Kraist: Meram eo Me ej Romaak ilo Marok
N̄e kwoj en̄jake bwe meram in naan in kam̧ool eo am ej ejekadkad im marok ej epaaktok, bōk peran. Kōjparok kallim̧ur ko am̧ n̄an Anij.
Opiij eo aō ilo Relief Society Building eo em̧m̧an ijo lale ļo̧k Salt Lake Temple eo. Aolep bon̄, kōn jetjet in an jerbal āinwōt juon waj, tōm̧a ko nabōjān tampeļ eo rej ebbōl n̄e ej jok marok. Tampeļ eo ej juon meram ejjab oktak, ekaenōm̧m̧an itunabōjān wintō eo aō.
Juon bon̄ ilo Pāpode eo jem̧ļo̧kļo̧k, opiij eo aō ekar pād wōt ilo an tab ke aļ eo eaar tulo̧k. Ilo aō reinabōjļo̧k ilo wintō eo, tampeļ eo ekar marok. Tōm̧a ko rejjan̄in kar ebbōl. Ikar jino būrom̧ōj. Ikar jab maron̄ loe tōrerein tampeļ eo ke ij waate jidik aolep jota elōn̄ iiō ko.
Loe marok ilo ijo ikar kōtmāne ke in kar loe meram ie ej kakeememej eō bwe juon iaan mennin aikuj ko raorōk ewōr ippād n̄an ad maron̄ eddōkļo̧k ej ilo ad ekkejel wōt n̄an jipan̄ eo ad jān meram eo—Jisōs Kraist. E ej unjān kajoor eo ad, Meram eo im Mour eo an Laļ in. Ilo an jako ekkejel eo ekajoor n̄an E, jej jino mej ilo jetōb. Kōnke ejeļā menin, Setan ej kajjieon̄ kōjerbal m̧akūtkūt an laļ in jej aolep jelm̧ai. Ej kajjieon̄ in katinaad meram eo ad, rupe ekkejel eo, kune jikin elletok kajoor eo, kōmakeikļo̧k kōj make ilo marok. Eddo kein rej jekjek ko jeļā kaki ilo mour in, bōtaab Setan ej buuļ jerbal n̄an kōjeno̧lok kōj im jiron̄ kōj bwe kōj wōt jej en̄jaki.
Jet Iaad Rej En̄jake Mejtok in Ānbwinier kōn Būrom̧ōj
N̄e būrom̧ōj ko rej kōjebwebweik kōj, n̄e mour ej lukkuun kōmetak kōj epen ad menono, n̄e kar kakkure kōj āinwōt em̧m̧aan eo ilo iaļ eo n̄an Jericho im kar likūti bwe en mej, Jisōs ej itok im lutōk oil ilo kinej ko ad, kōkōm̧anm̧an an kotak kōj, bōkļo̧k kōj n̄an juon oteeļ, lale kōj.1 N̄an kōj ro jej būromōj Ej ba: “Inaaj … kameraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālikimi, … bwe kom̧in maron̄ jeļā kōn m̧ool in bwe N̄a, Irooj Anij, ij loļo̧k armej ro aō ilo en̄taan ko aer.”2 Kraist ej kemour kinej ko.
Jet Iaad Rej Lukkuun Mōk
Elder Jeffrey R. Holland ekar ba: “Bwe e jab aikuj bwe jen ettōr m̧ōkajļo̧k jān kajoor eo ad. … Ak [jekdo̧o̧n ta] bwe, ijeļā elōn̄ … iaami [elukkuun,] lukkuun m̧ōkaj aer ettōr im bwe kajoor [eo] im en̄jake eo ej letok jipan̄ jet iien ej āinwōt epaak an ejjeļo̧k kobban.”3 N̄e kōtmāne ko rej kaddoik kōj, jemaron̄ bōjrak im kajjitōk ippān Jemedwōj Ilan̄ n̄an jeļā ta eo n̄an kōtļo̧ke. M̧ōttan en̄jake an mour eo ad ej ekkatak ta eo n̄an jab kōm̧m̧ane. Ak mekarta, jet iien mour in maron̄ emaron̄ in lukkuun kam̧ōkm̧ōk. Jisos ej kallim̧uri kōj, “Kom̧win itok n̄an Ippa, kom̧ otemjej rej jerbal in ban, im Inaaj kakkijeik kom̧.”4
Kraist ej m̧ōņōņō in jerbal ippād n̄an jipan̄ ņa mejļan mālijjon̄ ko ad n̄an kōmeraik eddo ko ad. Kraist ej kakkije eo.
