Ni Moroni a Mangyab-ababa kadagiti Pinanid, ni Tom Lovell

Oktubre 28–Nobiembre 3: “Kayatko a Magutugotkayo Amin … nga Agbabawi”

Mormon 1–6

Saan nga insurat ni Mormon ti “sangabukel a pakaammuan” ti “nakaal-alingget a buya” ti kinadangkes ken panagpapatay a nakitana kadagiti Nephite (Mormon 2:18; 5:8). Ngem no ania ti insuratna iti Mormon 1–6 ket umdasen a mangipalagip kadatayo no kasano ti kapaut ti panagbalin a nadangkes dagiti nalinteg a tao. Iti baet ti kasta a napalalo a kinadangkes, awan maysa a makababalaw ken ni Mormon iti pannakabannogna ken kasta met iti pannakaupayna. Ngem babaen iti amin a nakita ken napadasanna, dina kaano man napukaw ti riknana iti naindaklan nga asi ti Dios ken ti natibker a pammatina a ti panagbabawi ket ti wagas a pangawatan iti daytoy. Ket nupay saan nga inawat dagiti bukod a tao ni Mormon ti agpakpakaasi nga awisna nga agbabawida, ammona nga adda dakdakkel nga ummong nga allukoyenna. “Adtoy,” impakdaarna, “agsuratak kadakayo amin nga adda iti igid ti daga.” Iti sabali a pannao, nagsurat kadakayo (kitaen iti Mormon 3:17–20). Ket ti mensahena kadakayo, iti agdama, ket ti isu met la a mensahe a nakaisalakanan koma dagiti Nephite iti panawenda: “Mamati iti ebanghelio ni Jesucristo. … “Agbabawi ken agsagana a dumatag iti pangukoman ni Cristo” (Mormon 3:21–22).

Kitaen met iti “Mormon Preserves the Record to Bring the House of Israel to Christ” (video), Gospel Library.

Dagiti Kapanunotan iti Panagsursuro iti Pagtaengan ken iti Simbaan

Mormon 1–6

Masurotko ni Jesucristo iti laksid ti no ania ti aramiden ti dadduma a tao.

Idi agarup 10 laeng ti tawenna, nakaskasdaaw a naiduma ni Mormon kadagiti tao iti aglawlawna. Bayat ti panangbasayo iti Mormon 1–6, agsapul kadagiti wagas a ti pammati ni Mormon ken ni Jesucristo ti namagbalin kenkuana a naidumduma ken nangted kenkuana kadagiti gundaway nga agserbi ken mangbendision kadagiti dadduma. Matulongannakayo a mangirugi dagiti sumaganad a bersikulo:

Mormon 1:2–3, 13–17.Ania dagiti pagdumaan ti madlawyo a nagbaetan ni Mormon ken dagiti taona? Ania dagiti kababalin nga adda kenkuana a nakatulong kenkuana nga agtalinaed a naespirituan a napigsa iti kasta a narigat a panawen?

Mormon 2:18–19.Ania dagiti inaramat ni Mormon a balikas a mangiladawan iti lubong a nagnaedanna? Kasano a napagtalinaedna ti namnama iti laksid ti aglawlawna?

Mormon 3:12.Kasano ti narikna ni Mormon maipapan kadagiti tao iti aglawlawna? Ania ti maaramidyo tapno mapadur-as ti kita ti ayat nga adda kenkuana?

Ania dagiti dadduma pay a bersikulo iti Mormon 1–6 ti mangted bugas iti pammati ni Mormon ken ni Jesucristo? Ania dagiti gundaway a naited kenkuana gapu ta pinilina ti agtalinaed a napudno?

Ibilang ti panangadal iti mensahe ni Presidente Thomas S. Monson a “Be an Example and a Light” (Liahona, Nob. 2015, 86–88), nga agsapsapul no apay a nasken a napateg wenno naiduma dagiti pasurot ni Jesucristo. Kasano nga ileppasyo dagiti binatog kas kadagitoy? “ ket maysa a pagwadan kaniak no isu ket . Nakatulong daytoy kaniak nga agtarigagay a .”

