Kajoor eo ej Rie Tōmak
Jān am̧ kajutak peim n̄an rejtake, kwoj kōm̧m̧ane juon kallim̧ur ippān Anij, eo n̄an rikarejar rein, ro kwonaaj rie er.
Elōn̄ iien em̧ōj aō ron̄ an ritōl ro an priesthood eo leļo̧k kam̧m̧oolol n̄an rie tōmak eo an ro rekar jerbal. Jān en̄jake in ej waļo̧k ilo ainikier, kwojeļā aer kam̧oolol em̧wilaļ im em̧ool. Kōttōbar eo aō rainin ej n̄an kwaļo̧k kam̧m̧oolol eo an Irooj kōn am̧ rie ro Rikarejeran ilo Kabun̄ in. Im ej barāinwōt n̄an rōjan̄ eok n̄an kōjerbal im kaddōkļo̧k kajoor in n̄an rie ro jet ilo tōmak eo am̧.
M̧okta jān am̧ kar ļotak, kwaar kwaļo̧k kajoor in. Ļōmņak likļo̧k n̄an ta eo jej jeļā kōn laļ eo an jetōb m̧okta jān an kar ļotak. Jemedwōj Ilan̄ ekar kwaļo̧k juon karōk n̄an ajri ro Nejin. Kōm kar pād ijōņ. Lucifer, jetōb eo jeid, ekar jum̧ae karōk eo me enej kar kanemkwoj kōj n̄an kālet. Jeova, Jitōn Bōro Nejin Jemedwōj Ilan̄, ekar rie karōk eo. Lucifer ekar tōl juon jum̧ae. Jeova ekar rie ainikien anjo̧, im Ekar paļentiir n̄an erom̧ ad Rilo̧mo̧o̧r.
M̧ool eo bwe kwoj pād ilo mour in kiiō ej kwaļo̧k ke kwaar rie Jemād im Rilo̧mo̧o̧r eo. Ekar bōk tōmak ilo Jisōs Kraist n̄an rie karōk in m̧ōņōņō eo im eddo eo an Jisōs Kraist ilo karōk eo ke ekar jidik wōt am̧ jeļā kōn nej apan̄ ko kwonaaj jelm̧ai ilo mour in.
Tōmak eo am̧ n̄an rie ro rikarejeran Anij ekar men eo enaaj lewaj m̧ōņōņō n̄an būruwōm̧ ilo mour in. Ke kwaar uwaake kajjitōk eo an mijenede ro n̄an jar n̄an jeļā bwe Bok in Mormon eo ekar naan an Anij, tōmak eo ekar pād ippem̧ n̄an rie juon rikarejeran Irooj. Ke kwaar bōk kajjitōk eo n̄an peptaij, kwaar rie juon karejeran Anij ettā.
Ke kwaar kōtļo̧k an juon armej likūt pā ko pein ion bōram̧ im ba, “Bōk Jetōb Kwojarjar,” kwaar rie e āinwōt juon rikabwijer Melkisedek Priesthood eo.
Jān raan eo, kwaar, kōn tiljek jerbal, rie kajjojo armej ro rekar lewaj ioom̧ priesthood eo im ro kajjojo rekar kapit eok n̄an juon opiij ilo priesthood eo.
Ilo en̄jake ko am̧ m̧okta ilo priesthood eo, kajjojo rie ekar juon m̧akūtkūt eļam̧ waan ilo lōke juon rikarejar an Anij. Kiiō, elōn̄ iaam̧i em̧ōj aer wanlōn̄ļo̧k n̄an juon jikin eo me rie ej aikuji eļapļo̧k.
Kwoj kālet men̄e n̄an rie aolep ro me Irooj ej kūr er—ilo jabdewōt kūr Irooj ekar kūr er n̄ani. Kālet in ej waļo̧k ilo kweilo̧k ko reļļap aolepān laļ in. Ekar waļo̧k ilo iien in. Ilo kain kweilo̧k kein, etan em̧m̧aan im kōrā ro—rikarejar ro an Anij—rej riiti, im kajjitōk ippem̧ n̄an kajutak pein n̄an rie. Komaron̄ m̧akoko in kwaļo̧k bout in rie eo am̧, ak kallim̧ur n̄an rie tōmak eo am̧. Ilo am̧ kotak peim̧ n̄an rie, kwoj kōm̧m̧ane juon kallim̧ur. Kwoj kōm̧m̧ane juon kallim̧ur ippān Anij, eo n̄an rikarejar rein, ro kwonaaj rie er.
Armej rein rejjab wānōk, āinwōt kwe. Kōjparok kallim̧ur ko am̧ enaaj aikuji tōmak eo epen bwe Irooj ekar kūr er. Kōjparok kallim̧ur kein renaaj barāinwōt bōktok m̧ōņōņō n̄an indeeo. Jab kōjparoki renaaj bōktok būrum̧ōj n̄an kwe im ro kwoj iakwe er—im aaet luuji kajoor eo eļap jān jon̄an am̧ ļōmņake.
