Tapno Maammmuanyo, ni Gary L. Kapp

Disiembre 16–22: “Umasidegkayo ken ni Cristo, ket Agbalinkayo a Naan-anay Kenkuana”

Moroni 10

Irugi ti Libro ni Mormon nga addaan iti kari ni Nephi a mangipakita kadatayo a “ti nadungngo nga asi ti Apo adda kadagiti amin a pinilina, gapu iti pammatida” (1 Nephi 1:20). Igibus ti libro nga addaan iti agpada nga awis manipud ken ni Moroni: “Manglagip no kasano ti kinamanangngaasi ti Apo” (Moroni 10:2–3). Ania dagiti pagarigan ti asi ti Apo a nakitayon iti Libro ni Mormon? Mabalin a panunotenyo ti naasi a wagas a panangiturong ti Dios iti pamilia ni Lehi iti langalang ken iti ballasiw dagiti dadakkel a danum, dagiti nadungngo nga asi nga impakitana ken ni Enos idi umararaw ti kararuana iti pammakawan, wenno ti asi nga impakitana ken ni Alma, maysa a naiget a kabusor ti Simbaan a nagbalin a maysa kadagiti natured a salaknibna. Wenno mabalin a maiturong dagiti pampanunotyo iti asi ti nagungar a Mangisalakan nga impakitana iti tattao idi inagasanna dagiti masakitda ken binendisionanna dagiti babassit nga ubbingda. Nalabit a ti kapatgan, amin dagitoy ket mabalin a mangipalagip kadakayo no “kasano ti kinamanangngaasi ti Apo” kadakayo, ta naisurat ti Libro ni Mormon a mangawis iti tunggal maysa kadatayo nga umawat iti asi ti Dios—maysa nga awis a gagangay a nayebkas kadagiti pammakada a balikas ni Moroni, “Umasidegkayo ken ni Cristo, ken agbalin a naan-anay kenkuana” (Moroni 10:32).

Dagiti Kapanunotan iti Panagsursuro iti Simbaan ken iti Pagtaengan

Moroni 10:3–7

Maammuak ti kinapudno ti amin a banag babaen ti bileg ti Espiritu Santo.

Ti kari iti Moroni 10:3–7 ket nangbalbaliw iti biag dagiti minilion a tattao iti intero a lubong. Kasano a napagbalbaliwna ti biagyo? Bayat ti panangbasayo iti Moroni 10:3–7, ibilangyo ti naan-annad a panagbasayo ngem iti napalabas. Mabalinyo nga amirisen ti tunggal ragup ti balikas, a mangsalsaludsod iti bagiyo kas kadagitoy: Ania ti kaipapanan daytoy? Kasano a maaramidko a nasaysayaat daytoy? Ania dagiti padas a napasarak iti daytoy?

Bayat ti panangutobyo iti bukodyo a panagsukisok iti naespiritruan a kinapudno, mabalin a makatulong no kasano a nakasarak dagiti dadduma iti kinapudno babaen ti bileg ti Espiritu Santo. Inladawan ni Elder Mathias Held ti padasna kas baro a miembro ti Simbaan (kitaen iti “Seeking Knowledge by the Spirit,” Liahona, Mayo 2019, 31–33). Inladawan ni Elder David F. Evans ti padasna kas maysa a napadakkel iti Simbaan ngem adda latta dagiti saludsodna (kitaen iti “The Truth of All Things,” Liahona, Nob. 2017, 68–70). Ibilangyo ti panangbasa iti maysa wenno agpada kadagitoy a mensahe ken panangisurat iti ania man a masursuroyo manipud iti panagsukisokda iti kinapudno a makatulong kadakayo iti bukodyo.

Mabalinyo pay a sukisoken no ania ti insuro ti Dios maipapan iti kinapudno babaen ti panangbasa iti sumagmamano kadagiti binatog iti Pangiwanwan iti Nasantuan a Kasuratan, “Kinapudno” (Gospel Library). Ania kadagiti nasantuan a kasuratan a kasla nangnangruna a nainsiriban kadakayo? Nalabit mabalinyo ti agpili iti maysa nga ibinglay iti maysa a tao nga agsapsapul met iti kinapudno babaen ti Espiritu.

