Ni Moroni nga agsursurat kadagiti pinanid a balitok
Minerva Teichert (1888–1976), Ni Moroni: Ti Naudi a Nephite, 1949–1951, lana iti masonite, 34 3/4 x 47 a pulgada. Museu ti Arte iti Brigham Young University, 1969
Sakbay nga inleppas ni Moroni ti kasuratan nga ammotayo iti agdama kas ti Libro ni Mormon kadagiti bukodna a maudi a balikas, imbinglayna dagiti tallo a mensahe manipud iti amana, ni Mormon: maysa a surat kadagiti “natalna a paspasurot ni Cristo” (Moroni 7:3) ken dua a surat nga insurat ni Mormon para ken ni Moroni. Nalabit nga inraman ni Moroni dagitoy a mensahe iti Libro ni Mormon gapu ta nasirmatana dagiti pagpapadaan ti nagbaetan dagiti pagpeggadan iti panawenna ken iti panawentayo. Idi naisurat dagitoy a balikas, timmallikud dagiti tao a Nephite manipud iti Mangisalakan. Adu kadakuada ti “nakapukaw iti ayatda iti tunggal maysa” ket naragsakda iti “amin a banag malaksid iti nasayaat” (Moroni 9:5, 19). Ket kaskasdi a nakasarak pay laeng ni Mormon iti pakaigapuan ti namnama, a mangisursuro kadatayo a ti namnama ket saan a kayatna a sawen ti panangilaksid wenno panagbalin nga awanan iti ammo maipapan kadagiti parikut ti lubong. Ti namnama kaipapananna ti kaadda ti pammati iti Nailangitan nga Ama ken ni Jesucristo, a ti pannakabalinna ket dakdakkel ken ad-adda nga agnanayon ngem dagitoy a parikut. Kaipapananna ti “panagtalek iti tunggal nasayaat a banag” (Moroni 7:19). Kaipapananna ti panangpalugod iti Pannubbot ni Jesucristo “ken ti namnama iti dayagna ken iti biag nga agnanayon, ket agtalinaed koma iti kapanunotanyo” (Moroni 9:25).
Dagiti Kapanunotan iti Panagsursuro iti Pagtaengan ken iti Simbaan
Tulongannak ti Silaw ni Cristo a mangammo iti kinapudno ken biddut.
Agsiddaaw ti adu a tao, “Kasano a maammuak no agtaud ti maysa nga impresion manipud iti Dios wenno iti bukodko a pampanunot?” wenno “Iti nakaad-adu a panangallilaw ita, kasano a maammuak no ania ti umno wenno biddut?” Dagiti balikas ni Mormon iti Moroni 7 ti mangted kadatayo iti sumagmamano a pagbatayan a mausartayo a mangsungbat kadagitoy a saludsod. Sapulen dagitoy nangnangruna kadagiti bersikulo 12–20. Mabalinyo nga usaren dagitoy a kinapudno a mangtulong kadakayo a mangamiris kadagiti mensahe a sanguenyo ken dagiti padasyo iti daytoy a lawas.
Babaen ken ni Cristo, mabalinko ti “agtalek iti tunggal nasayaat a banag.”
Dinamag ni Mormon ti maysa a saludsod a kasla adda naipangpangruna a pakainaiganna iti agdama: “Kasano a mabalin ti agtalek iti tunggal nasayaat a banag?” (Moroni 7:20). Kalpasanna insurona maipapan iti pammati ken ni Jesucristo, namnama, ken panangngaasi. Bayat ti panangbasayo kadagiti bersikulo 20–48, kitaenyo no kasano a tulongannakayo ti tunggal kababalin a mangsapul ken “agtalek” iti kinaimbag nga aggapu ken ni Jesucristo. Apay a kasapulan dagitoy a kababalin para iti maysa a disipulo ni Jesucristo?
Kitaen met iti “Mormon’s Teachings about Faith, Hope, and Charity” (video), Gospel Library.