Jet Iaad Rej Jab En̄jake Āinwōt Juon Uwaan eo Āinjuon
Kōn un ko rellōn̄, jejjab enjake ad aorōk im menin aikuj. Kallim̧ur Ekāāl ej kwaļo̧k kijejeto ko reļļap Jisōs ekar kōm̧m̧ani n̄an tōpar aolep kain armej ro: rileba ro, ritōltōl eooj ro, ajri ro, Rikaļeļe ro, kōrā enana m̧wilin, kōrā ro, Riparise ro, rijerawiwi ro, Risameria ro, kōrā ro emej pāleer, ritariņa in Rom ro, rilōn̄ ro, ro rejjab erreo. Ilo eitōn aolep bwebwenato, E ej pukōtļo̧k juon eo ekar jab ilo iminene kake kar jab bōke ilo jukjuk in pād.
Luk 19 ej kwaļo̧k bwebwenato eo kōn ritōltōl eooj eo ilo Jericho kar etan Zakkiōs. Ekar tallōn̄e juon wōjke bwe en maron̄ loe an Jesus etetal ijo ļo̧k. Zakkiōs ekar jerbal ippān kien eo an Rirom im kar watōke āinwōt rijorāān im juon rijerawiwi. Jisōs ekar loe ilo raan wōjke eo im kar ikkūrļo̧k n̄an e, im ba, “ Zakkiōs, kwōn jab rum̧wij im to laļ; bwe rainin In pād ilowaan m̧weo im̧ōm̧.”5 Im ke Jisōs ekar loe em̧m̧an eo an būruwōn Zakkiōs im men ko ekar kōm̧m̧ani n̄an ro jet, ekar bōke menin katok eo an, ba, “Rainin lo̧mo̧o̧r ej itok n̄an m̧wiin, bwe e barāinwōt nejin Ebream.”6
Ekar jouj an Kraist jiron̄ļo̧k Rinipai ro, “Iaar jiron̄ bwe ejjeļo̧k juon iaami en ilo̧k.”7 Peter ekar wōr an kajoor in meļeļe ilo Jerbal 10 ke ekar kean̄, “Anij ear katakin eō bwe in jab likūt jabdewōt armej e mo̧ ak jab erreo.”8 Ej juon menin aikuj ejjab oktak an rikaļoor in Kūrijin ro im Armej ro Rekwojarjar ilo Raan ko-Āliktata n̄an kwaļo̧k iakwe n̄an doon.9 Jisos ej letok ejja kain kūr in wōt n̄an kōj im me Ekar leļo̧k n̄an Zakkiōs: “Lo, Ij jutak im̧aan kōjām, im kaļļaļļaļ: eļan̄n̄e jabdewōt armej enaaj ron̄ ainikiō, im kapeļļo̧k kōjām eo, Inaaj deļo̧n̄ļo̧k n̄an e, im naaj kejotak ippān im e Ippa.”10 Kraist ej lo kōj ilo wōjke ko kōtōkkad.
Jet Iaad Jej En̄jake Ad Jab Maron̄ Kāālet Ta Eo Jej Tōmake Kōn Kajjitōk Ko.