Maron̄ in kar kajjitōk ippam̧, ak naaj kajjitōk ippam̧, men̄e kwoj rie bisop eo am̧, stake būreejtōn eo, Ritōl ro Routiej, im Opiija ro Routiej an Kabun̄ in. Emaron̄ waļo̧k n̄e kajjitōk ippem̧ n̄an rie opiija ro im ritōl ro ilo juon kweilo̧k eļap. Jet iien enaaj ilo juon intōrpiu ippān juon bisop ak stake būreejtōn.
Ko̧o̧njeļ eo aō ej bwe kwōn kajjitōk kajjitōk ko ippem̧ make m̧okta kōn tiljek im lukkuun jar. Ilo am̧ kōm̧m̧an āindein, komaron̄ kōļmenļo̧kjeņ kōn ļōmņak ko am̧ kiiō, naan ko, im kōm̧m̧an ko. Kajjieon̄ keememej im ejaake uwaak ko kwonaaj liļo̧k n̄e Irooj enaaj intōrpiuik eok, jeļā bwe juon raan Enaaj. Komaron̄ m̧aanjabpopo ilo am̧ kajjitōk ippem make kajjitōk ko rej āinwōt:
-
Inan̄in ke ļōmņak ak kōnono kōn m̧ōjņo̧ ko an armej ippān armej ro ikar kallim̧ur n̄an rejtake?
-
Inan̄in ke kappukote juon kein kam̧ool ej kwaļo̧k ke Irooj ej tōl er?
-
Ikar ke en̄jake eddo eo im kautiej ļoor tōl eo aer?
-
Inan̄in ke kōnono kōn m̧ool eo imaron̄ loe ke er rej rikarejar ro an Anij?
-
Inan̄in ke jar kōn er aolep iien kōn etāer im kōn en̄jake in iakwe?
Kajjitōk kein renaaj, n̄an elōn̄ wōt iaad wōj, tōl n̄an jet en̄jake in inepata im aikuj eo n̄an ukweļo̧k. Anij ekar kakien kōj n̄an jab ekajet ro jet ilo jab jim̧we, ak ilo kōm̧m̧an, jej loe menin epen n̄an kōjekdo̧o̧ne. Enan̄in aolep men ko jej kōm̧m̧ani ippān armej ro rej tōlļo̧k n̄an etale er. Im ilo aolep wāween ko ilo mour ko ad, jej keidi kōj make ippān ro jet. Jemaron̄ kōm̧m̧an āindein kōn elōn̄ un ko, jet iaer ewōr unin, ak emakijkij an tōl kōj n̄an jab errā.
Būreejtōn George Q. Cannon ekar letok juon kakkōļ eo ij jakewaj n̄an kom̧ āinwōt eo aō make. Ij tōmak ekar kōnono kōn m̧ool eo: “Anij ekar kālet rikarejar ro An. Ej watōke āinwōt jim̧we eo An n̄an kakkure er, eļan̄n̄e rej aikuj in kakkure. Ejjan̄in letok menin n̄an kōj kajjojo n̄an kōnanaiki im kakkure er. Ejjeļo̧k juon armej, jekdo̧o̧n n̄e emaron̄ pād ilo tōmak eo, jekdo̧o̧n uteej in ilo Priesthood eo, emaron̄ kōnono nana kōn eo Irooj ekar kapit e im pukot ruwōn ippān ritōl ro routiej an Anij ioon laļ in ilo an jab kōm̧m̧an An jab m̧ōņōņō. Jetōb Kwojarjar eo enaaj em̧m̧akūt jān e jān armej eo, im enaaj etal ilo maroklep. Ilo jekjek in, kwoj ke loe an lukkuun aorōk bwe jen lukkuun tiljek?”1
Ekkatak eo aō ej bwe ro uwaan Kabun̄ in ipeļaakin laļ in rej m̧ool n̄an doon im ro otemjej rej tōl ioer. Ewōr, ijoke, kōkōm̧anm̧anļo̧k ko jemaron̄ im aikuj kōm̧m̧ani. Jemaron̄ ļōn̄jak kōn kajoor eo ad n̄an rejtake ro jet. Enaaj bōk tōmak im kijejeto. Erkein emān iaan elmakot ko ij kōm̧m̧ani n̄an kōj bwe jen m̧akūtkūt kake ilo kweilo̧k in.
-
Jemaron̄ kalikkar kajjojo m̧akūtkūt ko rikōnono ro rej ļōm̧aki tok im jino rainin n̄an kōm̧m̧ani. Ilo ad kōm̧m̧an āindein, kajoor eo ad n̄an rejtake er enaaj ļapļo̧k.
