Adtoy ti Kordero ti Dios, ni Walter Rane

Disiembre 23–29: “Umayto Ditoy Lubong a Mangsubbot kadagiti Taona”

Paskua

Manipud iti Nephi agingga iti Moroni, nangkumit ti tunggal propeta ti Libro ni Mormon iti nasagraduan a panggep a nagupgop iti panid ti pauloti libro: “ti panangallukoy iti [amin a tao] a ni Jesus ti Cristo.” Nakita Isuna ti maysa a propeta kas maysa nga espiritu sakbay daytoy a biag, ken nakita ti sabali pay ti panagministrona iti daga iti maysa a parmata. Maysa ti nagtakder iti rabaw ti pader tapno ipakdaar dagiti pagilasinan ti pannakayanakna ken ti ipapatayna, ken maysa pay ti nagparintumeng iti sanguanan ti nagungar a bagina, a mangap-apros kadagiti sugat dagiti ima, saka, ken sikiganna. Ammoda amin daytoy napateg a kinapudno: “Awan ti sabali a pamuspusan wenno wagas a pakaisalakanan ti tao, babaen laeng iti pangsubbot a dara ni Jesucristo, nga … umayto a mangsubbot iti lubong” (Helaman 5:9).

Isu nga iti daytoy a panawen ti Paskua, kabayatan ti panangrambak dagiti mamatpati iti intero a lubong iti kinaimbag ken ayat ti Dios iti panangyegna iti Anakna, utobenyo no kasano a napatibker ti Libro ni Mormon ti pammatiyo ken ni Cristo. Bayat ti panangpanunotyo maipapan iti pannakayanakna, utobenyo no apay immay Isuna ken no kasano a nangbalbaliw iti biagyo ti yaayna. Kalpasanna mapadasanyo ti pudno a rag-o ti Paskua—ti sagut nga ited ni Jesucristo kadakayo.

Dagiti Kapanunotan iti Panagsursuro iti Pagtaengan ken iti Simbaan

Nayanak ni Jesucristo tapno agbalin a Mangisalakanko.

Kannawidan ti panagbasa iti estoria ti pannakayanak ti Mangisalakan iti Baro a Tulag iti panawen ti Paskua, ngem masarakanyo pay dagiti nabiag a padto iti daytoy nasagraduan a pasamak iti Libro ni Mormon. Kas pagarigan, masarakan dagiti padto ti pannakayanak ken panagministro ti Mangisalakan iti 1 Nephi 11:13–36; Mosiah 3:5–10; ken Helaman 14:1–13. Ania dagiti impresion maipapan ken ni Jesucristo nga umay kadakayo bayat ti panagbasayo kadagitoy a binatog ken panangutobyo kadagiti simbolismo dagiti pagilasinan ti pannakayanakna? Kasano a patibkeren dagiti pammaneknek dagitoy a propeta ti pammaneknekyo ken ni Cristo ken ti misionna?

Adtoy ti sumagmamano a dadduma pay a singasing a makatulong kadakayo a mangipamaysa ken Jesucristo iti panawen ti Paskua:

• Ammoyo kadi a mabalinyo a buyaen dagiti mensahe manipud kadagiti napalabas a debosional iti Paskua ti Umuna a Panguluen iti Gospel Library? Sapulem dagitoy iti “Christmas Videos” collection. Ibilangyo ti panangibinglay kadagitoy a mensahe ken musika tapno maisaknap ti rag-o ti Paskua.

• Mabalin a maragsakan met ti pamiliayo a dumngeg kadagiti napili manipud iti “Christmas Music” collection iti Gospel Library.

• Ibilang ti panangplano kadagiti aktibidad a mabalin nga aramidenyo wenno ti pamiliayo kadagiti aldaw nga umadanin ti Paskua tapno marikna ti Espiritu ni Cristo, kas iti panagserbi iti maysa a tao wenno aggigiddan a panangkanta kadagiti himno ti Paskua. Kitaen iti LighttheWorld.org para kadagiti kapanunotan.

Kitaen met iti Mateo 1:18–25; 2; Lucas 2; 3 Nephi 1:4–22; “Away in a Manger,” Hymns, no. 206.

Ni Jesucristo ti Mangisalakan ti lubong.

