N̄a Meram in Laļ, jān James Fullmer

Jeptōm̧ba 23–29: “Kom̧in Jutak im Wōnm̧aantak n̄an Ippa”

3 Nipai 8–11

“Lo, N̄aij Jisōs Kraist, eo rikanaan ro raar kam̧ool ke Enaaj itok n̄an laļ.” (3 Nipai 11:10). Kōn naan kein, jerkakpeje Rilo̧mo̧o̧r eaar kwaļo̧k kadkadin E make, kakūrm̧ool elōn̄ļo̧k jān 600 iiō ko kōn kanaan ko ilo Bok in Mormon. “Waļo̧kļo̧k eo im kean̄ eo,” Elder Jeffrey R. Holland eaar je, “rej men ko raorōk tata, iien eo eļap tata, ilo aolepān bwebwenato an Bok in Mormon. Eaar loļo̧k eo im jem̧ļo̧k eo me kar karon̄ im im̧we aolep rikanaan in Rinipai ro. … Aolep raar kōnono kōn e, al kōn e, ettōņak kōn e, im jar kōn waļo̧kļo̧k eo an—bōtaab en̄in eaar lukkuun in waļo̧k. Raan n̄an raan! Anij eo ej aolep bon̄ōn ko remarok n̄an meram in jibbon̄ kar waļo̧k” (Christ and the New Covenant [1997], 250–51).

Bar lale “Jesus Christ Appears in the Ancient Americas” (video), Gospel Ļaibrāre.

Jesus Christ Appears in the Ancient Americas | 3 Nephi 8–11

Ominous destruction comes upon the people of Ancient America. Hope returns as survivors gather and witness the Resurrected Christ descend from Heaven.

Ļōmņak ko n̄an Ekkatak ilo M̧weeo im ilo Kabun̄ in

3 Nipai 8–11

Jisōs Kraist ej Meram eo an Laļ in.

Kwomaron̄ keememej naan ko rej āinwōt marok jilōn̄lōn̄ im meram emakijkij an waļo̧k ilo 3 Nipai 8–11. Ta eo kwoj katak jen jebta kein kōn jetōbin marok jilōn̄lōn̄ im meram? (lale, n̄an waanjon̄ak, 3 Nipai 8:19–23; 9:18; 10:9–13). Ta eo ej bōktok marok jilōn̄lōn̄ n̄an mour eo am̧? Ta eo ej bōktok meram? Etke kwoj ļōmņak Rilo̧mo̧o̧r eaar kāālet n̄an kwaļo̧k kadkadin E make āinwōt “meram im mour an laļ”? (3 Nipai 9:18; 11:11).

M̧akūtkūt ko kōmeļeļeiki ilo 3 Nipai 9–11 rej ilubwilijin ko rekwojarjar tata ilo Bok in Mormon. Kadikdik riiti, im lukkuun kōļmenlo̧kjeņ. En̄rein rej jet iaan kajjitōk ko n̄an jipan̄ eok. Ļōmņak in je im̧we ko me rej itok n̄an eok.

• Elmen aō kar en̄jake n̄e in kar pād ilubwiljin armej rein?

• Ta eo ej im̧we eō kōn Rilo̧mo̧o̧r ilo jebta kein?

• Ijeļā bwe Jisōs Kraist ej aō Rilo̧mo̧o̧r.

• Elmen an Jisōs Kraist juon meram ilo mour eo aō?

Bar lale Sharon Eubank, “Kraist: Meram eo Me ej Romaak ilo Marok,” Liaona, Māe 2019, 73–76.

Je im̧we ko. N̄e kwoj je im̧we ko an jetōb kwoj būki, enaaj ļapļo̧k am̧ būki.

3 Nipai 9–10

Jisōs Kraist ej kijooror in jeorļo̧k bōd.

Elder Neil L. Andersen eaar kwaļo̧k, “Ij kam̧ool bwe Rilo̧mo̧o̧r eo ej maron̄ im ekjooror n̄an jeorļo̧k jerawiwi ko ad (“Repent … That I May Heal You,” Liahona, Nov. 2009, 40). Lale 3 Nipai 9–10 kōn kein kam̧ool eo kōn tūriam̧o an Kraist im An kijooror n̄an jeorļo̧k bōd. Ta eo kwoj loe ilo 3 Nipai 9:13–22; 10:1–6 me ej jipan̄ eok en̄jake iakwe im tūriam̧o eo an Rilo̧mo̧o̧r eo? Ke kwaar en̄jake An “kakweilo̧ktok” im “naajdik” eok? (lale 3 Nipai 10:4).

