Meram in Paotokin Eaar Romaak ilo Er, jān Gary L. Kapp

Oktoba 7–13: “Lo, Aō Lan̄lōn̄”

3 Nipai 17–19

Jisōs Kraist ej kab m̧ōj an kar joļo̧k juon raan n̄an kōm̧m̧ane jerbal in karejar eo an ilo āne in Bun̄-peļo̧k, katakin gospel eo An, leļo̧k n̄an armej ro iien n̄an lo im en̄jake jeno̧k ko ilo ānbwin eo Ānbwinin kar ālkin jerkakpeje, im kam̧ool bwe E eo kar Rilo̧mo̧o̧r eo me rekar kallim̧ur kake. Kiiō iien em̧m̧akūt. Eaar ba, “iien eo Aō epaak.”(3 Nipai 17:1). Eaar aikuj in jepļaak n̄an ippān Jemān, im Eaar jeļā bwe armej ro raar aikuj iien n̄an kōļmenļo̧kjeņ kōn ta eo Eaar kwaļo̧k. Kōn menin, kar kallim̧ur n̄an bar jepļaaktok raan eo tok juon, Eaar jilkinļo̧k jarlepju eo n̄an im̧ōko im̧weer. Bōtaab ejjeļo̧k juon eaar ilo̧k. Raar jab ba ta eo raar en̄jake, ak Jisōs eaar jeļā wōt: raar kōjatdikdik Enaaj kar “pād wōt aetokļo̧k ippāer” (3 Nipai 17:5). Ebar wōr An men ko raorōk n̄an kōm̧m̧ani, ak eaar kwaļo̧k tiriam̧o n̄an ro nejin Anij ej aolep men eo eaorōktata Ippān. Kōn menin Jisōs ekar bar pād aetokļo̧k. Ta eo eaar waļo̧ktok ālkin eaar bōlen waanjon̄ak eo ejouj tata kōn jerbal in karejar me em̧ōj kar je ilo jeje ko rekwojarjar. Ro raar pād remaron̄ in kar ba wōt bwe eaar pen kōmeļeļeik (lale 3 Nipai 17:16–17). Jisōs Make eaar ba ilo jetōb in naan ko reļam waan im kajoor: “Kiiō lo, Aō lan̄lōn̄ eobrak.” (3 Nipai 17:20).

Ļōmnak ko n̄an Ekkatak ilo M̧weeo im ilo Kabun̄

3 Nipai 17; 18:24–25, 28–32

Rilo̧mo̧o̧r eo ej waanjon̄ak eo ad eweeppān kōn jerbal in karejar.

Emaron̄ 2,500 armej ro raar pād ke Rilo̧mo̧o̧r eaar waļo̧k ļo̧k, aaet Eaar lo juon wāween n̄an jerbal in karejar n̄an er juon ilo̧k juon. Ta eo kwoj keememeje kōn wāween An kar jerbal in karejar ilo 3 Nipai 17; 18:24–25, 28–32? Ta aikuj ko Eaar jerbal in karejar n̄ani? Ta m̧wiļ ko ekar kōm̧m̧an bwe jerbal in karejar eo An em̧m̧an? Kwomaron̄ barāinwōt ļōmņak kōn wāween An jerbal in karejar n̄an eok. Elmen am̧ maron̄ ļoor waanjon̄ak eo An? (Bar lale 3 Nipai 18:24–25 im 28–32.)

Bar lale “Jesus Christ Has Compassion and Heals the People” (pija), Gospel Ļāibrāre.

3 Nipai 17:13–22; 18:15–25; 19:6–9, 15–36

Rilo̧mo̧o̧r eaar katakin eō kilen jar.

Pijaikļo̧k enaaj kar elmen n̄e kwoj ron̄ an Rilo̧mo̧o̧r jar kōn kwe. Elmen an en̄jake in jelet wāween am̧ jar? Kōļmenļo̧kjeņ kake menin ilo am̧ katak 3 Nipai 17:13–22; 18:15–25; im 19:6–9, 15–36. Ta eo kwoj katak jān waanjon̄ak eo an Jisōs Kraist im katak ko kōn jar? Ļōmņak in pukot ļōmņak ko kōn elmen, n̄āāt, ia, n̄an wōn, im etke jar. Ta ļōmņak ko jet kwoj būki jen eoon kein?