Ejjab lōn̄ iiō ko remootļo̧k, ikar edodo im kitōtō kōnke kōn kajjitōk ko im ikar jab maron̄ loe uwaak ko n̄ani. Jibbon̄ tata in juon Jādede, ekar wōr juon aō ettōņak jidikdik. Ilo ettōņak eo ij ikar maron̄ loe juon m̧ōn keladikdik im ikar meļeļe bwe ij aikuj etal in jutak ilowaan. Ekar wōr ļalem arch ko rej kabooļe, ak wintō ko rekar kōm̧m̧an jān deka. Ikar alin̄n̄ūr ilo ettōņak eo, jab kōņaan etal n̄an lowaan kōnke ekar kanuuj ļap an dik im marok. Innām juon ļōmņak ekar jiktok ilo kōļmenļo̧kjeņ eo aō ke brother eo an Jared ekar kijenmej im ļōme deka ko n̄an kūlaaj ko ralikkar. Kūlaaj eo ej deka eo me ekar kōm̧m̧ane jekjek in oktak eo. Ke Irooj ekar an̄ur deka ko an brother eo an Jared, rekar romaakļo̧k kōn meram ilo wa ko remarok.11 Emōkaj aō kar obrak kōn ikdeelel n̄an pād ilowaan mōn keladikdik eo jen bar jikin ko jet. Ekar likun jikin eo—jikin eo wōt—n̄an n̄a bwe in lukkuun “loe.” Kajjitōk ko me rekar kabōņōņōik eō rekar jab jako, ak ļapļo̧k in meram ilo kōļmenļo̧kjeņ eo aō kar kajjitōk eo ālkin aō kar ruj: “Ewi wāween am naaj kōļapļo̧k tōmak eo am, āinwōt brother eo an Jared, bwe deka ko am ren erom meram?”12
Kōmālij ko ad rewabanban kar kōm̧m̧an n̄an kappukōt meļeļe im meļeļe ilo men ko rem̧m̧an. Ijjab jeļā aolep un ko etke rōn̄ōl eo ilo mour in eļap an mijel. Ejjab ijo in ilo eddōkļo̧k eo ad ejjeļo̧k jem̧ļo̧kin ej ijo epād ippād aolep uwaak ko. Ej ijo im jej kōļapļo̧k leke eo ad (ak jet iien kōjatdikdik eo ad) ilo kein kam̧ool kōn men ko jab loi. Leke ej itok ilo wāween ko rejjab aolep iien pidodo karōki, ak ewōr meram ilo marok ko ad. Jisōs ekar ba, “Bwe lo, N̄aij Jemān, N̄aij meram eo, im mour eo, im m̧ool eo an laļ.”13 N̄an ro rej kapukot m̧ool eo, emaron̄ ilo jinoin āinwōt emenin bwebwe ilo pād ilo m̧weo edik kōn wintō ko kar kōm̧m̧an jān dekā. Ak kōn kijenmej im kajjitok ko rem̧ool, Jisōs emaron̄ ukōt wintō dekā ko ad n̄an kūlaaj im meram. Kraist Ej meram eo n̄an lo.
Jet Iaad Jej Enjake Bwe Ejjab Bwe Em̧m̧an Eo Ilo Kōj
Uno buroro eo an Kallim̧ur M̧okta ekar jab rōōj wot ak ebar meej, meļeļein bwe jonan rōōj in uno eo ej pād lo m̧ōttan im ban jakoļo̧k jekdoon jon̄an lōn̄ in iien an kwalkwoļ.14 Setan ej kojerbal un in āinwōt juon bōtta ekilep: m̧ōttan mouj elipijinjin būrōrō maron̄ ban oktak n̄an mouj. Ak Jisōs Kraist ej kwaļo̧k, “Iaļ ko Aō [rej] re utiej jān iaļ ko ami,”15 im kabwilōn̄lōn̄ in iakwe eo An ej bwe n̄e jej ukweļo̧k jān jerawiwi ko ad, Bōtōktōkin ej kōro̧o̧l kōj n̄an erreo. Ejjab alikkar ke, ak ijowot ke em̧ool.
Pija jān iStock.com/iinwibisono
“Men̄e bōd ko ami rej āinwōt būrōrō, renaaj mouj āinwōt sno; men̄e re būrōrō in wōt juon būrōrō eļap an eddo, renaaj āinwōt kooļan sip.”16 Irooj ej ba kōn kajoor: lāeo ak lieo “eo emōj an ukeļo̧k jen … jero̧wiwi, ejja in wōt ej bōk joerļo̧k bōd, im N̄a, Irooj, ij jab bar keememeji.”17 Ilo ba ilo bar juon wāween: Itok jen kōļmenļo̧kjeņ ippān doon.18 Kwaar kōm̧m̧ani bōd ko; aolep rej likjab.19 Itok n̄an ippa im ukweļo̧k.20 Ijjamin naaj bar keememeji.21 Komaron̄ in bar mour.22 Ewōr juon aō jerbal n̄an am̧ kōm̧m̧ane.23 Kraist ej letok jeorļo̧k bōd im karreoik.
