Ginasgasut a tawen kalpasan ti pannakadadael dagiti Jaredite, natakuatan dagiti Nephite dagiti nabati [ruins] ti nagkauna a sibilisasionda. Maibilang kadagitoy a nabati ket maysa a datdatlag a kasuratan—dagiti pinanid ti “puro a balitok” a “napno iti kitikit” ket dagiti Nephite “saan a marukod ti tarigagayda” a mangbasa iti daytoy (Mosiah 8:9; 28:12). Iti agdama addaankayo iti pannakayababa daytoy a kasuratan, ken maaw-awagan daytoy iti libro ni Ether. Idi binasa dagiti Nephite daytoy, “napnoda iti ladingit” idi maammuanda ti nakalkaldaang a pannakatnag dagiti Jaredite. “Nupay kasta naikkanda iti nawada a pannakaammo, ket iti dayta nagrag-oda” (Mosiah 28:12, 18). Mabalin a makasarakkayo met kadagiti nakalkaldaang a kanito iti daytoy a libro. Ngem makapagrag-okayo pay iti daytoy a sagut ti pannakaammo. Insurat ni Moroni, “nabilinak a mangisurat kadagitoy a banag, tapno mapapanaw ti dakes, ken tapno dumteng ti panawen nga awanton ti bileg ni Satanas iti puspuso dagiti annak ti tattao” (Ether 8:26).
Dagiti Kapanunotan iti Panagsursuro iti Pagtaengan ken iti Simbaan
Tarabayennakto ti Apo iti panagdaliasatko iti biag.
Masarakanyo dagiti naespirituan a nalawag a pannakaammo ken pannakaawat no idasigyo ti panagdaliasat dagiti Jaredite iti taaw iti panagdaliasatyo iti biag. Kas pagarigan, ania ti impaay ti Apo a nangsilaw iti dalanyo kas kadagiti bato kadagiti bilog dagiti Jaredite? Ania ti mabalin nga ibagi dagiti bilog, wenno dagiti angin a “nangipugso nga agturong iti naikari a daga”? (Ether 6:8). Ania ti masursuroyo manipud kadagiti tignay dagiti Jaredite kasakbayan, kabayatan, ken kalpasan ti panagdaliasat? Kasano nga idaldalannakayo ti Apo nga agturong iti naikari a daga?
“Agkanta iti panagdaydayaw iti Apo.” Inyebkas dagiti Jaredite ti panagyamanda ken panagayatda iti Dios babaen ti kanta ken panagdayaw (kitaen iti Ether 6:9). Mabalinyo ti agsapul wenno mangparnuay kadagiti gundaway a mangusar iti musika ken naimpusuan a pammaneknek a mangdayaw iti Dios iti pagtaengan ken iti simbaan. Kas pagarigan, mabalin a maitutop ti agkanta iti himno ti pammadayaw a kas iti “Praise the Lord with Heart and Voice” (Hymns, no. 73) no agad-adal iti Ether 6:1–12.
Numan pay kasla rimbawan ti kinatangig ken kinadangkes ti pakasaritaan dagiti Jaredite, adda met dagiti pagarigan ti kinapakumbaba kadagitoy a kapitulo—nangnangruna iti Ether 6:5–18, 30; 9:28–35; ken 10:1–2. Ti panangutob kadagiti sumaganad a saludsod ket makatulong kadakayo a makasursuro manipud kadagitoy a pagarigan: Apay nga impakumbaba dagitoy a Jaredite ti bagbagida kadagitoy a situasion? Kasano nga impakitada ti panagpakumbabada? Kasano a binendisionan ti Dios ida kas bungana? Ibilangyo no ania ti maaramidyo a sitatallugod a “magna a sipapakumbaba iti sango ti Apo” (Ether 6:17) imbes a mapilpilit nga agbalin a napakumbaba (kitaen iti Mosiah 4:11–12; Alma 32:14–18).
Kitaen met iti Dale G. Renlund, “Do Justly, Love Mercy, and Walk Humbly with God,” Liahona, Nob. 2020, 109–12.
Makapagbalinak a kas maysa a lider a kas ken ni Cristo.
Dagiti kapitulo 7–11 ti Ether ket mangsakup iti 28 a kaputotan. Numan pay awan unay ti adu a detalye a maited iti kasta a kabassitna nga espasio, maysa a pagtuladan ti alisto nga agtaud maipapan kadagiti bunga ti nalinteg a ken nadangkes a panangidaulo. Ania ti masursuroyo maipapan iti panangidaulo manipud kadagiti pagarigan—negatibo ken positibo—dagiti ari a nailista iti baba?
Nangted ni Dieter F. Uchtdorf iti makatulong a balakad maipapan iti panangidaulo iti mensahena, “The Greatest among You,” (Liahona, Mayo 2017, 78–81). Ibilangyo ti panangadal iti daytoy a mensahe—nangruna dagiti estoria nga isaritana —a mangsapsapul kadagiti pagbatayan wenno pagtuladan ti panangidaulo a kas ken Cristo. Kaano a nakitayon dagitoy a pagbatayan wenno pagtuladan a naipakita kadagiti tao a mangidaulo?
Bayat ti panangutobyo iti nasursuroyo, panunoten ti maipapan kadagiti gundaway a mabalin nga adda kadakayo a mangidaulo wenno mangimpluensia iti dadduma iti pagtaengan, komunidad, callingyo iti Simbaan, ken dadduma pay. Kasano a mapadur-astayo dagitoy a kababalin ti panangidaulo a kas ken ni Cristo, uray pay no awanankayo iti naituding nga aramiden iti panangidaulo?