Kitaen met iti Henry B. Eyring, “The Faith to Ask and then to Act,” Liahona, Nob. 2021, 74–76; “Let the Holy Spirit Guide,” Hymns, no. 143; Gospel Topics, “Seek Truth and Avoid Deception,” Gospel Library.

Isuratmo dagiti impresion. Ti panagbalin a napasurot iti ebanghelio ni Jesucristo ket kayatna a sawen ti agpada ti pannakaammo ken panagbiag iti ebanghelio. Ad-adda nga agtignaykayo iti no ania ti masursuroyo no isuratyo daytoy. No mangisursurokayo, awisenyon dagiti tao nga isursuroyo a mangisurat kadagiti naespirituan nga impresionda.

Moroni 10:8–25

Inikkannak ti Dios kadagiti nasantuan a sagut.

Adu dagiti nadumaduma a wagas a mabalin ti maysa a tao a “tallikudan … dagiti sagut ti Dios” (Moroni 10:8). Pagtallikudan ti sumagmamano a tattao nga adda dagitoy a sagut. Pagtallikudan dagiti dadduma dagiti sagutda babaen iti panangbaybay-a kadagitoy wenno saan a panangpadur-as kadagitoy. Bayat ti panangbasayo iti Moroni 10:8–25, sapulenyo dagiti kinapudno a mangtulongto kadakayo a mangtakuat kadagiti naespirituan a sagutyo ket usaren dagitoy a mangbendision kadagiti annak ti Dios. Mabalin a makatulong dagiti saludsod a kas kadagitoy: Ania dagiti naespirituan a sagut? Asino ti nakaitedanda? Apay a maitedda? Kasano nga awatentayo ida? Mapanunotyo kadi dagiti pagarigan ti tattao nga agus-usar kadagiti sagut a nailista iti Moroni 10:9–16?

Moroni 10:30–33

Makapagbalinak a naan-anay babaen ti parabur ni Jesucristo.

Ti balakad ni Moroni nga “umasideg ken ni Cristo” ket iramanna ti ad-adu pay ngem iti panagsursuro ken panangpanunot maipapan Kenkuana. Ngem ketdi, daytoy ket maysa nga awis nga umasideg ken ni Cristo iti kaan-anayan a kaipapanan no mabalin—tapno agbalin a kas Kenkuana. Bayat ti panangbasayo iti Moroni 10:30–33, kitaenyo dagiti ragup ti balikas a tumulong kadakayo a makaawat no ania ti kayat a sawen ti umasideg ken ni Cristo, no kasano a maaramid a posible daytoy, ken dagiti bunga iti panangaramid iti daytoy.

Lagipenyo ti panagadalyo iti Libro ni Mormon iti daytoy a tawen, ket utobenyo no ania ti narikna ken nasursuroyo maipapan ken ni Jesucristo. Kas pagarigan, kasano a nakatulong kadakayo ti Libro ni Mormon nga umasideg Kenkuana? Kasano a natulongannakayo nga agpannuray a naan-anay iti parabur ni Cristo? Kasano a natulongannakayo a “saan a tallikudan” ti bileg ti Mangisalakan? Ibilangyo ti panangibinglay iti bukodyo a panagsaksi iti Libro ni Mormon iti maysa a tao nga agkasapulan a dumngeg iti daytoy, agraman dagiti ay-ayaten ken gagayyem a nalabit a saan a makaammo iti mensahena.

Kitaen met iti “Moroni Invites All to Come unto Christ” (video), Gospel Library.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Moroni 10:3–4

Maammuak para iti bagik a pudno ti Libro ni Mormon.