Ak ta bun̄tōn ko jej lukkuun aikuj in kōm̧m̧ani? Ta m̧ōttan eo eaorōk tata n̄an bar ekkejel n̄an kajoor eo an Jisōs Kraist n̄e jej pere? Būreejtōn Russell M. Nelson ekar kanooj alikkar an ba: “M̧ōttan eo aorōk tata n̄an kōm̧m̧an im kōjparok bujen ko rekwojarjar. … Ejjab juon wāween eo ekaipokpok.”24 kōm̧m̧an bwe Kraist en iolapen mour eo am̧.25
N̄e kwoj en̄jake bwe meram in naan in kam̧ool eo am ej ejekadkad im marok ej epaaktok, bōk peran. Kōjparok kallim̧ur ko am̧ n̄an Anij. Kajjitōk kajjitok ko am̧. Kōtļo̧k bwe Irooj ej ukōt dekā eo n̄an kūlaaj ilo kijenmej. Oktakļo̧k n̄an Jisōs Kraist, eo ej iakwe wōt eok.
Jisos ekar ba, “N̄a meram eo ej romaak ilo marok, im marok ej jab jeļā E.”26 Bwe ej meļeļein jekdo̧o̧n ta ewi jon̄an kajjieon̄, marok eo ejjab maron̄ kune meram eo. Jekdo̧o̧n ta. Komaron̄ lōke bwe meram eo An enaaj pād n̄an kwe.
Kōj, ak armej ro jej iakwe er, maron̄ pād ilo juon iien marok ekadu. Ilo wāween eo an Salt Lake Temple, menija eo an im̧ōko, Brother Val White, kar bok juon call ilo enan̄in ilo iien eo em̧ōkaj tata. Armej ro raar kile. Ta eo ekar jorrāān ippān tōma ko an tampeļ eo? M̧okta, rijerbal eo ekar etal n̄an aolep jikun jarom ko ilo tampeļ im bar kabbōli tōm̧a ko kōn e make. Innām raar jāniji pāātre ko ilo automatic power suppy eo im kar idajon̄jon̄ er n̄an pukōt ta eo ekar likjab.
Epen n̄an bar kabbōli tōm̧a ko kōn kwe make. Jej aikuji ro m̧ōttad. Jej aolep aikuji doon. Ejjeļo̧k oktak jān rijerbal ro an tampeļ eo im m̧ōko im̧ōn Kabun̄ in, jemaron̄ jipan̄ doon ilo ad jede ilo nememein armej, bar kōkajoor pāātre ko ad ilo jetōb, bar kōm̧m̧ane ta eo ekar bōd.
Meram eo ad make maron̄ āinwōt tōm̧a eo emake ioon juon wōjke. Ak jenaaj maron̄ wōt romaake meram dikdik ko ad, im aolep ippān doon, einwōt Temple Square ilo ien Kūrijm̧ōj, jenaaj kanōltok million armej ro n̄an m̧weo im̧ōn Irooj. Em̧m̧antata eo iaan aolep, āinwōt an Būreejtōn Nelson kar kōketak, jemaron̄ bōktok meram eo an Rilo̧mo̧o̧r eo n̄an kōj make im armej ro raorōk ippād kōn baj jerbal in kōjparok bujen ko ad. Ilo elōn̄ wāween ko, Irooj ej kōjeraam̧m̧an jerbal in tiljek eo kōn kajoor im kōn lan̄lōn̄.27
Ij kam̧ool kom̧ij ro rejitōnbōro. Irooj ejeļā ewi jon̄an am̧ kajjieon̄. Kwoj eddōkļo̧k. Etal wōt. E ej lo aolep kaarmejete ko ro jet rejjab loi im bwini er n̄an em̧m̧an eo am̧ im em̧m̧an eo an ro kwoj iakwe er. Jerbal eo am̧ ejjab waan. Kwoj jab make iaam̧. Lukkuun āt Etan, Emmanuel, ej meļeļe in “Anij ippād”28 Em̧ool E ej pād ippam̧.
Bōk bar jejjo bun̄tōn ko ilo iaļan bujen eo, jekdo̧o̧n eļan̄n̄e ekanooj in marok n̄an lo lukkuun ettoļo̧k. Tōm̧a ko renaaj bar ebbōl. Ij kam̧ool kōn m̧ool eo in naan ko an Jisōs, im rej obrak kōn meram eo.“Kepaaktok Eō im Inaaj pād kepaakwaj kom̧; niknik kappukot eō im kom̧ naaj lo eō; kajjitōk, im kom̧ naaj bōk; kaļļaļļaļ, im enaaj peļļo̧k n̄an kom̧.”29 Ilo etan Jisōs Kraist, Amen.