Jilu Nipai: Jon̄oulruo Rein Ro Ikar Kāālet, jān Gary L. Kapp

Jeptōm̧ba 30–Oktoba 6: “N̄a Kien eo, im Meram eo”

3 Nipai 12–16

Āinwōt ro rikaļooran Jisōs me raar kuk ippān doon ilo Toļ Galilee, armej ro me raar aiin doon ilo tampeļ eo ilo ānen Bun̄peļo̧k kar mour ium̧win kien Moses. Raar ļoore kōnke eaar tōlļo̧k jetōb ko aer n̄an Kraist (lale Jekab 4:5im kiiō Kraist eaar jutak im̧aer, kean̄ kōn kien eo eutiejļo̧k. Bōtaab jekdo̧o̧n ro iaad me rejjan̄in kar mour kōn kien Moses remaron̄ kile bwe jon̄ak eo Jisōs eaar ejaake n̄an rikaļoor ro An ejjuon kien eutiej. “Ikōņaan bwe kom̧in weeppān,” Eaar kwaļo̧k (3 Nipai 12:48). Eļan̄n̄e menin ekōm̧m̧an am̧ en̄jake likjab, keememej bwe Jisōs eaar barāinwōt ba, “em̧ōņōņō ro rej jeram̧ōl ilo jetōb ro rej itok n̄an Eō, bwe aer aelōn̄ in lan̄” (3 Nipai 12:3). Kien in eutiejļo̧k ej juon kūr—bar juon wāween ba “ itok n̄an Eō im mour” (3 Nipai 12:20). Āinwōt kien Moses, kien in ej bōkļo̧k kōj n̄an Kraist—Eo ej make wōt me emaron̄ lo̧mo̧o̧ren im koweeppān kōj. “Lo,” Eaar ba, “N̄a kien eo, im meram eo. Kom̧in reitok n̄an eō, im niknik n̄an jem̧ļo̧kin, im kom̧ naaj mour” (3 Nipai 15:9).

Ļōmnak ko n̄an Ekkatak ilo M̧weeo im ilo Kabun̄

3 Nipai 12–14

Imaron̄ juon rikaļoor em̧ool an Jisōs Kraist.

En̄in ej juon wāween n̄an ekkatak im bōk ta eo Rilo̧mo̧o̧r eaar kwaļo̧k ilo 3 Nipai 12–14: Kāālet juon eoon, im lale n̄e kwomaron̄ kōmeļeļeik ilo juon jentōj me ej jino kōn “Rikaļoor ro rem̧ool an Jisōs Kraist …” N̄an waanjon̄ak, jidik kōmeļeļeik ilo 3 Nipai 13:1–8 emaron̄ “Rikaļoor ro Rem̧ool an Jisōs Kraist rejjab kappok nōbar n̄an kōm̧m̧an em̧m̧an.” Kajjieon̄ in eoon kein:

• 12:3–16:

• 12:38-44:

• 13:19-24:

• 14:1–5:

• 14:21–27:

• Eoon ko jet me rej im̧we eok

Ālkin riiti eoon kein, ta eo kwoj en̄jake eaar im̧we eok n̄an ļoor Jisōs Kraist?

Kien eo ilo 3 Nipai 12:48 emaron̄ in ļap—em̧ool epen. Ta eo kwaar ekkatak jen ennaan eo an Elder Jeffrey R. Holland “Em̧ool—Kom̧ Naaj Weeppān” (Liaona, Okt. 2017, 40–42) me enaaj jipan̄ eok meļeļe naan ko an Rilo̧mo̧o̧r ilo eoon in? Ekkar n̄an Moronai 10:32–33, ta eo ej kapidodoik n̄an weeppān āinwōt Rilo̧mo̧o̧r?

Bar lale Dallin H. Oaks, “The Challenge to Become,” Ensign, Nov. 2000, 32–34; Unin Kōnono ko an Gospel in, “Become like Jesus Christ,” Gospel Library; “Lord, I Would Follow Thee,” Hymns, no. 220; “Jesus Christ Teaches How to Live the Higher Law” (video), Gospel Library.

