Ron̄jake Ainikien
Ilo juon laļ eobrak kōn ainikien ko rekapokpok, Jemedwōj Ilan̄ ekar kōm̧m̧an bwe jen maron̄ ron̄ im ļoor Ainikien.
Ekkeinļo̧k ke ej jibbon̄, būratōr eo an kōrā eo pāleeō ekar leļo̧k juon no̧o̧t n̄an kōrā eo pāleeō me ekar jeiki n̄an jinen elōn̄ iiō ko rem̧ootļo̧k. Ilo iien eo, Sister Homer ekar juon leddik jidikdik wōt. Jidikin, no̧o̧t eo ekar riit āinwōt in, “Jino Jitōnbōro, joļo̧k aō bōd bwe ikar jab kwaļo̧k aō naan in kam̧ool rainin—ak ij iakwe eok.” Ke kōm kar etal in mōn̄ā in rālep, ikar ļōmņak bwe ekar juon men ekabwilōn̄lōn̄. Kōn menin, ikar jijet laļļo̧k, im je juon no̧o̧t me ej ba, Jitōnbōro Būreejtōn Nelson, joļo̧k bōd bwe ikar jab kwaļo̧k rainin—ak ij iakwe eok.” Jon̄an ekar jab juon en̄jake em̧m̧an. Kōn menin en̄in kōj kiiō, im ij m̧ōņōņō n̄an kakobaik naan ko aō n̄an ro me em̧ōj aer kar kwaļo̧k ilo m̧wen̄an in rainin.
Elōn̄ iiō ko rem̧ootļo̧k, ikar ekkāke ilo juon baluun jidikdik ippān juon pailōt kāāl ej pād ilo jebwe eo. Ilo jem̧ļo̧kin ekkāke eo am, kōm kar jo̧k ilo ejjeļo̧k uwōta. Ak ke kōm kar epaake laļ, ikar ron̄ ainikien juon alarm ilo ijo m̧aan ej kakkōl pailōt eo bwe en “kelōn̄ļo̧k.” Pailōt eo ekar reilo̧k n̄an co-pailōt eo me eļapļo̧k iminene eo an, eo ekar jitōn̄ļo̧k iaļ eo laļļo̧k, ettoļo̧k jān jikin jo̧k eo, im ekar ba, “Kiiō!”
Baluun eo waan ekar mōkaj an em̧akūt n̄an tuanimiin̄ im jo̧k laļļo̧k, innem wanlōn̄ļo̧k n̄an ijo eutiejļo̧k, kajjejet wōt ilo iaļan jo̧k, im jo̧k ilo ejjeļo̧k uwōta. Jekar jeļā tokālik bwe bar juon baluun ekar tin bar keļo̧k. Jekar ke ļoor kakkōl ko an alarm eo, jemaron̄ kar itaak, ijjeļo̧kin ad ettoļo̧k jān, baluun eo me ekar pojak in keļo̧k. En̄jake in ekar katakin ruo katak ko raorōk: Kein kajuon, iien ko rekauwōtata ilo mour ko ad, jenaaj ron̄ elōn̄ ainikien ko rej jieik doon bwe jen lukkuun ron̄jaki. Kein karuo, eaorōk bwe jen ron̄jake ainikien ko rejim̧we.
Ainikien ko Rej Jieiki Doon
Jej mour ilo juon laļ eo me elōn̄ ainikien ko rej aikuj ad ron̄jaki. Kōn aolep nuuj ko rekabwilōn̄lōn̄, tweets, blogs, podcasts, im naan in rōjan̄ ko me rej kipel kōj jān Alexa, Siri, im ro jet, jemaron̄ lo an pen n̄an jeļā ewi wōt ainikien ko n̄an ron̄jake. Jet iien jej bōk elōn̄ meļeļe ilo mour ko ad, ļōmņak bwe n̄e elōn̄ meļeļe ko ippād enaaj em̧m̧an ad jeļā m̧ool eo. Ak jet iien jej “bōjrak … ikōtaan ruo ļōmņak ,”1 kāālet n̄an “pio̧ ak bwil.”2 Ak bar jet iien jej ļoor ta eo epidodo, ron̄jake wōt juon ainikien ak jekjek eo jepād ie n̄an tōl kōj, ak kōjatdikdik eļap kōn maron̄ ko ad make n̄an ļōmņak.