3 Nipai 9:19–22

Irooj ej aikuji “bōro e rup im jetōb ettā.”

M̧okta jen itok eo an Rilo̧mo̧o̧r, katok kōn menin mour ekar juon kōkaļļein en̄taan eo an Jisōs Kraist (lale Moses 5:5–8). Ta kien eo ekāāl Rilo̧mo̧o̧r ekar letok ilo 3 Nipai 9:20–22? Elmen an jitōn̄ļo̧k kōj n̄an E im en̄taan eo An?

Ta meļeļein n̄an eok n̄an leļo̧k juon katok in juon bōro erub im jetōb ettā? Etke kwoj en̄jake bwe Rilo̧mo̧o̧r ekōņaan katok in jān kwe?

3 Nipai 11:1–8

Ij maron̄ ekkatak n̄an ron̄jake im meļeļe ainikien Anij.

Elmen am̧ jeļā n̄e Anij ej kōnono n̄an eok? Bōlen en̄jake eo an armej ro ilo 3 Nipai 11:1–8 emaron̄ jipan̄ eok meļeļe jet pedped in katak ko kōn ron̄jake im meļeļe ainikien Anij. Kwomaron̄ kile piktok ko kōn ainikien Anij me armej ro raar ron̄jake im ta eo raar kōm̧m̧ane n̄an kōkm̧anm̧anļo̧k meļeļe kake.

Emaron̄ bar jipan̄ n̄an lale eoon ko jet me ej kōmeļeļeik ainikien Anij ak im̧we in Jetōb eo An. Erkein rej jejjo̧ iaer: Bōlen, ālkin riiti eoon kein, kwomaron̄ je jet unin tōl n̄an kile revelesōn: 1 Kiin̄ Ro 19:11–12; Galatia 5:22–23; Alma 32:27–28, 35; Hilamōn 10:2–4; Ether 4:11–12; Katak im Bujen Ko 9:7–9; 11:11–14.

Kwomaron̄ bar jeraam̧m̧an jān ron̄jake rikanaan ro rainin, rijilōk ro, im ritōl ro jet an Kabun̄ ro raar ron̄ im ļoor ainikien Anij. Jet iaer rej kwaļo̧k en̄jake ko n̄an “Ron̄jake E!” video koļāākjen ilo Gospel Ļaibrāre. Ļōmņak in alooje juon ak eļōn̄ļo̧k.

Elmen am̧ mour kake ta eo kwaar ekkatak n̄an ron̄ im kile eļapļo̧k ainikien Anij?

Bar lale Russell M. Nelson, “Ron̄jake E,” Liaona, Māe 2020, 88–92; “This Is My Beloved Son,” Children’s Songbook, 76; Unin Kōnono ko an Gospel in, “Personal Revelation,” Gospel Ļāibrāre.

Juon lo̧k Juon, jān Walter Rane

3 Nipai 11:8–17

Jisōs Kraist ej kūr eō n̄an bōk juon aō make naan in kam̧ool kōn E.

Emaron̄ 2,500 armej raar kuk ippān doon ilo ipeļaakin tampeļ eo ke Jisōs Kraist eaar waļo̧k (lale 3 Nipai 17:25). Jekdo̧o̧n oran in eļap, Rilo̧mo̧o̧r eo eaar kūr er kajjojo “juon ilo̧k juon” n̄an en̄jake jenkwan dila ko ilo Pein im Neen (3 Nipai 11:14–15 Ilo am̧ riiti, ļōmņake ta eo en kar āinwōt ijo. Ilo wāween ta ko Rilo̧mo̧o̧r eaar kūr kwe bwe “kom̧in jutak im wōnm̧aantak n̄an” Ippān? (3 Nipai 11:14).

N̄an ļomņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Kōnke Jabōt in ej Jabōt ļalem ilo allōn̄ in, Rūkaki ro an Būraimere rej rōjan̄ er n̄an kōjerbale m̧akūtkūt in ekkatak ko ilo “Appendix B: Kōpooj Ajri ro n̄an juon Mour Ejjeļo̧k Jem̧ļo̧kin ilo Iaļen Bujen in an Anij.”

