Minerva Teichert (1888–1976), Mamuniag ni Alma iti Dandanum ti Mormon1949–1951, lana iti masonite, 35 7/8 × 48 a pulgada. Museu ti Arte iti Brigham Young University, 1969

Disiembre 2–8: “Tapno Maiturongda iti Umno a Dalan”

Moroni 1–6

Kalpasan ti panangileppasna iti kasuratan ti amana maipanggep kadagiti Nephite ken panangyababana iti kasuratan dagiti Jaredite, napanunot ni Moroni a nalpasen ti aramidna a panangidulin iti kasuratan (kitaen iti Moroni 1:1). Ania pay ti adda a masao maipanggep iti dua a pagilian a nakaro a nadadael? Ngem nakita ni Moroni ti panawentayo (kitaen iti Mormon 8:35), ket naparegta isuna nga “isurat ti sumagmamano pay a bambanag, a nalabit a mabalin a napategto … iti masakbayan nga aldaw” (Moroni 1:4). Ammona nga umay idin ti nasaknap nga ikakalilis iti kinapudno, a mangyeg iti pannakatikaw maipanggep kadagiti ordinansa ti priesthood ken maipanggep iti relihion iti sapasap. Mabalin a daytoy ti gapu no apay a nangyeg kadagiti pangilawlawag a detalye maipapan iti sakramento, panagbuniag, panangitalek ti sagut ti Espiritu Santo, ken dagiti bendision ti pannakiummong kadagiti pada a mamatpati tapno “maiturong [ti tunggal maysa] iti umno a dalan, … nga agtalek laeng iti kinapateg ni Cristo, nga isu ti akin-aramid ken nangpasantak iti pammati[tayo]” (Moroni 6:4). Dagiti napapateg a nalawag a pannakammo ken pannakaawat a kas kadagitoy ti mangted kadatayo iti rason tapno agyaman gapu ta tinaginayon ti Apo ti biag ni Moroni tapno mabalinna nga “isurat ti sumagmamano pay a banag” (Moroni 1:4).

Dagiti Kapanunotan iti Panagsursuro iti Pagtaengan ken iti Simbaan

Moroni 1

Masurotko ni Jesucristo iti baet ti pagsusupadian.

Bayat ti panangbasayo iti Moroni 1, ania ti mangparegta kadakayo maipapan iti kinapudno ni Moroni iti Apo ken iti takemna? Ania dagiti sumagmamano a wagas a mabalin ti maysa a tao a “mangtallikud ken ni Cristo”? (Moroni 1:2–3). Utobenyo no kasano a makapagbalinkayo a napudno ken ni Jesucristo, uray no maipasangokayo kadagiti pannubok ken pagsusupadian.

Moroni 2–6

Nasken a maannong dagiti ordinansa ti priesthood kas ibilin ti Apo.

Agtartaray ni Moroni para iti biagna idi insuratna dagitoy a kapitulo. Apay a pakarigatanna ti agsurat maipapan kadagiti administratibo a detalye a kas iti no kasano ti mangannong kadagiti ordinansa? Utobenyo daytoy bayat ti panangbasayo iti Moroni 2–6. Apay iti panangkunayo a napateg dagitoy a detalye iti Apo? Dagitoy ti sumagmamano a saludsod a mabalin a mangiwanwan iti panagadalyo:

Kumpirmasion (Moroni 2; 6:4). Ania dagiti pangiturong ti Mangisalakan iti Moroni 2:2 a mangisuro kadakayo maipapan iti ordinansa ti kumpirmasion? Ania iti panagkunayo a kaipapanan ti “naaramid ti pannakadalus babaen ti pannakabalin ti Espiritu Santo”? (Moroni 6:4).

Pannakaorden iti priesthood (Moroni 3).Ania ti masarakanyo iti daytoy a kapitulo a makatulong iti maysa a tao nga agsagana a maordenan iti priesthood? Ania ti masarakanyo a mangtulong ti maysa a tao nga agsagana a mangannong iti panagorden?