Kōjerbal mennin katakin ko. Rilo̧mo̧o̧r eaar kwaļo̧k m̧ool ko jen kōjerbal kein katakin ko eirļo̧k wōt. Kwomaron̄ kōm̧m̧ani men ko eirļo̧k wōt juon ilo am̧ katak ak kwaļo̧k kōn 3 Nipai 12. Kalimjōke ak jibwe jidik jo̧o̧l, juon kāāntōļ, ak juon kopā n̄an kōdepakpak ekōnono eo kōn m̧ool ko indeeo Rilo̧mo̧o̧r ekar katakin.

3 Nipai 12:1–2; 15:23–24; 16:1–6

Em̧ōņōņō ro rej tōmak ilo jab loe.

Keidi n̄an aolepān oran ro nejin Anij raar lo Rilo̧mo̧o̧r im ron̄ Ainikien, āinwōt armej ro ilo ānen Bun̄-peļo̧k. Elōn̄ wōt iaad eļapļo̧k aer āinwōt armej ro kar kōmeļeļiki ilo 3 Nipai 12:2; 15:23; im 16:4–6. Ta kallim̧ur ko kar kōm̧m̧ani n̄an kain armej rōt kein ilo eoon kein? Elmen an kallim̧ur kein kar kūrm̧ool ilo mour eo am̧?

Bar lale Jon 20:26–29; 2 Nipai 26:12–13; Alma 32:16–18.

3 Nipai 12:21–30; 13:1–8, 16–18; 14:21–23

Imaron̄ kajjieon̄ kakwojarjar kōņaan ko an būruwō.

Juon unin kōnono kwomaron̄ kile ilo jebta kein ej kūr eo an Rilo̧mo̧o̧r n̄an mour juon kien eutiejļo̧k—n̄an mour jim̧we ejjab wōt ilo kōm̧m̧an ko ad ak barāinwōt ilo būruwōd. Pukot unin kōnono in ke Rilo̧mo̧o̧r ej kōnono kōn aitwerōk (3 Nipai 12:21–26), mour etoon (3 Nipai 12:27–30), jar (3 Nipai 13:5–8), im jitlo̧k (3 Nipai 13:16–18). Ta waanjon̄ak ko jet kwomaron̄ loi? Ta eo kwomaron̄ kōm̧m̧ane bwe ikdeelel ko an būruwōd en ļapļo̧k an wānōk?

3 Nipai 14:7–11

Jemedwōj Ilan̄ enaaj letok n̄an eō men ko rem̧m̧an n̄e ij kajjitōk, kappukot, im kaļļaļļaļ

Āinwōt am̧ riiti kūr eo an Irooj ilo 3 Nipai 14:7–11 n̄an kajjitōk, kappukōt, im kaḷḷaḷḷaḷ, kōļmenļo̧kjeņ kōn ta “men ko rem̧m̧an” Emaron̄ kōņaan bwe kwon kajjitōk kaki. Dam̧oļo̧k in jeje kein rekwojarjar remaron̄ jipan̄ eok meļeļe elmen kajjitōk, kappukōt, im kaļļaļļaļ. Remaron̄ barāinwōt jipan̄ kōmeļeļeik etke jet jar rejjab uwaak ilo wāween eo kwoj kōtmene: Aiseia 55:8–9; Hilamōn 10:4–5; Moronai 7:26–27, 33, 37; im Katak im Bujen Ko 9:7–9; 88:64. Elmen an eoon kein jelet wāween am̧ kajjitōk, kappukot, im kaļļaļļaļ?

Bar lale Milton Camargo, “Kajjitōk, Kappukot, im Kaļļaļļaļ,” Liaona, No̧b. 2020, 106–8.

N̄an waanjon̄ak, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.

Ļōmņak ko n̄an Katakin Ajri ro

3 Nipai 12:14–16

Imaron̄ juon waanjon̄ok n̄an ļoor Jisōs.

• Jet iien ajri ro rejjab kile ewi jon̄an an waanjon̄ok ko aer maron̄ kōjeraam̧m̧an ro jet. Kōjerbal 3 Nipai 12:14–16 n̄an rōjan̄ er n̄an romaake aer meram. N̄an waanjon̄ak, n̄e kwoj riiti “kwe” ak “am̧” ilo eoon kein, kajjitōk ippān ajri ro n̄an jitōn̄ er make. Ba n̄an ajri ro kōn meram eo kwoj loe ilo er n̄e rej ļoor Jisōs Kraist im elmen an im̧we eok n̄an bar ļoor E. Al ippān doon juon al me ej rōjan̄ ajri ro n̄an romaak āinwōt juon meram, āinwōt “I Am like a Star” (Children’s Songbook, 163).