Napaliiw ni Mormon a ti pammati ken namnamatayo ken ni Jesucristo ti mangiturong kadatayo nga addaan iti panangngaasi. Ania ti panangngaasi? Mabalinyo nga isurat ti Ti panangngaasi ket … ket kalpasanna basaenyo ti Moroni 7:44–48, nga agsapsapul kadagiti balikas wenno ragup ti balikas a makaileppas iti binatog. No malpasyo, ibilangyo a sukatan ti balikas a Panangngaasi iti nagan ni Jesucristo. Ania ti isuro daytoy kadakayo maipapan iti Mangisalakan? Kasano nga impakita ni Jesucristo ti natarnaw nga ayatna? Panunotenyo dagiti pagarigan manipud kadagiti nasantuan a kasuratan ken iti bukodyo a biag.
Napaliiw ni Presidente Dallin H. Oaks: “Ti gapu no apay a di mapaay ti panangngaasi ken ti gapu no apay a nain-indaklan ti panangngaasi ngem iti uray dagiti kapatgan nga aramid ti kinaimbag … ket dayta a panangngaasi, ‘ti nadalus nga ayat ni Cristo’ [Moroni 7:47], ket saan a maysa a tignay ngem maysa a kondision wenno kasasaad ti panagbalin. … Ti panangngaasi ket maysa a banag a pagbalinan ti maysa a tao” (“The Challenge to Become,” Ensign, Nob. 2000, 34). Pampanunotenyo daytoy a palawag, mabalinyo a basaen ti mensahe ni Elder Massimo De Feo “Pure Love: The True Sign of Every True Disciple of Jesus Christ” (Liahona, Mayo 2018, 81–83). Kasano nga apektuan ti panangngaasi ti kinadisipuloyo? Kasano a mabalinyo ti “kumpet iti panangngaasi”? (bersikulo 46).
Kitaen met iti 1 Taga Corinto 13:1–13; Ether 12:33–34; “Love One Another,” Hymns, no. 308; “Charity: An Example of the Believers” (video), Gospel Library; Gospel Topics, “Charity,” Gospel Library.
Agaramat kadagiti adalen a banag [object lesson]. Nalabit ti panangpanunot iti tallo ti sakana a tugaw ket makatulong kadakayo a makaawat iti ad-adu pay maipapan iti pagnanaigan ti pammati, namnama, ken panangngaasi (kitaen iti Dieter F. Uchtdorf, “The Infinite Power of Hope,” Liahona, Nob. 2008, 21–24).
Ti pungtot ti mangiturong iti ladingit ken panagsagaba.
Maisupadi iti mensahe ti ayat ni Mormon iti Moroni 7:44–48, inraman ti maikadua a surat ni Mormon ken ni Moroni dagiti ballaag a maibusor iti maysa a banag a mabalin nga adu ti agkarkarigatan iti agdama—pungtot wenno gura. Segun iti Moroni 9:3–5, ania dagiti sumagmamano a nagbanagan ti pungtot dagiti Nephite? Ania dagiti ballaag a mabalintayo nga alaen manipud kadagiti bersikulo 3–5, 18–20, 23?
Kitaen met iti Gordon B. Hinckley, “Slow to Anger,” Liahona, Nob. 2007, 62–66.
Maaddaanak iti namnama ken ni Cristo ania man dagiti kasasaadko.
Kalpasan ti panangiladawanna iti kinadangkes a nakitana, imbaga ni Mormon iti anakna a saan nga agladingit. Ania ti makaawis iti riknayo maipapan iti mensahe ti namnama ni Mormon? Ania ti kayat na a sawen kenka ti “bitibiten[naka]” ni Cristo? Ania dagiti kababalin ni Cristo ken dagiti pagbatayan ti ebangheliona nga “agtalinaed koma iti kapanunotanyo” ken mangted kadakayo iti namnama? (Moroni 9:25).