Ilo an kajjojo wāween kein maron̄ jipan̄, iminene ej katakin kōj bwe rejjab jejjet aolep iien. Men eo ebun̄bun̄ ejjab jejjet aolep iien. Bōjrak ikōtaan ruo ļōmņak ejjeļo̧k tōprakin. Men ko epidodo ejjab aolep iien ej tōl n̄an men ko raorōk. Pedped wōt kōn juon ainikein ak jekjek eo jepād ie emaron̄ kadikļo̧k ad loļo̧kjeņ. Im kōjatdikdik wōt kōn ļōmņak ko ad make emaron̄ tōl kōj n̄an juon ļōmņak me eban jipan̄ kōj. Eļan̄n̄e jejjab mejmej karuo, ainikien ko rebōd remaron̄ kattoļo̧k kōj jān ad dāpdep wōt ilo gospel in n̄an jikin ko epen ļōn̄aj tōmak ko ad, im en̄jake eļapļo̧k jān ajimakeke, inepata, būromōj.
Ron̄jake Ainikien Eo Ebōd
In kwaļo̧k juon kōmeļeļe kōn ta meļeļein aō ba ilo aō kōjerbal juon waanjon̄ak im juon waanjon̄ak in jeje ko rekwojarjar. Ritallōn̄ toļ ro ekkā aer likūt bwe jon̄an utiej ko me rej ilōn̄lo̧k 8,000 meter ko “rekauwōtata” kōnke ilo jon̄an utiej kein, ejabwe oxygen n̄an emenono. Elōn̄ kauwōtata rōt in ilo mour in jetōb. Eļan̄n̄e jej joļo̧k eļap iien ilo jikin ko renana, jeban maron̄ ron̄ ainikien ko me rem̧m̧an me jej aikuji ilo mour in jetōb ko ad.
Ilo Bok in Mormon, jej riit kōn Korior, eo ekar mour kōn iminene rōt in. Ekar itok limoin kōn eļap bun̄bun̄ kōnke katak ko an rekar “rekāitoktok-limo n̄an ļōmņak an kanniōk.”3 Ekar ba bwe ro jinen im jemān im rikanaan ro rej katakin manit bwebwe ko kar ļōmi n̄an kōm̧m̧an jon̄an anemkwōj im dāpij jajeļo̧kjeņ.4 Ekar akwāāl bwe armej ro rej aikuj anemkwōj n̄an kōm̧m̧an jabdewōt ta eo rej kāālet kōnke kien ko rej n̄an bōbrae armej jān aer kōm̧m̧ani kōņaan ko aer.5 N̄an e, tōmak ilo Pinmuur eo an Jisōs Kraist ekar “tokjen kōļmenļo̧kjeņ ko rejabwe,” kar ejaak jān tōmak ilo juon eo me ekar jab pād laļ in kōnke jekar jab maron̄ loe.6
Korior ekar kōm̧m̧an eļap poktak kōn menin kar bōkļo̧k n̄an im̧aan riekajet eo eutiej im pris eo eutiej. Ijeņ, ekar jerkak “im kōnono naan ko reļļaaj,” kōnono ņae ritōl im akweļap kōn juon kōkaļļe. Juon kōkaļļe kar leļo̧k n̄ane. Kar im̧ōke bwe en jab kōnono. Innem Korior ekar kile bwe em̧ōj m̧oņe, im ej ļōmņak kōn m̧ool ko raorōk me ekar kakkuri, ekar būromōj, “Iaar jeļā iien otemjej bwe ewōr juon Anij.”7
Innem Korior ej un̄n̄ar kijen m̧ōn̄ā m̧ae raar jujuri ioon laļ ippān juon kurup an RiZoram.8 Eoon eo āliktata ilo bwebwenato eo an epād ie emeemļo̧kjeņ eo ealikkar: “Im āindein jej lo bwe devil ejjāmin naaj rejetake ro nejin ilo raan eo āliktata, a ej kaiur im iperļo̧k er laļļo̧k n̄an hell.”9
Ainikien eo Ejim̧we