Ti sakramento (Moroni 4–5; 6:6).Ania ti maaramidanyo tapno agbalin ti sakramento a naespirituan a bugas ti lawasyo?

Panagbuniag (Moroni 6:1–3).Ania ti ar-aramidenyo tapno agtultuloy a maragpatyo dagiti kualipikasion para iti panagbuniag?

Insuro ni Jesus no kasano ti nasken a pannakaannong dagiti ordinansa

Maibatay iti no ania ti nasursuroyo, kasano a balbaliwanyo dagiti wagas a pakapagpanunotan, pakairamanan, wenno pangisaganaanyo kadagiti dadduma para kadagitoy nga ordinansa?

Kitaen met iti Doktrina ken Katulagan 84:20.

Mangyakem [role-play]. Maysa a nasayaat a wagas tapno malagipyo no ania ti nasursuroyo ket ti panangilawlawag iti daytoy iti dadduma. Kas pagarigan, padasenyo ti panagyakem kadagiti buya [scenario] a kas iti daytoy: Saan a masigurado ti maysa a gayyem a nakasaganan nga agpabuniag. Kasano nga usarenyo ti Moroni 6 a mangtulong kenkuana?

Moroni 4–5

Ti pannakiranud iti sakramento ket mangtulong kaniak nga umas-asideg ken ni Jesucristo.

Nalabit a nangngeganyon dagiti kararag iti sakramento iti adu a gundaway, ngem kasano ti kasansan a panunotenyo a nasayaat maipapan iti kayat a sawen dagiti balikas? Nalabit a mabalinyo a padasen nga isurat ti dua a kararag ti sakramento manipud iti memoria. Kalpasanna idasigyo ti insuratyo iti Moroni 4:3 ken 5:2. Adda kadi ania man a banag a nadlawyo maipapan kadagitoy a kararag a saanyo a nadlaw idi?

Ibilangyo ti panangiraman iti maysa a himno ti sakramento iti panagadalyo, kas iti “In Memory of the Crucified” (Hymns, no. 190).

Moroni 6:4–9

Ipateg dagiti disipulo ni Jesucristo dagiti kararua ti tunggal maysa.

Indibidual ti panagpili a sumurot ken ni Cristo, ngem matulongandatayo dagiti kapada iti pammati a mamagtalinaed kadatayo “iti umno a dalan” (Moroni 6:4–5). Ania ti inaramid dagiti miembro ti Simbaan idi panawen ni Moroni a mangpapigsa iti tunggal maysa? Bayat ti panangbasayo iti Moroni 6:4–9, utobenyo dagiti bendision a sumangbay manipud iti panagbalin a “naibilang kadagiti kameng ti simbaan ni Cristo” (Moroni 6:4).

Mabalin met a panunotenyo dagiti tao a tumabtabuno iti ward wenno branchyo. Adda kadi asino man a mabalin nga addaan iti naisangsangayan a panagkasapulan iti ayatyo —nalabit a maysa a kabarbaro wenno nabiit pay a nagsubli? Kasano a makatulongkayo tapno ad-adda a kas iti inladawan ni Moroni dagiti padasda iti simbaan? (Para kadagiti kapanunotan, kitaen iti My Covenant Path wenno ti “Strengthening New Members” videos iti Gospel Library). Mabalin a masarakanyo ti sumagmamano nga inspirasion iti benneg I ti mensahe ni President Dallin H. Oaks “The Need for a Church” (Liahona, Nob. 2021, 24–25).

Bayat ti panangutobyo no ania ti kaipapanan ti “mataraonan kadagiti nasayaat a balikas ti Dios” (Moroni 6:4), mabalin a makatulong no panunotenyo ti panangtaraon a kasapulan ti maysa a patubo a mula wenno maysa a maladaga—ken no ania ti mapasamak no mabaybay-an. Sukisokenyo ti Moroni 6:4–9 para kadagiti kapanunotan maipapan no kasano a matulonganyo a naespirituan a “mataraonan” dagiti dadduma. Kasano a nakatulong dagiti pada a disipulo a nangtaraon kadakayo?