-
Jemaron̄ jar kōn er ilo aer kōnono bwe Jetōb Kwojarjar eo enaaj bōkļo̧k naan ko aer n̄an būruwōn kajjojo armej ro jej iakwe er. N̄e jej jeļā tokālik bwe jar ko ad rekar uwaak, kajoor eo ad n̄an rejtake ritōl ro ad enaaj ļapļo̧k.
-
Jemaron̄ jar bwe kajjojo rikōnono renaaj jeraam̧m̧an im kakūrm̧ool ilo aer letok ennaan ko aer. N̄e jej loe bwe rekar kakūrm̧oole, jenaaj eddōkļo̧k ilo tōmak eo ad n̄an rejtake er, im enaaj niknik.
-
Jemaron̄ ron̄jake ennaan ko jān rikōnono ro rej itok āinwōt juon uwaak n̄an jar ko ad make n̄an jipan̄. N̄e uwaak ko rej itok, im er renaaj, jenaaj eddōkļo̧k ilo tōmak n̄an rejtake aolep rikarejar ro an Irooj.
Ilo kakkobaba n̄an kōkōm̧anm̧anļo̧k rejtake ro rej jerbal ilo Kabun̄ in, jenaaj ekkatak bwe ejjeļo̧k juon jon̄ak eo me jemaron̄ kōļapļo̧k kain kajoor in. Ijeņ, emaron̄ bōktok eļapļo̧k kōjeraam̧m̧an n̄an kōj. Ej ilo m̧weo im baam̧le eo.
Ij kōnono n̄an kom̧ rikabwijer priesthood ro reddik ro rej jokwe ilo m̧weo ippān jeme. In ba n̄an kom̧ jān en̄jake eo aō make ta meļeļein an juon baba en̄jake tōmak in rejtake eo am̧. Emaron̄ kalimjōk eok kōn lōke. Ak eļapļo̧k an jelm̧ae eļapļo̧k apan̄ ko jān am̧ maron̄ jeļā. Ilo iien eo emaron̄ jab loe iaļ eo kōn elōn̄ jorrāān ko rej pād im̧aan mejān.
Am̧ kile e enaaj jipan̄ e jet. Am̧ iakwe n̄an e enaaj jipan̄ e eļapļo̧k. Ak men ko me renaaj jipan̄ eo eļaptata ej naan ko rem̧ool āinwōt kein: “Baba, ikar jar kōn eok, im ikar en̄jake bwe Irooj enej jipan̄ eok. Men otemjej renaaj jerbal. Ijeļā enaaj.”
Kain naan kein ewōr aer barāinwōt kajoor ilo wāween tōl eo juon, jemān n̄an nejin. N̄e juon ļaddik ewōr juon an bōd eļap, bōlen ilo men ko ilo jetōb, emaron̄ en̄jake bwe ekar likjab. Āinwōt jemān, ilo iien ņe, kwoj bwilōn̄ n̄e, ālkin am̧ jar n̄an jeļā ta n̄an kōm̧m̧ane, Jetōb Kwojarjar eo enej likūt naan kein ilo lo̧n̄iim̧: “Nejū, ij pād ippam̧ n̄an jem̧ļo̧kin. Irooj ej iakwe eok. Kōn jipan̄ in An, komaron̄ bar kōro̧o̧lļo̧k. Ijeļā bwe komaron̄ im kwonaaj. Ij iakwe eok, M̧am̧a.”
Ilo doulul eo an priesthood eo im ilo baam̧le eo, kōļapļo̧k tōmak n̄an rie kajjojo ej wāween eo jej kalōk Zaion eo Irooj ekōņaan bwe jen ejaake. Kōn jipan̄ eo An jemaron̄ im jenaaj. Enaaj bōk ekkatak n̄an iakwe Irooj kōn aolepān būruwōd, maron̄, ļōmņak, im kajoor im n̄an iakwe ro jet āinwōt ad iakwe kōj make.
Ilo ad eddōkļo̧k ilo iakwe eo erreo an Kraist, būruwōd ej meraļo̧k. Bwe iakwe in enaaj kōttāik kōj im tōļļo̧k kōj n̄an ukweļo̧k. Lōke eo ad ilo Irooj im ilo ro jet enaaj eddōkļo̧k. Innām jenaaj em̧m̧akūt m̧aanļo̧k erom̧ juon wōt, āinwōt an Irooj kallim̧ur bwe jemaron̄.2
Ij kam̧ool bwe Jemedwōj Ilan̄ ejeļā im ej iakwe kom̧. Jisōs ej Kraist eo emour. En̄in ej Kabun̄ eo An. Jej kabwijer priesthood eo An. Enaaj kautiej kijejeto ko ad n̄an eddōkļo̧k ilo ad kajoor n̄an kōjerbale im rejtake doon. Ij kōm̧m̧ane āindein ilo etan ekwojarjar Jisōs Kraist, amen.