Kōnke Jemedwōj Ilan̄ ekōņaan men ko rem̧m̧an n̄an kōj, Ej kōm̧m̧an bwe jen maron̄ ron̄ Ainikien. Eiten aolep iien, jej ron̄ Ainikien kōn im̧we ko litok jān Jetōb Kwojarjar. Jetōb Kwojarjar ej membōr eo kein kajilu an Doulul in Anij. Ej kam̧ool kōn Jemen im Nejin eo,10 eo kar jilkintok n̄an “katakin [kōj] aolep men ko,”11 im naaj “kwaļo̧k n̄an [kōj] aolep men ko [jej] aikuj kōm̧m̧ani.”12
Jetōb eo ej kōnono n̄an armej ro reoktak ilo wāween ko reoktak, im Emaron̄ kōnono n̄an ejja armej eo wōt ilo wāween ko reoktak ilo iien ko reoktak. Kōn menin, ekkatak kōn wāween ko me Ej kōnono n̄an kōj ej juon men eo jej kappukōte ilo mour ko ad. Jet iien, Ej kōnono ilo “ļōmņak eo [ad] im ilo [būruōd]”13 ilo juon ainikien edik ak ekajoor, deil “er n̄an … lowa tata.”14 Bar jet iien im̧we ko An rej “koobrak [ad] ļōmņak” ak “kanooj jiktok … ilo en̄jake ko [ad].”15 Bar jet iien buruōd enaaj “māāņāņ [ilowaad].”16 Ak bar jet iien, Enaaj koobrak ad kōn m̧ōņōņō, kōmeramļo̧k ad ļōmņak,17 ak bōktok aeņōm̧m̧an n̄an bōro ko ad me reinepata.18
Kappukot Ainikien
Jenaaj ron̄ ainikien Jemed ilo elōn̄ jikin ko. Jenaaj ron̄ n̄e jej jar, ekkatak jeje ko rekwojarjar, pād ilo iien jar, bōk koņaad ilo kōmeļeļe ko an ro retōmak, ak etal n̄an tampeļ. Ilo m̧ool, jenaaj loe ilo iien kweilo̧k in ilo wiiken in.
Rainin jej rejtake em̧m̧aan rein 15 āinwōt rikanaan ro, rilolo ro, im rikwaļo̧k revelesōn ro. Mour in jetōb ko aer im aer en̄jake ej leļo̧k n̄an er juon kōļmenļo̧kjeņ ejenoļo̧k me eļap ad aikuji. Enaan ko aer repidodo n̄an ron̄jaki im kōnono kaki ilo lukkuun alikkarin. Rej ba n̄an kōj ta eo Anij ekōņaan bwe jen jeļā, men̄e e ebun̄bun̄ ak ejjab.19
Kappukot Ainikien ilo juon iaan jikin kein em̧m̧an, ak kappukot e ilo elōn̄ iaaer eļapļo̧k an em̧m̧an. Im n̄e jej ron̄jake, jej aikuj ļoor tōl eo me em̧ōj letok. Rijilōk Jemes ekar ba, “A kom̧win ri kōm̧anm̧an naan eo, im jab ri ron̄jake wōt.”20 Im Būreejtōn Thomas S. Monson ekar katakin juon iien: “Jej lale. Jej kōttar. Jej ron̄jake ainikien edik im emera. N̄e ej kōnono, em̧m̧aan im kōrā ro rekapeel rej pokake.”21
N̄e Uwaak Erumūj An Itok
Jinoin jerbal in aō me itijem̧lo̧k kake, Sister Homer im n̄a kom̧ro kar kajjitōk n̄an ukōt jerbal eo am. Ilo iien eo, ekar āinwōt n̄e n̄an kom̧ro juon kāālet eo eļap. Jekar ekkatak, jekar jitlo̧k, im jekar jar, ak juon uwaak erumūj an itok. Āliktata, jekar kōm̧m̧ane juon kāālet im bun̄ m̧aanļo̧k. Ilo ad kōm̧m̧ane menin, jej en̄jake ad aenōm̧m̧an im ejjab to kom̧ro kar ekkatak bwe ekar juon iaan kāālet ko rem̧m̧an tata jekar kōm̧m̧ani.
