti Alma 8:9–11; 9:5, 30–31; ken 10:6, 25).
-
Ania ti maaramidyo tapno maiturong ti pusoyo iti Dios? (kitaen iti Jeremiah 24:7; Alma 16:16; Helaman 3:35).
-
Ania ti maaramidyo tapno masigurado a “masarakan [kadakayo]” ti balikas ti Dios? (Alma12:13). No adda kadakayo ti balikas ti Dios, ania ti epekto daytoy kadagiti “balikas,” “aramid,” ken “panunotyo”? Alma 12:14
Ania ti padas ni Amulek nga isurona kadakayo maipapan kadagiti bendision ti kaadda iti nalukneng a puso? (kitaen iti Alma 10:1–11).
Kitaen met iti “Alma Warns Zeezrom” (video), Gospel Library.
Para iti ad-adu pay a kapanunotan, kitaen dagiti isyu ti Liahona ken Para iti Pigsa dagiti Agtutubo a magasin iti daytoy a bulan.
Dagiti kapanunotan para iti Panangisuro kadagiti Ubbing
Maibinglayko ti ebanghelio ni Jesucristo.
-
Ti panid ti aktibidad ita a lawas ti makatulong kadakayo a manggupgop kadagiti pasamak iti Alma 8–10 para kadagiti annakyo. Mabalin a kayatyo a tulongan ida a mangsapul kadagiti pagbatayan a namagbalin kada Alma ken Amulek a nasayaat a misionario. Kas pagarigan, saanda a simmuko (kitaen iti Alma 8:8–13), pinaneknekanda ni Cristo (kitaen iti Alma 9:26–27), ken nagtinnulongda (kitaen iti Alma 10:12).
-
Maysa a kanta maipapan iti aramid ti misionario “I Want to Be a Missionary Now” (Children’s Songbook, 168) ti makaited kadagiti annakyo kadagiti kapanunotan maipapan kadagiti wagas a pangibinglayan iti ebanghelio kadagiti gagayyemda. Allukoyenyo ida a mangilista kadagiti kapanunotan a masarakanda ken tattao a mabalin a pangibinglayanda iti ebanghelio. Mabalinyo pay a payakem kadakuada no ania ti mabalin nga isao wenno aramidenda.
Yallukoy ti pannakiraman. No agsaganakayo a mangisuro, imbes nga agpamplano kadagiti banag nga isao, saludsodenyo iti bagiyo, “ Anianto ti aramiden dagiti ubbing tapno masursuruan?” Masursuruanto a nasaysayaat dagiti ubbing ken napapaut ti pananglagipda no aktibo a makipasetda.
Plano ti Dios ti plano ti pannakasubbot.
-
Nalabit a mabalin nga idrowing dagiti annakyo ti maysa a ladawan a mangibagi kadagiti pagbatayan ti plano ti pannakasubbot kas iti Pannakatnag da Adan ken Eva, ti Pannubbot ni Jesucristo, panagbabawi, ipapatay, panagungar, ken panangukom. Kalpasanna, mabalinyo a tulongan ida a mangiparis kadagiti ladawanda kadagiti bersikulo iti Alma 11–12 a mangisuro maipapan kadagitoy a pagbatayan.
Makapagbalinak a maysa a nasayaat a gayyem.
-
Mabalinyo nga awisen ti maysa nga ubing nga agpammarang a ni Amulek ken ti sabali pay nga ubing nga agpammarang a ni Alma bayat ti panangisaritayo iti estoria iti Alma 8:18–22. Kasano a maysa a nasayaat a gayyem ni Amulek ken ni Alma? Kalpasanna mabalin nga ibinglay dagiti annakyo no kasano a nagbalin a gayyemda ti maysa a tao ken no kasano ti imparikna kadakuada dayta a padas.
-
Nalabit a mabalinyo ti agaramid iti puzzle ti panaggayyem: sapulen wenno idrowing ti maysa a ladawan a mangibagi iti panaggayyem ket gettengen daytoy kadagiti pedaso ti puzzle. Iti likud ti tunggal pedaso, mangisurat iti maysa a banag a mabalintayo nga aramiden tapno agbalintayo a nasayaat a gayyem, agraman dagiti banag nga inaramid da Alma ken Amulek. Mabalin nga agsisinnublat dagiti annakyo a mangpili iti maysa a pedaso ken inayon daytoy iti puzzle bayat ti panangbasayo iti naisurat iti likud daytoy. Asino ti agkasapulan iti pannakigayyemtayo?
Makapagbalintayo a nasayaat a gagayyem kadagiti dadduma.
Gapu ken ni Jesucristo, agungarakto.
-
Ibilang ti maysa nga adalen a banag a kas iti daytoy a mangisuro maipapan iti Panagungar: ti imayo ti mangibagi iti espirituyo, ken ti guantes ti mabalin a mangibagi iti bagiyo. Ikkatenyo ti imayo iti guantes tapno ipakita nga agsinanto dagiti espiritu ken bagitayo iti ipapatay. Kalpasanna isubliyo ti imayo iti guantes tapno ipakita nga agtiponto manen dagiti espiritu ken bagitayo iti Panagungar. Pagsisinnublatenyo dagiti annakyo a mangisuot kadagiti guantes ken mangikkat iti daytoy bayat ti panangibasayo iti Alma 11:43 kadakuada. I-display ti ladawan ti nagungar a Mangisalakan (kitaen iti Libro ti Arte ti Ebanghelio, num. 59), ken paneknekan nga inaramid ni Jesucristo a posible ti panagungar ti tunggal maysa.
Para iti ad-adu pay a kapanunotan, kitaen iti isyu ti Friend a magasin iti daytoy a bulan.
Ladawan ni Alma a mangmangan a kalanglangna ni Amulek, ni Dan Burr