Ammo ni Moroni no ania ti rikna ti agmaymaysa iti nadangkes a lubong—nangruna kalpasan ti ipapatay ti amana iti gubat ken nadadael dagiti Nephite. “Natdaak a maymaysa,” insuratna. “Awan gagayyemko wenno asino man a papanak” (Mormon 8:3, 5). Mabalin a kasla awanen ti namnama dagiti banag, ngem nasarakan ni Moroni ti namnama iti pammaneknekna nga “agtultuloyto dagiti agnanayon a panggep ti Apo” (Mormon 8:22). Ket ammo ni Moroni a ti kangrunaan a paset dagita nga agnanayon a panggep ket ti Libro ni Mormon—ti kasuratan a sipapasnek nga ilepleppasnan, ti kasuratan nga iti maysa nga aldaw ket mangisubli iti adu a tao “iti pammatida ken Cristo” (Mormon 8:16; 9:36). Ti pammati ni Moroni kadagitoy a kari ti namagbalin a posible tapno ipakdaarna kadagiti masakbayan nga agbasbasa iti daytoy a libro, “Agsaritaak kadakayo a kasla addakayo” ken “Ammok a denggenyonto dagiti balikasko” (Mormon 8:35; 9:30). Ita adda kadatayon dagiti balikasna, ket ti aramid ti Apo ket agtultuloy a maaramid, gapu ta nagtalinaed da Mormon ken Moroni a napudno iti misionda, uray no nagmaymaysada.
Dagiti Kapanunotan iti Panagsursuro iti Pagtaengan ken iti Simbaan
“Mamati ken ni Jesucristo” ken “agkammatalek iti ebanghelio[na].”
Kalpasan ti panangyababana iti kasuratan dagiti taona, inted ni Mormon ti panggibus a mensahena iti Mormon 7. Apay iti panagkunayo a pinilina daytoy a mensahe? Ania ti kaipapanan kadakayo ti “agkammatalek iti ebanghelio ni Cristo”? (Mormon 7:8).
Kitaen met iti “I Believe in Christ,” Hymns, no. 134.
Sinaludsod ni Presidente Russell M. Nelson: “No naidiaya kadakayo dagiti diamante wenno rubi wenno ti Libro ni Mormon, ania koma ti pilienyo? Kinapudnona, ania ti dakdakkel ti pategna kadakayo?” (“The Book of Mormon: What Would Your Life Be Like without It?,” Liahona, Nob. 2017, 61).
Makapagtungpalak kadagiti bilin uray no saan nga agtungpal dagiti dadduma.
No dadduma mabalin a mariknayo nga agmaymaysakayo iti panagreggetyo a mangtungpal kadagiti bilin. Ania ti masursuroyo manipud iti pagwadan ni Moroni a makatulong? (kitaen iti Mormon 8:1–11). No mabalinyo a damagen ken ni Moroni no kasano a nagtalinaed a napudno, ania ti panangkunayo nga isaona?
Impakita ni Jesucristo ken ni Moroni no ania ti napaspasamak idi dumteng ti Libro ni Mormon (kitaen iti Mormon 8:34–35), a nangiturong kenkuana tapno mangted kadagiti nabatad a ballaag para iti aldawtayo. Bayat ti panangbasayo iti Mormon 8:26–41 ken 9:1–30, utobenyo no kasano a mayaplikar kadakayo dagiti balikasna. Kas pagarigan, kadagitoy a bersikulo agdamag ni Moroni iti 24 a saludsod. Ania ti makitayo a pakakitaan kadagitoy a saludsod a nakita ni Moroni iti aldawtayo? Kasano a makatulong ti Libro ni Mormon kadagiti karit a nakita ni Moroni?
Dumngeg iti Espiritu. Ikasoyo dagiti kapanunotan ken riknayo, nga uray no kasla awan pakainaiganda iti basbasaenyo. Mabalin a dagita nga impresion ti kayat ti Nailangitan nga Amayo a masursuroyo. Kas pagarigan, ania dagiti impresion nga adda kadakayo kalpasan ti panagutobyo kadagiti saludsod ni Moroni iti Mormon 9:1–30?
Inleppas ni Moroni dagiti sinurat ti amana babaen ti nabileg a mensahe para kadagiti tao iti aldawtayo a saan a mamati kadagiti milagro (kitaen iti Mormon 8:26; 9:1, 10–11). Apay a mariknayo a kasapulan ita ti pammati kadagiti milagro? Sukisokenyo ti Mormon 9:9–11, 15–27 ken Moroni 7:27–29 ket utoben dagiti saludsod kas iti:
Ania ti masursurok maipapan iti Mangisalakan manipud kadagitoy a bersikulo?
Ania ti masursurok maipapan kadagiti milagro, iti napalabas ken iti agdama?
Ania dagiti benepisio ti panamati a ni Jesucristo ti Dios dagiti milagro? Ania dagiti bunga ti saan a panamati iti daytoy?
Ania dagiti milagro—dadakkel ken babassit—a trinabaho ti Mangisalakan iti biagko? Ania ti isuro kaniak dagitoy a milagro maipapan Kenkuana?
