Oktubre 21–27: “Awanen ti Naragragsak a Tao.” 3 Nephi 27–4 Nephi
Oktubre 21–27: ‘Awanen ti Naragragsak a Tao.’ 3 Nephi 27–4 Nephi,” Umaykayo, Sumurot Kaniak—Para iti Pagtaengan ken Simbaan: Libro ni Mormon 2024 (2023)
Nalablabes pay ngem iti napintas a pilosopia nga utoben dagiti pannursuro ni Jesucristo. Naisangratda a mangparegta kadatayo nga agbalin a kas Kenkuana. Ipakita ti libro ti 4 Nephi no kasano a naan-anay a mangbalbaliw ti ebanghelio ti Mangisalakan kadagiti tao. Kalpasan ti ababa a panagministro ni Jesus, naggibus ti sinigsiglo a panagsusupanget dagiti Nephite ken Lamanite. Ti dua a pagilian a naam-ammo gapu iti sinnuppiat ken pasindayag ket “nagsangsangkamaysada, dagiti annak ni Cristo” (4 Nephi 1:17), ket nangrugi nga addaanda iti “agpapada iti amin a banag” (4 Nephi 1:3). Gapu iti “ayat ti Dios … a nagnaed iti puso dagiti umili,” ket “pudno awanen ti naragragsak a tao kadagiti amin a tao a pinarsua ti Dios” (4 Nephi 1:15–16). Daytoy ti no kasano a binalbaliwan dagiti pannursuro ti Mangisalakan dagiti Nephite ken Lamanite. Kasano a mabalbaliwandakayo?
Dagiti Kapanunotan iti Panagsursuro iti Pagtaengan ken iti Simbaan
Ti Simbaan ni Jesucristo ket naawagan iti naganna.
Bayat ti panangrugi dagiti disipulo ti Mangisalakan a mangipasdek iti Simbaanna iti intero a daga, rimsua ti maysa a saludsod nga, iti dadduma, nalabit a kasla awan kaes-eskanna—ania ti nasken nga agbalin a nagan ti Simbaan? (kitaen iti 3 Nephi 27:1–3). Ania ti masursuroyo maipapan iti kapateg daytoy a nagan manipud iti sungbat ti Mangisalakan iti 3 Nephi 27:4–12?
Impalgak ti Mangisalakan ti nagan ti Simbaanna iti agdama iti Doktrina ken Katulagan 115:4. Utobenyo ti tunggal balikas iti dayta a nagan. Kasano a matulongannatayo dagitoy a balikas a mangammo no asinotayo, no ania ti patientayo, ken no kasano ti nasken a panagtignaytayo?
Kitaen met iti Russell M. Nelson, “The Correct Name of the Church,” Liahona, Nob. 2018, 87–89; “Jesus Christ Declares the Name of His Church and His Doctrine” (video), Gospel Library.
Nabangon ti Ti Simbaan ni Jesucristo iti ebangheliona.
Kalpasan ti panangilawlawag a nasken a ti Simbaanna ket “mabangon iti ebanghelio[na]” (3 Nephi 27:10), inladawan ti Mangisalakan no ania ti ebangheliona. Kasano ti pananggupgopyo iti no ania ti kinunana iti 3 Nephi 27:13–22? Maibatay iti daytoy a depinision, ania ti kayatna a sawen para iti Simbaan—ken para kadakayo—ti mabangon iti ebangheliona?
Isuratyo no ania dagiti masursuroyo. Kitaen no ania ti insuro ti Mangisalakan kadagiti disipulona iti 3 Nephi 27:23–26. Apay a napateg ti mangisurat kadagiti naespirituan a padpadas? Ania ti mariknayo a makaparegta nga agsurat bayat ti panangadalyo iti panangministro ti Mangisalakan iti 3 Nephi?
Ania koma ti sawenyo no saludsodennaka ti Mangisalakan, a kas iti panangsaludsodna kadagiti disipulona, “Ania ti tarigagayanyo kaniak?” (3 Nephi 28:1). Panunotenyo maipapan iti daytoy a saludsod bayat ti panangbasayo iti 3 Nephi 28:1–11. Ania ti masursurom maipanggep kadagiti tarigagay ti puspuso dagiti disipulo manipud kadagiti sungbatda iti saludsodna? Kasano nga agbaliwbaliw dagiti tarigagayyo bayat ti panagbiagyo iti ebanghelio ni Jesucristo?
Masansan a yebkas dagiti himno dagiti naimpusuan a tarigagay—“More Holiness Give Me” ti maysa a pagarigan (Hymns, no. 131). Ibilangyo ti panagsapul iti maysa a himno a mangyanninaw kadagiti tarigagayyo.
Ti Libro ni Mormon ti maysa a pagilasinan a maipatpatungpalen ti aramid ti Dios iti ud-udina nga aldaw.
Panunotenyo dagiti pagilasinan a mangipakaammo kadakayo nga addanto mapasamak. Kas pagarigan, kasano nga ammoyo nga umay ti tudo wenno agbaliwbaliw dagiti panawen? Segun iti 3 Nephi 29:1–3, kasano nga ammoyo a ti aramid ti Dios a mangummong kadagiti taona “mangrugin a maipatungpal”? (kitaen met iti 3 Nephi 21:1–7). Mabalinyo met a kitaen, iti 3 Nephi 29:4–9, dagiti banag nga ilibakto dagiti tao iti aldawtayo. Kasano a papigsaen ti Libro ni Mormon ti pammatiyo kadagitoy a banag?
Ti panangsurot kadagiti pannursuro ni Jesucristo ti mangiturong iti panagkaykaysa ken kinaragsak.