Ti kangrunaan a rason a rambakantayo ti pannakayanak ni Jesucristo ket gapu iti pangsubbot a sakripisiona. Gapu iti dayta a sakripisio, maisalakannatayo manipud iti basol ken patay, maliwliwanatayo kadagiti rigat, ken matulongannatayo nga “agbalin a naan-anay Kenkuana” (Moroni 10:32). Ania ti nasursuroyo manipud iti Libro ni Mormon iti daytoy a tawen maipapan iti bileg ti Mangisalakan a mangsubbot kadakayo? Adda kadi dagiti pakaammuan wenno pannursuro a napateg kadakayo? Ibilang no ania ti isuro kadakayo dagiti sumaganad a binatog maipapan iti pangsubbot a mision ti Mangisalakan: 2 Nephi 2:6; Alma 7:7–13; 11:40; ken Helaman 5:9; 14:16–17. Ania ti mariknayo a makaparegta nga aramidenyo a mangipakita Kenkuana iti panagyamanyo?

Paneknekan ti Libro ni Mormon ni Jesucristo.

Ti “Mainayon a Pammaneknek ken ni Jesucristo” ket ad-adda pay ngem iti subtitulo ti Libro ni Mormon; maysa daytoy a palawag ti nasantuan a panggepna. Utobenyo no ania ti masursuroyo manipud kadagiti sumaganad a nasantuan a kasuratan maipapan iti mision ti Libro ni Mormon nga agpaneknek ken ni Cristo: 1 Nephi 6:4; 19:18; ken 2 Nephi 25:23, 26; 33:4, 10.

Ibilang ti panangisurat iti maysa a journal no kasano a nayasidegnakayo nga ad-adda ken ni Cristo ti panagadal iti Libro ni Mormon itoy a tawen. Makatulong kadakayo ti sumaganad a pannignay:

• “Maysa a banag a nasursurok maipapan iti Mangisalakan itoy a tawen ket …”

• “Ti panangsursuro maipapan iti Mangisalakan iti Libro ni Mormon ket nangbalbaliw iti wagas a …”

• “Ti paboritok a tao [wenno estoria] iti Libro ni Mormon ket insuronak a ti Mangisalakan …”

Nalabit nga adda maysa a tao a maparaburan a mangammo no kasano ti riknayo maipapan iti Libro ni Mormon. Kasano a maibinglayyo dagiti padas ken pammaneknekyo? Mabalin a mariknayo a naparegtakayo a mangted iti kopia kas sagut ti Paskua. Ti Libro ni Mormon app ti mangaramid a simple ti panangibinglay.

Inlista ni Bishop Gérald Caussé ti sumagmamano a kinapudno manipud iti Libro ni Mormon maipapan ken ni Jesucristo (kitaen “A Living Witness of the Living Christ,” Liahona, Mayo 2020, 39–40). Mabalin a kitaenyo ti listaanna ket utobenyo no kasano a ti tunggal maysa kadagitoy a kinapudno ket namagbalbaliw—wenno mabalin a mangbalbaliw—iti biagyo.

Kitaen met iti Gospel Topics, “Book of Mormon,” Gospel Library.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti kapanunotan para iti Panangisuro kadagiti Ubbing

Gapu ta daytoy a Domingo ket maikalima a Domingo ti bulan, maparegta dagiti mannursuro iti Primary a mangusar kadagiti aktibidad iti panagadal iti “Apendiks B: Panangisagana kadagiti Ubbing para iti Tungpal Biag iti Dana ti Katulagan ti Dios.”

Ni Jesucristo ti sagut ti Nailangitan nga Ama kaniak.

• Tapno matulongan dagiti annakmo nga agpokus iti sagut nga inted ti Nailangitan nga Ama kadatayo babaen ti panangibaonna iti Anakna, mabalinyo a bungonen ti ladawan ni Jesucristo kas maysa a sagut iti Paskua. Mabalin a pagsasaritaanyo kadagiti annakyo maipapan kadagiti paborito a sagut iti Paskua a naawatyo wenno namnamaenyo nga awaten. Kalpasanna mabalinda nga ikkaten ti bungon ti ladawan ni Cristo ket ilawlawag no kasano a nagbalin nga Isu ti napateg a sagut para kadatayo. Ti maysa a kanta a “He Sent His Son” (Children’s Songbook, 34–35) ti makainayon iti daytoy a pagsasaritaan. Tulonganyo dagiti annakyo nga agsapul kadagiti ragup ti balikas iti kanta a mangiladawan kadagiti bendision nga adda kadatayo gapu iti pannakayanak ni Jesus.