Mabalin a narikna ni Mormon a saan a makaipaay iti pagdumaan kadagiti taona ti pagwadanna. No adda gundawayyo a makisarita ken ni Mormon, ania koma ti ibagayo kenkuana maipapan no kasano a nakaaramid iti pagdumaan kadakayo ti pagwadanna?

Kitaen met iti David A. Bednar, “Quick to Observe,” Ensign, Dis. 2006, 30–36, wenno Liahona, Dis. 2006, 14–20; “Something Different about Us: Example” (video), Gospel Library; Gospel Topics, “Living the Gospel of Jesus Christ,” Gospel Library.

Tulonganyo dagiti dadduma a mangibinglay no ania ti masursuroda. No ibinglay dagiti tao ti nasursuroda, papigsaenda ti bukodda a pammati ken ti pammati dagiti dadduma (kitaen iti Doktrina ken Katulagan 88:122). Padasenyo a damagen iti pamilia wenno klaseyo no ania dagiti padasda bayat ti panangadalda iti balikas ti Dios.

Gubat, ni Jorge Cocco

Mormon 2:10–15

Ti nadiosan a panagleddaang ket mangiturong kaniak ken ni Cristo ken iti napaut a panagbalbaliw.

Idi nakita ni Mormon ti panagleddaang dagiti taona, ninamnamana nga agbabawida. Ngem “saan a panagbabawi ti pagledleddaanganda” (Mormon 2:13)—saan a daytoy ti kita ti nadiosan a panagleddaang ngem nailubongan a panagleddaang. Tapno maawatan ti pagdumaan, ibilangyo ti panangisurat iti no ania ti nasursuroyo manipud iti Mormon 2:10–15 iti maysa a tsart a kas iti daytoy:

Nadiosan a Panagleddaang	Nailubongan a Panagleddaang
Umay ken ni Jesus (bersikulo 14)	Mangilunod iti Dios (bersikulo 14)

Kasano ti pannakaammoyo no ti panagleddaangyo ket nadiosan wenno nailubongan? No mapaspasaranyo ti nailubongan a panagleddang, kasano a mabalbaliwanyo dayta iti nadiosan a panagleddaang?

Kitaen met iti 2 Taga Corinto 7:8–11; Michelle D. Craig, “Divine Discontent,” Liahona, Nob. 2018, 52–55.

Mormon 3:3, 9

“Dida naubog a ti Apo ti nangisalakan kadakuada.”

Napaliiw ni Mormon a saan a binigbig dagiti Nephite dagiti wagas a binendisionan ida ti Apo. Bayat ti panangbasayo iti Mormon 3:3, 9, mabalinyo nga utoben no kasano a bigbigbigenyo ti impluensia ti Dios iti biagyo. Ania dagiti bendision a sumangbay no bigbigenyo ti impluensiana? Ania dagiti bunga ti saan a panangbigbig Kenkuana? (kitaen iti Mormon 2:26; Doktrina ken Katulagan 59:21).

Kitaen met iti Henry B. Eyring, “O Remember, Remember,” Liahona, Nob. 2007, 66–69.

Mormon 5:8–24; 6:16–22

Agtakder ni Jesucristo a nakatanggaya dagiti takiagna a mangawat kaniak.

No mariknayo a naawanankayon iti namnama maipapan kadagiti bukodyo a basol, ti panangiladawan ni Mormon iti panagtakder ti Mangisalakan “a nakatanggaya dagiti takiagna nga umawat kadakayo” ket makaited iti pammatalged. Bayat ti panangbasayo iti Mormon 5:8–24 ken 6:16–22, ania ti masursuroyo maipapan iti rikna ti Nailangitan nga Ama ken ni Jesus kadakayo, uray no agbasolkayo? Kasano ti nariknayon a tultulongannakayo ni Jesucristo a nakatanggaya dagiti takiagna? Ania ti mariknayo a makaparegta nga aramiden kas bungana?

Kitaen met iti “Come unto Jesus,” Hymns, no. 117.

Dagiti Kapanunotan para iti Panangisuro kadagiti Ubbing

Mormon 1:1–3; 2:1, 23–24; 3:1–3, 12, 17–22

Kas ken ni Mormon, masurotko ni Jesucristo.