Kitaen met iti Gospel Topics, “Serving in Church Callings,” Gospel Library; “Principles of Leadership in the Church,” General Handbook: Serving in The Church of Jesus Christ of Latter-day Saints, 4.2 (ChurchofJesusChrist.org).
No agkumplot dagiti tao tapno mangipatungpal a nalimed kadagiti nadangkes nga aramidda, mairamanda iti nalimed a kinnunsabo. Kas nayon iti nalimed a kinnunsabo a nailadawan iti Ether 8:7–18, masarakan ti dadduma pay a pagarigan iti Helaman 1:9–12; 2:2–11; 6:16–30; Moises 5:29–33. Ibilangyo ti panangidilig kadagitoy a bersikulo iti 2 Nephi 26:22–24, a ditoy nga inladawan ni Nephi no kasano nga aramiden ti Apo ti trabahona. Apay iti panagkunayo a nabilin ni Moroni a mangisurat iti inaramidna maipapan iti nalimed a kinnunsabo?
Ania ti nasursuroyo manipud iti libro ni Ether a makatulong kadakayo a manggun-od kadagiti bendision a nailadawan iti Ether 8:26?
Dagiti Kapanunotan para iti Panangisuro kadagiti Ubbing
Makapagtalekak iti Nailangitan nga Ama a mangliwliwa kaniak no mabutengak.
Addaan iti tunggal maysa iti naririgat nga aldaw—uray dagiti babassit nga ubbing. Nalabit a matulonganyo dagiti annakyo a mangsarak kadagiti balikas ken ragup ti balikas iti Ether 6:1–12 a mangipakita no kasano a nagtalek dagiti Jaredite iti Dios bayat ti sumagmamano a narigat ken nakabutbuteng nga aldaw. Ibilangyo ti panagbibinninglay iti sumagmamano a padpadas idi tinulongannakayo ti Dios kabayatan dagiti naririgat a panawen iti biagyo.
Mangisangbay iti panagyaman ken kappia ti pananglagip no ania iti inaramid ti Apo.
Kalpasan ti natalged nga isasangpetda iti naikari a daga, nagyaman unay dagiti Jaredite ta “nagarubos ti luada iti ragsakda” (Ether 6:12). Mabalin a maparegtayo dagiti annakyo a makarikna iti panagyaman kadagiti bendision ti Dios babaen ti panangtulongyo kadakuada a mangbirok kadagiti ragup ti balikas manipud iti Ether 6:9, 12 a mangipakita no kasano nga inyebkas dagiti Jaredite ti panagyamanda iti Dios. Mabalin a magustuanda ti panangkanta, kas iti inaramid dagiti Jaredite, iti maysa a kanta a mangipeksa iti panagyaman, kas iti “My Heavenly Father Loves Me” (Children’s Songbook, 195). Kiddawenyo kadagiti annakyo a mangibaga kadakayo iti sumagmamano a banag a pagyamananda.
Nalabit a mabalin dagiti annakyo ti mangbasa iti Ether 6:30; 7:27; ken 10:2 ket mangsarak no ania ti nalagip dagitoy nalilinteg nga ari. Kasano nga inapektuan daytoy ti wagas a panangidauloda kadagiti taoda? Mabalinyo ken dagiti annakyo a pagsasaritaan dagiti wagas a mangipalagip iti bagiyo no ania ti inaramid ti Dios para kadakayo. Kas pagarigan, nalabit a mabalinda ti agsurat maipapan iti daytoy wenno agdrowing kadagiti ladawan. Mabalin nga isingasingyo nga ipaugalida ti panangisurat kadagiti bendision a makitada manipud iti Dios (kitaen iti “O Remember, Remember” [video], Gospel Library).
Nalabit a magustuanyo ken dagiti annakyo ti panangyakem iti sumagmamano a banag nga insuro dagiti propeta nga aramidentayo. Mabalinyo pay ketdi a pagbalinen daytoy iti ay-ayam a pangpugtuanyo no ania ti ibagi dagiti tignay. Daytoy ti mabalin a mangisagana kadagiti annakyo a mangilawlawag no apay a napateg ti panangsurot iti propeta ti Dios. Kalpasanna mabalinyo a basaen ti Ether 7:24–27 tapno maammuan no ania ti napasamak idi nagtulnog dagiti tao iti propeta ti Dios. Kasano a mabendisionantayo babaen ti panangsurot iti propeta iti agdama?
Ti panagsapul kadagiti pagtuladan ket maysa a makatulong a paglaingan iti panagadal iti nasantuan a kasuratan. Naglaon ti libro ti Ether iti maulit-ulit a pagtuladan a mangyunay-unay iti asi ti Apo. Tapno matulongan dagiti annakyo a makasarak iti daytoy a pagtuladan, awisenyo ida a mangbasa iti Ether 9:28–35 ken Ether 11:5–8, nga agsapsapul kadagiti pagpapadaan ti dua a pakaammuan. Ania ti masursurotayo manipud kadagitoy nga estoria? Nalabit a mabalinda ti agsapul kadagiti ladawan iti Libro ti Arte ti Ebanghelio dagiti dadduma a tao kadagiti nasantuan a kasuratan a nagbabawi ken napakawan.
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
dagiti bilog dagiti Jaredite iti baybay
Dagiti Bilog dagiti Jaredite, ni Gary Ernest Smith