Āinwōt juon tōprak, em̧ōj ad ekkatak bwe uwaak ko jet iien rerumūj aer itok. Menin emaron̄ kōnke ejjab juon iien ejejjet, kōnke juon uwaak eo ejjab menin aikuj, ak kōnke Anij ej lōke kōj n̄an kōm̧m̧ane jokālet ko ippād make. Elder Richard G. Scott ekar bar katakin kōj bwe jej aikuj kam̧m̧oolol kōn iien rōt kein im kar kōm̧m̧ani kallim̧ur in: “N̄e kwoj mour erreo im kāālet eo am̧ ej juon wōt ippān katak ko an Rilo̧mo̧o̧r im kwoj aikuj n̄an jerbal, wōnm̧aanļo̧k kōn ļōke. … Anij ejamin kōtļo̧k bwe kwon ļe ijuwee im̧aan ilo an ejjeļo̧k kakkōļ n̄an im̧we eok eļan̄n̄e kwar kōm̧m̧an juon kāālet ebōd.”22
Jej Aikuj Kāālet
Im kōn menin, jenaaj aikuj n̄an kāālet ewi wōt ilubwiljin ainikien ko reokkōtaktak, jenaaj pokake. Jenaaj ke ļoor ainikien ko jejjab ļōki me an laļ in, ak jenaaj ke kōm̧m̧an jerbal ko me remenin aikuj n̄an kōtļo̧k ainikien ko an Jemed n̄an tōl kōj ilo kāālōt ko ad im kōjparok kōj jān kauwōtata? Tiljek eļapļo̧k ilo ad kappukot Ainikien, epidodo ad maron̄ ron̄jake. Ejjab meļeļein bwe Ainikien ej ļapļo̧k ak bwe maron̄ ko ad n̄an ron̄jake em̧ōj an ļapļo̧k. Rilo̧mo̧o̧r ekar kallim̧ur bwe eļan̄n̄e jej “eo̧ron̄ naan in kain̄i ko [An], im wūjleptok lo̧jiln̄ier n̄an [An] kōkapilōklōk,” E “enaaj [letok] eļapļo̧k.”23 Ij kam̧ool bwe kallim̧ur in em̧ool—n̄an kōj kajjojo.
Epaakeļo̧k juon iiō em̧ootļo̧k, ekar jako būrator eo aō erūtto ilo juon itaak in wa. Ilo iiō ko jinoin an Jon rekar obrak kōn kallim̧ur im kōttōbar. Ak ke ej rūttoļo̧k, juon ānbwin erup im kōļmenļo̧kjeņ etarpok ekar kōm̧m̧an bwe mour eo an en pen. Ke ekar jab bōk kōmour eo me ekar kōjatdikdik ilo mour in, Jon ekar dim wōt ilo tōmak eo an, kapene bwe en niknik, jon̄an an maron̄, n̄an jem̧ļo̧kin.
Kiiō, ijeļā bwe Jon ekar jab wānōk, ak eto aō baj ļōmņak ta eo ekar kōm̧m̧an bwe en kijenmej im niknik. Elōn̄ ainikien ko rekar kūr e n̄an jikin kajirere eo, ak ekar kāālet bwe en jab etal. Ijjeļo̧kin, ekar kōm̧m̧an jon̄an an maron̄ n̄an dāpij mour eo an ilo gospel in. Ej leļo̧k aolepān mour eo an ijeņ kōnke ekar jeļā bwe enaaj kar ron̄ ainikien m̧aajta eo an ijeņ ej leļo̧k aolepān mour eo an ijeņ kōnke ekar jeļā bwe epād ijeņ bwe en maron̄ kar bōk katak.
Jem̧ļo̧k in
Ro jeiū im jatū, ilo juon laļ eobrak kōn ainikien ko rekapokpoko, Ij kam̧ool bwe Jemedwōj Ilan̄ ekar kōm̧m̧an bwe jen maron̄ ron̄ im ļoor Ainikien. Eļan̄n̄e jenaaj mour tiljek, E im Eo Nejin renaaj kwaļo̧k uwaak ko me jej pukoti, kajoor eo jej aikuji, im m̧ōņōņō eo kōj aolep jej ikdeleel kake. Ilo etan Jisōs Kraist, Amen.