No adda pammatik ken ni Jesucristo, maaramidko ti ania man a nasken a paaramidna kaniak.
Ibilang ti aggigiddan a panangsapul iti sumagmamano a ladawan a mangipakita iti maysa a tao manipud kadagiti nasantuan a kasuratan a mangipatpatungpal iti maysa a banag a napateg (kitaen, kas pagarigan, iti Libro ti Arte ti Ebanghelio, dagiti num. 19, 70, 78, 81). Kasano a ti kaadda ti pammati ken ni Cristo ket makaaramid iti pagdumaan kadagitoy a pagarigan? Kalpasanna mabalinyo ken dagiti annakyo ti mangbasa iti Moroni 7:33, nga agsapsapul no ania ti maaramidtayo no addaantayo iti pammati ken ni Jesucristo. Mabalinyo pay ti agbibinninglay kadagiti padas idi pinaraburannakayo ti Apo iti bileg a mangaramid iti pagayatanna.
Makaited kaniak iti namnama ti panangpatik ken ni Jesucristo.
Bayat ti panangibasayo iti Moroni 7:41 kadagiti annakyo, nalabit a mabalinda nga ingato dagiti imada no mangngeganda ti maysa a banag a kinuna ni Mormon a nasken a namnamaentayo. Isaritayo kadagiti annakyo maipapan iti namnama a mariknayo gapu ken ni Jesucristo.
Mabalinyo ken dagiti annakyo ti agpanunot pay iti maysa a tao a mabalin a marigatan iti maysa a banag. Nalabit a mabalin dagiti annakyo ti mangidrowing iti ladawan para iti tao a mangipalagip kenkuana a maaddaan iti namnama ken ni Jesucristo.
Maaddaanak iti namnama ken ni Jesucristo, uray pay kabayatan dagiti naririgat a pannubok.
Tapno maisuro kadagiti annakyo ti maipapan iti namnama ken ni Jesucristo, mabalinyo a punuen iti danum ti maysa a nalitnaw a pagkargaan ket itinnagmo ditoy ti dua a banag—maysa a tumpaw ken maysa a lumned. Bayat ti aggigiddan a panangbasayo iti Moroni 7:40–41 ken 9:25–26, mabalin a sapulen dagiti annakyo no ania ti aramiden ti namnama para kadatayo. Kalpasanna mabalinda nga idilig ti tumpaw a banag iti maysa a tao nga addaan iti namnama ken ni Cristo. Kasano a “bitbitenna[tayo]” ni Cristo no maipasangotayo kadagiti naririgat a pannubok? Tulonganyo dagiti annakyo a mangpanunot kadagiti wagas a mabalinda a laglagipen ti Mangisalakan ken dagiti makaparegta a pannursurona iti “kapanunotan[da] iti agnanayon.”
Ti maysa a kanta maipapan iti ayat, kas iti “Love One Another” (Children’s Songbook, 136) ket mabalin a mangirugi iti pananglilinnawag maipapan iti kaipapanan ti panangngaasi. Mabalinyo a basaen wenno gupgopen ti Moroni 7:47 ken awisenyo dagiti annakyo nga agdrowing iti ladawan ti bagbagida a mangipakpakita iti ayat iti maysa a tao. Isingasing nga ikabilda ti ladawanda iti maysa a lugar a mangipalagip kadakuada iti panagayat kadagiti dadduma a kas iti ar-aramiden ni Jesus.
Kasano a maparegtayo dagiti annakyo a mangsapul ken mangpadur-as iti nadalus nga ayat ni Cristo iti biagda? Nalabit matulongam ida nga agpanunot kadagiti wagas a nangipakitaan ni Jesus iti panangngaasi (kitaen, kas pagarigan, iti, Lucas 23:34; Juan 8:1–11; Ether 12:33–34). Kasano a masurottayo ti pagwadanna?
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
Jesucristo
Ladawan ni Cristo ti Mangisalakan, ni Heinrich Hofmann