• N̄an rōjan̄ ajri ro nejum̧ n̄an jab ņooje meram eo aer (lale 3 Nipai 12:15), kōtļo̧k aer bōk kuņaer ņooje ak pinej juon ļaam̧ ak jet meram. Remaron̄ joļo̧k aer pinej meram eo aolep iien rej ba juon men remaron̄ kōm̧m̧an n̄an waanjon̄ak n̄an ro jet.

3 Nipai 13:19–21

“Likūt n̄an kom̧ mennin aorōk ko ilo lan̄.”

• Riiti eoon kein remaron̄ ļōn̄aj ekōnono eo kōn men ko jej kaorōki. Bōlen kwomaron̄ tōl ajri ro nejum̧ n̄an pukot juon men eaorōk me ej kakeememej er kōn mennin aorōk eo eaorōk indeeo.

3 Nipai 14:7–11

Jemedwōj Ilan̄ ej ron̄jake im uwaaki jar ko aō.

• Ilo am̧ riiti 3 Nipai 14:7, kajjitōk ippān ajri ro nejum̧ n̄an kōm̧m̧an m̧akūtkūt n̄an pinej jenkwan kūr ko kajjojo an Rilo̧mo̧o̧r ilo eoon in. N̄an waanjon̄ak, remaron̄ kajutak peier (kajjitōk), kōm̧m̧ani pekūlaaj kōn peier (kappukot), ak āinwōt n̄e rej kōllaļlaļe ilo juon kōjem (kōllaļlaļ). Jipan̄ ajri ro ļōmņaki men ko remaron̄ ba im kajjitōk kaki ilo jar ko aer.

• Ajri ro nejum̧ remaron̄ kōņaan juon ikkure me rej kajjitōk juon men im bōk jet men reoktakļo̧k. Ilo 3 Nipai 14:7–11, ta eo Rilo̧mo̧o̧r ej kōņaan bwe jen jeļā kōn Jemedwōj Ilan̄?

3 Nipai 14:21–27; 15:1

Rilo̧mo̧o̧r ekōņaan bwe in ron̄jake im kōm̧m̧ane ta eo Ej kwaļo̧ke.

• Ļōmņak kōn wāween ko kwomaron̄ jipan̄ baam̧le eo am̧ pijaikļo̧k būrabōļ eo ilo eoon kein. Bōlen ro uwaan baam̧le eo remaron̄ jin̄aik pija ko, kōm̧m̧ani kōl ko, ak kalōk men ko ioon pedped eo epen im ebokbok. Remaron̄ bar pinej jenkwan etaer n̄an “armej eo māletlet” ilo aer riiti 3 Nipai 14:24–27 ak al “The Wise Man and the Foolish Man” (Children’s Songbook, 281). Ak remaron̄ jutak aolep iien n̄e rej ron̄ naan eo “kōm̧m̧ani” ilo 3 Nipai 14:21–27 im 15:1.

• En̄in juon menin katak kwomaron̄ kajjieon̄: kajjitōk ippān ajri ro nejum̧ n̄an antoone n̄e juon iaan ne ko neer ej pinej jenkwan ron̄jake naan ko an Rilo̧mo̧o̧r im eo juon ej pinej jenkwan kōm̧m̧ane ta eo Rilo̧mo̧o̧r eaar kwaļo̧k. Karuwaineneik ajri ro nejum̧ n̄an kajjieon̄ palene nee eo neen “ron̄jake.” Ta eo enaaj waļo̧k n̄e juon kōto ekajoor ej uk tok ruum̧ eo? Innām kwe im ajri ro nejum̧ maron̄ pukot men ko rekkar Rilo̧mo̧o̧r ekar katakin kōj n̄an kōm̧m̧ani: lale 3 Nipai 12:3–12, 21–26; 13:5–8.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Rilo̧mo̧o̧r ej Loļo̧k Armej ro ilo Amedka, jān Glen S. Hopkinson