Lix saqenkil li rilob’aal kilemtz’un chiruheb’, xb’aan laj Gary L. Kapp

7–13 octubre: “K’ehomaq reetal, nujenaq xsahil inch’ool”

3 Nefi 17–19

Li Jesukristo ak kixnumsi li kutan chi k’anjelak chiruheb’ li wankeb’ sa’ li ch’och’ Naab’alil, sa’ xk’utb’al lix evangelio, sa’ xkanab’ankileb’ li tenamit chirilb’al ut chixch’e’b’aleb’ li k’ob’olal sa’ lix junxaqalil waklijenaq chi yo’yo, ut sa’ xch’olob’ankil xyaalal naq a’an li yeechi’inb’il aj Mesias. Ak xwulak xhoonalil naq tento taaxik. “Ak xwulak inhoonal,” chan (3 Nefi 17:1). Taasutq’iiq rik’in lix Yuwa’, ut kixnaw naq eb’ li tenamit ke’raj ru hoonal re xk’oxlankil sa’ xch’ooleb’ li k’a’ru kixk’ut chiruheb’. A’an kixyeechi’i naq taasutq’iiq wulajaq ut kixkanab’eb’ li tenamit chi xik sa’ rochocheb’. A’b’an maajun xko’o. Ink’a’ ke’xye li ke’reek’a sa’ xch’ooleb’, a’b’an li Jesus kiru chixk’eeb’al reetal: ke’royb’eni naq a’an “taakanaaq chik junpaataq rik’ineb’” (3 Nefi 17:5). Wan naab’al chik lix k’anjel aajeleb’ ru, a’b’an aajel ajwi’ ru choq’ re xk’utb’al li ruxtaan choq’ reheb’ li ralal xk’ajol li Dios. Jo’kan naq li Jesus kikana jun chik k’amok. Li kik’ulman chirix a’an maare a’an li esilal q’axal ch’ina-us chirix rilb’aleb’ li komon li tz’iib’anb’il resil sa’eb’ li loq’laj hu. Eb’ li ke’wan aran ka’ajwi’ ke’xye naq ink’a’ naru chi yeemank chan ru xchaab’ilal (chi’ilmanq 3 Nefi 17:16–17). Chirix li musiq’ejil hoyonik a’in li moko k’uub’anb’il ta, li Jesus kixye: “Anajwan ut k’ehomaq reetal, nujenaq xsahil inch’ool” (3 Nefi 17:20).

Li na’leb’ re tzolok sa’ li ochoch ut sa’ li iglees

3 Nefi 17; 18:24–25, 30–32

Li Kolonel kixk’ut rik’in xb’aanuhom chan ru tento taa’uxq rilb’aleb’ li komon.

Ke’wan tana 2,500 chi komon aran naq kixk’utb’esi rib’ li Kolonel, a’ut a’an toj kixtaw xhoonal re rilb’al li junjunq reheb’. Chan ru naq kik’anjelak chiruheb’ sa’ 3 Nefi 17; 18:24–25, 28–32? K’a’ruheb’ li rajomeb’ ru li kixtenq’aheb’ wi’? K’a’ru kixb’aanu re naq chaab’il tz’aqal lix k’anjel? Naru nakak’oxla chan ru nak’anjelak a’an chawu. Chan ru naru nakataaqe lix b’aanuhom a’an? (Chi’ilmanq ajwi’ 3 Nefi 18:24–25 ut 28–32.)

Chi’ilmanq ajwi’ “Jesucristo siente compasión y sana a las personas” (video), Biblioteca del Evangelio.

3 Nefi 17:13–22; 18:15–25; 19:6–9, 15–36

Li Kolonel kixk’ut chiwu chan ru tijok.

K’oxla chan raj ru rab’inkil li Kolonel chi tijok chawix. Chan ru naq rab’inkil a’an tixjal raj chan ru nakattijok laa’at? K’oxla li na’leb’ a’in naq nakawil 3 Nefi 17:13–22; 18:15–25; ut 19:6–9, 15–36. K’a’ru nakatzol rik’in lix b’aanuhom ut lix k’utum li Jesukristo chirix li tijok? Naru nakak’e reetal jo’q’e, chan ru, b’ar, ani aj chi’ix, ut k’a’ut naq nokotijok. K’a’ chik ru li na’leb’ nakak’ul sa’eb’ li raqal a’in?

