Dagiti Jaredite a Pumampanaw iti Babel, ni Albin Veselka

Nobiembre 11–17: “Ray-abenyo Dayta Belo ti Kaawan ti Pammati”

Ether 1–5

Idinto a pudno a nangatngato dagiti wagas ti Dios ngem dagiti wagastayo ken nasken a tungpalentayo a kanayon ti pagayatanna, allukoyennatayo pay nga agpanunot ken agtignay para iti bagbagitayo. Dayta ti maysa a leksion a nasursuro ni Jared ken ti kabsatna. Kas pagarigan, ti kapanunotan iti panagdaliasat iti baro a daga a “naisalsalumina iti amin a daga” kasla nangrugin ken ni Jared, ket pinatgan ti Apo ti kiddaw, a kunkunana iti kabsat ni Jared, “Ket kasta ti aramidek kenka gapu iti daytoy naunday a panawen a yaararawmo kaniak” (kitaen iti Ether 1:38–43). Ket idi kasapulan ti kabsat ni Jared ti silaw iti uneg dagiti bilog a mangipan kadakuada iti naikari a daga, nagdamag ti Apo iti saludsod a masansan a saludsodentayo Kenkuana:Ania ti kayatmo nga aramidek?” (Ether 2:23). Kayatna a denggen dagiti kapanunotan ken pampanunotentayo, ket dumngegto ken itednanto ti pammasingkedna wenno bagbagaannatayo ketdi. No dadduma ti maysa laeng a banag a mangisina kadatayo kadagiti bendision a birbirokentayo ket ti bukodtayo a “belo ti kinaawan ti pammati,” ket no mabalintayo a “ray-aben dayta a belo” (Ether 4:15), mabalin a maklaattayo iti no ania ti pagayatan ti Apo nga aramiden para kadatayo.

Kitaen met iti “The Lord Appears to the Brother of Jared” (video), Gospel Library.

Dagiti Kapanunotan iti Panagsursuro iti Pagtaengan ken iti Simbaan

Ether 1:33–43

Bayat ti panangyararawko iti Apo, maaddaanto iti asi kaniak.

Isarita tiEther 1:33–43 ti tallo a kararag ti kabsat ni Jared. Ania ti masursuroyo manipud iti sungbat ti Apo iti tunggal kararag? Mangpanunotkayo iti maysa a panawen idi napadasanyo ti kaasi ti Apo idi immararawkayo Kenkuana iti kararag. Mabalinyo nga isurat daytoy a padas ket ibinglay daytoy iti maysa a tao a mabalin nga agkasapulan a dumngeg iti pammaneknekyo.

Kitaen met iti “Secret Prayer,” Hymns, no. 144.

Ether 2; 3:1–6; 4:7–15

Makaawatak iti paltiing para iti biagko.

Kinuna ni Presidente Russell M. Nelson: “Ipakaasik kadakayo a padur-asenyo koma ti naespirituan a kabaelanyo nga umawat iti paltiing. … Pilienyo nga aramiden ti naespirituan a trabaho a kasapulan tapno masagrap ti sagut ti Espiritu Santo ken mangngegan ti timek ti Espiritu nga ad-adda a masansan ken nalawlawag” (“Revelation for the Church, Revelation for Our Lives,” Liahona, Mayo 2018, 96).

Bayat ti panangadalyo iti Ether 2; 3:1–6; 4:7–15, ania ti masursuroyo maipapan iti “naespirituan nga aramid” a sinarita ni Presidente Nelson? Mabalinyo a markaan iti maysa a maris dagiti saludsod wenno pakaseknan nga adda iti kabsat ni Jared ken no ania ti inaramidna maipapan kadagitoy, ken iti sabali a maris mabalinyo a markaan no kasano a tinulongan isuna ti Apo ken ti panangipakaammona iti pagayatanna.

Adtoy dagiti sumagmamano a saludsod nga utoben bayat ti panangadalyo:

• Ania ti nakaawis iti riknayo maipapan ti wagas a panangsungbat ti Apo kadagiti saludsod ti kabsat ni Jared iti Ether 2:18–25?

• Kasano a mausaryo ti Ether 3:1–5 a mangtulong iti maysa a tao nga agsursuro no kasano ti agkararag?

• Ania ti manglapped kadakayo iti panangawatyo iti paltiing manipud iti Apo? (kitaen iti Ether 4:8–10). Kasano a masansan nga umawatkayo iti paltiing manipud Kenkuana? Ether 4:7, 11–15).

• Ania iti panagkunayo a kayat a sawen ti “ray-aben ti belo ti kinaawan ti pammati” iti biagyo (Ether 4:15).

Ania pay ti masursuroyo manipud iti kabsat ni Jared maipapan iti bukod a paltiing?

Insuro ni Elder Dale G. Renlund maipapan iti “A Framework for Personal Revelation” (Liahona, Nob. 2022, 16–19). Ibilang ti panagdrowing iti kuadro ti ladawan ken panangisurat iti uppat nga elemento ti balangkas iti tunggal sikigan. Kasano a matulongannakayo daytoy a balangkas a “mangpadakkel iti kabaelanyo nga umawat iti paltiing”?

Gospel Topics, “Personal Revelation,” Gospel Library.

Ether 2:14–15; 3:1–20

Babaen ti panangdusana, awisennatayo ti Apo nga agbabawi ken umasideg Kenkuana.

Nasken a dusaen ti Apo uray ti maysa a naindaklan a propeta a kas iti kabsat ni Jared. Ania ti masursuroyo manipud iti Ether 2:14–15 maipanggep iti panangdusa ti Apo? Panunotenyo no kasano a ti panangdusa ti Apo ken ti sungbat ti kabsat ni Jared ket mabalin a nakatulong a nangisagana kenkuana para kadagiti padasna iiti Ether 3:1–20.

