Samuel riLeman eo ioon Wōrwōr eo, jān Arnold Friberg

Jeptōm̧ba 9–15: “Naan in Lan̄lōn̄ im M̧ōņōņō Eļap”

Hilamōn 13–16

Jinoin an kar Samuel RiLeman eo kar kajjieon̄ n̄an kwaļo̧k “naan ko rem̧m̧an” ilo Zarahemla (Hilamōn 13:7), riNipai ro me rekar kapen būruwier rekar makoko in ron̄jake im rekar kadiwōjļo̧ke. Kwomaron̄ ba eaar āinwōt n̄e raar kalōk juon wo̧o̧l epen deļo̧n̄e ipeļaakin būruwier jon̄an eaar bōbrae er jān aer eo̧ron̄ ennaan eo an Samuel. Samuel eaar meļeļe aorōkin ennaan eo eaar kwaļo̧ke im eaar kwaļo̧k an tōmak ilo an ļoor kien eo an Anij “bwe en bar ro̧o̧lļo̧k, im kanaan” (Hilamōn 13:3). Āinwōt Samuel, jej aolep ioon wo̧o̧ļ ko ilo ad “kōpooj iaļ eo an Irooj” (Hilamōn 14:9) im kajjieon̄ ļoor rikanaan ro An. Im āinwōt Samuel, jej barāinwōt kwaļo̧k kam̧ool kōn Jisōs Kraist, “eo em̧ool Enaaj itok,” im kūr aolep n̄an “tōmak ilo etan” (Hilamōn 13:6; 14:13). Ejjab aolep renaaj ron̄jake, im jet remaron̄ niknik ilo jum̧ae kōj. Bōtaab ro rej tōmak lo ennaan in kōn tōmak ilo Kraist rej lo bwe em̧ool ej “naan ko rem̧m̧an kōn lan̄lōn̄ eļap” (Hilamōn 16:14).

Ļōmnak ko n̄an Ekkatak ilo M̧weeo im ilo Kabun̄

Hilamōn 13

Irooj ej letok kakkōl ko kōn rikanaan ro An.

Ilo jeje ko rekwojarjar, rikanaan ro jet iien rej keidi er n̄an riwaj ro ioon juon wo̧o̧ļ ak tawōr me rej kakkōl kōn kauwōtata ko (lale Aiseia 62:6; Ezekiel 33:1–7). Ilo am̧ katak naan ko an Samuel ilo Hilamōn13, ļōmņake elmen an juon riwaj n̄an kwe. Ta eo ekar ba me rekkar n̄an tōre in ad? (lale eļaptata eoon 8, 21–22, 26–29, 31, im 38). N̄an waanjon̄ak, ta eo Samuel ekar kwaļo̧k kōn ukweļo̧k? kōn ettā im m̧weie? kōn pukot m̧ōņōņō “ilo kōm̧m̧an nana”?

Kwomaron̄ bar kappukot ennaan ko an kweilo̧k eo ej kab jem̧ļo̧k kōn kakkōl ko rej āinwōt juon me Irooj eaar liļo̧k n̄an rikanaan ro rainin. Ta eo kwoj en̄jake n̄an kōm̧m̧ane kōn kōkaļļe kein?

Pukot Jon̄ok ko. Juon jon̄ak ej juon karōk ak m̧ōņōkjān me maron̄ kōjerbale āinwōt juon unin tōl n̄an kadedeļo̧ke juon jerbal. Ilo jeje ko rekwojarjar, jej lo jon̄ak ko me rej kwaļo̧k ekōjkan an Irooj kadedeļo̧k jerbal eo An, eo āinwōt jilkinļo̧k ro Rikarejeran n̄an kakkōl armej ro.

Ilo ad ron̄jake rikanaan ro, rej kōnono kōn Jisōs Kraist

Hilamōn 13–15

Anij ej kūr kōj n̄an ukweļo̧k.

Kakkōl ko an Samuel kōn ekajet eo an Anij ejejjet kōn jouj in kūr n̄an ukweļo̧k. Lale karuwainene ko ilo Hilamōn 13–15 (lale eļaptata Hilamōn 13:6–11; 14:15–19; 15:7–8). Ta eo jej katak jān eoon kein kōn ukweļo̧k? Jet armej rej lo ukweļo̧k āinwōt juon kaje eļap—men eo n̄an kōjekdoone. Ilo am̧ ļōmņak, elmen an kar Samuel kōņaan bwe riNipai ro ren lo ukweļo̧k?

