Ni Ether nga Aglemlemmeng iti Abut ti Dakkel a Bato, ni Gary Ernest Smith

Nobiembre 25–Disiembre 1: “Babaen ti Pammati Maipatungpal ti Amin a Banag”

Ether 12–15

Dagiti padto ni Ether kadagiti Jaredite ket “naindaklan ken datdatlag” (Ether 12:5). “Imbagana kadakuada amin a banag, manipud iti punganay ti tao” (Ether 13:2). Nakitana “dagiti aldaw ni Cristo” ken ti Baro a Jerusalem iti ud-udina nga aldaw (Ether 13:4). Ket insaona ti “namnama iti nasaysayaat a lubong, wen, uray pay iti lugar iti makanawan ti Dios” (Ether 12:4). Ngem sinupring dagiti Jaredite dagiti balikasna, iti isu met laeng a gapu masansan a supringen dagiti tao dagiti padto dagiti katulongan ti Dios iti agdama—“gapu ta dida ida [nakita]” (Ether 12:5). Kasapulan ti pammati tapno mamati kadagiti kari wenno ballaag maipapan iti bambanag a ditayo makita, a kas iti pannakasapul ni Ether iti pammati tapno agipadto maipapan “dagiti naindaklan ken datdatlag a banag” kadagiti di mamatpati a tao. Kinasapulan ni Moroni ti pammati nga agtalek a mabalin nga alaen ti Apo ti “kinakapsutna nga agsurat” ket aramidenna daytoy a pagpigsaanna (kitaen iti Ether 12:23–27). Isu daytoy ti kita ti pammati a mamagbalin kadatayo a “saan nga agduadua ken natibker, a kanayon a mangsursurot kadagiti naimbag nga aramid, ta naibagnos a mangigloria iti Dios” (Ether 12:4). Ken daytoy ti kita ti pammati a babaen itoy “mapasamak amin a banag” (Ether 12:3).

Dagiti Kapanunotan iti Panagsursuro iti Pagtaengan ken iti Simbaan

Ether 12

Makaiturong ti pammati ken ni Jesucristo kadagiti milagro.

Gagangay ita, kas idi aldaw ni Ether, a kayat dagiti tattao ti makakita iti pakakitaan sakbay a mamatida iti Dios ken iti bilegna. Ania ti masursurotayo manipud iti Ether 12:5–6 maipapan iti daytoy a kapanunotan?

Bayat ti panangbasayo iti Ether 12, mabalinyo nga isurat ti tunggal gundaway a masarakanyo ti balikas a “pammati.” Panunoten no ania ti isuro ti tunggal pagarigan maipapan iti pammati. Mabalin a makatulong dagiti saludsod a kas kadagitoy: Ania ti pammati? Ania ti kayat a sawen ti aramaten ti pammati? Ania dagiti bunga ti pammati ken ni Jesucristo? Mabalinmo pay nga isurat dagiti kapanunotanyo maipanggep kadagiti saksi a nagun-odyo “kalpasan ti pannakasuot ti pammatiyo” (Ether 12:6).

Kitaen iti Russell M. Nelson, “Christ Is Risen; Faith in Him Will Move Mountains,” Liahona, Mayo 2021, 101–4.

Pagbibinninglayem dagiti dadduma, ken no dadduma pangisuruem ida. Kasayaatan ti panagsursuro dagiti tao no adda gundawayda a mangibinglay iti masursuroda wenno uray pay mangisuroda iti pormal a kasasaad. Iti pagtaengan man wenno iti simbaan, ibilangyo ti panangpalugod kadagiti dadduma, agraman dagiti agtutubo, tapno mangisuro iti maysa a paset ti adalen.

Ether 12:1–9, 28, 32

Mangted kadatayo ni Jesucristo iti “nabilbileg a namnama.”

Kas nayon dagiti nauneg a nalawag a pannakaammo ken pannakaawat maipapan iti pammati, aduan met ti Ether 12 iti maisao maipapan iti namnama. Agpatarabaykayo kadagitoy a saludsod iti panagadalyo:

• Ania dagiti gapu ken ni Ether tapno “mangnamnama iti nasaysayaat a lubong” (kitaen iti Ether 12:2–5).