• Kasano a matulonganyo dagiti annakyo nga umawat iti awis ni Moroni a mangsaludsod iti Dios no pudno ti Libro ni Mormon? Ibilangyo ti panangted kadakuada kadagiti panid ti papel nga addaan kadagiti balikas a Basaen, Lagipen, Utoben, ken Kiddawen a nakasurat kadagitoy. Awisenyo dagiti annakyo a mangsapul kadagitoy a balikas iti Moroni 10:3–4. Ania ti nasken a basaen, laglagipen, utoben, ken kiddawentayo tapno magun-od wenno mapapigsa dagiti pammaneknektayo maipapan iti Libro ni Mormon? Mabalin met dagiti annakyo ti mangsapul kadagiti pagpapadaan dagitoy a bersikulo ken ti kanta a “Search, Ponder, and Pray” (Children’s Songbook, 109).

• Mabalin nga usaren dagiti annakyo ti ladawan iti udi daytoy a balabala tapno pagsaritaan ti maipapan iti panangikali ni Moroni kadagiti balitok a pinanid (kitaen met iti “Kapitulo 54: Ti Kari ti Libro ni Mormon,” Dagiti Estoria iti Libro ni Mormon, 156). Mabalin a magustuan dagiti in-inaudi nga ubbing ti agpammarang nga isuda ni Moroni nga agsursurat kadagiti pinanid ken mangikalkali kadagitoy. Ibinglayyo iti tunggal maysa dagiti pammaneknekyo iti Libro ni Mormon.

Moroni 10:8–19

Mangted kaniak ti Nailangitan nga Ama kadagiti naespirituan a sagut.

• Tapno maisuro dagiti annakyo maipapan kadagiti naespirituan a sagut, mabalinyo nga isurat dagiti numero 9 agingga iti 16 kadagiti agsisina a papel ken bungonen ti tunggal papel a kasla maysa a sagut. Mabalin nga agsisinnublat dagiti annakyo a manglukat kadagiti sagut, mangbasa kadagiti bersikulo manipud iti Moroni 10:9–16 a maitutop kadagiti numero, ken mangilasin iti tunggal naespirituan a sagut. Mabalinyo a pagsasaritaan no kasano ti kayat ti Nailangitan nga Ama a panangusartayo kadagitoy a sagut a mangbendision kadagiti annakna. Matulonganyo pay dagiti annakyo a makakita kadagiti sagut nga inted ti Nailangitan nga Ama kadakuada.

Moroni 10:32–33

Kayat ni Jesucristo nga umasidegak Kenkuana.

• Ammo kadi dagiti annakyo no ania ti kayat a sawen ti “umasideg ken ni Cristo”? Nalabit a mabalinyo a basaen ti Moroni 10:32 ket awisenyo ida a mangulit iti ragup ti balikas kadakayo. Kalpasanna mabalinda ti agkidem bayat ti panangikabilyo iti ladawan ni Jesus iti maysa a lugar iti siled. Kalpasanna, pagmulagaten ida, pasapul ti ladawan, paguummongen ida iti aglawlawna, ken pagsaritaanda dagiti wagas a makaasidegtayo ken ni Cristo. Nalabit a makatulong nga isurat iti pisarra ti saludsod nga Ania ti kayat a sawen ti umasideg ken ni Cristo? Tulonganyo ida a mangsukisok iti Moroni 10:32–33 tapno mangsapul kadagiti posible a sungbat (kitaen met iti Pagannurotan ti Pammati 1:3–4). Agtitinnulong a mangilista no ania ti kayat ni Cristo nga aramidentayo ken no ania ti ikarina nga aramiden para kadatayo.

• Nalabit a magustuan dagiti annakyo ti panangaramid ken panangarkos kadagiti sinan-puso a tsapa nga agkuna iti “Ay-ayatek ti Dios iti amin a kabaelak, panunotko, ken pigsak” (kitaen iti Moroni 10:32). Bayat ti panangaramidda, kasaritayo ida maipapan iti no kasano nga ipakitatayo iti Dios nga ay-ayatentayo Isuna.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Sakbay ti panangikalina kadagiti kasuratan, inawisnatayo ni Moroni a “manglaglagip no kasano ti kinamanangngaasi ti Apo” (Moroni 10:3).