Ether 2:16–25

Isagananakto ti Apo a mangballasiw iti daytoy “dakkel a taawko.”

No dadduma, ti panangballasiw iti “dakkel a taaw” ti kakaisuna laeng a wagas a pakaitungpalan iti pagayatan ti Dios para kadatayo. Adda kadi makitayo a pangipadaan iti biagyo iti Ether 2:16–25? Kasano nga insagananakayo ti Apo para kadagiti karityo? Ania ti idawdawatna nga aramidenyo ita nga agsagana para iti no ania ti kasapulan nga ipaaramidna kadakayo iti masakbayan?

Kitaen met iti L. Todd Budge, “Consistent and Resilient Trust,” Liahona, Nob. 2019, 47–49.

Yaplikaryo no ania ti masursuroyo. Ti panagadal iti ebanghelio ti mangparegta koma kadatayo a mangbalbaliw iti biagtayo. Kalpasan ti panangbasa iti Ether 4:11–12, mabalinyo nga ilista ti sumagmamano kadagiti impluensia iti biagyo ket ibilangyo no allukoyendakayo nga agaramid iti naimbag. Ania dagiti panagbalbaliw a mariknayo a makaparegta nga aramidenyo?

Ether 5

Paneknekan dagiti saksi maipanggep iti kinapudno ti Libro ni Mormon.

Bayat ti panagbasayo iti padto ni Moroni iti Ether 5, utobenyo ti panggep ti Apo iti panangisagana iti adu a saksi ti Libro ni Mormon. Ania dagiti saksi a nangparegta kadakayo a mamati a ti Libro ni Mormon ti balikas ti Dios? Kasano nga impakita kadakayo ti Libro ni Mormon “ti bileg ti Dios ken kasta met ti balikasna”? (Ether 5:4).

Dagiti Kapanunotan para iti Panangisuro kadagiti Ubbing

Ether 1:33–37; 2:16–25; 3:1–6

Denggen ken sungbatan ti Nailangitan nga Ama dagiti kararagko.

• No ammoyo ti pagsasao a saan nga ammo dagiti annakyo, ikkanyo ida iti sumagmamano a simple a direksion iti dayta a pagsasao (wenno ipatokar ti recording ti sabali a pagsasao). Mabalinyo nga usaren daytoy a mangilawlawag no apay a nagkararag ti kabsat ni Jared iti tulong iti Ether 1:33–37. Yunay-unay no kasano ti narikna ti Apo maipapan iti daytoy a kararag ken no kasano ti sungbatna (kitaen met iti “Kapitulo 50: Pumanaw dagiti Zoramite iti Babel,” Dagiti Estoria iti Libro ni Mormon, 143–44).

• Awisem dagiti ubbing nga agpammarang nga agaramidda iti maysa a bilog, kas iti nailadawan iti Ether 2:16–17. Kalpasanna, mabasayo ken dagiti annakyo ti maipapan kadagiti parikut dagiti Jaredite kadagiti bilogda (kitaen iti Ether 2:19) Ether 2:19–25; 3:1–6). Makatulong kadakayo ken kadagiti annakyo ti ladawan ken panid ti aktibidad iti udi daytoy a balabala tapno mangisarita iti estoria. Ania ti masursurotayo manipud iti kabsat ni Jared maipapan iti kararag? Ibilangyo ti panangibinglay ti maysa a padas idi nagkararagkayo para iti tulong ket tinulongannakayo ti Nailangitan nga Ama.

Ether 3:6–16

Naparsuaak iti ladawan ti Dios.

• Bayat ti panagdakkelda, maipasangonto dagiti annakyo iti adu a palso a mensahe maipapan iti Dios, isuda mismo, ken iti pisikal a bagida. Mabalinyo ti agpatulong kadakuada a mangbirok kadagiti kinapudno maipapan kadagitoy a topiko iti Ether 3:6–16. Tapno mangyunay-unay iti kinapudno iti Ether 3:13, 15, mabalinyo nga aggigiddan a kitaen ti ladawan ti Mangisalakan ket awisenyo dagiti annakyo a mangitudo kadagiti nadumaduma a paset ti bagina. Kalpasanna mabalinda ti mangitudo kadagiti kapada met la a paset dagiti bukodda a bagi. Aggigiddan nga agkansion iti maysa a kanta a mainaig kadagiti bagida, kas iti “The Lord Gave Me a Temple” (Children’s Songbook, 153). Mabalin a pagsasaritaanyo kadagiti annakyo maipapan no apay nga agyamankayo para kadagiti bagiyo.

Naparsuatayo iti ladawan ti Dios

Ether 5

Tallo a saksi ti nangpaneknek iti Libro ni Mormon.

• Impadto ni Moroni a makatulong dagiti Tallo a Saksi a mangipasdek iti kinapudno ti Libro ni Mormon. Tapno maisuro no ania ti maysa a saksi, mabalinyo a kiddawen kadagiti annakyo nga iladawanda ti maysa a banag a nakitada wenno napadasanda a saan a nakita wenno napadasan dagiti dadduma. Kalpasanna bayat ti panangbasayo iti Ether 5 nga aggigiddan, pagsasaritaanyo no apay nga agusar ti Apo kadagiti saksi iti aramidna. Mabalinyo pay nga ibinglay iti tunggal maysa no kasano nga ammoyo a pudno ti Libro ni Mormon ken no kasano a maibinglayyo ti panagsaksiyo kadagiti dadduma.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ad-adu Kadi ti Nakitam Ngem iti Daytoy?, ni Marcus Alan Vincent