Ilo am̧ m̧aanjabpopo n̄an katakin, ļōmņak in ekkatak ennaan eo an Būreejtōn Russell M. Nelson “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k” (Liaona,, Māe 2019, 67). Elmen an kōmeļeļeik ukweļo̧k? Ta kōjeraam̧m̧an ko an m̧oolin ukweļo̧k kwoj loi ilo enaan in an? Kwomaron̄ bar lale men ko rekkar me rikanaan eo ekar kūr kōj n̄an ukoti. Ta eo Jetōb Kwojarjar ej jiron̄ eok ke kwoj aikujin ukote? Ļōmņak in je revelesōn eo am̧ make kwoj bōke.

Elmen an ukweļo̧k oktak jen baj ukōt m̧wilid? Etke eaorōk n̄an bōk kūr eo an Anij n̄an ukweļo̧k? Ilo am̧ kōļmenļo̧kjeņ ilo menin, ļōmņak in al ak ron̄jake juon al me ej kwaļo̧k kūr in, āinwōt “How Gentle God’s Commands” (Hymns, no. 125).

Bar lale “Jisōs Kraist Enaaj Jipan̄ Kwe,” N̄an Kōkajoorļo̧k Jodikdik ro: Juon Tōl n̄an Kōm̧m̧ani Kāālet ko, 6–9; “Repentance: A Joyful Choice,” “Principles of Peace: Repentance” (videos), Gospel Ļāibrāre; Unin Kōnono ko an Gospel in “Repentance,” Gospel Ļaibrāre.

Hilamōn 14; 16:13–23

Anij eaar jilkintok kōkaļļe ko im kabwilōn̄lōn̄ ko n̄an kam̧ool kōn ļotak im mej eo an Rilo̧mo̧o̧r.

Ilo Hilamōn 14, Samuel eaar kōmeļeļeik bwe Irooj eaar letok kōkaļļein ļotak im mej eo an Rilo̧mo̧o̧r bwe armej ro “ren maron̄ jeļā kōn… itok eo An” im “tōmak ilo Etan” (Hilamōn 14:12). Ilo am̧ katak kōn Hilamōn 14, je kakōļļe ko kōn ļotak eo an Rilo̧mo̧o̧r ilo eoon 1–8 im kakōļļe ko kōn mej eo An ilo eoon 20–28. Etke kwoj ļōmņak kakōļļe kein renaaj kar wāween ko rejejjet n̄an kwaļo̧k kakōļļein ļotak im mej eo an Jisōs Kraist?

Men ko an juon make im kakōļļe ko remaron̄ jipan̄ eok “tōmak ilo etan [Rilo̧mo̧o̧r.” Ta eo ekar kōm̧m̧ane n̄an kōkajoor am̧ tōmak ilo E?

Ta kakkōl eo ej waļo̧k kōn kakōļļe ko ilo Hilamōn16:13–23? Ekōjkan am̧ maron̄ kōjekdoon m̧wil eo an armej ro kar kōmeļeļeik kaki ilo eoon kein?

Bar lale Alma 30:43–52; Ronald A. Rasband, “Kōn Karōk eo Ekwojarjar,” Liaona, No̧b. 2017, 55–57.

Hilamōn 15:3

Kauwe jān Irooj ej juon kakōļļe in An iakwe.

Naan ko an Samuel ewōr ie elōn̄ kauwe ko reļļap, ak Hilamōn 15:3 ej letok juon kōļmenļo̧kjeņ ejenolo̧k kōn kauwe eo jān Irooj. Elmen an kauwe in jān Irooj erom juon kōkkaļļe kōn iakwe eo An? Ta menin kam̧ool eo kwoj loe kōn iakwe eo an Irooj im tiriam̧o ilo kanaan im kakkōl eo an Samuel?

Ļōmņak in katak enaan eo an Elder D. Todd Christofferson “As Many as I Love, I Rebuke and Chasten” (Liaona, May 2011, 97–100), pukot jibadbad ko jilu rekwojarjar an kauwe. N̄āāt eo kwaar lo jan Anij jerbal ilo jekjek kein ilo mour eo am̧?