Saan a nalawag iti tunggal maysa no apay a napateg ti “maibilang kadagiti tao iti simbaan ni Cristo” ken “masansan nga agtataripnong” kadagiti miting ti Simbaan. Kasano ti panangilawlawagyo no apay nga agyamankayo iti panagbalinyo a miembro ti Simbaan ni Jesucristo? (kitaen dagiti dadduma a benneg ti mensahe ni Presidente Oaks a “The Need for a Church”).

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Moroni 2–6

Maysa a sagrado a sagut ti Espiritu Santo.

• Nadakamat ti Espiritu Santo wenno ti Espiritu iti sumagmamano a gundaway iti Moroni 2–6. Nalabit a mabalinyo a kiddawen kadagiti annakyo a birokenda ti tunggal bersikulo a mangdakamat Kenkuana, basaenda dagita a bersikulo, ken ilistada no ania ti masursuroda maipapan iti Espiritu Santo. Mabalinyo pay nga ibinglay iti tunggal maysa dagiti padas idi nariknayo ti impluensia ti Espiritu.

Moroni 4–5

Awatek ti sakramento tapno mangipakita a kanayonto a laglagipek ni Jesucristo.

• Ti panangbasa kadagiti kararag ti sakramento a kaduayo dagiti annakyo ket makaiturong iti panaglilinnawag maipapan iti no kasano a maaddaan kadagiti napatpateg a padas iti sakramento. Mabalin a makatulong kadakuada a mangipapan nga umay ti maysa a gayyem iti miting ti sakramento iti umuna a gundaway. Kasano nga ilawlawagtayo iti gayyemtayo no ania ti sakramento ken no apay a sagrado daytoy? Allukoyenyo dagiti annakyo a mangusar iti maysa a banag manipud iti Moroni 4 wenno 5 iti panangilawlawagda. Mabalin nga usaren dagiti in-inaudi nga ubbing ti panid ti aktibidad iti daytoy a lawas wenno ti Libro ti Arte ti Ebanghelio, num. 108.

• Aggigiddan nga agkansion iti maysa a kanta a makatulong kadagiti annakyo a mangpanunot maipapan iti Mangisalakan (kas iti “Reverently, Quietly,” Children’s Songbook, 26). Mabalinyo pay a sanayen ti panagtugaw a siraraem bayat ti sakramento.

Moroni 6:1–3

Makapagsaganaak a mabuniagan.

• Asino ti mabalin a mabuniagan?. Tulonganyo dagiti annakyo a mangsapul kadagiti sungbat iti daytoy a saludsod iti Moroni 6:1–3. Ania ti kaipapanan ti addaan iti “nasneban a puso ken napnuan babawi nga espiritu”? (Moroni 6:2). Kasano a mangtulong daytoy kadatayo nga agsagana para iti panagbuniag? Ibilangyo ti panangisarita kadagiti annakyo no kasano ti panagsaganayo a mabuniagan.

Moroni 6:4–6, 9

Mapantayo iti simbaan tapno makiranud iti sakramento ken mangsuporta iti tunggal maysa.

• Ammo kadi dagiti annakyo no apay a magustuanyo ti makimisa? Ti panagbasa iti Moroni 6:4–6, 9 ti makaited kadakayo iti gundaway a mapaglilinnawagan ti sumagmamano kadagiti banag nga ar-aramidentayo iti simbaan. Nalabit a makadrowingda kadagiti ladawan ti bagida nga agar-aramid kadagitoy a banag (kas iti panagkararag, panangisuro, panagkanta, ken panangawat iti sakramento).

• Kalpasan ti panangbasayo iti Moroni 6:4 nga aggigiddan, mabalinyo ken dagiti annakyo ti mangsapul kadagiti ladawan wenno pagarigan dagiti nasustansia a taraon ket idiligyo ti panangtaraon iti bagitayo iti “pannakataraon iti nasayaat a balikas ti Dios.” Mabalinyo pay a buyaen ti video a “Defenders of the Faith” (Gospel Library).

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ni Moroni iti Kueba, ni Jorge Cocco