Bar lale Katak im Bujen Ko 10:5.

3 Nipai 18:1–12

Imaron̄ in obrak kōn Jetōb ilo aō bōk kwojkwoj eo.

N̄e jej emakijkij kōm̧m̧ane juon men, emaron̄ erom̧ juon iminene. Jet iien jej kōm̧m̧ane ilo ad jab ļōmņake. Elmen am̧ maron̄ kōjparok jān an waļo̧k ilo kain̄i eo ekwojarjar an kwojkwoj kajjojo wiik? Ilo am̧ riiti 3 Nipai 18:1–12, kōļmenļo̧kjeņ elmen am̧ maron̄ “obrak” kōn jetōb kajjojo iien kwoj bōk kwojkwoj eo (bar lale 3 Nipai 20:1–9). Ekkar n̄an eoon 5–7, 11, ta jet iaan men ko kwoj aikuj “iien otemjej” kōm̧m̧ane? Kwomaron̄ bar kōļmenļo̧kjeņ etke Jisōs ekar letok n̄an kōj kain̄i eo an kwojkwoj—im bwe kwojkwoj eo ej kadedeļo̧k jibadbad ko An ilo mour eo am̧. Etke kwojkwoj eo ekwojarjar n̄an eok?

Ilo ennaan eo an “Keememej E IIen Otemjej” (Liaona, Pāp. 2018, 4–6), Būreejtōn Henry B. Eyring gave “jilu kōļmenļo̧kjeņ ko kōn ta eo komaron̄ keememej ilo am̧ bōk m̧ōttan kwojkwoj eo kajjojo wiik.” Ta eo ejiktok ippam̧ kōn elmakwot ko an? Ta eo kwomaron̄ kōm̧m̧ane n̄an kōkm̧anm̧anļo̧k am̧ kabun̄jar ilo iien kwojkwoj eo im ilo aolepen wiik eo?

Ta ko jet kwomaron̄ kōm̧m̧ane n̄an kōļap meļeļein am̧ kabun̄jar? Kwomaron̄ kajjitōkin eok make kajjitōk kein āinwōt: “Elmen an en̄taan eo an Rilo̧mo̧o̧r im̧we kajjojo raan in aō mour?” “Ta eo ij kōm̧m̧an em̧m̧an āinwōt juon An rikaļoor, im ta eo imaron̄ kōkm̧anm̧anļo̧k?”

Bar lale Matu 26:26–28; Jeffrey R. Holland, “Lo Ļaam̧ eo an Anij,” Liaona, Māe 2019, 44–46; “As Now We Take the Sacrament,” Hymns, no. 169; “Jesus Christ Introduces the Sacrament” (video), Gospel Library; Gospel Topics, “Sacrament,” Gospel Ļaibrāre.

Kōm̧m̧an iien n̄an kōlmenļo̧kjen. Jet iien, katak jeje ko rekwojarjar ebōk riit, jar, im kōļmenļo̧kjeņ. N̄e kwoj kōtļo̧k jidik iien n̄an kōļmenļo̧kjeņ im kōnono ippān Anij kōn ta eo kwoj ekkatak, kwonaaj kōļapļo̧k kajoor in naan eo An ilo mour eo am̧.

3 Nipai 18:22–25

Imaron̄ “kotak lōn̄ļo̧k” meram eo an Jisōs Kraist.

Jen ba ewōr juon m̧ōttam̧ eo ejjab jeļā kōn Jisōs Kraist ijoke kwoj juon iaan ro Rikaļooraņ. Ta eo m̧ōttam̧ ej ba kōn E, pedped ioon kōm̧m̧an ko am̧? Ta meļeļein n̄an eok n̄an “kotak ami meram bwe en maron̄ kōmeramļo̧k laļ”? (3 Nipai 18:24). Ta karuwainene ko jet Rilo̧mo̧o̧r ej litok ilo 3 Nipai 18:22–25 me ejipan̄ eok kotak lōn̄ļo̧k meram in?