Hilamōn 16

Rikanaan ro rej jitōn̄ļo̧k eō n̄an Jisōs Kraist.

Ilo Hilamōn 16, ta eo kwoj ekkatak jān ro raar bōk katak ko an Samuel? Ta eo kwoj ekkatak jān ro raar jab bōk e? Ļōmņak elmen an kar jipan̄ eok n̄an ļoor rikanaan ro remour epaakļo̧k Jisōs Kraist.

N̄an waanjon̄ak, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Hilamōn 13:2–5

Anij emaron̄ kōnono n̄an eō ilo buruwō.

• Elmen am̧ maron̄ katakin ajri ro nejum̧ bwe Anij emaron̄ kōnono ilo būruwōd, āinwōt An kar kōm̧m̧ane n̄an Samuel? Bōlen kwomaron̄ kajjitōk ippāer n̄an kwaļo̧k wāween ko reoktak n̄an kōnono ilo ejjeļo̧k naan (āinwōt jiknōļ ak en̄jake). Menin emaron̄ tōlļo̧k n̄an juon ekōnono ilo wāween ko reoktak bwe Jemedwōj Ilan̄ ej kōnono n̄an kōn̄. Āinwōt m̧ōttan ekōnono in, kwe im ajri ro nejum̧ remaron̄ kalimjōk pijain Samuel riLeman eo (laajrak in ewōr ruo) im riiti Hilamōn 13:2–5 ilo an ajri ro nejum̧ ron̄jake elmen an Anij kar jiron̄ Samuell ta eo en ba.

• Elōn̄ iaad—eļaptata ajri ro—raikuj jipan̄ ekkatak n̄an kile elmen im n̄āāt eo Anij ej kōnono n̄an kōj. Kwomaron̄ jiron̄ ajri ro nejūm̧ kōn juon iien ke Jetōb Kwojarjar eaar jipan̄ eok jeļā ilo būruwōm̧ ta eo Anij ekōņaan bwe kwon kōm̧m̧ane ak ba. Kōmeļeļeik elmen am̧ kar jeļā bwe Anij ekar kōnono n̄an eok. Bōlen ajri ro nejum̧ remaron̄ bar kwaļo̧k jabdewōt en̄jake āinwōt juon ippāer.

Hilamōn 14:2–7, 20–25

Rikanaan ro rej kwaļo̧k kōn Jisōs Kraist.

• Al ippān doon “Samuel Tells of the Baby Jesus” (Children’s Songbook, 36) emaron̄ in juon wāween em̧m̧an n̄an katakin ajri ro nejum̧ ta eo Samuel ekar kwaļo̧ke kōn Jisōs Kraist. Kwaļo̧k “Jebta 40: Samuel the Lamanite Tells about Jesus Christ” (Bwebwenato ko an Bok in Mormon, 111–13) ej bar juon. Ta eo Samuel ekar katakin kōn Rilo̧mo̧o̧r? Bōlen kwomaron̄ bar kwaļo̧k ta eo rikanaan ro raan kein rej kwaļo̧k kōn E. Elmen an naan ko aer kōļapļo̧k ad tōmak ilo E?

Hilamōn 16:1–6

Ij jeraam̧m̧an ilo aō ļoor rikanaan eo.

• Kwomaron̄ kōļapļo̧k an ajri ro nejum̧ lōke rikanaan eo n̄an kwaļo̧k n̄an er waanjon̄ak ko an armej ro raar tiljek. Jet iaer rej waļo̧k ilo Hilamōn 16:1, 5. Ilo am̧ riit, ajri ro nejum̧ remaron̄ jutak n̄e rej ron̄ men eo armej ro rekar kōm̧m̧ane ke raar tōmak ilo naan ko an Samuel. Innām , ilo am̧ riiti eoon 2 im 6, ajri ro nejum̧ remaron̄jijet n̄e rej ron̄ kōn juon men armej ro raar km̧m̧ane ke rekar jab tōmak. Elmen ad maron̄ kwaļo̧k ke jej tōmak naan ko an rikanaan eo emour? Ba n̄an ajri ro elmen am̧ kar jeraam̧m̧an ilo am̧ ļoor kapilōk eo an Irooj kōn rikanaan ro An.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjiin.

Samuel riLeman eo, jān Lester Yocum.