Chi’ilmanq ajwi’ Tzol’leb’ ut Sumwank 10:5.

3 Nefi 18:1–12

Naru ninnujak rik’in li Musiq’ej naq nink’ul li loq’laj wa’ak.

Wi naqab’aanu k’a’ruhaq chi kok’ aj xsa’, wan naq nab’aanuman yal chi jo’kan malaj yal pak’axinb’il. Wan naq naqab’aanu chi ink’a’ k’oxlanb’il. K’a’ru naru nakab’aanu re naq ink’a’ taak’ulmanq a’an rik’in li k’ojob’anb’il k’anjel re li loq’laj wa’ak nakattz’aqon wi’ rajlal xamaan. Naq nakawil 3 Nefi 18:1–12, k’oxla chan ru nakatru chi “nujak” sa’ musiq’ej rajlal naq nakak’ul li loq’laj wa’ak (chi’ilmanq ajwi’ 3 Nefi 20:1–9). Jo’ naxye sa’eb’ li raqal 5–7, 11, k’a’ruheb’ li k’a’aq re ru “junelik” tento taab’aanu? Naru ajwi’ nakak’oxla k’a’ut naq li Jesus kixk’e qe li k’ojob’anb’il k’anjel re li loq’laj wa’ak—ut ma yoo li loq’laj wa’ak chixk’eeb’al chi uxk li rajom a’an sa’ laa yu’am? K’a’ut naq nim xloq’al li loq’laj wa’ak choq’ aawe?

Sa’ “Recordarle siempre” (Liahona, febrero 2018, 4–6), li Awa’b’ej Henry B. Eyring kixye “oxib’ li na’leb’ chirix li naru neke’jultiko’ aawe rajlal xamaan naq nakak’uleb’ li loq’laj eetalil re li loq’laj wa’ak.” K’a’ru li mas nawulak chawu chirix li kixye? K’a’ru naru nakab’aanu re xchaab’ilob’resinkil laa loq’onihom sa’ li loq’laj wa’ak ut chiru li xamaan?

K’a’ chik ru naru nakab’aanu re loq’onink chi anchal chik aach’ool? Naru nakapatz’ aawib’ a’in: “Chan ru naq lix mayej li Kolonel naxtoch’ inyu’am wulaj wulaj? “K’a’ru yookin chixb’aanunkil chi us jo’ xtzolom, ut chan ru naru tinchaab’ilob’resi wib’?”

Chi’ilmanq ajwi’ Mateo 26:26–28; Jeffrey R. Holland, “K’ehomaq reetal lix Karneer li Dios,” Jolomil ch’utub’aj-ib’ re abril 2019; “Naq naqakʼul li eetalil,” Eb’ li B’ich, 103; “Jesucristo establece la Santa Cena” (video), Biblioteca del Evangelio; Temas del Evangelio, “Santa Cena,” Biblioteca del Evangelio.

K’e aahoonal chi k’oxlak. Wan naq li xtzolb’aleb’ li loq’laj hu naraj naxye rilb’aleb’, tijok chirixeb’, ut xtz’ilb’aleb’ rix sa’ k’a’uxlej. Naq nakak’e aahoonal chi k’oxlak sa’ ch’anch’ookilal ut chi aatinak rik’in li Dios chirix li yookat chixtzolb’al, naru nakanimob’resi xwankil li raatin a’an sa’ laa yu’am.

3 Nefi 18:22–25

Naru “nintaqsi” lix saqen li Jesukristo.

K’oxla naq wan raj jun laa wamiiw li maak’a’ naxnaw chirix li Jesukristo, ka’ajwi’ naq laa’at nakattaaqenk re. K’a’ru tixk’oxla raj laa wamiiw chirix li Jesukristo a’ yaal aab’aanuhom laa’at? K’a’ru naraj naxye choq’ aawe naq “taataqsi laa saqen re taaruuq taalemtz’unq chiru li ruchich’och’”? (3 Nefi 18:24). K’a’ chik ru kixye li Kolonel sa’ 3 Nefi 18:22–25 li nakatxtenq’a chixtaqsinkil li saqen a’an?

Chi’ilmanq ajwi’ Bonnie H. Cordon, “De modo que vean,” Liahona, mayo 2020, 78–80.

3 Nefi 18:36–37; 19:6–22

Eb’ lix tzolom li Jesukristo neke’xsik’ li maatan re li Santil Musiq’ej.