• Ania ti panggep ti maysa nga angkla? Ania ti aramiden ti namnama iti kararuayo nga umasping iti ar-aramiden ti angkla para iti bilog? Ether 12:4).

• Ania ti nasken a namnamaentayo? (kitaen iti Ether 12:4; Moroni 7:41).

• Kasano a nangted kadakayo ti ebanghelio ni Jesucristo iti “nabilbileg a namnama”? (Ether 12:32).

Kitaen met iti Moroni 7:40–41; Jeffrey R. Holland, “A Perfect Brightness of Hope,” Liahona, Mayo 2020, 81–84.

Ether 12:23–29

Mapagbalin ni Jesucristo ti pagkapsutak a pagpigsaak.

No basaentayo dagiti nabileg a sinurat ni Moroni, nalaka a lipaten a nariribukan isuna maipanggep iti “kinakapsutna nga agsurat” ket nagamak a laisento dagiti tao dagiti balikasna (kitaen iti Ether 12:23–25). No nariknayon ti panagdanag maipapan iti bukodyo a pagkapsutan, basaenyo maipapan kadagiti pannakidangadang ni Moroni—ken ti sungbat ti Mangisalakan—iti Ether 12:23–29. Mabalinyo pay nga utoben dagiti panawen idi tinulongannakayo ti Apo a mangbigbig kadagiti pagkapsutanyo ket pinatibkernakayo—nupay saanna a naan-anay nga inikkat dagitoy. Kasta met a panunotenyo maipapan dagiti pagkapsutan a pagrigrigatanyo iti agdama. Ania ti nasken nga aramidenyo tapno umawat iti kari ti Mangisalakan nga “aramiden a napigsa kadakuada dagiti nakapsut a banag”? (Ether 12:27).

Ibilang ti panangsukisok kadagiti sumaganad a binatog tapno makita no kasano a nagun-od dagiti dadduma ti pigsa kadagiti nasantuan a kasuratan babaen ti parabur ni Jesucristo:

• Enoc (Moises 6:31–34; 7:13)

• Moises (Exodo 4:10–12; 14:31)

• Gideon (Uk-ukom 6:12–16; 8:22–23)

• Pedro(Lucas 5:8–10; 22:55–62; Dagiti Aramid 4:13–21)

• Moroni (Ether 12:23–29)

• Joseph Smith (Joseph Smith—Pakasaritaan 1:28; Doktrina ken Katulagan 35:17; 135:3)

Kitaen met iti Gospel Topics, “Grace,” Gospel Library; “The Lord Is My Light,” Hymns, no. 89.

Ether 13:13–22; 14–15

Mangyeg kaniak iti naespirituan a peggad ti saan a panangawat kadagiti propeta ti Apo.

Ti panagbalin nga ari dagiti Jaredite, iti pakasaritaan, ket maysa a napeggad a posision. Nangnangruna a pudno daytoy para ken ni Coriantumr, ta adu a “maingel a lallaki … ti nagpanggep a mangdadael kenkuana” (Ether 13:15–16). Iti Ether 13:15–22, kitaen no ania ti inaramid ni Coriantumr a mangsalaknib iti bagina ken no ania ti imbalakad ni propeta Ether nga aramidenna ketdi. Bayat ti panagbasayo iti dadduma pay iti libro ni Ether, utobenyo dagiti bunga ti saan a panangawat kadagiti propeta. Ania ti mapasamak kadagiti tao no “[isardeng] ti Espiritu ti Apo ti mangtarabay kadakuada”? (Ether 15:19). Ania ti mabalin a tarigagayan ti Apo a masursurotayo manipud kadagitoy a pakaammuan? Ibilangyo no anianto ti aramidem a mangsurot kadagiti propetana.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Ether 12:6–22

Ti pammati ket panangpati kadagiti banag a ditayo makita.