3 Nipai 8–9

N̄e ij pād ilo marok jilōn̄lōn̄, Jisōs Kraist emaron̄ aō meram.

• N̄an jipan̄ ajri ro nejum̧ keidi en̄jake in ilo 3 Nipai 8–9, kwomaron̄ bar ba ak ron̄jake juon rekoot in jimettan in jebta kein ilo juon ruum̧ emarok. Ekōnono kōn ta eo emaron̄ in kar āinwōt n̄an pād ilo maroklep eo ium̧win raan ko jilu. Innām kwomaron̄ kōnono etke Jisōs Kraist kar ņaetan E Make Meram in Laļ (lale 3 Nipai 9:18). Ta eo Jisōs ekar kūr armej ro, im kōj, n̄an kōm̧m̧ane bwe En maron̄ ad meram? (lale 3 Nipai 9:20–22).

3 Nipai 10:4–6

Jisōs ej kōjparok armej ro An āinwōt an lo̧lo̧ eo kōjparok tokki ko nejin.

• Kōļmenļo̧kjeņ eo kōn juon lo̧lo̧ ej aiin tokki ko nejin emaron̄ in juon kein katakin ekajoor n̄an jipan̄ ajri ro meļeļe piktok eo an Rilo̧mo̧o̧r eo im mijen eo. Kwomaron̄ riit 3 Nipai 10:4–6 ilo an baam̧le eo am̧ lali juon pijain juon lo̧ļo̧ im tokki ko nejin. Etke lo̧lo̧ eo ej aikuj in aiin tokki ko nejin? Etke Rilo̧mo̧o̧r eo eaar kōņaan kepaakeļo̧k kōj n̄an E? Elmen ad itok n̄an Ippān n̄an lo kōjparok?

3 Nipai 11:1–15

Jisōs Kraist ej kūr eō n̄an itok n̄an Ippān.

• Elmen am̧ naaj jipan̄ ajri ro nejum̧ en̄jake Jetōb ilo am̧ riiti 3 Nipai 11:1–15 ippān doon? Bōlen kwomaron̄ kajjitōk ippāer n̄an ba n̄an eok n̄e rej lo jet men ilo eoon kein me ejipan̄ er en̄jake iakwe eo an Anij. Kwomaron̄ kōm̧m̧an ejja āinwōt ilo pija ko ilo laajrak in ak pija eo “Jisōs Kraist ej Waļo̧k ilo Tampeļ eo” (Gospel Library). Ba n̄an ajri ro nejum̧ kōn wāween am̧ en̄jake n̄e kwoj riit im kōļmenļo̧kjeņ kōn iien kein. Kōm̧m̧an bwe ren bar kwaļo̧k en̄jake ko aer.

  Jesus Christ Appears at the Temple | 3 Nephi 11:1–17

  The people of Ancient America come to Bountiful and gather. They hear the voice of God the Father introduce His Son. They witness Jesus descending from heaven and testify He is the Savior of the world.

3 Nipai 11:1–8

Anij ej kōnono n̄an eō ilo ainikien edik, emera.

• Bōlen kwomaron̄ riiti jet iaan eoon kein ilo mera, “ainikien edik” (3 Nipai 11:3). Ak kwomaron̄ kejo̧ juon rekoot in al āinwōt “This Is My Beloved Son” (Children’s Songbook, 76) ilo mera me epen n̄an ron̄. Ta eo armej ro raar aikuj in kōm̧m̧ane n̄an meļeļe ainikien eo jān lan̄? (lale eoon 5–7). Ta eo jej ekkatak jān en̄jake eo aer?

3 Nipai 12:21–26

Jisōs Kraist ekōņaan bwe in peptaij.

• Riiti 3 Nipai 11:21–26, im kajjitōk ippān ajri ro nejum̧ n̄an jutak aolep iien n̄e rej ron̄ naan eo peptaij. Ta eo Jisōs ekar katakin kōn peptaij? Eļan̄n̄e ajri ro nejum̧ raar lo juon peptaij m̧okta, kajjitōk ippāer n̄an kōmeļeļeik ta eo raar loe. Etke Jisōs ekōņaan bwe in peptaij?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Juon Seperd, jān Howard Lyon.