K’oxlaheb’ li tij toje’ aak’ehom. K’a’ru nakatzol rik’ineb’ laa tij chirix li tz’aqal rajom aach’ool? Chirix junjunqeb’ li kutan rik’in li Kolonel, li ch’utch’uukil tenamit “ke’tijok re xk’ulb’al li k’a’ru k’a’jo’ ajb’il xb’aaneb’”—li maatan re li Santil Musiq’ej (3 Nefi 19:9). K’a’ut naq jwal atawal ru li maatan re li Santil Musiq’ej? Naq nakawileb’ li raqal a’in, k’oxla li rajom aach’ool laa’at re tat-ochb’eeniiq xb’aan li Santil Musiq’ej. Chan ru naru nakasik’ chi anchal aach’ool li rochb’eeninkil?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

3 Nefi 17:7, 20–25

Li Kolonel naxraheb’ chi junjunqal li ralal xk’ajol li qaChoxahil Yuwa’.

• Naru nakawoksi jun jalam-uuch jo’eb’ li wankeb’ sa’ li tusleb’ aatin a’in malaj li video “Jesucristo ora y los ángeles ministran a los niños” (Biblioteca del Evangelio) re xtenq’ankileb’ laa kok’al chixtawb’al ru li seraq’ sa’ 3 Nefi 17. Naru nakawileb’ li ch’ol aatin malaj eb’ li raqal sa’ 3 Nefi 17 li neke’aatinak chirix lix rahom li Kolonel choq’ reheb’ li tenamit (jo’eb’ li raqal 7 ut 20–25). Laa kok’al naru neke’xyiib’ xjalam-uucheb’ a’an rochb’een li Jesukristo. Naq yooqeb’ chixb’aanunkil a’an, tenq’aheb’ chixk’oxlankil chan ru naq li Jesus naxk’ut lix rahom choq’ reheb’ a’an.

K’ehomaq reetal lee kok’al, xb’aan laj Gary L. Kapp

3 Nefi 18:1–12

Naru nink’oxla li Jesukristo naq nink’ul li loq’laj wa’ak.

• Naru nakapatz’ reheb’ laa kok’al naq te’xye aawe k’a’ru nak’ulman sa’ li loq’laj wa’a’k. Chirix a’an naru nakayaab’asi 3 Nefi 18:1–12 ut nakapatz’ reheb’ laa kok’al naq te’xtaqsi li ruq’ naq te’rab’i k’a’ruhaq juntaq’eet rik’in li naqab’aanu laa’o sa’ li kutan a’in. K’a’ru naraj li Jesukristo naq taajultiko’q qe malaj taqak’oxla sa’ li loq’laj wa’ak? (chi’ilmanq 3 Nefi 18:7, 11).

3 Nefi 18:15–24; 19:6–9, 15–36

Li Jesus kixk’ut chiwu chan ru tijok.

• Xb’ichankil jun li b’ich chirix li tijok, maare “Natijok jun ch’ina al” (B’ichleb’aal choq’ reheb’ li Kok’al, 6–7), naru naxtenq’aheb’ laa kok’al chixk’oxlankil li rajb’al naq nokotijok. Chirix a’an naru nekeril 3 Nefi 18:18–21 ut tex’aatinaq chirix li kixk’ut li Jesus chirix li tijok. Xb’oqb’aleb’ laa kok’al chixyeeb’al k’a’ru neke’reek’a naq neke’tijok naru naxtenq’aheb’ chixwotzb’al xnawomeb’ xch’ool chirix li tijok.

• Maare taawulaq chiruheb’ laa kok’al xb’aanunkil jun b’atz’unk re xsik’b’aleb’ li osob’tesink re li tijok. Naru nakatz’iib’aheb’ li raqal a’in reheb’ li loq’laj hu chiruheb’ kok’ hu, toja’ naq taamuqeb’: 3 Nefi 18:15; 3 Nefi 18:20; 3 Nefi 18:21; 3 Nefi 19:9; ut 3 Nefi 19:23. Laa kok’al naru neke’xtaweb’ li hu ut neke’rileb’ li raqal re xtawb’al li k’a’ru kixk’ut li Jesukristo malaj eb’ lix tzolom chirix li tijok.

Re xtawb’al xkomon chik li na’leb’, chi’ilmanq li hu Amigos re li po a’in.

Eb’ li anjel ke’kanjelak chiruheb’, xb’aan laj Walter Rane.