Insuro ni Presidente Russell M. Nelson: “Ti Mangisalakan ken Mannubottayo, ni Jesucristo, aramidennanto dagiti sumagmamano a kabilgan nga aramidna iti nagbaetan ita ken iti yaayna manen. Makitatayto dagiti namilagruan a pakakitaan a ti Dios Ama ken ti Anakna, ni Jesucristo, idauluandanto daytoy a Simbaan iti kinangayed ken kinatan-ok” (“Revelation for the Church, Revelation for Our Lives,” Liahona, Mayo 2018, 96). Ania ti mariknayo a mabalin a sumagmamano kadagitoy a milagro? Ania ti maaramidyo tapno matulongan ti Mangisalakan a maipatungpal dagitoy?
Ania ti masursuroyo maipapan iti pammati ken milagro manipud kadagiti padas dagiti Santo iti Samoa, Tonga, Fiji, ken Tahiti idi sinarungkaran ida da Presidente ken Sister Nelson? (kitaen iti Russell M. Nelson, “Christ Is Risen; Faith in Him Will Move Mountains,” Liahona, Mayo 2021, 101–4).
Kitaen met iti Ronald A. Rasband, “Behold! I Am a God of Miracles,” Liahona, Mayo 2021, 109–12; Gospel Topics, “Miracles,” Gospel Library.
Dagiti Kapanunotan para iti Panangisuro kadagiti Ubbing
Paneknekan ti Libro ni Mormon ken ti Biblia ti maipapan ken ni Jesucristo.
Tapno mayunay-unay ti relasion ti Biblia ken ti Libro ni Mormon, kas iti inaramid ni Moroni, mabalinyo ti agay-ayam iti game a kas iti daytoy a kaduayo dagiti annakyo: Kiddawenyo kadakuada a mangisao iti “Daan a Tulag, Baro a Tulag” no ingatoyo ti maysa a kopia ti Biblia ken “Mainayon a Pammaneknek” no ingatoyo ti maysa a kopia ti Libro ni Mormon. Mabalinyo pay ti agpili iti sumagmamano a pasamak nga agpada a paneknekan ti Biblia ken ti Libro ni Mormon—kas iti pannakayanak, ipapatay, ken Panagungar ni Jesus—ket awisenyo dagiti annakyo a mangsapul kadagiti ladawan dagitoy a pasamak (kas pagarigan, iti Libro ti Arte ti Ebanghelio).
Tapno matulongan dagiti annakyo a makasursuro iti maikawalo a pagannurotan ti pammati, mabalinyo nga isurat ti tunggal balikas iti nagsisina a papel. Awisenyo dagiti annakyo a mangurnos kadagiti balikas iti husto nga urnos ket uliten daytoy iti sumagmamano a gundaway.
Makapagtungpalak kadagiti bilin uray pay no mariknak ti ti panagmaymaysa.
Ti pagwadan ni Moroni ket mabalin a mangparegta kadagiti annakyo nga agtungpal kadagiti bilin ti Dios uray no mariknada ti panagmaymaysa? Kalpasan a binasayo ti Mormon 8:1–7 a kadua ida, mabalinda ti mangibinglay no ania koma ti nariknada no isuda ni Moroni. Kadagiti bersikulo 1, 3, ken 4, ania ti naibilin ken ni Moroni nga aramidenna, ken kasano a tinungpalna? Kasano a makapagbalintayo nga ad-adda a kas ken ni Moroni?
Nalabit a mabalinyo a pagsasaritaan kadagiti annakyo maipapan kadagiti situasion a nasken a pilienda ti naimbag ken dakes no awan ti mangbuybuya. Kasano a nakatulong ti kaadda ti pammati ken ni Jesucristo kadagitoy a situasion? Ti kanta a kas iti “Stand for the Right” (Children’s Songbook, 159) ti mabalin a mangnayon iti daytoy a panaglilinnawag.
Mabalin a kayatyo nga ilawlawag kadagiti annakyo a ti milagro ket maysa a banag nga aramiden ti Dios tapno maipakitana ti pannakabalinna ken bendisionanna ti biagtayo. Kalpasanna mabalinyo a basaen dagiti ragup ti balikas manipud iti Mormon 9:11–13, 17 a mangiladawan iti sumagmamano kadagiti milagro ti Dios, ket mabalin a panunoten dagiti annakyo ti dadduma pay a milagro (dagiti ladawan manipud iti Libro ti Arte ti Ebanghelio, kas kadagiti num. 26, 40, 41, ken 83, ti makatulong). Isaritayo maipapan kadagiti milagro nga inaramiden ti Dios iti biagyo.
Ipakitayo kadagiti annakyo ti maysa a recipe, ket pagsasaritaan no ania ti mapasamak no nalipatanyo nga ikabil ti maysa a kangrunaan a ramen. Aggigiddan a basaenyo ti Mormon 8:24 ken 9:20–21 a mangsapul iti “ramen” a mabalin a mangiturong kadagiti milagro manipud iti Dios.
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Ladawan
Ni Moroni a kumitkita iti pannakadadael dagiti Nephite
Ni Moroni a Kumitkita iti Pannakadadael dagiti Nephite, ni Joseph Brickey