Bar lale Bonnie H. Cordon, “Bwe Ren Maron̄ Lo,” Liaona, Māe 2020, 78–80.

3 Nipai 18:36–37; 19:6–22

Rikaļoor ro an Jisōs Kraist rej kappukōt menin letok eo an Jetōb Kwojarjar.

Lōmnak kin jar ko am̧ make kiiō. Ta eo jar ko am̧ rej katakin eok kōn ikdeelel ko am̧ rem̧wilaļ tata? Ālkin joļo̧k juon raan ilo im̧aan mejān Rilo̧mo̧o̧r, jarlepju eo “raar jar kōn men eo raar kanooj kōņaan”—menin letok eo an Jetōb Kwojarjar (3 Nipai 19:9). Etke menin letok eo an Jetōb Kwojarjar eaorōk? Ilo am̧ riiti eoon kein, kōļmenļo̧kjeņ kōn ikdeelel eo am̧ make n̄an jemjerā eo an Jetōb Kwojarjar. Elmen am̧ maron̄ kappukot jemjerā in?

N̄an waanjon̄ak, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak n̄an Katakin Ajri ro

3 Nipai 17:7, 20–25

Rilo̧mo̧o̧r ej iakwe aolep ro nejin Jemedwōj Ilan̄.

• Kwomaron̄ kōjerbal juon pija āinwōt ko ilo laajrak in ak pija eo “Jesus Christ Prays and Angels Minister to the Children” (Gospel Library) n̄an jipan̄ ajri ro loe bwebwenato eo ilo 3 Nipai 17. Ļōmņak in riiti naan ko ak eoon ko jān 3 Nipai 17 me rej kwaļo̧k kōn iakwe eo an Rilo̧mo̧o̧r n̄an armej ro eoon 7 im 20–25). Ajri ro nejum̧ remaron̄ jin̄aik juon pijaier make ippān Jisōs. Ilo aer kōm̧m̧ane, jipan̄ er ļōmņake wāween ko Jisōs eaar kwaļo̧k An iakwe n̄an er.

Lo Ro Reddik Nejimi, jān Gary L. Kapp

3 Nipai 18:1–12

Imaron̄ ļōmņak kōn Jisōs n̄e Ij bōk kwojkwoj eo.

• Bōlen kwomaron̄ kajjitōk ippān ajri ro n̄an jiron̄ eok ta eo ej waļo̧k ilo iien kwojkwoj eo. Innām kwomaron̄ riiti 3 Nipai 18:1–12 im kajjitōk ippān ajri ro nejum̧ n̄an kajutak peier n̄e rej ron̄ men eo āinwōt juon jej kōm̧m̧ane rainin. Ta eo Jisōs Kraist ekōņaan bwe jen keememeje ak ļōmņake ilo iien kwojkwoj eo? (lale 3 Nipai 18:7, 11).

3 Nipai 18:15–24; 19:6–9, 15–36

Jisōs ej katakin eō kilen jar.

• Al ippān doon juon al kōn jar, āinwōt “A Child’s Prayer” (Children’s Songbook, 12–13), ej juon wāween em̧m̧an n̄an jipan̄ ajri ro nejum̧ ļōmņake etke jej jar. Kwe im ajri ro nejum̧ maron̄ riiti 3 Nipai 18:18–21 im kōnono kōn ta eo Jisōs ekar katakin kōn jar. Karuwaineneik ajri ro nejum̧ n̄an kwaļo̧k n̄an eok elmen aer en̄jake n̄e rej jar me emaron̄ jipan̄ er kwaļo̧k naan in kam̧ool eo aer kōn jar.

• Emaron̄ limo n̄an ajri ro n̄an etal im kappukot kōjeraam̧m̧an ko jet raorōk kōn jar. Kwomaron̄ je eoon in jipan̄ kein ilaļ ioon juon peba im ņooji: 3 Nipai 18:15; 3 Nipai 18:20; 3 Nipai 18:21; 3 Nipai 19:9; im 3 Nipai 19:23. Innām ajri ro nejum̧ remaron̄ pukot peba ko im riiti eoon ko, pukot men ko Jisōs Kraist ak rijilōk ro An rekar katakin kōn jar.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Angels Ministered unto Them, jān Walter Rane.