• Ibilang ti panangtulong kadagiti annakyo a mangulit kadakayo ti “Ti pammati ket dagiti bambanag a namnamaen ken saan a makita” manipud iti Ether 12:6. Mabalin a magustuanda ti panangbuya kadagiti ladawan a mangipakita kadagiti pagarigan ti pammati iti Ether 12:13–15, 19–21 (kitaen iti Libro ti Arte ti Ebanghelio, nos. 78, 85, ken panid ti aktibidad itoy a lawas). Pailawlawag kadagiti annakyo no ania ti ammoda maipapan iti tunggal estoria. Adtoy dagiti sumagmamano a saludsod a makatulong kadakayo a mangilawawag kadagitoy a pagarigan ti pammati:

  • Ania ti ninamnama dagitoy a tao?

  • Kasano a nasubok ti pammatida?

  • Ania ti napasamak gapu iti pammatida?

  Mabalinyo pay nga ibinglay dagiti bukodyo a padas iti panangaramat iti pammati.

Ether 12:4, 32

Ti namnama kasla maysa nga angkla iti kararuak.

• Tapno maawatan no ania ti isuro ti Ether 12:4 maipapan iti namnama, mabalinyo ken dagiti annakyo ti mangsapul iti ladawan ti maysa a bilog ken maysa nga angkla. Apay a kasapulan dagiti bilog dagiti angkla? Ania ti mapasamak iti maysa a bilog nga awanan iti maysa nga angkla? Bayat ti panangbasayo iti Ether 12:4 nga aggigiddan, pagsaritaan no kasano a matulongannatayo ti namnama a kas iti panangtulong ti angkla iti maysa a bilog. Awisenyo dagiti annakyo a mangidrowing kadagiti ladawan ti maysa a bilog ken maysa nga angkla tapno mabalinda nga isuro ti maipapan iti namnama.

• No kasapulan dagiti annakyo ti depinision ti namnama, tulonganyo ida a mangsapul iti maysa iti Pangiwanwan iti Nasantuan a Kasuratan, “Namnama” (Gospel Library). Segun iti daytoy a depinision ken iti Ether 12:4, 32, ania koma ti nasken a namnamaentayo? (kitaen met iti Moroni 7:40–42). Tulonganyo dagiti annakyo nga agpanunot iti dadduma pay a balikas para iti namnama, agraman kadagiti balikas a kasungani ti kaipapanan ti namnama. Mabalinyo pay nga ibinglay iti tunggal maysa ti sumagmamano a kinapudno ti ebanghelio a mangted kadakayo iti namnama.

Ether 12:23–29

Matulongannak ni Jesucristo nga agbalin a naespirituan a napigsa.

• No dadduma maipasango dagiti ubbing kadagiti situasion a pakariknaanda a nakapuyda, a kas iti inaramid ni Moroni. Tulonganyo dagiti annakyo a mangammo no apay a kastoy ti narikna ni Moroni iti Ether 12:23–25, ket saludsodenyo kadakuada no naaddaanda iti kasta met la a rikna. Kalpasanna awisenyo ida mangbasa kadagiti bersikulo 26–27 tapno maammuan no kasano a tinulongan ti Apo ni Moroni.

• Nalabit a mabalin nga agdrowing dagiti annakyo iti maysa a ladawan ti maysa a banag a nakapuy ken maysa a banag a napigsa. Kalpasanna mabalinda ti manginayon iti drowingda ti sumagmamano a balikas ken ragup ti balikas manipud iti Ether 12:23–29 a mangisuro kadakuada maipapan iti no kasano a mapagbalin ti Mangisalakan a napigsa dagiti pagkapsutantayo. Allukoyenyo dagiti annakyo nga agpanunot maipapan ti maysa a pagkapsutan a mabalin nga adda kadakuada ken kalpasanna agpatulongda iti Mangisalakan tapno agbalinda a napigsa. Mabalinyo nga ibinglay ti maysa a padas idi tinulongannakayo ti Mangisalakan nga agbalin a napigsa tapno maaramidyo ti maysa a narigat a banag.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Nakaskasdaaw dagiti Padto ni Ether, ni Walter Rane