Ania koma ti kayarigan ti panagbiag kadagiti tawen kalpasan ti isasarungkar ti Mangisalakan? Bayat ti panagadalyo iti 4 Nephi 1:1–18, ibilang ti panangilista kadagiti bendision nga inawat dagiti tao. Mabalinyo pay a markaan wenno kitaen dagiti pili nga inaramidda a nakatulong a nangiturong iti daytoy naparaburan a biag. Ania ti insuro ni Jesus kadakuada a mabalin koma a nangparegta kadagiti nalinteg a pilida? Adtoy ti sumagmamano a pagarigan, ngem mabalin a makasarakkayo iti dadduma pay: 3 Nephi 11:28–30; 12:8–9, 21–24, 40–44; 13:19–21, 28–33; 14:12; 18:22–25.
Utobenyo no ania ti maaramidyo a makatulong iti pamilia, ward, wenno komunidadyo nga agbiag iti dakdakkel a panagkaykaysa ken ragsak. Ania ti maaramidyo tapno makatulong kadakuada a mangparmek kadagiti panagsisina ken pudno nga agbalin a “maymaysa” kadagiti dadduma nga annak ti Dios? Ania dagiti pannursuro ni Jesucristo a mangtulong kadakayo a mangipatungpal iti daytoy a panggep a tun-oyen?
Nakalidliday, a ti kagimongan a Zion a nailadawan iti 4 Nephi ket in-inut a natnag iti kinadangkes. Bayat ti panangbasayo iti 4 Nephi 1:19–49, sapulenyo dagiti galad ken kababalin a nanggibus iti kinaragsak ken panagkaykaysada. Ania ti maaramidyo a makatulong a mangliklik kadagitoy a kababalin wenno ugali?
Kitaen met iti Moises 7:18; D. Todd Christofferson, “Sustainable Societies,” Liahona, Nob. 2020, 32–35; Reyna I. Aburto, “With One Accord,” Liahona, Mayo 2018, 78–80; Gospel Topics, “Belonging in the Church of Jesus Christ,” Gospel Library.
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Tapno mayam-ammo ti kinapateg ti nagan ti Simbaan ni Jesus, makisarita kadagiti annakyo maipapan iti bukodda a nagan. Apay a napateg dagiti nagantayo? Kalpasanna mabalinyo a basaen ti 3 Nephi 27:3 nga aggigiddan, a mangsapsapul iti saludsod nga adda kadagiti disipulo ni Jesus. Tulonganyo dagiti annakyo a mangsapul iti sungbat iti 3 Nephi 27:5–8. Apay a napateg ti nagan ti Simbaan?
Mabalinyo pay a tulongan dagiti annakyo a mangpanunot kadagiti nadumaduma a grupo a nakaikamenganda, kas iti pamilia wenno klase iti Primary. Saludsodenyo kadakuada no ania ti kayatda maipapan iti pannakaikamengda iti tunggal grupo. Kalpasanna mabalinyo ti aggigiddan a mangkanta iti “The Church of Jesus Christ” (Children’s Songbook, 77), ket isarita maipapan dagiti gapu ti pagyamananda iti Simbaan ti Mangisalakan.
Nabangon ti Ti Simbaan ni Jesucristo iti ebangheliona.
Ginupgop ti Mangisalakan ti ebangheliona iti 3 Nephi 27. Mabalinyo nga ilawlawag kadagiti annakyo dayta a balikas nga ebanghelio kayatna a sawen ti “naimbag a damag.” Ania dagiti naimbag a damag a masarakantayo iti 3 Nephi 27:13–16? Usarenyo ti panid ti aktibidad iti daytoy a lawas a mangisuro a ti Simbaan ti Mangisalakan ket nabangon iti ebangheliona.
Agrag-o ti Nailangitan nga Ama no agsubli dagiti annakna Kenkuana.
Ibilang ti panagay-ayam iti maysa nga ay-ayam a paglemmengen ti maysa a tao ken padasen dagiti dadduma pay a miembro ti pamilia ti mangsapul kenkuana. Daytoy ti makaiturong iti saritaan maipapan iti rag-o a mariknatayo no masarakan ti maysa a tao a nayaw-awan. Kalpasan ti panangbasa iti 3 Nephi 27:30–31, mabalinyo ti agsarita maipapan iti no kasano ti panagtitinnulong nga agtalinaed a nasinged iti Nailangitan nga Ama tapno “awan … ti mapukaw.”
4 Nephi
Mangyeg kaniak ti rag-o ti panangsurotko ken ni Jesucristo.
Tapno matulonganyo dagiti annakyo a makasursuro maipapan iti kinaragsak dagiti tao a nailadawan iti 4 Nephi, mabalinyo nga ipakita kadakuada dagiti ladawan dagiti naragsak a tao. Kalpasanna, bayat ti aggigiddan a panangbasayo kadagiti bersikulo 2–3 ken 15–17 (wenno “Kapitulo 48: Kappia iti America,” Dagiti Estoria iti Libro ni Mormon, 136–37), mabalinda nga itudo dagiti ladawan no makadanonkakayo iti maysa a banag iti estoria a mangyeg iti ragsak.
Tapno matulonganyo dagiti annakyo a mangsanay iti naisursuro iti 4 Nephi 1:15–16, ipakitayo kadakuada dagiti situasion a panaggiginnura dagiti tao iti tunggal maysa. Awisem ida a mangyakem no ania ti mabalin a kayarigan ti situasion no addaantayo iti “ayat ti Dios” iti puspusotayo.
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
Ni Cristo a makisasao iti tallo a disipulo a Nephite
Ni Cristo ken dagiti Tallo a Disipulo a Nephite, ni Gary L. Kapp