• Gapu ta ubing pay ni Mormon idi napadur-asna ti pammatina ken Cristo, mabalin nga isu ti agbalin nga inspirasion kadagiti annakyo. Nalabit a mabalinyo a basaen ti Mormon 1:1–3 ket mabalin a denggen dagiti annakyo no mano ti tawen ni Mormon idi nangted kenkuana ni Ammaron iti naisangsangayan a mision. Mabalinyo pay a tulongan ida a mangsapul kadagitoy a bersikulo dagiti kababalin a nakita ni Ammaron ken ni Mormon. Kasano a matulongannatayo dagitoy a kababalin a mangsurot ken ni Jesucristo?

  

  Mormon, Agtawen iti 10, ni Scott M. Snow

• Gapu ta sinurot ni Mormon ni Jesucristo, naikkan isuna kadagiti gundaway nga agserbi ken mangbendision iti dadduma. Mabalinyo nga awisen dagiti annakyo a mangbasa iti maysa kadagiti sumaganad a binatog ket tulonganyo ida a mangibinglay no ania ti masursuroda maipapan ken ni Mormon: Mormon 1:1–3; 2:1, 23–24; ken 3:1–3, 12, 20–22 (kitaen met iti “Chapter 49: Mormon and His Teachings,” Dagiti Estoria iti Libro ni Mormon, 138–42). Kasano a sinurotna ni Jesucristo? Kasano a nakatulong ti pammatina ken ni Jesucristo ken nangbendision kadagiti dadduma? Kasano a makatulong ti pammatitayo kadagiti tao nga am-ammotayo?

Mormon 2:8–15

Ti nadiosan a panagleddaang ti mangiturong kaniak ken ni Cristo ken iti napaut a panagbalbaliw.

• Nalabit mabalinyo ti agaramid iti tsart a kas iti adda iti “Dagiti Kapanunotan iti Panagsursuro iti Pagtaengan ken iti Simbaan” tapno matulongan dagiti annakyo a makaawat iti pagdumaan ti nailubongan ken nadiosan a panagleddaang bayat ti panagbasada iti Mormon 2:8, 10–15. Kalpasanna mabalinda pay ti mangsukisok iti Mormon 2:12 tapno mangsapul kadagiti rason no apay a ti panagbabawi ti nasken a mangaramid “a naragsak … dagiti puso[tayo]” Kasano a masiguradotayo a ti panagleddaang a mariknatayo gapu kadagiti basoltayo ket mangiturong kadatayo nga agpatulong iti Dios nga agbalbaliw?

Mormon 3:3, 9

Ikkannak ti Nailangitan nga Ama iti adu a bendision.

• Ti panangawis kadagiti annakyo a mangilista (wenno mangidrowing kadagiti ladawan) ti sumagmamano a banag a pagyamyamanda ket mabalin a nasayaat a wagas a tumulong kadakuada a makarikna iti panagyaman iti Dios. Kalpasan ti panangaramidda iti listaan, mabalinyo a basaen ti Mormon 3:3, 9 ken ilawlawag a binendisionan met ti Nailangitan nga Ama dagiti Nephite, ngem saanda a binigbig daytoy. Ania ti mabalintayo nga aramiden a mangipakita nga agyamantayo iti Nailangitan nga Ama kadagiti bendisiontayo?

Mormon 3:12

Kayat ti Nailangitan nga Ama nga ayatek ti tunggal maysa.

• Uray no nadangkes dagiti Nephite, saan a pulos a nagsardeng ni Mormon nga ayaten ida. Tulonganyo dagiti annakyo a mangsapul kadagiti balikas a “naayat” ken “ayat” iti Mormon 3:12. Aggigiddan nga agkansion iti maysa a kanta maipapan iti panagayat kadagiti dadduma, kas iti “Jesus Said Love Everyone” (Children’s Songbook, 61), bayat ti panangipakitayo kadagiti ladawan dagiti ubbing manipud iti amin a suli ti lubong. Paneknekan maipapan iti ayat ti Dios para kadagiti amin nga annakna.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Naisurat ti Libro ni Mormon “tapno mamatikayo iti ebanghelio ni Jesucristo” (Mormon 3:21).