Nayanak ni Jesucristo tapno agbalin a Mangisalakanko.

• Nalabit a magustuan dagiti ubbing a mangibinglay kadakayo no ania ti ammoda maipapan iti panakayanak ni Jesus. Addaan ti Libro ti Arte ti Ebanghelio iti sumagmamano a ladawan a makatulong kadakuada a mangisarita iti estoria (kitaen dagiti num. 28, 29, 30, 31). Mabalinmo pay a kitaen dagiti ladawan a mangiladawan iti biag ti Mangisalakan ken ti pangsubbot a sakripisiona. Apay nga imbaon ti Nailangitan nga Ama ni Jesucristo?

  

• Mabalin a magustuan pay dagiti annakyo a mangidrowing kadagiti bukodda a ladawan ti pannakayanak ken panagministro ni Jesus. Nalabit a mabalinda nga idrowing no ania ti nailadawan iti 1 Nephi 11:13–23; Mosiah 3:5–10; Helaman 14:1–13; ken 3 Nephi 1:4–22. Kalpasanna mabalinda nga ibinglay kadakayo no ania ti isuro dagiti ladawanda maipapan ken ni Jesucristo.

• Tapno mayunay-unay nga agpada nga isuro ti Biblia ken Libro ni Mormon maipapan iti pannakayanak ni Jesus, mabalinyo nga ilista dagiti pasamak a nailadawan iti Lucas 2:4–14; Mateo 2:1–2; ken 3 Nephi 1:15, 19–21. Kalpasanna mabalin dagiti annakyo ti mangsukisok kadagitoy a nasantuan a kasuratan a mangikeddeng no naaramid dagiti pasamak iti Bethlehem, kadagiti America, wenno agpada. Apay nga agyamantayo nga adda kadatayo ti Libro ni Mormon kas maikadua a saksi ti pannakayanak ni Jesucristo?

Magustuan dagiti ubbing dagiti estoria. Dagiti estoria ti maysa kadagiti kapintasan a wagas a pakatulongan kadagiti ubbing nga agsursuro ken manglagip kadagiti kinapudno. Bayat iti panangibinglayyo iti estoria maipapan iti pannakayanak ni Jesus, ibilangyo pay ti panangibinglayyo kadagiti estoria manipud iti biagyo a nakatulong a nangpapigsa iti pammatiyo iti Mangisalakan.

Paneknekan ti Libro ni Mormon ni Jesucristo.

• Bayat ti panangileppasyo ken dagiti annakyo iti panagadalyo iti Libro ni Mormon iti daytoy a tawen, mabalin a daytoy ti nasayaat a gundaway a panagbibinninglayyo kadagiti paboritoyo nga estoria wenno binatog manipud iti daytoy sagrado a libro. Ti panangkita iti sumagmamano a ladawan iti Umaykayo, Sumurot Kaniak wenno Dagiti Estoria iti Libro ni Mormon ti makatulong kadagiti annakyo a manglagip no ania ti nasursuroda itoy a tawen. Tulongam ida a mangkita no ania ti isuro dagitoy nga estoria maipapan ken ni Jesucristo.

• Mabalinyo pay nga ikkan dagiti annakyo iti maysa a ladawan ni Jesus, wenno pagdrowingenyo ida iti bukodda a ladawanna. Awisen ida a mangingato kadagiti ladawanda tunggal mangngegda ti nagan ni Cristo bayat ti panangbasayo iti 2 Nephi 25:23, 26. Peneknekan a naisurat ti Libro ni Mormon tapno makatulong kadatayo a “mamati ken ni Cristo” (2 Nephi 25:23).

Para iti ad-adu pay a kapanunotan, kitaen ti isyu ti magasin a Friend iti daytoy a bulan.

Ti Parmata ni Nephi maipapan ken ni Birhen Maria, ni Judith A. Mehr